亂皂𥴊仔店 ⓂⒺⒾⓃⓀⒾⓄⓈⓀ

(2023.05.28 早起頓 希臘紅菜盒 + 螺絲麵 + 果子優格/1137kcal)

歷史是一篇 hōo 研究者揀選出來 ê 世說新語。

物食是按這个土地生湠佮看 tsiâ 較有才調佮耐性將伊四處湠。

恁講 gún 正宗，我家己 mā 無確定。

起因，我捷捷 teh 思考，領土 ê 定義 m̄ 是講倚恁彼搭就是恁--ê，是按怎我倚 TR 遐爾仔倚，Zypern 倚 TR 遐爾仔遠，GR 佮 TR 攏講 Zypern 是𪜶-ê，雖罔現此時 ê Zypern 有一半是國家，總是遮 ê 問題 tī 未來又閣 ē 成做啥物款生張咱 m̄ 知影，因為未來 ê 故事原仔 m̄ 是咱遮 ê 平凡人所編寫。

我真慣勢別人 kā 我當做中國人來看待。

起因，𪜶讀 ê 歷史就敢若我讀 ê 歷史，世界 kan-na 一个生張，一个美麗。

Sóo-tí 當我搪著這位厝內窗仔門一拍開隨看著 Türkiye ê 同學按呢回答遐 ê 世界就是我所講佮認為 ê 人𪜶 ê 應話 hōo 我感覺伊該當 mā 搪著佮我相𫝛 ê 問題。

不而過，伊並無搪著佮我相𫝛 ê 問題，伊只是 tuì 伊讀 ê 智識感覺好玄，紲落來沓沓仔成做家己 ê Αριστοτέλης(Aristoteles)。

「成做 Νάρκισσος(Narziss) mā buē 䆀，總是按呢 ê 四常傷過白汫無味」

第一擺知影希臘 ê 領土 tshan-tshiūnn 金門、馬祖按呢是佮 gún 翁做陣去小金門行跤花，翁徛踮 Bunker 按指示方向看向中國大陸講「Türkiye mā 一直講希臘遐倚𪜶地區 ê 島攏是𪜶--ê。」

落尾手有機會搪著蹛踮遮 hōo Türkiye 講𪜶是佮 Türkiye 泅 tī 仝一帕水欶仝一塊衣(ui)臍帶閣相連 ê 同學，伊 ê 分張 hōo 我想著咱 ê 番薯島，總是咱番薯島人較無伊這款無確定 ê 確定，伊準做無確定家己是希臘人抑是 Türkiye 人，伊卻非常確定伊是這 hōo 這塊土地飼晟養大漢 ê 人，這塊土地號做希臘。

伊 ê 態度 mā hōo 我想著敍利亞朋友 ê 分張，𪜶學習 ê 歷史 kan-ta Osmanlı 500 外冬 ê 歷史，總是歷史行過 ê 跤步 m̄ 是 kan-ta Osmanlı 猶閣有 tsuē-tsuē 課本讀 buē 著 ê 有聲智識，只不過遮 ê 踮課本聽 buē 著 ê 聲音 tī 網路猶未遐爾仔發達進前，伊就敢若 The Last King ê 這幕，你認為死無透 ê 人閣 kā 𠞭一刀，伊就 ē 死甲連血跡攏揣無 ê 痕跡，總是人 ê 記持就敢若一粒麥仔，伊 buē 永遠是你眼前 ê 這粒麥仔，準做你認為你已經 kā 伊基因改良。

「Gún-ê 歷史 m̄ 是 kan-na 這 500 外冬」因為戰亂𤆬某囝怙11路到德國 ê 敍利亞朋友講，伊 ê gún-ê 歷史 mā 是課本 500 外冬佮讀 ê 著 ê 資料，引𤆬我敨放雙目敢若 mā kan-na ē 曉囥踮400冬彼搭 ê 慣勢。

歷史是相拍雞仔 ê 勝利者 tsiah 有底決定抑是時間？

我 m̄ 知影，總是我清楚知影我愛 tī 家己短短 ê 年間不時提醒家己，千萬 m̄ 通成做 tī Epidaurus 聽著 ê 這句話「恁 ê 歷史實在是太不可思議，gún-ê 歷史 tsham 恁無法得比並」ê 狹目。

歷史 ê 闊度佮複雜 tsham 咱人 ê 思考相𫝛，總是，歷史 mā 清楚 kā 咱人類講，我從來 m̄ 捌纏綴恁人類孤一味 ê 喙斗 teh 生湠，準做恁掠做我已經滅絕甲連一隻蠓仔攏揣 buē 著，我猶是四界生湠 hōo 恁捎無摠。

Tshan-tshiūnn 智識無夠額 ê 我 tī България(Bulgaria)見著 Thraker 出土 ê 雕刻隨想著十六八重表菊佮印度北部 ê 建築。

我是平凡人無可能成做 Αριστοτέλης，總是我 ē-tàng 延續伊 ê 精神，tuì 萬物好奇、憢疑最後成就家己 ê 肥底，tshan-tshiūnn 按希臘同學遐學來 ê Moussaka。

希臘紅菜盒

...... 材料 ......

美國茄，切片　3

蒜頭，刴幼　

洋蔥，刴幼　1

挽肉　250g

滾水　400ml

Kam-má-tooh，切塊　3

Tshì-sù　100g

番薑仔粉　1TL

芳料草

鹽、胡椒

...... 步數 ......

1. 圓茄捊寡鹽等半點鐘。

2. 洋蔥、蒜頭落鼎芡芳，kam-má-tooh、挽肉濫落去炒熟。

3. 落番薑仔粉、芳料草、滾水、鹽、胡椒抐 hōo 齊，煮20分鐘。

4. 美國茄、挽肉落烘瓷，Tshì-sù 鋪落去，落烘箱捘200度烘45分鐘，樂暢來食。

(28.05.2023 Frühstück Moussaka - Fusilli - Joghurt mit Frucht/1137kcal)

Mein Moussaka war nicht so original wie aus Griechenland.

Was ist original, was nicht?

Ich weiß nicht.

Aber, wichtig ist ich brauche nicht um das Gewicht sorgen konnte und das Gericht genießen.

Ja, die Idee von Moussaka habe ich von meinem Freund aus Griechenland gelernt.

Moussaka

...... Zutaten ......

Auberginen in Scheiben schneiden　3

Fein gehackter Knoblauch　

Fein gehackte Zwiebel　1

Hackfleisch　250g

Wasser　400ml

Tomaten in Stücke geschnitten　3

Käse　100g

Paprikapulver　1TL

Kräuter

Salz ＆ Pfeffer

...... Zubereitung ......

1. Aubergine mit Salz bestreuen, etwa 10~15 Minuten ziehen lassen.  Dann das ausgetretene Wasser abschütten und das Salz mit einem Küchenpapier entfernen.

2. Zwiebel und Knoblauch in die Pfanne geben und anbraten bis sie goldbraun sind. Tomaten mit Hackfleisch dazu geben und kurz verquirlen, dann das Wasser zum kochen bringen bis die Tomaten weich sind.

3. Paprikapulver mit Kräuter, Salz und Pfeffer in die Pfanne geben und kurz verquirlen.

4. Auberginen mit Hackfleisch in eine ofenfeste Schale legen, mit Käse bestreuen. Dann im Ofen bei 200 °C 45 Minuten backen. Guten Appetit!

 (28.05.2023 Breakfast Moussaka - Fusilli - Yoghurt with fruit/1137kcal)

My moussaka was not as original as from Greece.

What is original, what is not?

I don't know.

But, importantly I don't need to worry about the weight and could enjoy the dish.

Yes, I learned the idea of moussaka from my friend in Greece.

Moussaka

...... Ingredients ......

Aubergines cut into slice　3

Finely chopped garlic　

Finely chopped onion　1

Minced meat　250g

Water　400ml

Tomatoes cut into pieces　3

Cheese　100g

Paprika powder　1TL

Herbs

Salt＆ Pepper

...... Method ......

1. Sprinkle the aubergine with salt and leave to soak for about 10~15 minutes.  Then pour off the water and remove the salt with a paper towel.

2. Add the onion and garlic to the pan and fry until golden brown. Add the tomatoes with the minced meat and whisk briefly, then bring the water to the boil until the tomatoes are soft.

3. Add the paprika powder with the herbs, salt and pepper to the pan and whisk briefly.

4. Place the aubergines with minced meat in an ovenproof dish, sprinkle with cheese. Then bake in the oven at 200 °C for 45 minutes. Enjoy your meal!