亂皂𥴊仔店 ⓂⒺⒾⓃⓀⒾⓄⓈⓀ

(2024.04.14 早起頓 三文魚菜蔬白鳳豆 + 俗麭 + 優格/936kcal)

Tī Google 猶末通知我 ê 資料庫 ē 按亞洲中心徙到歐洲中心 ê Ireland tī 華文推薦讀著一篇真有意思 ê 文章 - 你 tī Starbucks 手機仔隨出現 Starbucks 相關 ê 臆你佮意是 m̄ 是 Google teh kā 你監視？

我 tuì 電子科技無一个認捌 mā m̄ 捌愖過這个問題，讀煞這篇文章我又閣成做貓開始斟酌看家己 ê 手機。

拄按臺灣徙來德國 ê 手機是彼款揤 Google tsiah 有法度揣資料 ê Asus，伊 m̄ 捌出現這个問題，所以當食鹹 mā 掛鹹一个錢拍二十四个結 ê 翁冇手 kā 我換 Nokia 我猶是 m̄ 捌張持這个問題，一直到讀著這篇文章，我 tsiah 斟酌綴 leh 觀察新手機仔 ê 世界。

我已經 buē 記得彼篇文章按怎討論這个問題 mā 無興 uī 伊繼續跍踮 Google 撈魚，總是我非常確定這件代誌 tī Google 猶末通知我 ê 資料庫 ē 徙位進前，我 ê Nokia 捷捷出現華文文章，自收著通知遮 ê 華文文章 m̄ 捌閣出現，準做我猶是逐日固定踅臺灣電子報，Google m̄ 捌「臆我佮意」m̄-koh 有按 YouTube 遐連結推薦，像 ió-gà, Pilates 遮 ê 文章推薦，不過 mā m̄ 是齊是遮 ê 文章，推薦百百樣，這 m̄ 知佮我無 teh 使用社群媒體像 Meta 遮 ê 敢有相關？

 劉靜娟女仕 tī《落西北雨的下晡》 〈 無愛予伊知影我咧想啥〉寫著上網路搜揣烘碗機，紲落來踅到佗見到佗，其中寫著  Meta(面冊) hōo 我成做一隻貓，我較無行到佗齊是 ió-gà, Pilates 遮 ê 問題敢是我無 teh 使用 Meta 佮伊生湠出來 ê 社群有關係？

毋知，m̄ 知，Keine Anhnung, No idea, Je ne sais pas, No se, Non lo so, わからない!!!

總是歐盟規定 ê 網路隱私政策確實比臺灣保守，我熟似 ê 德國人 mā 真罕得使用社群媒體，加加使用 What's APP 這項，總是 m̄ 是逐个德國人攏按呢生，這个現象 kan-ta 適合我 ê 箍仔。

我個人是無反對隨機推薦，起因我個人捷因為遮 ê 隨機推薦得著 tsuē-tsuē 新智識，像這出菜，行踏西班牙 tsuē-tsuē 斗到今猶 m̄ 捌行踏 ê Basque 菜色。

我 m̄ 知影德國人看電視 ê 慣勢，sóo-tí 無法度確定德國公共電視台敢有佮 Google 合作，起因我有機會認捌這出菜是跟綴德國公共電視台行踏 Basque 煞戲後隨生湠 ê 智識，電視 ê Basque 拄離開，手機仔 ê Basque 隨來挨拶，紮 ê 伴手閣佮電視無宛 2 體，是講昨昏 mā 跟綴公共電視台踅瑞典觀光景點，節目一煞鼓到今我 ê 手機仔猶無出現任何一篇佮瑞典有相關 ê 報導，這 m̄ 知敢佮收視率有相干？

起因，Basque 彼集是 WDR Wunderschön，瑞典這集是整合捌報導 ê 瑞典成做一集，其中 mā 有 Wunderschön ê Pippi Långstrump 遊樂園 - Astrid Lindgren Theme Park 遮 ê 推薦是按怎運動，正經 hōo 我㨨無一絲線，不過 es mir egal，今年車日子露營 ê 角勢就是瑞典，時到就有閣較 tsuē 機會認捌瑞典 ê 大小事，特別是原味 ê Kanelbulle 肉桂捲。

跟綴 Wunderschön 行踏 Basque 煞，手機仔隨出現「臆我佮意」，我越頭問 Castellano 講甲連祖先攏跟綴 buē 著 ê 翁「這臆我佮意敢正經是 Basque 料理？」

「是，Basque 除了食魚 mā 食足 tsuē 豆，像電視紹介按呢」翁應。

有人生有十外冬攏種 tī 西班牙，tuì 西班牙歷史 mā 佮我有𫝛款症頭 ê 臺灣歷史，m̄ 捌，中國歷史，捌淡薄仔 ê 翁伊 ê 保證，隨綴 leh 出菜，正經好食甲 hōo 𪜶老母成做茶鈷，是按怎我出 ê 白鳳豆伊 m̄ 食，西班牙人出 ê 白鳳豆伊食了了。

翁𪜶老母 ê 故事閣熥落去，m̄ 免照鏡，我隨感覺家己橫肉面，不過我猶是佮意佮翁耍這項「Gún 後生真歹奉待，伊食西班牙 ê 豆仔 m̄ 食我出 ê 豆仔。」

「你家己 mā 捌講過，若 m̄ 是你愛食豆仔，你腹肚閣較枵 mā buē 食伊一喙」翁隨紲喙。

確實，若 m̄ 是無地選擇，𪜶老母出 ê 菜無一項合我脾土，不過 mā m̄ 是 kan-ta 我一个人有這个問題。

「這隻影片真有 14 你敢 bueh 看？」

「Das Essen macht mich angespannt, aber ich habe Schwein gehabt」翁看煞 Opened ｜Animated Short Film 2022｜CommDe 分張伊 ê 感想。

「我 mā 按呢認為，因為彼个美麗 ê 結尾 buē 出現 tī 你兜。」

「M̄-koh 咱兜」翁若牛目瞇甲若頂月眉(bâi)繼續那食伊上慼 ê 敵人(番薑仔佮敏豆)那講。

Die Ernährungs-Docs-Essen als Medizin 有一集討論囡仔喙白問題，受訪 ê 囡仔分張伊喙白 ê 因端「Das Essen macht mich angespannt」食糜飯是一件痛苦 ê 代誌。

感謝各位我 m̄ 捌 ê 葡萄牙佮西班牙媽媽，無恁 ê 鬥相共，我相信 gún 翁 ê 喙白是無藥醫 ê 絕症。

「我囡仔時上佮意 ê 糜飯是去葡萄牙奶母遐抑是西班牙學校 ê 中晝頓，我 mā 佮意去同學𪜶兜𨑨迌順紲 hōo 𪜶阿媽抑是媽媽飼 ê 味素」翁講。

原食譜 kan-ta 豆佮菜蔬，我順彼日跟綴 Wunderschön 見來 ê 畫面添寡三文魚做伙食，畢竟德國 ê 三文魚比歐洲塗水蚶(Thôo-tsuí-ham/Miesmuschln)較好來往。

歐洲塗水蚶佮蝦仔攏是金仔鞏--ê，我 ê 14 是新沢 m̄ 是冷凍。

白鳳豆菜蔬炒

...... 材料 ......

罐頭白鳳豆　1

敏豆，切橛　300g

洋蔥，切幼　1

三文魚　200g

滾水　600g

Kam-má-tooh，切塊　2

番薑仔，切片　1

番薑仔粉　1TL

蒜頭，刴幼

薑，礤簽

芳料草

鹽、胡椒

...... 步數 ......

1. 三文魚落鼎煎 hōo 赤赤，挈出來。

2. 洋蔥、蒜頭、薑落鼎炒芳，Kam-má-tooh、敏豆、番薑仔、芳料草、番薑仔粉摻落去炒軟，滾水摻落去煮 10 分鐘。

3. 白鳳豆濫落去煮 5 分鐘，tiàu 寡鹽、胡椒，三文魚鋪落去，樂暢來食。

(14.04.2024 Frühstück Riesenbohnen mit Lachs und Gemüse - Toastbrot - Joghurt/936kcal)

Ich habe kein Facebook usw, und ich kenne Spanisches Essen nicht, außer Paella und ich habe das Rezept aus Spanien nie gesucht, nach dem Wunderschön aus WDR gucken, mein Handy zeigte mir das Rezept aus dem Baskenland.

Ja, genau wie Wunderschön!!!

Mann!!! Was ist denn los?

Deutsches Fernsehen weißt was ich gucke im Fernsehen?

Ich weiß, wer hat YouTube oder Meta benutzt, hat das Problem für immer.

Die Menschen fühlen Google hat sie schon ausspioniert.

Aber, ich habe keine Social Media, warum? Perché? Por qué?

Ich bin so neugierig, aber ich habe leider keine Kenntnisse über die Technologie, aber das ist kein Problem für mich...., denn in diesem Fall ist das nicht so schlimm.

Wegen dem Problem habe ich neues Rezept bekommen und lecker!!!

Riesenbohnen mit Lachs und Gemüse

...... Zutaten ......

Riesenbohnen aus der Dose　1

Grüne Bohnen in Stücke geschnitten　300g

Fein gehackte Zwiebel　1

Lachs　200g

Wasser　600g

Tomaten in Stücke geschnitten　2

Paprika in Stücke geschnitten　1

Paprikapulver　1TL

Fein gehackter Knoblauch

Geraspelter Ingwer

Kräuter

Salz ＆ Pfeffer

...... Zubereitung ......

1. Lachs in die Pfanne geben und anbraten bis sie gold braun ist, dann rausnehmen.

2. Zwiebel mit Knoblauch und Ingwer in die Pfanne geben und anbraten bis sie goldbraun ist, Tomaten mit Grüne Bohnen, Paprika, Paprikapulver, Kräuter dazu geben und anbraten bis sie weich sind.

3. Wasser dazugeben und gut mischung, dann ca. 10 Minuten kochen. 

4. Riesenbohnen mit Salz und Pfeffer dazugeben und ca. 5 Minuten kochen. 

5. Lachs dazugeben. Guten Appetit!

(14.04.2024 Breakfast Salmon Vegetables and Jack Beans -Toast - Yogurt/936kcal)

I don't have Facebook and so on, and I don't know Spanish food, except paella and I never looked for the recipe from Spain, after watching Wunderschön from WDR, my cell phone showed me the recipe from the Basque.

Yes, just like the TV-Show Wunderschön !!!

What's going on!!!

German television know what I watch on television?

I know, whoever used YouTube or Meta has the problem forever.

People feel Google has already spied on them.

But, I don't have social media, why? Perché? Por qué?

I'm so curious, but unfortunately I have no knowledge of the technology, but that's not a problem for me...., because in this case it's not so bad.

Because of the problem I got new recipe and yummy!!!

Salmon Vegetables and Jack Beans

...... Ingredients ......

Canned Jack beans　1

Green beans cut into pieces　300g

Finely chopped onion　1

Salmon　200g

Water　600g

Tomato cut into pieces　2

Bell pepper cut into pieces　1

Smoked paprika　1TL

Finely chopped garlic

Grated ginger

Herbs

Salt ＆ Pepper

...... Method ......

1. Put the salmon in the pan and fry until it is gold brown, then remove it.

2. Put the onion with garlic and ginger in the pan and fry until it is golden brown, add tomatoes with green beans, paprika, paprika powder, herbs and fry until they are soft.

3. Add the water and have a good mix, then cook for about 10 minutes.

4. Add the jack beans with salt and pepper and cook for about 5 minutes.

5. Add salmon. Enjoy your meal!