亂皂𥴊仔店 ⓂⒺⒾⓃⓀⒾⓄⓈⓀ

(2023.01.02 早起頓 番薯 Frittata + 白花仔菜烘 + 時計果優格/854kcal)

Gún 翁某 tuì 白花仔菜有無𫝛款 ê 記持，m̄-koh 有相𫝛 ê 脾土攏無意愛。

不過，聽過 gún 翁 ê 分享，我發現 gún 媽媽料理白花仔菜 ê 方式無問題，有問題 ê 是我。

Gún 媽媽在生時攏 ē 講，有啥物物食 ē-sái hōo 姑娘仔你 buē 嫌伊無臭塗味佮臭羶味？

Tī 臺灣食吳郭魚嫌臭塗味重，踮德國食三文魚我 mā 嫌臭塗味重...

Tī 臺灣食羊肉嫌羊肉臭羶味重，踮德國食綿羊肉我 mā 嫌綿羊肉臭羶味重...

我真𠢕嫌物件有問題，m̄-koh 我又閣足食遮 ê 物。

O͘h...難忘 tī 波士尼亞食著 ê 烘羊肉，難忘 tī 斯洛維尼亞食著 ê 烘奶豬仔等等...

寫到遮抑是愛講，m̄ 是 gún 拄著 ê 物件無好食是 gún 頇顢揣著適合家己 ê 喙斗 tshan-tshiūnn 白花仔菜𫝛款。

囡仔時，gún 媽媽慣勢 kā 白花仔菜用油小可炒一下，紲落來用水 kā 伊翕甲軟軟軟才食。

按呢 ê 料理方式是 ē-tàng hōo 硬扦 ê 白花仔菜變較軟，m̄-koh 伊 ē 有一款 Gá-suh 味...

Gún 大家伊料理白花仔菜 ê 方式 tsham gún 媽媽料理 ê 方式並無啥物無相𫝛，不而過 gún大家 ê 白花仔菜是 hōo 我想 bueh kā 伊挈來喙邊聿一下攏 buē...

Gún 大家是 kā 規蕊 ê 白花仔菜囥入去滾水煠甲軟 tsiah 挈出來切做一蕊一蕊然後掜鹽佮肉桂粉。

葫蘆墩 ê 白米，無糙(無錯)，我無寫 m̄ 著伊就是按呢料理白花仔菜。

我捌 iōng 這款心情來看待白花仔菜 -- 伊是白花仔菜乾 ~ 肉桂粉 hōo 白花仔菜看起來 mā 成白花仔菜乾。

總是，m̄ 管伊較按怎成白花仔菜乾，伊原仔 m̄ 是白花仔菜乾，tshan-tshiūnn 阿婆掠做 kā 白頭鬃染黑就 ē-tàng 成做少女按呢。

不過，ti 遮決定愛引用 gún 翁 ê 形容 tsiah 有法度知影伊老母 ê 手藝偌爾仔讚「Die Wüste in meinem Mund das Wasser sucht」(沙漠 tī 我 ê 喙走揣水源)。

歸結，白花仔菜自我開始扞灶開始伊 m̄ 捌出現 tī 我 ê 菜單，一直到 gún 搪著這份食譜 tsiah tuì 伊略略仔 ê 改變，紲落來成做 gún 大聲喝「Wir lieben Blumenkhol」(gún ài 白花仔菜)。

白花仔菜烘

...... 材料 ......

白花仔菜，剺蕊　1

油　6EL

カレー粉　1TL

鬱金粉　1/2TL

蒜頭，刴幼　2

番薑仔粉　1/2TL

鹽、胡椒

...... 步數 ......

1. 材料濫做一伙搜齊，落烘箱捘220度烘25~30分鐘，樂暢來食。

(02.01.2023 Frühstück Süßkartoffel-Frittata - Blumenkohl aus dem Ofen - Maracuja-Joghurt/854kcal)

Bevor mein Mann hat gesagt, der Blumenkohl ist die Wüste in meinem Mund der Wasser sucht.

Ich sage, der Blumenkohl ist eine Tankstelle in meinem Mund.

Nach dem  wir das Rezept probiert haben, sagen wir「Wir lieben Blumenkhol!」

Blumenkohl aus dem Ofen

...... Zutaten ......

Blumenkohl in kleine Stücke geschnitten　1

Öl　6EL

Currypulver　1TL

Kurkumapulver　1/2TL

Knoblauch in kleine Stücke geschnitten　2

Paprikapulver　1/2TL

Salz ＆ Pfeffer

...... Zubereitung ......

1. Alle Zutaten gut mischen in den Ofen legen und auf 220 Gard 25~30 Minuten backen. Guten Appetit!

(01.02.2023 Breakfast Sweet Potato Frittata - Roasted Cauliflower - Maracuja-Yoghurt/854 kcal)

Before my husband said the cauliflower is the desert in my mouth looking for water.

I say the cauliflower is a gas station in my mouth.

After trying the recipe, we say 「We love flower khol!」

Roasted Cauliflower

...... Ingredients ......

Cut cauliflower into small pieces　1

Oil　6EL

Curry powder　1TL

Turmeric powder　1/2TL

Cut the garlic into small pieces　2

Paprika powder　1/2TL

Salt ＆ Pepper

...... Method ......

1. Mix all ingredients well, put in the oven and bake on 220 Gard for 25 ~ 30 minutes. Enjoy your meal!