亂皂𥴊仔店 ⓂⒺⒾⓃⓀⒾⓄⓈⓀ

羅馬尼亞傳統食食➀

車日子一目𥍉已經來到羅馬尼亞，遮 ê 城市面肉佮我認定 ê 行無仝路。

這个無仝路 kan-ta 表示我鬥別人 ê 目睭來看生份 ê 角勢，這个鬥別人目睭 tuì 我來講無著抑是 m̄ 著 kan-ta 資訊來源猶無夠楦闊按呢 niā-tiānn。

起因，自國土若營養食甲較有冗剩 ê 攝襇仔蟲匈牙利沓沓徙跤到國土若金魚 ê 羅馬尼亞，我 m̄ 捌繼續鬥別人 ê 目睭抑是神魂來繩這个我唯二認捌 ê Bram Stoker ê Dracula 佮 Nadia Comăneci，不過，我猶是愛坦白，行踏羅馬尼亞我猶是跟綴德國史看伊 ê 目今佮往過。

這部(phō)德國史講無受著 Peter Maffy ê 影響是無可能，不過這是我家己 ê 問題 m̄ 是 Maffy ê 問題。

寫著 Maffy 決定愛紹介這葩我足愛 ê 歌曲，翻唱自前東德樂團 Karat ê Über sieben Brücken musst du geh'n(1978)。

羅馬尼亞 ê 歷史佮世間每一个角勢攏相仝，有伊家己 ê 走徙，sóo-tí 無法度接受別人一日徙栽，三日徛黃是我 ê 問題 m̄ 是 Maffy 抑是建國百外冬 ê 羅馬尼亞。

Oradea 是我順 An der schönen blauen Donau 各角勢跟綴奧地利人講伊是 Ins Meer(泅入大海) ê 第一个角勢，這久 ê 我 tuì 伊無一个認捌，不過我清楚知影這逝跤花栽煞，我 ê 花園 ē 出現 tsuē-tsuē 新栽。

感謝 gún 兜 ê 柴頭翁 hōo 我有機會坐金交椅兌現人生 ê 願望行踏 Nadia Comăneci ê 故鄉。

Hotel Vulturul Negru („Schwarzer Adler“ 烏色鴟鴞)

Die Zeit lauf wie ein Jaguar, wir sind jetzt in Rumänien, ich kenne Rumänien nicht so viel, aber hier bin ich überrascht.

Also, natürlich...ich habe meine Vorstellung von diesem Land,deshalb bin ich so überrascht, ich meine die Überraschung ist gut, die hat mir die Augen geöffnet.

Also, Rumänien ist groß, bis jetzt, ich sehe weniger als 1% vom Land und ich habe keine Idee zu schreiben was ich über das Land denke, aber, ich muss sehr ehrlich sagen, ich bin sehr glücklich, ich habe die Chance nach Rumänien zu Reisen und danke mein lieber seltsam Mann, JA, ER IST SELTSAM macht mich immer böse(Müde).

Aber ich liebe ihn sehr, obwohl ... Mann!!!

Ja, so böse in mein Leben .

Vielen Danke, mein Lieber seltsman Mann, ohne dich, ich kann nicht das Geld sparen, ohne dich, ich weiß nicht wann ich Nadia Comăneci Heimat besuchen kann.

Als ich Kind war, Nadia ist ein Superstar für mich und das einzige außer Dracula was ich in Rumänien kenne.

徛位 tī 匈牙利大田洋東爿 ê Oradea mā 是 Apuseni-Gebirges 山坪徛位 tī 東北爿上尾一个城市，伊 ê 市中心倚匈牙利 kan-ta 13 公里 m̄-koh 按羅馬尼亞入境匈牙利 m̄ 是 kan-ta 13 公里是遠甲若 bueh 去南美州復活島按呢夭壽骨 ê 遠。

不過，按匈牙利入境羅馬尼亞 mā 若按臺灣飛去智利復活島遐爾仔遠相𫝛，而且是無分護照。

大碗閣滿墘 ê 美味しい

自德國出發一路 m̄ 捌 hőng 檢查護照 ê 我 tī 遮一停跤停 bueh 2 點鐘，這个停跤無針對我個人，這个停跤是隨个仔隨个對分分。

行踏歐洲罕得 hōo 海關請教問題 ê 翁，因為牽手護照字名 mā 慣勢人一到海關隨 kā 車 ia̋n-jín 禁掉順紲眯一下補元気。無我這款牽手 ê 歐洲人，像德國人𪜶就無 gún 翁這款美國時間通 hōo 羅馬尼亞海關請問，sóo-tí 本底是若臺灣烏熊獨居 ê 𪜶開始隨个仔隨个成做羊咩仔疊做伙並大聲咩「這就是羅馬尼亞無法度加入 Schengen ê 因由」。

這个問題敢是造成羅馬尼亞無法得加入 Schengen ê 因由，𠊎毋知。總是我清楚知影偷渡者一增加，歐洲西部 ē 講「攏是東爿倖來--ê」。

羅馬尼亞 ê 國名就 tshan-tshiūnn 𪜶 ê 國名，按羅馬年閣開始。

Oradea ê 建城 mā 佮歐洲 tsuē-tsuē 城市相𫝛，按宗教開始 14 就是主教來扞權，只不過 Oradea ê 扞權者 m̄ 是 Voltaire 批判 ê 既無神聖，也無羅馬，更加 m̄ 是帝國 ê Germani 是向時 ê 兄弟姊妹，這久 ê 厝邊匈牙利。

Visegrád Burg, Magyarország

匈牙利人 tī 9 世紀按家己 ê 角勢徙位到 Karpaten 現此時 ê 匈牙利、奧地利、克羅埃西亞、塞爾維亞、捷克、斯洛划克、羅馬尼亞、斯洛維尼亞佮波士尼亞，紲落來跟綴年閣狗齒仔成做 Voltaire 批判 ê 一部份佮按東羅馬帝國衛隊成做扞權者 ê Osmanlı ê 一角勢。

 遮 ê 扞權者交咱人類性命跤步相𫝛，時間一到 m̄ 管願意抑是無願意攏愛成做過去 ê 心不可得，像我認捌 ê 羅馬尼亞朋友𪜶紹介自家歷史 buē 按盤古開天開始算 mā buē 囝婿是半子像德國按呢講著奧地利 gún 無仝國，講著往過 ê Heiliges Römisches Reich gún 仝國，𪜶大多數攏 ē 按呢紹介「 Gún-ê 歷史短短百外冬」ê 一人一家代，公媽隨人祀。

我低路人 m̄ 捌羅馬尼亞歷史，這斗進前 ê 匈牙利行跤花 mā 佮這擺相仝齊是造訪 Germani 地區 hōo 我羅馬尼亞 mā 跟綴匈牙利火燒厝，燒過間 ê 無興趣。

「咱愛來車頭拆票，起因 Oradea 非常媠非常有意思，咱千萬 m̄ 通停跤這日潦草 kā 䀐過」露營車一按搭好勢翁隨交代。

我那看按德國人意愛起造 ê 露營地，那幌頭表示我 tuì Germani 風格已經看甲若小林樽講伊 ê 枵燥拍 m̄ 見去仝款，飫，無興。

「這斗我無法度順你 ê 意見停跤一暝，不過我包穩你 buē 飫喙」翁開始 kā 四常愛踮露營區過兩暝 tsiah-ē 捎出來排 ê 露營桌椅搬出來排放好勢。

旅行先的按呢分張，我這个產婆摸尻川，外行--ê 就莫閣綿豉成做棺材內 ê 鳥鼠，齪死伊。跟綴伊 ê 跤步 kā 這兩暝 bueh 使用 ê 物件 mā 齊款 hōo 好勢，手牽手做陣去掠無洗身軀 ê 鳥鼠(鼠味/趣味)。

Oradea mā 真正 tshan-tshiūnn 翁分張 ê 美麗，羅馬尼亞 mā 交𪜶國名 ê 尾句 România ê ia 𫝛款是五彩十色 ê 民族。人猶未行到車頭拆票，我已經見著若鴛鴦 ê Roma 羅姆(ḿ)人，本底掠做 Oradea 是鴨仔過溪，無撩(聊)，開始有局有聊。因為𪜶佮我認捌 ê 故事是豬母牽去牛墟。

Oradea ê 運命交歐洲歷史佮 Roma 運命相𫝛攏有三年一閏，好歹齊 m̄ 知 ê 千變萬化，m̄ 值得造化 ê 人生。

羅姆人抑是辛提人 tī 歐洲 ê 面肉是生言造語，借刀殺人抑是生雞卵無，放雞屎有，我是目睭花花，匏仔看做菜瓜無才調做評論，總是眼前 ê 羅姆人抑是辛提人確實有先苦後甜，富貴萬年 ê 面肉，這个面肉 mā hōo 我想著《絕島之咒》食對藥，青草一葉 ê 各位主角。

人類 ê 懸低，自本就是用伊 ê 塗，糊伊 ê 壁 ê 甕肚佮重欹爿。車頭 ê 鴛鴦人 hōo 我想著沓沓仔成做了尾仔囝 ê 德國社會福利政策 ê 送伊魚，m̄ 教伊掠魚交羅馬尼亞一日到晏笑人食飯放屎，製造肥料，不如教伊做穡 ê 對照圖。

我 tuì 羅馬尼亞 m̄ 捌一个呼 tuì Oradea ê 印象 mā kan-ta Nadia Comăneci tī 奧運比賽優雅 ê 體操動作，sóo-tí 當翁 tī 輕鐵踅唸伊看來 ê Made in Germany，我想著林之助柳川溪墘膠畫 mā 想著翁某行涼(hangˇ liongˇ) tī 立陶宛首都 Vilnius 翁分張 ê 感想「遮 ê 厝 hōo 我想著台北，猶毋過台北猶原比伊媠幾仔百倍」。

Oradea 交 Vilnius 佮台北攏是行過一隻牛剝二領皮 ê 歹日子，Oradea 無行向猴頭鳥鼠耳，Vilnius 因為年閣關係 hōo 伊枵雞筅壁跤到今猶 teh 揣藥方改善贅(tsuè)生物，台北卻愈行愈向老猴無粉頭兼愛別人中進士，你跋死羊母 ê 近廟欺神。這是咱愛鳥鼠食油，目睛金，近視短利抑是珍珠看做鳥鼠尿 ê 自信不足？

 Oradea 有法度按豬來窮，狗來富，貓來起大厝有伊 ê 時空(khong)條件，總是百年老樹 m̄ 顧，顧外來樹 mā 無可能成就目今 ê 燦爛。

大碗閣滿墘 ê 美味しい

Karpaten ê 民族佮伊 ê 食食慣勢 tuì 我來講就敢若公視電視台 S3EP6 - 出名人請借問 - 青春咱的記者 --- 吳庭宇分張伊人 tī 烏克蘭採訪 ê 故事仝款，多元文化生湠多元食食。

自第一斗行踏波士尼亞我就深深愛著 Balkans ê 味素，特別是麭總是引𤆬我踅轉去番薯島 ê 滋味。

Oradea 是 gún 行踏羅馬尼亞第一个城市，tī 遮 ê 3 日 2 暝，我有見著若南投集集火車站 ê 古早拆票台 ê 麭店，遮 ê 麭是按手工出廠抑是機台出廠我 m̄ 知影，總是食過 ê 麭 tuì 我來講是乞食伴羅漢，好味好素 m̄ 是像德國彼款，烏牛大影，好看無好食。

德國 m̄ 是無食食文化，總是𪜶若足驚郭仔魚假赤鬃，無夠紅，真愛佮美國做陣 tī 樹林內放風吹，纏牢牢。

美國 ê 肉桂露螺捲有偌甜，德國就有偌甜，準做 tsuē-tsuē 人提倡德國愛行向英國減糖政策照顧人民健康，𪜶猶是戇蠓叮神明，無震動著。

我 tuì 匈牙利建築 m̄ 捌一个呼，tuì 猶太式建築 mā kan-ta 捌德國猶太式這个呼，sóo-tí 當輕鐡慢慢仔按市區駛入市內，我開始若厝外彼陣 m̄ 管樹椏剪甲無半椏猶是有法度逐日 ku-ku 叫，吵死人 ê 粉鳥仝款叫 buē 離。

「總算無 Germani 無 Osmanlı」一落車我隨阿婆仔穿 Triumph，buē 博假博，「遮是阿拉伯建築」翁 mā 隨綴 leh 囊 。

我那穿 Triumph 喙那開開，翁雄雄喝一聲 hōo 本底頭擔擔 ê 我隨越頭看佗一間火燒厝，有厝(趣)味。

「你喙閣繼續按呢開開，早慢有芋仔來種」翁手指停飛 tī 簾簷跤(nî-tsînn-kha) ê 粉鳥講。

我 m̄ 捌羅馬尼亞民族遷徙 ê 歷史 mā kā 阿卡較早捌分張 ê 故事擲挕捒，這久跤踏這个按匈牙利過海關無到十分鐘隨是羅馬尼亞城市 ê Oradea，彼个 hōo 我擲去壁角 ê 記持 tshan-tshiūnn 田螺含水過冬，等時機，趖來眼前。

「我總算理解 m̄ 是跟綴蘇聯部隊徙位到羅馬尼亞阿卡𪜶老爸是按怎是匈牙利人 ê 因由」我又閣雄雄喝一大聲。

「遮 ê 歷史就佮 Bismarck 年閣仝款」翁一面公關公賣豆腐，簡單 ê 表情，我一面臺灣史我從來 m̄ 捌三更燈火，五更雞愈免向望歐洲史 ê 表情 hōo 翁笑講換另外一个角度來看，gún 兜牽手至少無走馬看真珠。

Oradea tī 歐戰(一戰)進前一直徛位 tī 匈牙利地區，歐戰結束伊 hőng 換身份證成做新成立 ê 國家羅馬尼亞，二戰期間又閣 hőng 換做匈牙利身份證，二戰結束因為蘇聯伊又閣按匈牙利換做羅馬尼亞並落家甲到今。 Oradea 這个變化 hōo 我想著 Ligne Maginot 引路人序大 tī 寢開始 ê 自我紹介佮請教 gún-ê 問題。

「恁認為我是法國人抑是德國人？恁 m̄ 免回答，我家己是按呢認為，我是出世 tī 這塊土地 ē 曉講德語佮法語 ê 當地人。」

序大一段看起來輕鬆兼龍船雙頭發 ê 話是需要真心理解，船若反，平平沈 ê 一支草，一點露，無一个人特殊抑是無路用。

阿卡徛位 tī 羅馬尼亞佗一搭，年閣久遠記性愈來愈倒勼 ê 我已經 buē 記得，就 Let it go 準做我足認真反屜仔。

羅馬尼亞露營政策交挪威佮瑞典相𫝛，攏是允准路邊停車 --- 有政府告示 ê 角勢 tsiah 容允，sóo-tí bueh 踮羅馬尼亞 kā 露營過甲若德國抑是法國彼款手機仔一𫝻隨有厚甲若河溪兼物超所值 ê 露營區，彼愛較早睏較有暝，準做像 Oradea 這款順 Crișul Repede 起造並出名 ê 河岸城市。

「這搭露營地根本物不超所值」本底無成做羊咩仔 ê 翁 tī 市區搪著家己 ê 兄弟姊妹開始成做柴角仔綴 leh 疊哭呻。

無料跟綴伊樹林內放風吹，纏牢牢 ê 我想 bueh 開喙，總是我清楚知影按家己 ê 性地 kan-ta ē-hōo 畫面歹看「恁莫羊仔笑牛無鬚兼三工無偷掠雞，就假部份 ê Made in Germany 是世界唯一標準」。

不過，我猶是我，我真僫外媽疼外孫，雞母孵鵪鶉(ian-thun) tī 𪜶德國人互相再見我隨成做六月蚶，開喙臭，臭甲伊雞喙變鴨喙，無話通應。

Gún 是 2022 行踏羅馬尼亞，彼陣 ê Oradea kan-ta 一搭按徛家空地起露營地 ê 所在通選擇，這个露營地一暝 30€ 無收 Lei，有游泳池佮公用廚房，主人家講英語佮淡薄仔德語。

以羅馬尼亞 ê 人均消費來計算，這个露營地無俗價，以觀光城市飯店定價來計算，這个露營地俗甲有賰。

羊仔毛是按羊仔身軀來，恁遮 ê 觀光客要求羅馬尼亞人愛有恁西歐人 ê 美學建築兼設備，𪜶 mā 確實照恁 ê 喙斗做到夠，只不過敢有掛羊頭賣羊肉，這就無確定。

總是，準做掛羊頭賣狗肉 mā 是狗母無搖獅，狗公 m̄ 敢來，敢 m̄ 是。

Bueh ka̋ng 洗面進前，家己先洗喙。

露營食食 - 雞肉塊 + 蒜頭蘑菇炒 + 卵燥𫝻

聽人講德國人無德國驕傲，聽人講德國人是謙虛 ê 民族，聽人講....

聽遮 ê 人講，我捷感覺我敢佮𪜶蹛仝搭。

不過，遮 ê 故事攏是我 ê 經驗，無表示全德國人攏是按呢生。

總是我個人 tuì 這款見雞也投，見狗也投，一四界投無德國標準 ê 毒足慼，sóo-tí 一搪著人就隨做錦痀貓，想 bueh kā 咬。

露營食食 - 林檎紅菜頭生菜盤 + 肉片

是講，這个露營區 ê 物不超所值 mā m̄ 是德國人一四界投，西歐其他國家像 I-tá-lih 佮法國 mā 是投 buē 離。

搪著遮 ê 人我足想 bueh 請教，竟然無佮意是按怎閣 bueh 來。恁 ē-tàng 跟綴其他踮遮參觀押尾無停睏 ê 露營者仝款斡頭離開，是按怎 bueh 綿豉 tī 遮若享受恁愛 ê 建築美學，那做茶鈷呻 buē 離。

Bueh 出門就愛有心理準備 m̄ 管按怎點陳細膩攏 ē 搪著 hőng 當做盼仔摃，敢 m̄ 是。

行到佗落攏愛選擇家己熟似食物 ê 翁 ê Oradea 食食

Oradea 佮世界 tsuē-tsuē 角勢攏相仝，觀光地區 ê 食食文化 m̄ 是 I-tá-lih 就是美國，tī 我準備放棄食餐廳踅轉來露營地家己撆手䘼，徛位 ê 角間有一間看起來舊漚舊臭兼無半个人客 ê 餐廳吸引我 ê 目睭仁隨倚過去。

規家餐廳佮希臘粟仔麵𫝛款無半个人 ē 曉第二外語，菜單 mā kan-ta 羅馬尼亞語兼無隔壁桌通參考，gún 只好照認捌 ê 詞，像 Bacon，Spaghetti 遮 ê 詞點菜。

彼陣無確定食啥，轉來德國請教阿羅翁仔姐，𪜶講第一張相片 Karpaten 傳統料理➀齊是肉，這个分張 hōo 我佮羅馬尼亞色水繽紛 ê 市仔鬥 buē 起來。

 「目今 ê 羅馬尼亞食食是離開蘇聯加入歐盟 tsiah 有 ê 變化」聽阿羅翁仔姐按呢分張，我順記持行轉去羅馬尼亞佮保加利亞，確實是按呢。想 bueh bué 菜蔬猶是愛行踏德國超市 Lidl 閣有選擇，傳統𥴊仔店有地選擇 ê 菜蔬真正有限。

味素佮臺灣無相𫝛 m̄-koh 猶原比德國好啉 ê 真珠奶茶

這杯真珠奶茶以當地 ê 物價來算窮實無俗，總是人 tī 他鄉見故鄉隨成做紅鰱魚搢水，一个接一个泅入去店交觀。

遮 ê 真珠奶茶點法佮臺灣無相𫝛 buē 曉第二外語佮 m̄ 捌半句羅馬尼亞語 ê 我，押尾猶是完成交易 hōo 我那欶那 tuì 翁哭呻「我向望遮 ê 食食 ē-tàng 維持伊本底 ê 面肉莫行向捷克抑是波蘭 ê 面肉。」

「這个向望應當真僫達成」翁 kā 杯仔 hâinn hōo 我笑應。

臺灣 ê 食食文化愈來愈西化佮咱接受美國食食來徛位有關係，遮 ê hōo 蘇聯押做 tsa̋u-kán bueh 50 冬 ê 角勢，食食文化 mā 沓沓按糖是黃金行向糖是毒品 ê 路途，這是好代抑是䆀代？

M̄ 管好代抑是䆀代，無有一無兩 ê 智慧，準做仙果 mā 無法度解毒。 

栽欉 --- 2022.08.15

翻田塗 --- 2024.05.15