亂皂𥴊仔店 ⓂⒺⒾⓃⓀⒾⓄⓈⓀ

露營區主人家 ê 阿貓 

Timișoara 一个 hōo 我一直唸做 Tiramisù ê 城市，伊 ê 美麗 tuì 智識不足 ê 我 mā tshan-tshiūnn Tiramisù ê 故鄉遐爾仔迷人。

Timișoara 佮 Oradea 𫝛款攏徛位 tī 自然遺產匈牙利大平洋(Große Ungarische Tiefebene)，Timișoara mā 因為地下水徛位低烏塗肉肥，是羅馬尼亞重要 ê 嘉南平原之一。

人猶未行到 Karpaten 進前，我一直掠做規个羅馬尼亞滿四界攏有新沢閣俗價 ê 菜蔬通 bué，押尾發見家己 ê 眼界 tshan-tshiūnn 囡仔時 tuì 鹿港「摸乳巷」ê 態度仝款，kan-ta 看字 m̄ 款意。

塞爾維亞東正教教堂

Timișoara 佮咱番薯島有𫝛款 ê 運命，這个郎君來，彼个郎君去 hōo 伊成做我心目中神秘風情百萬千 ê 中亞世界。

引述《我在西伯利亞的監獄》ê 這段話「這是個光怪陸離的混血產物。在二十一世紀初期，所有異境之美都凝聚在這座孤立於北方泰加林的西伯利亞之城。」

我 tuì 羅馬尼亞 ê 人文歷史故事是捌一箍呼(honn) ê kan-ta ē 曉捎德國大補丸來補身體。

我「這有阿拉伯風格」。

翁「遮有德國名 Temeschwar」。

拄著若 Taj Mahal ê 窗門風格，我 buē 去思考人類千外冬 ê 文化交流，搪著一屑仔攏無神聖，一屑仔攏無羅馬，更加 m̄ 是帝國 ê 子民 gún 翁，我 mā kan-ta ē 曉按呢應按呢應「著，歐洲一四界是恁德國，連奧地利 mā 是」。

人正經是紅龜生蟲，龜怪。現此時 ê 田無溝，水無流，一搪著光焱焱 ê 歷史隨絞做紅燒獅仔頭。

我低路人冊讀無 tsuē，無法度區別茶米茶佮麥仔茶 ê 精差，就莫成做 Mn̂g-sng 妝娗家己 ê m̄ 捌一箍芋仔番薯。 

德國 mā 有相𫝛 ê 味素，總是我佮意羅馬尼亞版本，因為 m̄ 是糖半，是糖少

見寫 Mn̂g-sng 攏 ē 想著《鯤島計畫》ê 盲腸。

羅馬尼亞人天主教堂

Hőng 認定伊是 Banat 地區非正式首都 ê Timișoara 是羅馬尼亞第 5 大城，伊倚首都 Bukarest 550 公里，倚匈牙利 Budapest 300 公里，倚塞爾維亞 Belgrad 170 公里，倚 Germani....遮 ê 路途成做伊現此時 ê 風情百萬千。

本底是鮮綠色 ê 塞爾維亞東正教堂

Banat 是中歐歷史地區，這久 ê 伊，一个人𤆬三个囡仔，東爿羅馬尼亞，西爿塞爾維亞，北爿匈牙利，Banat ê 大後生就是 Timișoara。

羅馬尼亞東正教教堂

西元 553 年遮就有人類 ê 跤跡，一个出現 tī 6 世紀，消失 tī 9 世紀 ê 民族 Awaren。

12 世紀 Timișoara 出現 tī 阿拉伯學者 ê 地理記錄。

13 世紀匈牙利國王開始整治這个跟綴人類遷徙附加嚴重損蕩 ê 角勢。

16 世紀賜 Mozart 靈感 ê Ottoman Turks 行跤到。

18 世紀換奧匈帝國來相揣 Timișoara 按三跤步一堡寨 ê 軍事要地轉型做奧匈帝國第一个城市。

有提供 Toi Toi 便所間 hőng 歇暝 ê 停車場

Gún 本底計劃 tī 遮歇暝，押尾決定加疊寡歐元去露營區好好歇暝

按堡寨成做城市 ê Timișoara 伊 tī 1760 設街頭燈火，1857 開始建設鐵支路。

1884 伊佮柏林、巴黎遮 ê 大城市成做歐洲第一个有街頭燈火 ê 城市 mā 是東南歐洲第一个發表德文新聞 ê 城市，伊 ê 軍用病院 mā 比奧匈二元帝國首都 Wien 早 24 冬。

Timișoara 也是改移羅馬尼亞歷史重要 ê 城市，1989 追求民主 ê 羅馬尼亞按遮起鼓，伊 mā 是羅馬尼亞教育重鎮，這逝車日子按匈牙利車入羅馬尼亞 tī 遮 gún 確實見著 tsuē-tsuē 佮教育相關 ê 廣告，特別是德國德語學習。

羅馬尼亞是德國重要 ê 藍領來源，gún 稅厝 ê 公寓，二樓佮三樓 m̄ 管按怎換厝邊齊是羅馬尼亞人。

德國有 16 个聯邦，別 ê 聯邦按怎制訂政策，我無理解，總是我這久 ê 家甲政府佮羅馬尼亞政府有互相簽訂工作協議，因為這个協議 hōo gún 這斗車日子有比別人閣較斟酌 ê 一手資料認捌羅馬尼亞，特別是僫揣 ê 露營地。 

Timișoara mā 是少數德語強勢過西班牙語 ê 城市。

德語是按怎強勢，請參考這葩連結 --- Nach der Wende, Timișoara

綴輕鐵踅 Timișoara ê 希臘式東正教堂(當地人分張)

歐戰(一戰)期間，Timișoara 是 Schwein gehabt(好字運)無受著任何損蕩，不過複雜 ê 歷史需要解決，像 Timișoara 成做厝邊塞爾維亞想 bueh 挃 ê 城市，押尾伊猶原泅入羅馬尼亞 ê 角勢。

二次期間 Timișoara 就無閣遐好字運得著一隻豬，二戰期間伊 tshan-tshiūnn 法國皇后 Marie Antoinette 一暝烏絲變白絲閣行向斷頭台，本底 ê 交易行向落坐(lo̍h-tshē)。

1854 開始營運並是奧匈帝國糧草重要轉運地 ê Deta 車頭

本底 ê 交易行向落坐按 hőng 欣羨 ê 鐡路改移 ē-tàng 看出往時 ê 光焱焱佮現此時 ê 衰微(Sue-bî)。我 tuì 羅馬尼亞鐵路系統 m̄ 捌半項，總是人 tī Deta 見著若台鐵藍皮解憂號火車，我感謝天公伯 hōo 我出世 tī 臺灣 mā 感謝咱 ê 鐵路服務，雖罔伊猶原無夠十全(tsa̍p-tsn̂g)，伊 ê 利便猶原 hōo 盆跤骨齊換新支骨 ê 阿母 m̄ 免目上車跤猶栽 tī 塗跤 m̄ 知愛按怎 tsiah 好。

因為鉛粉掖有夠額 hōo gún 人 tī 倚 Timișoara ê 田庄搪著按奧地利來 Deta 過日子 ê 翁仔姐，並傍𪜶 ê 福氣 hōo gún 有機會走揣往時 ê 日耳曼(Ji̍t-ní-bān)並參觀世間無一項物 buē 花謝落塗美麗轉風霜。

離開奧地利翁仔姐分張 ê 墓園，gún 順手頭 ê 地圖沓沓仔蹓到帝國光榮 ê 象徵 Deta 車頭。

「遮有人 tī 等車幫，你敢 bueh 綴 leh 等火車」翁問。

「當然 mā bueh。」

翁某隨成做兩條平行線，翁一四界翕相，我一四界研究這若五分車 ê 鐵枝路是 bueh 按怎敆德國二手火車。羅馬尼亞有 tsuē-tsuē 公共交通工具按德國來。

當 gún 隨人完成家己 ê 任務，火車 mā 沓沓仔入站 hōo 我開始成做一隻貓，並大大典典 kā 雙目按旅客身上拑牢牢。

Tī 臺灣抑是德國火車跤枋佮月台懸低差一格就 hőng 申訴無利便，這个無停靠月台，車門 mā 無跤枋抑是掠外設梯仔 hōo 旅客𬦰上車 ê 火車是 bueh 按怎上車。

我雙目金金相準備上車 ê 旅客 mā uī 做押尾 ê 三位婦人人緊張，因為少年人上車就𬦰甲流汗流洘，𪜶 m̄-nā 大包細包閣兼行動無蓋利便是 bueh 按怎上車。當我想 bueh 出聲請翁 kā 包袱仔上上車人 m̄ 管按怎瞪力猶是無法度上車 ê 婦人人鬥相共，一位少年仔總算跳落車 kā 𪜶鬥相共，我 kiōng-bueh 按嚨喉跳出來 ê 心臟總算 ē-tàng kā 伊吞轉去。

「我想 bueh 請你 kā 𪜶鬥相共，m̄-koh 我驚失禮」我講。

「我 mā 是」翁應。

翁某兩人繼續徛𫝛位恬靜送火車離開，我 tuì 翁講「我相信少年人步頻願意鬥相共，是咱兩人若佛公祀 tī 遐 hōo 𪜶感覺 buē-tàng 繼續卸世眾。」

「我 mā 是按呢認為」。

匈牙利大平洋

啥物是匈牙利大平洋，無翁 ê 引𤆬我窮實是捌一个呼。

我認捌 ê 世界文化遺產 kan-ta 人造建築，sóo-tí 當我 kiōng-bueh hōo Sandmännchen(德國睏神)牽去𨑨迌，gún 翁想著一帖提神藥方，彼就是「遮是無料 ê 自然遺產」本底成做 m̄ 願開喙 ê 目蚶隨開喙並認真學習成做文化人 tuì 伊金金相。

經過匈牙利大平洋 ê 糜飯 - 林檎檨仔兔仔耳生菜盤

2022 ê 匈牙利是火燒埔，燒甲 tuì 生菜冷盤喙白 ê 我 mā 甘願 kā 𪜶成做糜飯過日。 

露營區主人家 ê 阿貓

這个倚 Timișoara ê 阿貓露營地，自頭到尾無列入 gún-ê 露營清單，伊是 gún 翁臨時臨曜 tī 地圖看著「荷蘭人露營地」隨決定來遮歇暝。

荷蘭人四處生湠露營區是歐洲通人知 ê 市草，不過這个露營地扞地者並 m̄ 是荷蘭人，是羅馬尼亞當地人，sóo-tí 見著 gún 遮 ê 受著荷蘭人露營地來交觀，總有一種講 buē 出喙 ê 礙虐。這个礙虐 hōo 我想著第 34 屆 ê 鄭宜農。

湯鍋仔揣無通食，下跤大箱仔凡勢有物件通食~喵

總是 mā 愛感謝這个 kan-ta 看外表無斟酌內才 ê 臨時臨曜，因為伊 gún tsiah 有機會確定躊躇 ê CASA FERCH DETA 是正港講德語 ê 主人家。

Gún-ē 要意主人家敢是日耳曼文化出身 ê 人，猶是受著這斗 ê 經驗，畢竟 gún 無想 bueh kā 時間閣一擺分張 hōo 金光黨。

CASA FERCH DETA ê 主人家是一對按奧地利來羅馬尼亞經營民宿佮露營地 ê 退休翁仔姐，愛露營 ê 𪜶因為人按海豬成做海翁無法度繼續車 Caddy 這類 ê 廂仔車四界露營，tī 這假影 ê 荷蘭人露營地一 Check in 好勢隨行倚 Hallo，gún mā 隨佮𪜶約好時間跟綴𪜶 ê 跤步行踏這个本底強勢 ê 德裔綴帝國榮光斜(tshiâ)西轉做羅馬尼亞裔 ê 庄頭。

「德語本底是 Deta 上 tsuē 人使用 ê 語言，這久成做生份 ê 外來語....」

我理解主人家 ê 心情，總是彼是歷史 m̄ 是現此時。

若 m̄ 是 Deta mā 熱甲若火燒埔 buē 出現 ê 糜飯

根據文獻資料 Deta 自一開始 m̄ 是一个庄抑是市，伊是貴族手頭 tsuē-tsuē 地契其中一个名，伊按地契名稱成做一个庄是 17 改朝換代，換奧地利 Haus Habsburg kā 權利扞到羅馬尼亞 tsiah 開始，遮 ê 德國族裔大多數是按德國拜仁州(Bayern)佮法國阿爾薩斯 - 洛林(Elsaß-Lothringen)遷徙。

遮 ê 德國移民 tī 二戰結束 mā 拄著排德政策放下百冬來 ê 爸公產，過海到美國抑是本國(德國佮奧地利)另起飼雞，食雞，起家，生湠。

現此時 ê 德國裔羅馬尼亞人敢有跟綴祖先 ê 跤步繼續保留祖先 ê 聲音，像德國裔波蘭人按呢，我 m̄ 知影，總是我是認同跤踏這地土地，自本就愛認同這地土地栽出來 ê 花欉。

一份早起頓，三个角勢人共同 ê 記持 --- 美國早起頓

Casa Ferch tī 奧匈二元帝國年間是一間音樂教室，伊 tī Ferch 家族離開 mā 按燦爛行向腌臢(a-tsa)成做當地人 ê 無料糞埽場、有路無宅人 ê 無料徛家。

這對按奧地利來 ê 翁仔姐佮 tsuē-tsuē m̄ 甘往時風華美麗成做癩 ko 爛癆 ê 德國人抑是奧地利人仝款，整本 kā 伊 bué 落來成做收藏館兼民宿佮庄園露營地。 

Gún 造訪 ê 時間，庄園猶原 teh 整理 mā m̄ 知影未來敢有機會再次行踏，總是我相信這間百冬老厝 ê 沓沓仔恢復伊本底 ê 燦爛標緻。

好食甲 hōo 我隨放棄剾板膋 ê 麵丸仔糋

Über Reisen zu schreiben war noch nie meine Stärke.

Naja, ich muss sehr ehrlich sagen, ich bin nicht daran interessiert, Reiseberichte zu schreiben, ich muss jedoch noch Folgendes aufzeichnen um solche Vorfälle zu vermeiden.

Mit Menschen über diese Reisen sprechen, ich wusste nicht, dass ich dort war, ich wusste nicht, dass ich dort war auch wenn niemand hören will, was ich zu sagen habe.

Ich erzähle mir auch Geschichten, wenn ich also auf einen Ort mit einem Netzwerk stoße.

Deta 傳統市場

遊記一直 m̄ 是 我 ê 專長，應當按呢講，我 tùi 紹介按怎食按怎耍奕 ê 事項無興頭，總是無興頭原仔愛 kā 遮 ê 記持做做神奇符號，以避免這个問題佮人講古攏 m̄ 知我人 tī tueh ê 歹神氣。

雖罔，我家己 mā 清楚知影，別人 ê 請教是牽尪仔補雨傘 ê 罔開講，無要意，總是伊 tuì 我來講 m̄ 是閒甲掠蝨母相咬 ê 無聊，伊是我 tsuē-tsuē 不可得 ê 這久佮彼久。

這久 tuì kā 記持成做神奇符號是捎無摠頭，總是有網路就緊 kā 這久 ê 不可得成做未來 ê 不可得。

一直按算 kā 記持轉做神奇符號 2266 Balkan 車日子重新梳妝打扮，總是想 bueh 做 ê 代誌 tsuē 過整理遮 ê 2266...特別是無法度放伊自由 ê 食食攝相。

總是，無頭胡蠅 ê 四常猶是有法度引𤆬我交平靜相拄搪。

寫 Blog 是敨放心情是做議量 m̄ 是逼家己行向死路，這是近來生湠 ê 智慧。

栽欉 --- 2022.08.19

翻田塗 --- 2024.06.08