亂皂𥴊仔店 ⓂⒺⒾⓃⓀⒾⓄⓈⓀ

Mostar 上出名 ê 景點之一 --- Stari Mostar

這是 gún 第 2 擺來到波士尼亞，tuì 伊 ê 感受猶原佮第一斗相𫝛，這是一个媠甲 hōo 我喝忝 mā m̄ 願 kā 目睭瞌起來 ê 所在 mā 是一个 hōo 我感覺足自在 ê 所在，準做遮 ê 人看起來攏誠無好鬥陣 ê 款。

這个所在猶原 hōo 我輕鬆甲定定 buē 記得日頭公佮月娘，只是，這个輕鬆捷捷 mā hōo 我感覺沉重。

第一回我想無是啥物因端，這回來行踏我想我揣著答案，媠人無媠命。這句刻薄卻是我唯一想 ē 著 ê 答案。

一个國家3个總統，3个攏想 bueh 做這个家唯一 ê 扞鼎灶掠外，厝外閣有一个惡霸一日到晏想 bueh 強押伊做細姨，一想著遮又閣牽去遐 ê 看起來佮惡霸門扇枋鬥甲誠峇，窮實是孤人擉算盤 ê 假仙

一想著這我開始愖咱番薯島 mā 有 ê 問題，隨交懍恂。

媒人保入房，無保一世人，咱現此時所看著佮認捌 ê 代誌敢是誠實按呢生？總是咱 buē-tàng kā m̄-tio̍h ê 代誌當做食補來處理 mā m̄ 免一日到晏誓不兩立。認捌別人佮咱 ê 無相𫝛 mā 接受咱佮別人 ê 無宛二體咱得著 ê 比咱家己想 ê 閣較豐沛腥臊。

最後，祝福波士尼行跤花 Bihać 露營主人家佮意愛 Versace 花哩囉 Siat-tsuh 穿插 Mostar 主人家 hām Una 國家公園搪著 ê 塞族佮波族媽媽佮其他路途搪著 ê 當地人一切平安，愈來愈好。

Neretva 河

Es ist mein zweiter Besuch in Bosnien, ob es nun das erste oder das zweite Mal war, meine Gefühle waren dieselben.

Es ist ein wunderschöner Ort, so schön, dass ich am liebsten eingedöst wäre.

Es ist auch ein Ort, an dem ich mich sehr entspannt fühle, obwohl es nicht einfach ist, mit den Menschen hier Freundschaft zu schließen.

Dieser Ort entspannt mich immer noch so sehr, dass ich den Tag und die Nacht vergesse.

Es ist nur so, dass ich mich bei dieser Entspannung immer noch schwer fühle.

Ich konnte den Grund für den ersten Besuch nicht finden, diesmal glaube ich, dass ich die Antwort gefunden habe.

Wir haben ein Sprichwort, das besagt, dass hübsche Mädchen kein gutes Leben haben,d ies ist eine sehr harte Aussage, aber es ist die einzige Antwort, die ich möchte.

3 Präsidenten in einem Land, von denen jeder der wichtigste sein will und der Tyrann versucht weiterhin, sie zu Konkubinen zu machen, wenn man an diejenigen denkt, die scheinbar gut mit den Tyrannen auskommen, aber in Wirklichkeit auf sich allein gestellt sind und dann denke ich an unsere eigenen Probleme und dazu fällt mir dieses Sprichwort ein.

Der Makler garantiert nur, dass die Immobilie gekauft wird, nicht aber dass es keine anderen Probleme mit der Immobilie gibt.

Ob die Informationen, die wir sehen und erhalten, wahr sind？

Ich weiß es nicht, aber wir können das, was falsch ist, nicht einfach so hinnehmen oder hassen, zu erkennen, dass Menschen anders sind als wir selbst, und zu akzeptieren, dass wir anders sind als andere, gibt uns mehr Seelenfrieden.

舊城

波黑(hik)聯邦第六大城 mā 是聯邦唯一搭入選 UNSECO ê 城市。

第一斗行踏波士尼亞就想 bueh 來遮巡禮，總是路途遙遠兼時間無夠額就 kā 五日三暝 ê 跤花栽踮倚克羅埃西亞 ê Bihać。

這久因為時間夠額人閣兼人拄好 tī Dubrovnik 就順這个角勢 kā 進前想 bueh 栽 ê 跤花栽 tī Mostar。

Mostar 舊城

第一斗行踏波黑聯邦我 m̄ 捌斟酌愖過波士尼亞佮赫塞哥維納 ê 精差。起因，波士尼亞這个辭就是按非穆斯林成做穆斯林 ê 名稱。

另外，我搪著 ê 歐洲人較講 mā 講我去波士尼亞行跤花無人 ē 講我去波黑行跤花，sóo-tí 我一直掠做 Mostar mā 是波士尼亞，我 ê 14 是我知影波黑有三个政體 mā 一直掠做保險願意保 ê 角勢就是波士尼亞地區。起因，德國保險 kan-ta 願意承保波士尼亞地區，sóo-tí 這斗搪著冇談清楚區別波士尼亞佮赫塞哥維納 ê 露營主人家 hōo 我一堆 Confused Nick Young。

這久巡田園，翻田塗揣資料 tsiah 知影是按怎主人家一直強調伊是出世 tī Mostar ê 波士尼亞人 mā 理解德國保險是按怎 kā 赫塞哥維納 ê 部份，當做西瓜切角 m̄ 是切橛抑是塊 ê 因由。

舊城

Mostar 佮地球 tsuē-tsuē 角勢相𫝛 tī 人類猶未有神奇符號出現進前就有人安身 tī 這个 Gaga 分張。

Tī 波士尼亞戰爭彼 3 年目睭看 ē-tio̍h ê 代誌 m̄ 是這久 ê 紺這久 ê 恬靜，是看啥人 ê 身軀較 tsuē 空，像遮 ê 建築仝款。

Mostar 佮 Bihać 這兩个波黑城市到今猶原保留彼 3 冬 ê 跤跡 hōo 人民理解，自由 m̄ 是倚靠別人佮喝講我 bueh 愛就有 ê 簡單。

舊城

Mostar ê 城市變化 tshan-tshiūnn Gaga 講伊是波士尼亞人 m̄ 是講我是波士尼亞 ê Bošnjak 像波士尼行跤花 ê 露營主人家按呢紹介自家。

未來 ê 波黑 ē 閣成做啥物款生張，這个歷史跤跡就交 hōo 未來，起因無一个人知影彼久 ê 討厭 ē 成做這久 ê 意愛，彼久 ê 意愛 ē 成做今仔日 ê 慼。

按新城接舊城

Mostar tī Ottoman 猶未行跤到進前佮山鷹之國阿爾巴尼亞仝款大部份 ê 居民攏是跟綴羅馬帝國 ê 跤跡信奉基督教，只不過遮 ê 歷史 m̄ 知是無受神奇符號 ê 照顧，抑是基督徒成做穆斯林猶未學著按怎 tī 東正教堂添四隻宣禮塔 ê 技術。

到底是佗一个，無一个答案，總是現此時 ê Mostar 真僫見著羅馬捌停跤 ê 跤跡就是囉。

Mostar ê 城市名稱佮城市上出名 ê 橋有相干，起因伊 ê 號名就是按這座橋來。

人㴙㴙㴙 ê 倒手岸

1468 Ottoman 按 Asia Minor 徙位到遮 kā 伊按橋分做兩个地區，一个商業區一个人家區並 tī 16 世紀 kā 按橋湠做城市 ê Mostar 木橋翻新做現此時 ê 石橋。

講著石橋，只要 Ottoman 捌栽過跤花 ê 角勢攏有相𫝛 ê 橋，只不過現此時攪起來敢若 Monstar 較出名，這凡勢佮神奇文字有關係，像人類 tuì 英文有一款英國、美國遮 ê 英文 tsiah 是英文。

像 Nicki Minaj ê 故鄉 Republic of Trinidad and Tobago mā 是講英文，總是一講著這个國家大多數 ê 人應當有這个想法，伊佮新加坡英文仝款...我無歧視新加坡英文，總是英文本底就 m̄ 是按新加坡這塊土地生湠。

不過，這是我這个年間 ê 故事，未來 ê 新加坡英文 ē 成做啥物款生張，無人知影，總是語言佮文化攏是起厝千工，拆厝一陣風仝款，厝拆了了就 buē 閣感覺本底 ê 怪奇真奇怪。

Mostar ê 神奇符號

the bridge is like a rainbow arch soaring up to the skies,

extending from one cliff to the other...

I, a poor and miserable servant of Allah, have passed through 16 countries,

but I have never seen such a high bridge. It is thrown from rock to rock as high as the sky

--- Mostar Wikipedia

Mostar 舊城

1878 奧地制-匈牙利帝國 mā kā 跤花栽到遮，二戰納粹德國 mā kā 跤花栽到遮並 kā 伊劃入克羅埃西亞 ê 一部份，彼陣 ê 慼成做這陣 ê 後悔(?) Mostar tī 奧匈侵門踏戶開始按石頭年間行入新石頭年間，彼久 ê 愛成做這久 ê 討厭(?) Mostar tī 南斯拉夫成做經濟火車母之一。

我 m̄ 是當地人 m̄ 知影當地人誠實 ê 感受，總是彼陣 ê 彼久攏是 tsham 當地人冇談得來 ê 故事，遮 ê 故事 mā 引𤆬我行出驚人 m̄ 捌 Taiwan ê 無聊佮無自信。

這逝路看起來簡單，竟然 mā 行西瓜 kiōng-bueh 剖一半 tsiah 有法度得著 ê 簡單智慧。

受波黑政府保護 ê 文化遺產 Blagaj

Blagaj 倚 Mostar 10公里左右，伊佮阿爾巴尼亞 Gjirokastër 相𫝛，規个庄頭攏保留真完整 ê Ottoman 建築。

Blagaj mā 是大多數行踏 Mostar ē 順紲來遮洗按 Mostar 紮過來 ê 觀光氣味 ê 角勢。

Blagaj tī 波士尼亞語 ê 14 是溫和，這个溫和 mā 表示這个順水色色緻較無  Neretva 河遐爾仔藍起造 ê Buna 河 ê 天氣變化。

Blagaj tekija(修道院)

Blagaj 上早出現 tī 神奇符號 ê 記錄是 1423，押尾沓沓仔成做一个完整 ê 城市生張是 15 世紀 Ottoman 來遮生湠。

Blagaj tekija(修道院)

現此時 ê Blagaj 已經看 buē 出彼當時 ê 光炎炎，彼陣融合地中海佮 Ottoman 風格 ê 條道院 mā 見 buē 著修士。

總是按倒手岸看彼久輝煌 ê 正手岸有一種人較媠猶是比 buē 過時間 ê 跤步佮人類 ê 選擇。

受波黑政府保護 ê 文化遺產 Blagaj

Blagaj tī 中古世紀是波士尼亞重要 ê 堡寨，gún 受保險 ê 限制，窮實是捎無佗一區是保險有負責佗一區是保險無負責。

車駛到 Blagaj 修道院遮就隨決定無 bueh 繼續行踏其他 ê 角勢，起因「遮 ê 空氣欶起來真有壓力」。

波士尼行跤花彼年搪著按捷克來 ê 少年兄分張伊人 tī 塞族自治區 ê 感想成做 gún 行踏 Blagaj ê 烏面賊，我 m̄ 知影遮 ê 人 tuì 波黑聯邦 ê 態度，總是遮 ê 空氣就是 hōo gún 有壓力。

彼个壓力是比人 tī Una 國家公園見著仇佷文字閣較沈重 ê 無地敨。

受波黑政府保護 ê 文化遺產 Blagaj

這逝 ê 波士尼亞行跤花除了 kā 跤花栽踮 Mostar mā 完成日夜所夢 ê Paneuropäische Verkehrskorridore，全歐洲交通巷路之一 ê Mostar 到 Sarajevo。

這段路程愛感謝露營區主人家 Gaga ê 鬥相共，無伊 ê 開喙真正足僫 bué 票佮理解時間 mā 感謝按 Sarajevo 轉來到 Mostar ê 媠姑娘，驚 gún m̄ 知到站 buē 曉英語 ê 伊手機仔捎 leh 請 Google kā gún 講到站矣。

受波黑政府保護 ê 文化遺產 Blagaj

Mostar 到 Sarajevo 這段路線 m̄ 管是坐長途客運抑是火車攏有無相仝 ê 光景。

坐長途客運這段，gún 翁一直喝講遮 hōo 伊想著南投，遐 hōo 伊想著嘉義。

按 Sarajevo 坐火車轉來到 Mostar 我想著瑞士貴参参 ê Alpen 路線，雖罔我 m̄ 捌坐過瑞士線，總是我想瑞士路線 mā 應當按呢生，若霜淇淋按呢按一輾閣一輾有無仝 ê 滋味。

好味素 ê 波士尼亞料理

德國 tī 波士尼亞 3 冬戰爭內底收容 tsuē-tsuē 波士尼亞人佮克羅埃西亞人，遮 ê 人 tī 戰爭結束了後猶原選擇成做德國欠工 ê 工蟻。

桌頂這盤本底無吸 gún 目睭仁 ê 菜單相片就是因為閣一斗路過這間無任何妝娗 ê 餐廳步頻鼻著德國味隨停跤點菜。

好味素 ê 波士尼亞料理

Mā 因為 gún 認出德國味 hōo 店東自動分張伊 tī 德國餐廳做穡過 20 冬 ê 故事。

我 m̄ 知影別人 tuì 德國料理按怎想，總是馬鈴薯條食過歐洲 tsuē-tsuē 味素，我猶原意愛德國味。

這 m̄ 知佮塗肉林檎 tī 德國品種 tsuē 甲若河溪敢有相干。

好味素 ê 波士尼亞料理

我無愛食臺灣 ê 鱒魚，認捌 ê 鱒魚又閣 kan-ta 德國法國味 ê 鱒魚煙。

自人 tī 阿爾巴尼亞食著炸甲外皮酥酥內肉軟𩚨 ê 鱒魚料理 tī 遮一見著相片隨來一份，彼味素好甲正經無話講 mā hōo 店東 kā 我褒唆我蹛踮行仔內。

好味素 ê 波士尼亞料理

人行到這个年歲 tuì 一个城市 ê 記持除了媒體帶來 ê 記持，賰 ê 就 kan-ta 人佮人之間 ê 分張。

Mostar 佮 Sarajevo 兩个攏 tī 3 年戰爭受傷嚴重 ê 城市 mā 經過 tsuē-tsuē 無仝年間 ê 變化，行踏 Sarajevo ê 記持到今 kan-ta 彼位 buē 曉英語 m̄-koh 知影 gún-ê 目標是啥 ê 古錐公車司機。

另外，別人 ê 悲傷正經 m̄ 免過度關心，起因咱 m̄ 是行過彼个故事 ê 人，不過咱 ē-tàng 用心恬靜體會𪜶 ê 悲傷。

是，我無愛聽遐 ê 行踏過波士尼亞 Romeo and Juliet 橋佮大屠殺 ê 故事，自然無法度回答 tuì 這兩个角勢 ê 感想。

栽欉 --- 2022.10.13

翻田塗 --- 2024.09.09