亂皂𥴊仔店 ⓂⒺⒾⓃⓀⒾⓄⓈⓀ

世俗人猶未交德國人來往進前，東正教、天主教、基督教齊是基督教，德國人分類 ê Dom, Münster, Kirche, Kapelle mā 齊是教堂無分類。

世俗人交德國人來往十外冬，因為學習台語文向時 ê m̄ 捌字看告示，沓沓仔按「幼加扣八」進步到有淡薄仔才調理解伊是「iù kah khàu-pē（幼甲哭爸）」(看看板：廣告招牌的台語大學問 von 何信翰) ê 14，我猶原是世俗人相信這个世界有我看 buē 著 ê 千枝萬葉並尊存無法度形容 ê 力量，sóo-tí 這篇記錄非讀書心得 mā 非好冊推薦。這篇文字單純屬於個人心情記錄。

德國電視台 ZDFneo 近來放送 1984 The Karate Kid 小子難纏 hōo 我想著《山城番子巴》李筱峰教授交吳晟老師 ê 話𫝛時 mā 想著 Hena Ma tī 第 21 期電子報 --- 收 tī 屜仔內 20 冬 ê 萬年筆「性命故事讀kah寫」。

我更加體會胡適生前鼓勵每個人都來寫回憶錄的意義；也想起史家貝克(Carl Becker)所言「人人都是史家」，以及羅斯(A.L.Rowse)所言「閱讀傳記是最便捷的方法，可以學到許多歷史。」

思故鄉、念故鄉、緬懷親情、故鄉情，大家也要實際做些事、愛護自己受傷的故鄉。.....請從庶民史開啟台灣意識與情感。

1984 猶青春 ê 我，看 Hideo Miyagi 若熥清飯 tuì 男主角 Daniel LaRusso 熥家己 ê 名無反應，看 Miyagi 先生食燒酒吐心情 mā 無要無意，2024 年歲行到日到暝 m̄ 捌改變我卻感覺伊倚我愈來愈來愈遠 ê 年歲，我想著這三段話 mā 想著這本冊，按別人 ê 故事學習歷史，m̄ 管伊是虛構抑是真實，遮 ê 故事齊反應作者行過、聽過、讀過 ê 人生，我 m̄ 捌要意 ê 歷史。

2024 翻頭看 1984 我 tuì Hideo Miyagi 先生 tuì 別人 ê ABCD 齊是狗咬豬有深深 ê 感受，我 tuì Hideo Miyagi 先生是按怎按 Okinawa 來到美國有無仝 ê 認捌，這个變化有一部份是按《Arturo ê 禮物》アトルーロの贈り物引𤆬家己行入這个本底無要意 ê 跤跡。

我是世俗人 tuì 世間宗教無一个固定 ê 認捌 mā 無一个特別 ê 意識形態，我 ê 14 是台灣字應當是啥物生張，總是迵過無仝 ê 文化 hōo 楦闊眼界理解無外國傳教士，往過 hőng 歸類 tī 無要無意舊區舊臭需要擲捒挕 ê 跤跡，無法度成做文獻 hōo 後輩有機會繼續生湠𪜶掖 ê 種子並繼續接枝湠新面肉。

這本冊是面冊猶原願意開放 hōo 無口座使用者 ē-tàng 自在行踏𪜶 ê 資料庫，彼陣 ê 我除了捷行踏《順聰款》看新冊資訊，我 mā 捷去《李江却台語文教基金會》行踏讀文章看新冊資訊，這本冊就是按李江却台語文教基金會生湠來 ê 冊單，這本冊 mā 𫝛款是請《聚珍臺灣》kā 我鬥相共按臺灣寄到德國。

冊按臺灣寄到德國，冊箱一拍開成做貓 ê 翁䀐一目隨問「這本敢是寫宗教 ê 冊？」

「你呔 ē 認為伊交宗教有相干?」

「冊皮」翁講。

注文進前我 m̄ 捌斟酌讀內文紹介 mā 清楚知影伊 ê 出版社是教會，總是自注文到交易我 m̄ 捌斟過伊敢 ē 是宣教冊彼類。這久 hōo gún 翁講一个開始成做貓開始 tuì 伊貓貓相 mā 決定若是宣教冊就當做「天父無愛鬧熱愛恬靜」ê 寄付並 kā 伊收藏 tī 冊架做妝娗就好。

情緒叨撚擲一爿，紲落來 ê 步驟愖清楚隨跟綴「導讀」讀這本冊，導讀讀煞越頭 tsham 翁分張「無剉(錯)，規欉好好，伊確實是教會出版 ê 小說，m̄-koh 伊 m̄ 是信教得未來 ê 宣教冊，伊是一本美國移民小說，按日文翻譯做台文。」

「有 14」翁講。

「我 mā 按呢認為。」

讀這本小說我搪著交讀《復活的人》相𫝛 ê 問題，捷跟綴文字思考 hōo 伊成做中國糜鹿，像「懷孕」我掠做伊是華文押尾發見伊 ē-tàng 按呢發音「Huâi-īn」。

這本冊 mā 有 tsuē-tsuē 我 m̄ 捌使用 ê 語辭交 tsuē-tsuē hām 教育部臺灣台語常用詞辭典無相仝 ê 用字，這部份 tuì 我來講 tī 代起先是礙目，不過礙目永遠是家己 m̄ 願向前行 ê 藉口，當我跟綴復活的人那讀那寫教育部臺灣台語常用詞辭典 ê 台語用字 mā 那向 ChhoeTagi台語辭典請教生份字辭，我得著 ê 寶藏是礙目無法得比並 ê tsuē。

押尾猶原愛閣講一擺，這 m̄ 是讀冊心得 mā m̄ 是好冊推薦，總是伊是一本治療我個人世界青光眼 ê 冊。

栽欉 --- 2023.06.05

翻田塗接枝 --- 2024.12.21

《Arturo ê 禮物》

アトルーロの贈り物 von David Lu 盧焜熙

譯者：Lîm Chùn Io̍ k 林俊育

㊓ 社團法人台灣全民台語聖經協會

㊞ 前衛出版社

㊑ 紅螞蟻圖書有限公司

ⓦⓦⓦ 聚珍臺灣