亂皂𥴊仔店 ⓂⒺⒾⓃⓀⒾⓄⓈⓀ

早起頓聽翁褒唆我 ê 手藝想著作家劉靜娟女仕《驚驚袂著等》ê〈番薯遮爾仔無人緣〉mā 隨想著彼日 tī Aldi 搪著 ê 趣味。

「番薯敢誠實遮爾仔好味素」一位按非洲來 ê 朋友看我揀伊食甲厭𤺪番薯揀甲遮認真 tìm 一下仔頭挨拶笑問，這个笑容佮問句 hōo 我想著按 Togo 來德國做穡 ê 阿麗搪著人建議伊「肉 m̄ 通食傷 tsuē」伊 ê 標準回答「你敢知影肉 tī 非洲 m̄ 是鞏金是金仔？」

咱攏慣勢提家己 ê 角度來看別人 ê 世界 mā 好玄咱慣勢 ê 料小是按怎成做別人 ê 特殊。

按番薯島來 ê 我 tuì 番薯 ê 感情就敢若翁 tuì 馬鈴薯 ê 目尾免徙 mā 看 ē 著伊 ê 料小少缺，總是這久 m̄ 是彼久，我 ê 料小少缺成做鞏金物，翁 ê 料小少缺猶原是窒倒街 ê 飽滇 hōo 我見著番薯 mā 成做攑香對綴 ê 人，無綴人 bué buē-tàng，特別是落價。

「你知影番薯 tī 臺灣就 tshan-tshiūnn 你 ê 白草花遐爾仔少缺 ê 無人緣，m̄-koh 自出名人 kā 伊當做保健食品來食，伊隨按吳郭魚成做臺灣鯛按呢身價反幾仔倍，恁德國決定有食著 gún-ê 喙瀾」我刁意故講。

「真有可能」翁笑應。

無人緣 ê 番薯是按怎按塗炭仔成做皇后，這窮實 mā 無啥特別，就請𠢕講話 ê 人出一支喙一直餾一直餾 tshan-tshiūnn 臺灣 ê《57健康同學會》，我 m̄ 是講《57健康同學會》kan-ta 出一支喙，我只是比喻 tsuē-tsuē hőng 認定是舊漚舊臭 ê 物，迵過專業者 ê 分張 hōo 咱有機會重(tiông)新認捌老朋友，這是一件真好 ê 代誌，只不過遮 ê 智識捷捷成做咱家己 ê 王祿仔仙，咱 kan-ta bueh 聽家己佮意 ê 物佮合社會溫度 ê 事項。

比論講，人專業者分張講「食番薯真好，有啥閣啥，m̄-koh 愛注意伊是米糧愛節」，咱人 ê 耳空 kan-ta 聽 ē 著「食番薯比食米較健康」按呢 ê 話，然後繼續成做王祿仙仔，我知影按怎食較健康。

當然，我 m̄ 是 teh 講每一个人攏有這个症頭，總是我捌有這个症頭，gún 翁 mā 有，特別是伊 tsham 爸母做伙，全世界 kan-ta 𪜶食上健康閣上知影按怎食。

Gún 翁𪜶爸母 ê 癖性是𪜶 ê 自在，我 m̄ 免閣喋詳，總是𪜶後生是 gún 翁我需要解決這个問題，起因我正經無法度逐日攏食相𫝛 ê 物過日子，像這久 hōo gún 翁 uī 伊痴迷 ê 番薯有法度疊新衫 mā 是翁某兩人平靜討論問題 tsiah 得著 ê 滋味。

「你敢知影世界米糧有 tsuē-tsuē 種?」我問翁。

「麥仔 mā 是」見聽別人問伊你敢知就驚人知伊 m̄ 知，就隨緊講一項伊捌 m̄-koh 伊 ê 捌別人並無需要。

知影伊 ê 性 mā 講甲喙甲生研 ê 無啥特別就隨 kā 一耳入，一耳出準過繼續講「咱人佮豬攏𫝛款是雜食物物，著 m̄」我講。

「豬本底...」總算發現家己 ê 病症又閣發作，伊隨恬靜等候我 ê 紲喙尾。

「Hőng 飼 tī 豬牢 ê 豬無法度自由選擇𪜶 ê 食材，這久 ê 你有法得自在選擇食食，是按怎猶原 bueh 成做實驗室 ê 猴，已經自由又閣踅轉來 hőng 關」我無指人名說人姓。

「照你揣著 ê 食譜款番薯」翁應。

「你確定」我講。

「確定」翁應。

咱人捷捷 hōo 家己 ê 認為堅定綁 tī 箍桶，這無啥 m̄ 著，起因彼是屬於家己 ê 信仰，總是家己 ê 信仰造成別人 ê 困擾，彼就 m̄ 通。

德國西南廣播電台有一篇文章 teh 討論德國人 ê 食食慣勢，其中有一段寫著「Superfood」--- 只要 m̄ 捌 tī 這塊土地出產攏是超級食物。

我 m̄ 知影彼日 ê 非洲朋友敢是按呢看待我 tuì 番薯 ê 感情，起因離開臺灣 tsiah 知影薟 m̄ 是亞洲人較捷 teh 食 ê 滋味，非洲人 mā 食足薟，而且薟甲我哀天叫地，不過我本底就無食薟，sòo-pái 叫甲按呢譀呱呱 mā 是正常範。

總是我清楚知影 gún 翁這久猶原滓著我早前 ê 癖性，話總是聽一半甚至無到一半煞落來開始做寡龜怪 ê 代誌，然後成做茶鈷呻 buē 離，這就 buē 挃，愛修正 m̄ 通 hōo 伊細空 m̄ 補，大空叫苦，像膽無去 tsiah 來喝「早知就莫按呢做」。

今仔日 ê 番薯按埃及來 ê 咱臺灣 kā 伊號做竹山番薯台農64號，看資料寫講伊適合煮糜，我捌綴德國人 kā 伊煮咖哩 mā 捌 kā 伊煮過番薯湯，照實講滋味正經無鹹無纖 ê 無聊甲食 buē 落喙。

當然，這有我家己慣勢 ê 喙斗，總是 bueh 食番薯湯我猶原較佮意肉鬆閣綿 ê 煮湯炕番薯攏適合 ê 黃皮黃肉57。 

M̄ 知是黃皮紅肉較合歐洲 ê 喙斗抑是其他，起因 m̄ 管番薯按葡萄牙、西班牙抑是非洲各角勢行跤到德國抑是法國，攏齊齊是黃皮紅肉，無咱臺灣有遐爾仔 tsuē 品種通選擇。

因為煮糜煮湯 buē 合喙，這久 ê 阿媠攏 kan-ta 這个煮法 --- 落烘箱 kā 烘甲若番薯糖按呢，這斗揣著 ê 食譜是 kā 我 ê 阿䆀敆翁 ê 阿䆀紲落來招阿花來做伴，好食甲。

雙薯玫瑰草花

...... 材料 ......

番薯，切塊　1kg

馬玲薯，切塊　500g

煠好 ê 玫瑰草花　500g

鹽、胡椒

...... 步數 ......

1. 番薯、馬鈴薯、油濫做伙落烘箱，捘200度烘35分鐘。

2. 玫瑰草花濫落去搜齊，tiàu 寡鹽佮胡椒，樂暢來食。

Das Frühstück ist sehr lecker und wir müssen das öfters Essen, sagt mein Mann.

Ich esse das Frühstück und denke was mein Mann gesagt hat.

Dann denke ich die Geschichte aus Lidl ein Afrika Mann fragt mich, ist die Süßkartoffel sehr lecker, und ein Buch habe ich gelesen.

' Warum isst du die Süßkartoffel, sie ist nichts '

Ich esse das Frühstück und ich denke an das Mädchen aus Togo.

Den Tag, als die Leute aus Europa oder American, jede sagen ' Das Fleisch ist nicht gesund, deshalbe möchte ich kein Fleisch essen '.

Das Mädchen sagt, ich habe kein Problem mit jedem Fleisch. Weil es ist Gold.

Vielleicht, an den Tag wohnen wir in Taiwan.

Du wirst das sagen.

Mann, die Süßkartoffel ist nichts, bitte kaufe die nicht, sage ich zu meinem Mann.

Rosenkohl-Süßkartoffeln-Kartoffeln

...... Zutaten ......

Süßkartoffeln in Stücke geschnitten　1

Kartoffeln in Stücke geschnitten　500g

Gekochter Rosenkohl　500g

Salz & Pfeffer

...... Zubereitung ......

1. Die Süßkartoffeln und Kartoffeln gut mischen im Backofen auf 200 Grad 35 Minuten backen.

2. Mit Rosenkohl gut mischen, dann mit Salz und Pfeffer abschmecken. Guten Appetit!

The breakfast is delicious and we have to eat it more often, says my husband.

I eat breakfast and think what my husband said.

Then I think the story from Lidl an Africa man asks me, is the sweet potato very tasty, and I read a book.

'Why do you eat the sweet potato, it is nothing'

I eat breakfast and I think of the girl from Togo.

The day when people from Europe or America say, 'The meat is not healthy, that's why I don't want to eat meat'.

The girl says I have no problem with any meat. Because it's gold.

Maybe that day we live in Taiwan.

You will say that.

Oh my dear, the sweet potato is nothing, please don't buy it, i say to my husband.

Brussels Sprouts with Sweet Potatoes and Potatoes

...... Ingredients ......

Sweet potatoes cut into pieces　1

Potatoes cut into pieces　500g

Boiled Brussels sprouts　500g

Salt & Pepper

...... Method ......

1. The sweet potatoes and potatoes well mix in the oven bake to 200 degrees for 35 minutes.

2. Mix with Brussels sprouts, then season with salt and pepper. Enjoy your meal!