亂皂𥴊仔店 ⓂⒺⒾⓃⓀⒾⓄⓈⓀ

荷蘭薯沙 tuì 歐洲人來講，其實無啥特別。

Tuì 我這位身為馬鈴薯國新婦來講，伊 mā 是無啥特別。

M̄-koh，無特別無代表伊無啥物特殊 ê 代誌 thang 記錄佮紹介。

阮翁有一个朋友，伊 ê 男朋友是前東德人。

塗肉林檎舊底 tuì 我無市，起因較食 mā kan-ta 彼幾味カレー抑是馬鈴薯條，押尾 ē 成做伊 ê Fans 是按行踏德國開始。

自本 mā 無愛食 Mayo ê 我來到德國 mā 成做伊 ê Fans，不過這段歷史已經倚我愈來愈遠，起因有歲仔烏貓姊年間，糋 ê 油 ê 按喙入去到出來 m̄ 免超過一工，這久不止需要三天，而且胃腸閣 ē 趁這个時間作怪，先生講早前食無問題，無表示現此時食無問題，確實有影。

本底我掠做我較狡怪嫌臺灣 ê 馬鈴薯條佮 Mayo buē 敆喙，押尾有機會 tī 遮熟似一寡仔臺灣留學生 tsiah 發現逐家佮我攏有相仝 ê 想法，德國 ê 馬鈴薯佮 Mayo 好食。

是講，人 tī 德國我 mā 無綴當地人分品種，佗一款落價就 bué 彼款，只要品質無䆀甲 buē-tàng bué。

原早 tsham 菜擴是死對頭 ê 翁，這馬看著菜擴，伊家己 ē 捾幾粒轉來囤。

今仔日當 leh 料理，伊講「你拍破我自囡仔時 tuì 菜擴 ê 印象」。

聽伊按呢分張，我規个人笑甲腹肚疼。

不過，做伊 ê 牽手--我論真講，實在有夠意神伊這款 ê 哭呻。

2023.03.30

一張桌兩塊盤，

一雙手挈雙箸，

一雙手挈攕佮匙。

兩个人，兩支喙，想𫝛胃 bueh 食煞來無仝味。

一支喙，白飯敆豆腐。

自看「Winterkartoffelknödel」(寒人塗肉林檎)，寒人 bué 塗肉林檎目睭攏 ē 出現 Ignaz，我實在有夠佮意這个紅龜生蟲，龜怪 ê 角色。

維基百科紹介伊是德國傳統料理，熟似 ê 美國朋友分張這是𪜶猶太人傳統美食，到底佗一个講法 tsiah 是正範？

我家己 ê 想法是兩个攏正範，起因歷史從來 m̄ 捌講我 kan-na 一款面容。

另外，傳統 ê 德國食法是搵甜甜 ê 林檎醬(Apfelmus)，總是我 m̄ 是德國，sóo-tí gún 就隨人照隨人脾土搵醬食。

我搵優格醬，gún 翁繼續伊 ê 傳統德國食法搵林檎醬。

當拄仔學習做菜，真興學習遮 ê kā 原形食物舞甲 hőng 認 buē 出伊是 Tsiā ê 物，總是心適興 ê 物 tshan-tshiūnn 這句俗諺，台灣無三日好光景，心適火一廕，興甲四界生湠 ê 風神蔭隨無見半个。

是，初初興這味，簡單一句「臭頭仔包布，防蠅(風神)」，畢竟我 ê 食食相放伴𪜶 ê 西方料理較食 kan-ta 意大利麵、Pizza 遮 ê tī 歐洲是料小，踮臺灣是 Fashion, Mode ê 僫得「好味素」，是講真久 m̄ 捌轉去臺灣蹓蹓 hui-hui m̄ 知目今 ê 食食相放伴敢猶是按呢生，不過 tī 倚 bueh 十冬前開始學習做料理，我 ê 環境確實是按呢生。

近來 gún 翁想 bueh 食臺灣水餃，我貧惰做，請伊去 Stuttgart 中國超市 bué 我 tsiah kā 伊鬥煠水餃，窮斤算兩 m̄ 算月給 hōo 牽手 ê 伊隨講「彼一逝路傷過傷本，塗肉林檎窒倒街，抑無咱來食意大利麵猴？」

「無問題」胸坎仔頓三下微微仔笑應。

彼日 ê 頓胸坎今仔日實踐，伊見著金滑 ê 麵猴隨講「這外包--ê。」

按 2016 頭路辭掉專心致意做家庭主婦，四常生活 m̄ 捌閣聽過「you've got mail」 ê 提醒。

今仔日中畫，一人坐踮客廳那聽ラジオ那食茶那讀市政府 ê 週報。

我彼个活 tī 無聲世界 ê 手機仔雄雄 tiang 一聲 kā 我按家己 ê 恬靜 khiú 轉過這个恬靜。

08.....翁設定 ê Enigma(密號)揤煞，烏趖趖 ê 畫面隨光映映閣掛「Willkommen im Kartoffelland」(歡迎來到馬鈴薯國家)，隨行向廚房檢查厝內敢猶閣有馬鈴薯佮レモン。

一項一項檢查，確定厝內攏齊有，四箍圍仔又閣賰窗仔外佮 kan-ta 家己聽 ē-tio̍h ê 聲音「較早 ê you've got mail hōo 我感覺誠有壓力，這久 ê you've got mail hōo 我感覺我是下願池」。

有人講德文 ê 馬鈴薯是按義大利文「Tarufolo」(松露)演化，我 m̄ 是語文專家 mā m̄ 是德文專文科無法度確定。

起因，學過拉丁文 ê 夜間部同學講「m̄ 捌聽過」，另外 mā 有一个講法是法文 ê 馬鈴薯有可能是按南美洲印地安人 ê 語言「Papas 」演化。

非語言專家 m̄ 知啥物是啥物，總是透過一粒馬鈴薯學著 tsuē-tsuē 無相𫝛 ê 語言是一件非常有意思 ê 代誌。

蘑菇是素食界 ê 牛排，這是我按臺灣 ê 電視台看來--ê。

蘑菇伊是 m̄ 是素食界 ê 牛排，m̄ 是素食者 ê 我無清楚，m̄-koh 我真 ài 食「各位阿菇」。

有人講，旅行就是按家己生活 甲𤺪篤篤 ê 所在換去過別人生活甲𤺪篤篤 ê 所在。

這句話 tuì 我來講挈來講料理 mā 敆味。

有一擺 tsham 德國朋友做陣食餐廳，伊看我點這隨講「你汰 ē 點這無特別 ê 料小？」

無特別閣料小... uī-hô ē 遮爾仔火燒豬頭 ê 面熟。

「我感覺這蓋好食，而且人若是 tī 臺灣朋友問講德國有啥物好食，伊是我上愛款 ê 一項物食」我講。

我個人是真佮意印度料理。

M̄-koh，gún 翁 tuì 印度料理 ê 認捌無夠深，sóo-pái 寢頭仔招伊做陣食，伊 m̄ 捌應過一句「好，來食。」

這 hōo 愛食印度料理 ê 我一粒頭兩个大。

起因，翁某做陣出門，我無可能 uī-tio̍h 伊 kan-ta 食パン抑是土耳其烘肉。

Uī-tio̍h 這个問題，我開始挽瓜揫藤。

你敢捌看過人 ê 目睭，因為塗肉林檎成做半暝月。

我捌看過。

當 gún 翁看著塗肉林檎時，伊 ê 目睭著是半暝月。

烘箱馬鈴薯條