亂皂𥴊仔店 ⓂⒺⒾⓃⓀⒾⓄⓈⓀ

早時，我 tī 車頂睏甲 kóng-kóng 叫，這久換翁踮民宿睏甲 kóng-kóng 叫兼陷眠。

日猶未斜西，一个人坐窗仔邊成做九月狗爁日，讀文佯青，那食 Ka-pi 那思路亂皂，家己就是 拍破臺語顛倒勇 2018諾貝爾文學獎得主：Olga Nawoja Tokarczuk(朵卡萩) mā 那愖翁 ê 頭燒燒，尾冷冷「我 mā bueh 跟綴你 ê 跤步踮 Pixnet 寫 Blog」押尾成做「無人來看」看我食麵綴 leh 喝燒 ê 心適興。

咂一喙交德國無宛 2 體 m̄-koh 互相客氣推捒「Gún m̄ 是 Naschkatze➀」ê Ka-pi 繼續乞食攑蠓捽，假做 Tokarczuk，一个放伊自由 ê 聲音踅翻頭轉交我挨拶。

Gún 爸爸就是這款個性，無人聽伊彈 ê 琴，伊原仔繼續做，這款態度引𤆬我成做這久 ê 我。代誌是 uī 家己做 m̄ 是 bueh 做 hőng 看抑是 uī 別人做。

早前我 buē 感覺這段話有啥物特別，這久 ê 我暫時孤單一人坐踮𫝛款按羅馬字做變化 ê 波蘭讀這本小眾文化，頭殼又閣發出這个聲「這款文體敢有人來讀？」

文學是 uī 家己創作抑是 uī 銀兩佮聲望創作？

我想歷史 tsuē-tsuē hőng 編做佚(thit)名 ê 作品，𪜶 kā 心緒轉做神奇符號 ê 彼當時，𪜶敢捌斟過市草需求？

過去 ê 心不可求，這位按大眾文化 hőng 邀請 uī 小眾文化生花妙筆 ê 大作家 ê 想法，活 tī 目今 ê 我 mā 免 uī 伊求，我 kan-ta 需要問家己，家己敢有理解 Hermann Hesse ê 這段哲理；

你佮意--ê

你奮鬥--ê

你夢想--ê

你經歷過--ê

你敢有法度知影𪜶是煩煩惱惱抑是歡歡喜喜？

Tī 五線譜跳芭蕾 ê 菜豆變化，傍(pn̄g)耳就有法度區別？

我是這粒地球細甲無人通見 ê 狗蟻，我僫理解無聲望 ê 感覺，總是我知影當我搪著齷齪就是放手 hōo 伊競爭跟綴 Hegel ê 智慧，想 bueh 知影事實就 hōo 𪜶落水平平沉，全無重頭輕 ê 互相競爭合作，tī 這个過程觀察變化湠出新枝骨，簡單來講就是按一个圓湠出另外一个圓交 W wodzie, owej płynnej materii, nie ma nic stałego --- Jan Heweliusz(水，這个物質從來 m̄ 捌固定過)。

每一个事項攏有伊 ê 特殊 m̄ 通看貓無點佮 kan-ta 想 bueh 王梨頭，西瓜尾 ê 甜蜜人生。不過，西瓜倚大爿確實較有青盲貓咬著死鳥鼠 ê 好光景。

寫到遮真心佩服《灶雞仔》ê 作者群，無𪜶綿豉 m̄ 驚無聲望 ê 態度，這久 ê 我絕對無機會享受這个 m̄ 是搵豆油，無一个甘 ê 文學，並跟綴《灶雞仔》ê 作者群享受我家己 ê 搵豆油，食著甘 ê 恬靜。

引述陳明仁先生 ê 推薦序來做我 tuì《灶雞仔》ê 作者群 ê 解說；

正雄愛參加文學獎，教育部、台南市、高雄市辦--ê，若有機會，lóng 會參加。

這本小說集，lóng 是得獎作品，有時 m̄ 是 it 著獎金名聲，i 想 beh 愛台南成立王育德紀念館，chhōe 機會 beh 請求市長，若得頭名，會 tàng 公開發言，為 án-ni，i 得頭賞，市長 soah 無來，koh 拚後屆，chiah 有賴清德出席，有機會成立王育德紀念館。

黃昭堂紀念館，i mā tàu 爭取。

徛位 tī Oder-Neiße-Grenze ê Zgorzelec 踅轉去舊時 ê 徛名 Görlitz hōo 我想著金山佮玉山《鄉史補記》踅翻頭轉來我 ê 年間，Zgorzelec 佮 Görlitz ê 差別，就 kan-ta Zgorzelec 無拄著李天送，按散凶成做阿舍，像阿餘按呢。不過，準做有阿餘 ê 福氣，無好好仔寶惜 kan-ta bueh 迎新棄舊猶是無較縒。

是講，我 mā m̄ 知影 Zgorzelec 敢正經遐爾仔了尾仔囝，畢竟波蘭有 tsuē-tsuē 雙生仔 tī 一人一家代公媽隨人祀 ê 狀況猶是維持甲真好，像 Chełmno。

Zgorzelec mā 是胡長松先生 tī《復活的人》寫著交 Siraya 有相𫝛文化祭典 ê Schlesisch。

寫著歷史地名 Schlesisch 就愛寫頂港有名聲，下港上出名 Zurek alias Sauerteigsuppe 佮維京人教堂 Stabkirche Wang。

波蘭歷史 m̄ 捌一箍芋仔番薯兼智識低路 ê 我就莫繼續乞食攑蠓捽，假仙假觸 buē 博假博，總是有一件代誌是規欉好好，無剉 ê 確定，這搭城市 ê 交易交臺中𫝛款齊是按鐵路開始。

不過，伊較無臺中 ê 好字運 tī 戰後猶維持交易 ê 好光景，這 mā 是 gún 準做語言 buē 通 mā bueh 駛過柴杙來遮歇暝 ê 因由。

向望德國有一暝 45€ ê 民宿，彼是較早睏較有眠。

向望有法度撏 45€ 歇一暝 ê 角勢，大多數是露營地。

寫著德國露營地，這幾冬愈起愈像飯店 hōo 我失心適。

Zgorzelec 城市發展 m̄ 是按工業年間開始，不過成做交易角勢是按工業年間開始，𫝛時伊 ê 徛地就敢若世界之鑰：帝國夾縫下的台灣與波蘭這本冊名𫝛款，行過歷史 Hussitenkriege mā tī 虎獅豹 ê 跤爪保護家己莫 hōo 𪜶拆食入腹。

無咱番薯島有烏水溝 hōo 𪜶做應變(ìng-piàn) ê 波蘭 tī 歷史上捷成做虎獅豹喝來就來，喝去就喝 ê 美麗角勢。

波蘭真媠，總是伊 ê 美麗有一重展 buē 開 ê 憂愁 hōo 我自私感謝大自然 ê 私心。

是講有烏水溝拄著無要意人民利益 ê 扞權者 mā 是無較縒，行過烏暗年間 ê 德國 tī 近代又閣選出一个色緻佮烏暗年間 bueh 相𫝛 ê 扞權者，Zgorzelec 佮這座城市 mā 拄好隔一條河 ê 距離。

未來 ê 德國 ē 成做啥物面肉，無人知影，總是向望人類學 ē 曉歷史 ê 教訓。

佮波蘭隔一條河 ê Görlitz 交 Zgorzelec 捌做伙申請 2010 歐洲文化首都 m̄-koh 落第，落第因由無紹介，總是我按家己行踏往過 ê 金山玉山，我個人是按呢認為這是廣東目鏡隨人佮意，畢竟 hőng 嫌䆀 ê Ruhrgebiet(德國工業要地)無比金山玉山較迷人，伊猶是入選成做歐洲文化首都。

Gún 這逝行踏 Zgorzelec 主要因由金山 Görlitz 傷本，玉山 Zgorzelec hōo gún 有機會成做阿餘，按散赤成做阿舍停跤好好歇一暝，sóo-tí 鼓井水雞，m̄ 知影天地有偌大 ê 我就莫假做博士評斷歐洲文化首都選擇 ê 要件。

這逝做伙出門行跤花佯青 ê 冊單

《灶雞仔》陳正雄

《彼年春天》廖玉蕙

《驚驚袂著等》劉靜娟

栽欉 --- 2021.08.24

翻田塗 --- 2024.06.16

➀ 致著甜路災 ê 人