亂皂𥴊仔店 ⓂⒺⒾⓃⓀⒾⓄⓈⓀ

2019 掠肥食瘦前 ê 攝相 --- 正手爿

環境真正重要，無轉去台灣 buē 感覺家己大龐。

順《醫師好辣》宋晏仁醫師佮陳榮堅醫師分張 ê 第一階段減肥食 1400卡，板膋出外送貨愛按怎莫 hōo 伊走回頭車到將時 ê 3 冬就算成功 50%，5 冬就算 90%，10% 愛寄踮銀行做予備，畢竟咱人真𠢕慢牛厚屎尿揣理由叫回頭車來載。

板膋收成 3 冬進前，gún 翁 tī 瑞典搪著甜粅粅就隨叫回頭車轉來 kā 載 hōo 伊這久 tuì 磅仔哀爸叫母「我後擺 m̄ 敢閣喙饞，請你踅翻頭，拜託。」

我是出發瑞典進前就添有氧運動(iú-ióng ūn-tōng)，磅仔放伊自由 ê 順身體變化做調整。

窮實我無想 bueh 放磅仔自由，總是磅仔一徛起去本底 ê 自在隨火化轉鬱卒。我 ê 心理健康猶無儼硬(giám-ngē)到無要意數字變化 --- 自擋仔撨到 P 檔交添運動，磅仔頂 ê 數字 m̄ 捌 hōo 我好面色，準做 gún 翁出聲講「Gún 翁瘦甲 kiōng-bueh 無看人」我猶是感覺家己傷過大龐。

我無得著厭食症，m̄-koh 我清楚知影我若閣繼續 hōo 磅仔牽龜落湳，有一日我 ē 行入這个浮冇 ê 體重囮，像學生時代仝款 150公分, 38 公斤交志玲姊姊 ê 體格猶是無法度比並。

猶未交男朋友進前我 m̄ 捌要意家己 ê 體格，交男朋了後凡勢食伊 ê 瀾食過頭，我開始要意家己 ê 體格並認定 bueh 按䆀鴨咪仔成做天鵝就愛瘦甲 T-Shirt 一穿有通仔見胸掛骨。 

總是 m̄ 管我按怎苦毒家己，我 ê 胸掛骨就是 buaih 出現。

呔討胸掛骨 buaih 出現，這久翻頭看彼久，我想交我自來胸崁有淡薄仔 hām 臉模仔膨皮有相干。

正經，這久翻頭看彼久，平平仝一仙人 ê 十冬前交十冬後 ê 消風成做兩款無相𫝛 ê 面肉，這久看彼久總算理解呔討板膋 ē tuì 序大遮爾仔。

板膋 hōo 序大有飽足 ê 肥樠點火較油光，伊 mā 是序大上自然 ê 保養品兼化妝品。

2019 板膋飽足 ê 我，準做見無胸掛骨猶是比見著胸掛骨閣較青春美麗。這 m̄ 是自我褒嗦，這是有相片有對照 ê 事實。

出發瑞典進前攝 ê 相 --- 2024 6月底

自 2022.03.08 停跤催板膋，我 mā 順各專業大眾廟 ê 分張開始調整食食慣勢按 1400 調整到 1600 並增加有氧運動交 ió-gà，我 ê 胸掛骨總算出來見人客，我 ê 馬甲線 mā 沓沓仔出來見人，我煞無一霎(tiap)仔歡喜。起因，我見著家己 mā 沓沓仔行向 gún 翁猶未 50 頷頸有就有抾襇 ê 問題，另外我 ê 手骨 mā 開始生蝶仔...

見著遮 ê 變化，我知影這久 ê 我無適合有氧運動，我需要搜揣有法度增加筋肉 ê 運動，總是人準備出發瑞典交挪威就暫時停跤放筋肉自由到轉來德國。

不過，出發進前我猶是請教 Google 大眾廟賜我智慧 hōo 我 tī 栽跤花期間有法度享受當地美麗並交驚惶相出路，起因我知影 ió-gà ê 運動量無法度交我食 ê 物相拄數。

Google 賜我這个頻道 Ergotopia hōo 小面神 ê 我 ē-tàng 恬靜 tī 露營車內底 One more, two more 10 分鐘來敨放自我情緒叨撚，無運動 ē 走回頭車 mā 學習用心跟綴環境變化來調整數字 ê 束縛。

德國討論健康 ê 節目 Doc Fischer 捌討論歐盟 tuì 成人一日食食熱量 2000 ê 建議，討論到押尾 ê 答案是，這是建議 m̄ 是每一个人攏適合，起因一个人需要 ê 火種交環境、一日運動量有關係。

這斗行踏瑞典挪威我感受著準做一日成做樹欉來食 2 千 kha-lòo-lì，厭食症 m̄ 免來相揣，我自動去做仙。

 Gún 翁 ê 甜粅粅世界瑞典逐日食甜，伊 ê 體重無啥變化，轉來德國食甜隨歕雞胿。瑞典 ê 熱人是正港 ê 五月節粽食煞，破裘猶是 buē-tàng 放 ê 寒，愈倚北爿 ê 挪威愈免講，我 tī 遐 ê 車日子無一日無包甲若熱人肉粽過。 

2024.09.15 按瑞典轉來德國 tī 德國路段搪著 Action 停車揣啞鈴，自啞鈴成做我 ê 運動伴，我皮膚 ê 抾襇沓沓仔消失， 蝶仔䘼 mā 勻勻仔成做放山雞 ê 雞腿，上重要 ê 部份是本底卯卯 ê 尻川肉，伊又閣沓沓仔肨奶 hōo 心花開。

自交板膋停戰並添運動，我無一日無佮運動撨價數過交慢牛厚屎尿過，總是一想著運動帶 hōo 我 ê 心情交身體 ê 快活，心內牽 ê 彼隻慢牛隨走甲無看牛 ê 賰 YouTube 交我撨價數。

我𠢕神去 mā 𠢕迎新棄舊，一支運動影片無法度跟綴 10 分鐘，一个手骨運動 mā 無法度跟綴 YouTuber 一斗做超過 10 分鐘，所致我 ê 一日建議運動 30 分鐘拆做三部份，跤腿、手骨、腹肚，一日五工，拜六禮拜做 ió-gà 敨筋骨。

按呢運動法無法度達成網衝 ê 體格 m̄-koh 伊改善跤骨沓沓仔無 tshan-tshiūnn 往過遐爾仔捷甪甪 ê 問題，並改善一精神莫名其妙 ê Blue。

--- 2025.01.08

2021.06

翁仔姐做陣牽手 tī 2021.07 減肥，gún 翁開 4 月日按 79公斤行到72公斤，我猶 teh 拍拚。

這斗 ê 減肥，我清楚知影 buē-tàng 食白虎湯，總是見著翁收工我猶愛做工，心情講 buē Blue 是騙人--ê。

所致，我感謝 Blog 這个空間，無伊我無地揣空間記錄這段時間 ê 變化。

2021.9.23

我算六月食菜頭，十二月 tsiah 轉嗽 ê 性地。

自決定減肥，我 kan-ta 想著磅仔頂 ê 數字愛記錄這件代誌，所致無第一手 ê 減肥第一工交紲落來 ê 變化通對照，總是有嗽總比無嗽閣較好。

這領自烏貓姊陪伴我到今 ê 打鐡仔褲 tī 減肥進前褲頭 kan-ta 有法度囊甲跤頭趺，這久有法度囊甲腹肚並硬 kā 鈕起來，這是一个好彩頭。 

2021.10.11

沓沓仔有感覺這領有通伸勼 ê 打鐵仔褲，伊漸漸 teh 閬縫 hōo 空氣楔入來做伴，按呢我 mā 來試驗彼領拍算 kā 伊送去回收場 ê 裘仔。

Hm̀，囊內䘥仔傷過繃，內䘥仔解掉有較閬一寡，按呢這領按韓國款轉來 ê Zara 裘仔 ē-tàng 繼續穿，準做 gún 翁一直講這是阿媽 ê 時行，我 mā 無要意。

寫著內䘥仔，早前無法度挩鍊(liān)仔，凡勢 mā 是內䘥仔 ê 問題...才怪。

2021.10.18

今仔日又閣莫名其妙火化 Blue，無心情寫 Blog mā 無心情 uī 食食攝一張網衝相，按呢我愛揣啥物代誌來解決這个火化？

解決這个火化 Blue 進前我愛知影 Tsia teh tuì 我起毛敲油。

石頭爸母囝 ê 翁？

自精神到今，伊猶未惹事。

早起頓食甲 buē 敆喙？

準做一日 kan-ta ē-tàng 食 1400 我猶是食甲哽胿閣滿足。

按呢是啥物代誌 hōo 恁遮爾仔 Blue？

徛起去斡向房間 ET BOITE 牛仔褲捎來囊，気持ち隨婸，褲頭交肚臍愈來愈相倚。

2021.10.30

今仔日透早一精神感覺家己 ê 腹肚桶仔敢若有較細圈一寡，隨請翁 kā 我鬥攝相，果真有攝有真相。

我 ê 肚腹消風一大輾，褲頭交肚臍愈鈕愈相倚。

2021.11.27

按《醫師好辣》學來 ê 5:2 減肥法，一日食 1400 到目今 ê 倚 bueh 5 月日，腹肚桶仔正經按若有牢枝到若落貨 ê 體格。

這月日，gún 翁 mā 決定停跤剾板膋，我 tsiah 發現我 ka̋ng 營養師 ê 分張聽走精去。

人營養師分張五日糜飯食 2000，兩日糜飯食 500 ê 5:2 減肥法，我耳空重 ka̋ng 聽做一日食兩頓，早起頓做皇帝，下昏飯做乞食 ê 六日食 1500，一日食2000。 

這久翻頭看彼久，我感謝家己耳空重，起因愛我兩日食 500，gún 翁猶未變 Mn̂g-sng 我隨成做 Mn̂g-sng hōo 伊看。

這斗 ê 減肥成果看起來交烏貓姊年歲 bueh 相𫝛，m̄ 管磅仔數字按怎變化，彼圈肚就是若林檎...

二十冬前 m̄ 知影愛按怎好好愛惜家己跟綴 Mn̂g-sng ê 媠花 tī 別人欉，媠某 tī 別人房下性命減肥 ê 二十冬後 uī-tio̍h 健康減肥結果呔討猶相仝？

Warum?

露水做海水，繼續拍拚。

2022.02.28

板膋自 2021.7月剾到目今 bueh 倚 8 月日，按相片來看腰內肉看起來有較滅寡，總是呔討彼圈肚猶原若雞胿？

較有耐心寡，這是減肥停跤期。

是講這是減肥停跤期，是按怎我 ê 跤腿愈來愈瘦?

較有耐性寡，停跤期一過 ê 四月凡勢有新收成。

2022.06.30

近來發現𬦰公寓門喙 ê 砛仔跤腿無傷接力，是按怎 ē 按呢生?

按圓棍棍成做半精白行動 m̄ 是愛較扭掠？呔討我 ē 感覺軟荍荍無法度接力？另外 mā 真𠢕落頭鬃，我敢有致著啥物問題?

應當無 leh，畢竟蹛院期間無收著歹消息，這表示我猶硬插。

這个問題 m̄ 是啥物大問題，上網路請教眾大眾廟就好，這久搪著無料長鏡就 uī 家己翕一張少女年間 ê 向望，跤腿愛瘦甲若 Barbie 有閬縫。

出門行跤花車日子我已經按 65公斤行到 52公斤，八月日減掉 13 公斤。

這 13 公斤是烏貓姊年歲 uī-tio̍h Mn̂g-sng 逼家己減肥 ê 數字，不過這个數字 tī 彼當時 kan-ta 開 3 月日就達成。

這久翻頭看彼久相𫝛 ê 13 hōo 我想著將時 ê 信息，咱人 ê 體重 ē 維持你這世人上久長 ê 數字。

烏貓姊年歲 ê 數字一直是 48 ~ 51，這斗車日子停跤 tī 匈牙利(Hiong-gê-lī)磅仔 bueh 行到 48，總是彼是人 hōo 若火燒埔 ê 溫度鬱甲連沙拉攏食無路 ê 成果 m̄ 是定期成果。

所致，我 m̄ 通跟綴 Mn̂g-sng tuì 家己弄狗相咬，我愛相信科學並跟綴阿母 ê 智慧，準做手頭 ê 鴨卵你誠要意，你猶是愛擲過山 ê 看 hōo 開。

車日子進前，我 ê 跤指甲步頻必巡，車日子轉來必巡沓沓仔消失，這个變化 m̄ 知影交我這 4 月日我閣嚴格揀物件來食敢有相干？

Uī-tio̍h 飽滇，我 ê 糜飯有 50% 是生菜盤，一塊雞襟胸拆做兩份來食，油一斗 m̄ 敢超過一湯匙大約 15g，簡單講 uī-tio̍h 食甲哽胿閣無超過 1400 好喙斗 ê 我跟綴 gún 翁 ê 歹癖喙白。

出門車日子，想 bueh 繼續喙白，現實環境 hōo 我無法度喙白，我發見新發 ê 跤指甲無閣必巡，體力 mā 比嚴格實行一日食 1400 閣較好，這交我這段日子油肉食有夠額有相干，我相信。

因為，2022.10.24 車日子轉來 ê 第一冬收冬數字是 49.9「這正港是傑克，這太神奇了。」

車日子行跤花餐廳食食

Wahrscheinlich, Die Zeit hat fast den Rekordtag erreicht.

Mit Blick auf die Zahlen auf der Waage, fünf Schritte vor und drei Schritte zurück ...frustriert mich ein bisschen.

Auch wenn ich weiß, dass dieses Phänomen durch Hormone beeinflusst werden kann.

Zum Beispiel kann jede Frau vor der Menstruation etwa 0,5-2 kg zunehmen.

Ich weiß nicht, ob die jüngste Gewichtsveränderung darauf zurückzuführen ist.

Weil ich langsam in die Wechseljahre gekommen bin.

Ja, mein Körper ist nicht mehr jung, wie mein Alter.

Ich weiß manchmal nicht, warum es sie plötzlich gestiegen und plötzlich gesunken.

Ich weiß nicht wo das Problem ist, ich kann nur versuchen die Antwort zu finden.

Also kann ich nur noch die Jeans von vor zehn Jahren rausholen, anziehen und fotografieren und mit Hilfe dieser Jeans, die Antwort finden, wie die Fotos zeigen, habe ich wirklich abgenommen, vor allem der hintere Teil.

Weiter gehts!                    

車日子行跤花餐廳食食

My husband's goal has been achieved - July ~ November 2021.

Probably, the time has almost reached the record day.

Looking at the numbers on the scales, five steps forward and three steps back ... it frustrates me a little.

Even though I know that this phenomenon can be influenced by hormones.

For example, before menstruating, every woman can increase about 0.5-2 kg.

I don't know if the recent weight change was due to this.

Because I was slowly getting into menopause.

Yes, my body is no longer young, like my age.

Sometimes I don't know why it suddenly went up and suddenly it went down.

I don't know what the problem is, all I can do is try to find the answer.

So all I can do is take out the jeans from ten years ago, put them on and take pictures and find the answer with the help of these jeans

As the photos show, I really lost weight, especially the back part.

Keep going!