亂皂𥴊仔店 ⓂⒺⒾⓃⓀⒾⓄⓈⓀ

(減肥早起頓  夏金瓜冷盤。櫛瓜沙拉)

見講「保加(ka)利亞」攏 ê 憢疑家己 ê 台語有問題，起因 tsuē-tsuē 人 m̄ 是講「台語無這个講法」就是愛講「保加(ke)利亞」，落尾閣搪著有人講愛講「勃牙利/Pu̍t-gâ-lī」。

保加(ka)利亞是我按囡仔時綴序大講到大漢 ê 講法，勃牙利佮保加(ke)利亞這兩个講法是自開始接觸台語文書寫 tsiah 知影 ê 變化。

加有分文、白音，厝內序大 tī 遮講「加(ka)」是文音，是直接綴字唸無踅做白話講法，tshan-tshiūnn 關公 ê 赤兔馬，有人講愛講「胭脂馬/ian-tsi-bé」，有人講直接綴字齊唸做文音 ê「赤兔馬/tshik-thòo-má」，我 m̄ 是語言專家，總是有一套標準通綴，我就綴這套標準，雖罔我 tuì 文白音猶原捎無啥摠頭，起因無 tī 斟酌背遮 ê 無相𫝛，總是近來看《全家有智慧》大約仔知影「照字讀」愛唸「文讀(tho̍k)音」，加一个「仔」動詞隨成做名詞，像捊頭鬃需要 ê 家私「捊仔」。

文讀音開(khui)拆 --- 《全家有智慧》精選EP265｜臺語心花開VS臺灣好歌聲

動詞成做名詞開拆 --- 《全家有智慧》精選EP274｜美女媠噴噴vs朋友人巧巧

自囡仔到開始寫和樂文 m̄ 捌讀過「勃牙利」隨上網請教伊按佗落來，tī ChhoeTaigi 台語辭典⁺ 揣著答案 mā 揣著「保加(ka)利亞」，總是字典並無詳細紹介伊 ê 起源，我 ê 14 是準做 iōng 原文「България」來講伊 ê 音 tuì 我來講 mā 較成「puh-ka-lī-á」揣無「勃牙利」後尾迵過別人分張 tsiah 知影，漢字箍真愛 kā 日本借漢字，這个勃牙利就是按日文來，總是日文 mā 有這个講法「勃爾瓦利」發音相仝，寫法無仝。

講著保加利亞就 ē 想著 gún這个朋友 A-kun，五歲 hōo 父母倩人按保加利亞「送」來前西德。

這个「送」m̄ 是風靜湧平坐船坐 Pue-lîng-ki ê 送，是萬辛千苦掩掩揜揜 ê 送。

起因，彼久猶是一个人想 bueh 離開家己 ê 箍仔攏愛經過敢若 K(Das Schloss/城堡) ê 過程靜候遐 ê 伊透世人 m̄ 捌見過面 ê 人𪜶 ê 允准 ê 冷戰年間。

Tī 啥物攏 m̄ 捌 ê 五歲掩掩揜揜 hőng 送到前西德到有機會見著爸母，是 Berliner Mauer(Pik-lîm-uî-tshiûnn) hőng 徙走 ê 幾仔冬。

我 tuì gún 爸母 ê 感情 tshan-tshiūnn 一張會透光 ê 白紙，gún 攏向望有一日 ē-tàng kā 這張白紙畫甲連 Pantone 攏揣無色號。

M̄-koh 自 Berliner Mauer(Pik-lîm-ûi-tshiûⁿ)成做觀光 ê 歷史，gún ê 白紙原仔白甲 m̄ 免好天 mā ē 透光 ê 白鑠鑠。

本底伊想厝就隨 kā 手䘼擘起來行入灶跤敨放數念 ê 保加利亞夏金瓜冷盤，這久成做日鬚行踏雺霧飄散 ê 無味無素無形。

我 ê 喙斗 mā 是，sóo-tí kā 家己準做 Colombo 手是我 ê Carabela，Google 是我 ê 大海，目睭是我 ê 召(Tiàu)鏡，每一篇食譜是我 ê 新大陸。

--- 2024.01.07 翻草重熥

夏金瓜冷盤

...... 材料 ......

夏金瓜，切片　2

Kam-má-tooh　2

洋蔥，刴幼　

橄欖油　2EL

Lê-bóng 汁　1/4TL

糖　1/4TL

蒜頭，刴幼　

洋九層塔

鹽、胡椒

...... 步數 ......

1. 夏金瓜落鼎煎 hōo 赤赤。

2. 油、lê-bóng 汁、胡椒、鹽、蒜頭、糖濫做一伙抐 hōo 齊。

3. 夏金瓜、Kam-má-tooh、Sòo-sù 、洋九層塔、洋蔥濫做一伙，樂暢來食。

(Abendessen zur Gewichtsabnahme Zucchinisalat)

Ich möchte den Salat von einem Freund meines Mannes aus Bulgarien machen.

Aber, leider...

Ich bin zu faul.

Und ich möchte nicht das Essen verschwenden, besonders Oliven.

So, suche ich neues Rezept für Zucchini.

Und das Rezept ist lecker und einfach.

Aber, wichtig ist nichts verschwendet, weil sie sind in meinem Bauch.

Zucchinisalat

...... Zutaten ......

Zucchini in kleine Scheiben geschnitten　2

Tomaten in kleine Stücke geschnitten　2

Fein gehackter Knoblauch　

Fein gehackte Zwiebel　

Öl　2EL

Zitronensaft　1/4TL

Zucker　1/4TL

Basilikum

Salz ＆ Pfeffer

...... Zubereitung ......

1. Zucchini in die Pfanne geben und anbraten bis sie goldbraun sind.

2. Öl, Salz, Pfeffer, Zitronensaft, Zucker und Knoblauch gut mischen.

3. Zucchini, Tomaten, Zwiebel, Basilikum und die Soße gut mischen. Guten Appetit!

(Dinner for weight loss Zucchini Salad)

I want to make my husband's friend's salad from Bulgaria.

But, unfortunately...

I am too lazy.

And I don't want to waste the food, especially olives.

So, I am looking for new recipe for courgette.

And the recipe is delicious and simple.

But, importantly nothing is wasted because they are in my belly.

Zucchini Salad

...... Ingredients ......

Zucchini cut into slices　2

Tomatoes cut into small pieces　2

Finely chopped onion　

Lemon juice　1/4TL

Sugar　1/4TL 

Olive oil　2EL

Finely chopped garlic　

Basil

Salt＆ Pepper

...... Method ......

1. Add the zucchini to the pan and fry until golden brown.

2. Mix the oil, salt, pepper, lemon juice, sugar and garlic well.

3. Mix the courgettes, tomatoes, onion, basil and sauce well. Enjoy your meal!