亂皂𥴊仔店 ⓂⒺⒾⓃⓀⒾⓄⓈⓀ

(減肥早起頓 卵餅皮。蛋餅皮)

今仔日是狂歡節(11.11)，tī 德國鏡報讀著匈牙利政府決定限制 tī 𪜶 ê 世界無法度接受 ê 權利。

Kā 新聞囥一邊 ê 我，那烘卵餅皮那想著彼年踮西班牙聖母堂外口步頻想著愈來愈殕 ê 伊就 tuì 聖母講 m̄ 知影伊這久過了按怎 ê 代誌。

那烘餅那問已經坐 tī 食飯廳等食 ê 翁「你敢有讀著匈牙利這條新聞？」

「有--ah，過站仔歐盟 ē 講話，因為這違背歐盟 ê 政策」翁講。

「向望每一个佮咱慣勢 ê 社會形態有頗略無相𫝛 ê 人攏 ē-tàng tshan-tshiūnn Sphan 按呢，粉紅仔粉紅」我講。

「彼是鏡頭 ê 問題」翁笑甲吭跤翹。

「Gún 講你按怎生活，你就 ē 成做彼个樣，伊是一个幸福快樂 ê 粉紅兔仔」我講。

翁 ê 紅茶牛奶，我 ê Ka-pi 攏款好，翁某做陣 Guten Appetit 樂暢食早頓 mā 那食那感謝聖母聽著我 ê 聲音 hōo 我知影這殕 bueh 30 冬 ê 果「Ruhe in frieden,  A-mén」。

自加入面冊，我 mā 捌綴人提這本冊揣人，總是我較頇顢仙揣就揣 buē 著伊。

彼日徛踮 Templo Expiatorio de la Sagrada Familia(西班牙聖家堂)外口，久年 m̄ 捌聽著 ê 聲調宛然冬至 ê 圓仔烰 tī 我 ê 耳仔鬼「未來有機會我想 bueh 來遮行踏」。

Hőng 關慣勢 ê 猴山仔無法度離開櫳仔，殕慣勢 ê 記持 tshan-tshiūnn 冬至見食 mā 食圓仔按呢 ê 無要意。

「未來有機會我想 bueh 來遮行踏.....」𫝛一粒圓仔沈落去閣繼續浮出來。

「我有一个朋友 hōo 我 tuì 伊足煞心 sannh 伊，m̄-koh 伊佮 Sphan 𫝛款攏是粉紅兔仔佮我八字 buē 有一撇」我若想著伊開始 tuì 翁講伊 ê 代誌。

翁無出聲恬靜聽我 m̄ 捌分張 ê 愛情故事。

「伊是我學校 ê 同學，伊 mā 是第一个 hōo 我認捌這个世界 m̄ 是 kan-ta 查埔愛查某按呢 ê 愛情故事」翁繼續恬靜無應話，m̄-koh 五隻指頭 m̄ 知底時出垺 ê 目箍沓沓仔撇。

「窮實 gún 無閣連絡是因為我這支關 buē 峇 ê 喙，總是人 tī 戀愛準做是放一聲臭屁你 mā-ē 提出來講」我擔一下仔肩表示我 m̄ 是刁意故，只是人生就是遮爾仔拄好，彼久 ê 男朋友伊 ê 高中同學拄好是伊 ê 仝班同學。

「彼 m̄ 是你 ê 問題，是你彼久男朋友 ê 問題，因為你有 kā 講這是秘密」翁輕輕仔按我 ê 臉揤一下，表示莫閣認為是你家己 ê 問題。

窮實我已經行出這个「問題」我無膠多毋黏，話多毋甜(gauˊ doˊ mˇ ngiamˇ，fa doˊ mˇ tiamˇ)是有 ê 人就是認為愛拍死乞食，好人 m̄ 免賠命。

我有我 ê buē 曉替人設想，伊有伊 ê 大賊劫小賊，鰇魚劫墨賊，tī 這个故事我已經學著講話 m̄ 通無關後尾門。

按聖家堂轉去人插插插 ê 露營區，我又閣想著「超級星期天」 ê「阿亮」隨請面冊阿亮 kā 我鬥相共，揣無，換 IG、Twitter 猶是揣無伊 ê 影跡，押尾 tī 一篇 m̄ 知按佗落來 ê 文章看著伊 ê 字名，揤入去看是 3 冬前 ê 記念伊 ê 影片，伊 mā 已經先轉去塗州賣鴨卵--ah。

M̄ 知自本就知影 ē 有這日，起因  Philadelphia 出現進前 Pedro Almodóvar ê 電影 mā-ē 引𤆬人去搜揣佮愖影片 ê 因佮果，所以我並無真大 ê 悲傷，無真大 ê 悲傷 mā 凡勢是家己已經行入彼个 uī-tio̍h 迷戀繼續痴迷 ê 年歲。

我佮伊 ê 文藝青年氣質，除了這點我閣佮意伊佗一點？

查埔佮查某有法度好好仔坐做伙講話，除了愛情 mā 有𫝛一項 ê 興趣，這項興趣提掉 gún 敢閣有法度做鬥食飯誠懇睏做伙，設使伊 m̄ 是 My Own Private Idaho ê Mike 佮 Scott。

遮 ê 理解攏是火車過才摃鐘 ê 體會，總是有體會猶是比一日到暗儑頭儑面閣較贏。

若看影若佮伊相辭，影片禁掉我 tuì 翁講「向望伊 tī 塗州有收著我 ê 道歉。」

「決定有--ê」翁講。

按西班牙結束栽跤花轉來德國，一暝我夢著伊微微仔笑佮我相見佮講話總是目睭一擘金，我隨 kā 伊講 ê 話 buē 記得了了 m̄-koh 少年時見佮彼陣 ê 男朋友成做相拍雞仔，我攏 ē 一个人落南揣伊敨心鬱，來車頭接我 ê 伊第一見代誌 mā 是先𤆬我去食伊佮彼位鉛粉掖無閣額 ê 男朋友𫝛款愛食 ê 鹹豆漿。

我 buē 記得伊 tī 夢中佮我講啥物話，m̄-koh 青春少年 ê 食福隨轉來相揣。

敲一粒卵，卵餅皮鋪落去，燒燒 kā 𩛩寡生菜佮香腸，配一杯 Ka-pi 佮紅茶牛奶，桌頂 ê 食食佮人數佮往過無宛2體。

我猶原清楚知影我無任何傷害伊 ê 14，所以我 m̄ 免閣綁彼个人 ê 喙，掩 buē 密 ê 藤刺。

另外，夢中 ê 伊是按我 ê 意志生湠或是伊有收著我按西班牙寄出去 ê 道歉，這攏無重要，重要 ê 代誌是咱攏愛接受家己 ê 過了代 tsiah 有法度見著有愛 ê 角勢。

人生看起來真久長，窮實是一晃過三冬，一晃過一世人 ê hōo 你無法得匪類。

「Ruhe in frieden,  我 ê 朋友」

卵餅皮

...... 材料 ......

高黐麵粉　400g

燒滾水　160ml

滾水　100ml

鹽　1TL

......步數 ......

1. 麵粉、鹽濫做伙抐 hōo 齊，落燒滾水、滾水抐 hōo 齊撋做麵粞，崁布，等30分鐘。

2. 麵粞切做一份100g，挲圓，研做薄餅，落鼎煎 hōo 熟，樂暢來食。

(Gewichtsabnahme Taiwanischer Pfannkuchen/Nn̄g-piánn-phuê)

Mein Mann hat mich gefragt, gibt es Pfannkuchen in Taiwan?

Natürlich, Pfannkuchen mit Eierkuchen zusammen, sage ich.

Pfannkuchen mit Eierkuchen zusammen, du weißt Pfannkuchen und Eierkuchen ist das gleiche, kein Unterschied in Taiwan, sagt mein Mann.

Ja, ich weiß, sage ich.

Dann was ist das, fragt mein Mann.

Möchtest du mal probieren frage ich.

Ja, natürlich, sagt mein Mann.

Sagt Bitte, weil in Deutschland nichts kostenlos ist, sage ich.

Ich bin Mayo.

In Taiwan gibt es unterschiedlichen Pfannkuchen.

Einer ist wie deutscher Pfannkuchen, flüssigkeit in der Pfanne anbraten.

Ein ist das Rezept, ohne Hefe, Backpulver, Stärke aber 100% Weizenmehl, Wasser, Salz, mit Zeit und Geduld.

Ich liebe das Rezept die Zeit und die Geduld und das einfach lecker und schnell satt.

Oje, der Pfannkuchen ist eine sehr gut Idee zum campen.

Wir machen das beim Campen zum Frühstück, Hammer!

Taiwanischer Pfannkuchen/Nn̄g-piàⁿ phuê

...... Zutaten ......

Weizenmehl　400g

Heißes Wasser　160ml

Wasser　100ml

Salz　1TL

...... Zubereitung ......

1. Mehl und Salz gut mischen, Heißes Wasser und Wasser dazu geben und mit dem Kochlöffel langsam gut mischen bis es ein Teig ist. Dann nochmal mit der Hand 3~5 Minuten kneten.

2. Den Teig mit einem Tuch abdecken und 30 Minuten warten.

3. Teile den Teig zu 100g Kugeln und zum Fladenbrot ausrollen. Dann in die Pfanne geben und anbraten bis er goldbraun sind. Guten Appetit!

(Weight loss Taiwanese Pancake/Nn̄g-piánn-phuê)

My husband asked me, are there pancakes in Taiwan?

Of course, Pfannkuchen and Eierkuchen together, I say.

Pfannkuchen and Eierkuchen together, you know they are the same.

They are the same as Germany in Taiwan, says my husband.

Yes i know i say.

Then what is it? Asks my husband.

Would you like to try it, I ask.

Yes, of course, says my husband.

Say please, because nothing is free in Germany, I say.

I am mayo.

There are different types of pancakes in Taiwan.

One is like German pancakes, frying the liquid in the pan.

One is the recipe, without yeast, baking powder, starch but 100% wheat flour, water, salt, with time and patience.

I love the recipe, the time and the patience and it's simply, delicious and easy to be full.

Oh, by the way, this is also a good idea for camping.

When we are camping, we like to make this for breakfast.

Taiwanese Pancake/Nn̄g-piàⁿ phuê

...... Ingredients ......

Bread flour　400g

Hot water　160ml

Water　100ml

Salt　1TL

...... Method ......

1. Mix flour and salt well, add hot water and water slowly mix well with a spoon until it is a dough. Then knead again by hand for 3 ~ 5 minutes.

2. Cover the dough with a cloth and wait 30 minutes.

3. Divide the dough into 100g balls and roll out to make flatbread. Then add to the pan and fry until golden brown. Enjoy your meal!