一冬按年頭行到年尾，我 ê Muse mā tshan-tshiūnn 西方 ê 年節 tī 這睏仔倒轉去圍爐無時間佮我盤撋 hōo 我規仙人見著電腦 m̄ 知 bueh 做啥代誌，總是烏陰天是食茶配冊 ê 好日子。
雖罔，烏陰天是食茶配冊 ê 好日子，我 mā m̄ 是彼款規日有法度佮冊成做米糕𣻸 ê 人，特別是一想著猶有 tsuē-tsuē hōo 家己感覺無整理 ê 事項就規个刺疫，像 Blog ê 相片文字更正(king-tsìng)。
我知影無人要意遮 ê 代誌，總是我要意，這个要意就 tshan-tshiūnn 有 ê 人認為出門就是愛化妝，有 ê 人認為 m̄ 免按呢 ê 簡單。
那調整文字，那更正相片文字，那增加按公視台語「台語智識辭庫網」mā 篩選文章佮食譜，我發見按 2019 到今 ê 家己有真 tsuē 變化，特別是我猶原 tī 網路賴賴趖 m̄-koh 這賴賴趖已經 tsham 往過無相𫝛，我 buē 閣 uī-tio̍h 一个生份 ê 留話跳童抑是無料提供我 ê 時間，甚至感覺無好禮仔佮人交陪是一件失禮 ê 代誌，我就是我，這个 Blog 是我無𫞼柴杙 ê 田園 m̄ 是刁工 uī 別人起造 ê 田園 tsiah 簡單。
按年頭行到年尾，除了遮 ê 事項，我 mā 開始清家己 ê 堅持，tshan-tshiūnn 本底猶 ē 踅 ê 開放面冊迷眾頁，這久規个攏筅黗，我無需要遐爾仔 tsuē ê 四常信息，準做彼當時是 uī-tio̍h bueh 得著第一手資料像新冊出版，總是 tī 這个信息窒倒街 ê 年間，你無揣信息，信息 mā-ē 自動挨拶，像頂站仔踅冊店，我 ê 手機仔 mā 開始出現「50 本年度最佳讀本」ê 紹介，特別是我是揣四角字，手機仔煞推薦肚胿仔字，這敢 m̄ 是「世界大同」ê 一款，sóo-tí 遐 ê 社群媒體𠢕人真正無欠我一人，是講我 mā 無 ka̋ng 揤讚我是 leh 做啥茶鈷呻 buē 離。
總是，我 kan-ta 想 bueh 講，我佮意這款踅轉來原始食穿 ê 生活，我 ê 14 是你 bueh bué 一罐豆油，你 ē 出門去踅去揣，這間揣無換別間，若是 bué 無家己 bueh 愛 ê 豆油 mā ē-tàng 試別 ê 口味，tshan-tshiūnn 這本《獨裁者的廚師》自伊出版我見過伊幾仔擺，總是攏鼻無鼠(趣)味，押尾 tī 聚珍臺灣決定 kā 抉落去 kan-ta 我感覺我 bué ê 冊無夠額按呢 niā-tiānn。
2023 賰無到五支指頭仔 ê 時間，餾舊文讀著這篇，食譜已經確定 buē 閣熥，起因我自本就無愛食サラダ，彼陣記錄サラダ拄好搪著翁某 teh 糋膩瓤油 mā 猶 teh 揣敆喙閣 ē 飽脹 ê 料理，tī 彼段猶捎無摠 ê 日子サラダ是上保險 ê 食食 mā buē hōo 食食文化無相仝 ê 2个人 uī-tio̍h 食食冤家量債，畢竟我 tuì 成做天霸王無興趣 mā 無興一日到暗 uī-tio̍h 食食 teh I am angry 吵家抐宅。
這份食譜是 gún 翁按無料簞笥紮轉來 ê《KOCHEN! DAS GELBE VON GU》遐看來並無照單全收綴 teh 做 ê 成果，這本食譜冊無任何相片 sóo-tí 我 m̄ 知影伊自本 ê 生張生做啥物款，總是我知影伊是 Pilaw 華語講「手抓飯」ê 德國版本，我 ê 14 是伊 ê 主體猶是 Pilaw m̄-koh 疊德國衫，本底是 kā 手做飯匙，這久是湯匙做手。
2023 年兜 gún 翁猶是 m̄ 食𪜶老母款 ê 敏豆，2023 年兜 gún 翁已經 m̄ 知款幾斗「豆仔」轉來 hōo 我料理閣講「豆仔好食甲愛三不五時料理來食」，是啥物因端 hōo 喙白閣慼豆仔 ê 人有這款改變，無啥物因端就 kan-na 我願意接受 gún 翁 ê 喙白佮慼，紲落來 tī 問題內底理解伊 ê 想法佮仝理伊 ê 感受，m̄ 是綿精纏綴𪜶老母「我是恁老母，我煮啥你就愛食啥」 ê 無食閣 ē hőng siau。
這款提「愛」來包裝家己 ê 霸氣佮自私 tī 囡仔閣細漢有應效，大漢就真正愛看人款。
我 ê 天公伯，我又閣咸豐三，講到今。
敢有？無--neh，我無一碗飯熥 buē 離，起因這是另外一回事。
是，遮是我 ê Blog 我講了準算。
2023 冬尾，越頭看往過 ê 文字記錄，我猶原 bueh 閣寫一斗，寫 Blog 正經是一件好慣勢，起因伊 hōo 我敨放齷齪 mā hōo 我繩家己 ê 問題並搜揣改善 ê 方式，像無拄好又閣搪著 Mǹg-sǹg 佮 Thi-bī 我 ē 按怎生？
Buē 按怎生，起因 Thi-bī 愛踅金龜磨無表示我 mā 愛綴 leh 踅佮磨。
曷若是我家己去揣 Mǹg-sǹg 佮 Thi-bī，搪過一擺就 m̄ 免綿精米糕𣻸，準做𪜶看起來真正派抑是可憐代需要幫贊。
是，過了代就 kā 放水流免閣惜命命 m̄ 願放，畢竟我是活 tī 自由年間，另外人 Hegel 有交代；
Die Weltgeschichte ist der Fortschritt im Bewusstsein der Freiheit(世界歷史是自由意識 ê 進步)。
紫色 ê 字辭攏是按公視台語台辭庫網讀著 ê 新辭。
「優格」本底是寫「Yogur」，這是按 gún 二姊遐學來--ê，Yogur 是西班牙語，我想 bueh 保留這个講法，總是臺灣有家己 ê 講法，按呢我就照咱家己 ê 講法記錄，畢竟加一个語辭，加一个音階。
「新娘衫/迷迭香」佮「薰衫草/薰衣草」攏是我料理 Kam-má-tooh 醬上佮意 ê 芳料草，m̄-koh 往過 m̄ 捌直接寫𪜶 ê 名，起因 tī ChhoeTaigi 請教 ê 台語講法我感覺 buē 合我 ê 脾土，tshan-tshiūnn「土撥鼠」公視台語台 kā 翻做「番鼠」總是我較佮意這个按德語直接翻譯 ê 名「大理石鼠/Murmeltiere」，窮實德語直翻是「大理石動物」，是按怎 ē 按呢號名，我 m̄ 知影，總是我相信這佮伊 ê 起源有關係，伊蹛 tī 大理石山(Alpen)，寫到遮愛展一下，我捌 tī 瑞士 ê Alpen 佮𪜶保持距離 ê 相拄搪，𪜶古錐甲 hōo 我想 bueh 佮𪜶蹛做伙。
有新辭，免家己愖，蓋幸福。
--- 2023.12.26
敏豆挽肉秮仔飯
...... 材料 ......
敏豆，切橛 400g
秮仔 150g
洋蔥，刴幼 1
挽肉 200g
Kam-má-tooh，切塊 2
滾水 500ml
蒜頭，刴幼
鹽、胡椒
...... 步數 ......
1. 洋蔥、蒜頭落鼎芡芳，Kam-má-tooh、新娘衫、薰衫草摻落去炒軟，200ml 滾水濫落去煮20分鐘絞做醬。
2. 挽肉落鼎炒 hōo 赤赤，敏豆、秮仔、Kam-má-tooh 醬、300ml 滾水濫落去搜 hōo 齊，捘䆀䆀仔火煮甲收水。
3. Tiàu 寡鹽、胡椒，樂暢來食。
Weinachten habe ich nicht zu tun, dann sortiere ich die Rezepte aus die ich nicht mag und das was ich geschrieben habe.
Jetzt ist 2023, ich schaue auf die Artikel zurück, ich werde sagen, das Problem ist noch da.
Ich meine Sozialen Medien Problem ist noch hier, aber jetzt für mich, das ist wirklich mir egal, weil ich weiß egal wo ich bin, Ich habe keine Lust, berühmte Menschen zu sein, aber ich habe Problem mit meinen Mann über das Essen, und das Problem ist wichtig für mich.
Wie das Essen früher mag er die Bohnen nicht, aber jetzt ist ok, obwohl da gibt noch etwas beschweren, aber weniger als früher.
Das ist wichtiger als jemand den ich nicht kenne und mir sagt, hey, blah blah blah....
Hirse mit grünen Bohnen
...... Zutaten ......
Grünen Bohnen in Stücke geschnitten 400g
Tomaten in Stücke geschnitten 2
Fein gehackte Zwiebel 1
Fein gehackter Knoblauch
Hackfleisch 200g
Wasser 500ml
Hirse 150g
Kräuter
Salz ＆ Pfeffer
...... Zubereitung ......
1. Zwiebel mit Knoblauch in den Topf geben und anbraten bis sie goldbraun sind, Tomaten dazugeben und anbraten bis sie weich sind.
2. 200ml Wasser mit Kräuter dazugeben und gut mischen, dann ca. 20 Minuten kochen.
3. Hackfleisch mit Bohnen in die Pfanne geben und anbraten bis sie goldbraun sind.
4. Hirse mit Hackfleisch, Bohnen und 300ml Wasser in den Topf geben und gut mischen, dann auf kleiner Stufe kochen bis das Wasser weg ist.
5. Mit Salz und Pfeffer abschmecken. Guten Appetit!
Christmas I have nothing to do, then I sort out the recipes I don't like and what I have written.
Now it's 2023, I look back at the articles, I'm going to say the problem is still here.
I mean social media problem is still here, but now for me, I really don't care because I know no matter where I am, I don't feel like being famous people, but I have problem with my husband about food, and that problem is important to me.
Like the food before he doesn't like the beans, but now is ok, although there is still some complaining, but less than before.
That's more important than someone I don't know telling me, hey, blah blah blah....
Milet with Green Beans
...... Ingredients ......
Green bean cut into pieces 1
Tomatoes cut into small pieces 2
Milet 150g
Water 500ml
Finely chopped onion 1
Minced meat 200g
Finely chopped garlic
Herbs
Salt＆ Pepper
...... Method ......
1. Add the onion and garlic to the pan and fry until golden brown, add the tomatoes and fry until soft.
2. Add 200ml water with herbs and mix well, then cook for approx. 20 minutes.
3. Add the minced meat and beans to the pan and fry until golden brown.
4. Put the millet, minced meat, beans and 300ml water into the pan and mix well, then cook on a low heat until the water has gone.
5. Season with salt and pepper. Enjoy your meal!
留言列表
冊 ▪ Bücher ▪ Books (4)
