我 tuì Heilbronn 海布隆 ê 記持 tshan-tshiūnn 兔仔 ê 魚釣仔 Kan-ta 一尾魚。
第一斗行踏 Heilbronn 主要是彼陣猶是男朋友 ê gún 翁驚我一世人無機會交伊掠外 ê 德國人成做朋友盤撋，就大主大意 kā 我報名𪜶朋友 ê 食酒團。這个大主大意 ê 報名押尾成做我 tuì Heilbronn 上䆀 ê 記持，不過我 mā 感謝翁 ê 大主大意，因為伊 ê 大主大意 hōo 我生湠這个新智慧，雖罔彼陣是心狂火著，總是猶是感謝這逝風火著 ê 行跤花，無伊這逝久見再相會 ê 行尞猶是白汫無素 ê 工業化城市交大學城兼 gún 翁剾洗 ê Hauptstadt von Kebab(土耳其烘肉首都)。
Heilbronn 市中心 ê 土耳其烘肉店近來 mā 成做當地政府需要立法 ê 議題 --- Schöner ohne Döner? 無土耳其烘肉 ê 美麗。
第一逝行踏 Heilbronn m̄ 捌見過兔仔釣魚，第二逝盤車無斟酌看 Necker 河岸變化，這逝交翁做陣行踏 Heilbronn 順車頭路(Bahnhof Strße)聊聊仔步輦到以 Neckar 內喀(luē-khe̍nnh)河河岸做舊城柴杙 ê Friedrich Ebertbr. 腓德烈.艾伯特橋，見著金兔釣魚想著食酒團 tuì 亞洲人 ê 死板想法，想 bueh 開喙成做六月蚶，Heilbronn 出名 ê 輕鐵 mā-ē 做地下鐵 ê 車幫慢慢仔倚近，退一大步 kā 彼日 ê 記持 mā 送 hōo 輕鐵。
順 Friedrich Ebertbr. 腓德烈.艾伯特橋寬寬仔步輦到舊城，越頭問金兔仔你敢知影「Das Käthchen von Heilbronn」tī 佗落？
金兔仔無應聲，身軀邊綴梯𬦰落河岸咖啡廳取景閣綴梯𬦰懸分張新發現 ê 翁笑瞇瞇講「遮有栽柑仔蜜，你有柑仔蜜相片通楔 Blog。」
我順伊手指 ê 角勢貓貓相，現代妝娗藝術真正 m̄ 是我這款低路人通理解 ê 美麗 mā 好玄近代德國人按怎看待𪜶消失 ê 藝術。
Heilbronn 是 Baden-Württemberg 巴登.符騰堡邦第六大城 mā 是德國頂港有名聲，下港上出名 ê 紅酒之都，並是 Heinrich von Kleist 海因里希．馮．克萊斯特歷史歌劇 Das Käthchen von Heilbronn 凱蒂仔城(戲文) ê 原鄉。
這个 tī 西元一世紀就成做羅馬人柴杙要地 ê 古都，𪜶 ê 後代按怎看待一場戰爭 kā 千外冬 ê 影跡舞甲若《看見李火增》kan-ta ē-tàng tī 幸運保存 ê 相片內底解好奇，我這个 Fremd 外埠人 mā 好奇甲。
Heilbronn 第一斗出現 tī 神奇符號是西元 741 年，彼時 ê 伊號做 villa Helibrunna，意思是土地 ē 浡水 ê 角勢。
1050 Heilbronn 成做南北二路交易要地，1255 扞權者換手並劃入 Württemberg 符騰堡 ê 領地。
巴登.符騰堡是二戰 1952 年 tsiah 出現 ê 聯邦名稱，這部份 ē-tàng 看這支影片 Dialekte Hotline: Badisch，巴登人按怎講，特別是講著一講著 Baden-Württemberg kan-ta schwäbisch(規个族屬 Württemberg)這段。
講著巴登語交施維比許語，buē 曉聽祖先話 ê gún 翁聽我講德語捷哭呻，你 ê 通用德語透濫著這兩爿 ê 語法交腔口。
聽伊按呢哭呻我 kan-ta ē 按呢回應，我家甲徛遮 m̄ 入港隨灣，入鄉隨俗，我敢 bueh kā 德國過甲若美國，像你臺灣若行灶跤猶原 kan-ta 這句，做仙。
1281 年 König Rudolf I. von Habsburg Heilbronn 哈布斯堡海布隆國王魯道夫一世賜 Heilbronn 城市權利，轉白話來翻譯就是 Heilbronn 是一搭屬皇帝無屬貴族管理 ê 城市。
紲落來大約 tī 1300 年，Heilbronn ê 建城資料新添一搭有市政廳 ê 市場交 1278 起造，1529 完工 ê Kilianskirche 聖基里安教堂。
1306 年 順 Katharinenspital (Heilbronn)➀ ê 路線建立病院、醫療照護系統。
1322 年目今 ê 隔壁厝邊拜仁邦國王 Ludwig IV. (HRR) 賜伊最高管轄權。
1333 年 Heilbronn 因為河岸 ê 水力發電磨間交港口 hōo 伊成做市草𤆬頭羊 mā 因為水路規碗捧 hōo 伊成做德國 ê 小威尼斯。
➀ 民間醫療
1371 按Karl IV. (HRR) 神聖羅馬帝國皇帝 Karl 四世提著自治權利，成做帝國 ê 自由市，一直到伊成做符騰堡大公國 ê 一部份。
紲落來 ê 歷史變化...儉起來。
三十冬戰爭(1618 ~ 1648) Heilbronn 交帝國其他城市鄉鎮相𫝛 m̄ 捌因為伊是自由市交戰爭 hām 瑞典(1633)，法國(1688)相閃身。
紲落來 ê 1770 年，Heilbronn 按小威尼斯成做德國上重要 ê 牛豬屠角勢。
工業革命(1760 ~ 1840)進前 ê Heilbronn mā 跟綴彼久 ê 時行，起造 tsuē-tsuē 法國洛可可風格(Rococo 1730 ~ 1780)建築，工業革命開始 Heilbronn mā 跟綴時代 ê 跤步成做 Württemberg 重要工業要鎮。
四常寫著 Rococo m̄ 免 kā 蛇添跤，總是踮德國 Rococo 有兩種，一種法國式，一種德國式 ê Friedrich der Große Rococo 建築，像 Schloss Sanssouci。法國交德國 Rococo 有啥無相𫝛，低路人看 buē 出來，m̄-koh 學著 ê 智識愛臭頭包布，防蠅(風神)一下。
Götzenturm 向時 ê 城門
起造 tī 1392 年，懸 30 米徛位 tī 城門西南爿 ê Götzen 高塔，推測伊 ê 砂石是 1361 年按 Klingenberg (Heilbronn)運來到 Heilbronn。
Götzen 交城內其他 ê 高塔相比並，伊屬紅嬰仔歲數猶無一个定名，當地人 kā 伊稱呼做 Neuen Turm 新塔抑是 Viereckiger Turm 四角塔過 400 冬。按這个字名行過 400 冬後，伊受歌德(Goethe) ê 戲文 Götz von Berlichingen 主角 tī 這座塔頭前死亡成做出名塔 --- Götzenturm(戈茨塔)。
Götz 是歷史人物，伊確實 hőng 監禁 tī Heilbronn m̄-koh 伊並無 hőng 監禁 tī Neuen Turm 新塔，伊 hőng 監禁 tī Bollwerksturm 堡寨塔 a.k.a Hexenturm 尪姨塔。
Götzturm ê 面肉交往過已經無相𫝛，伊目今 ê 面肉是 19 世紀尾翻新 ê 生張，自 1985 年 Hubertus von der Goltz ê 雕刻 Über dem Abgrund 橫越(huâinn-ua̍t)萬丈深坑一直交伊相放伴。
St. Kilian Kirche 聖基里安教堂
目今 ê Heilbronn 舊城交新城若無猶原徛挺挺 tī Neckar 河岸 ê 城門，伊 hōo 人真正僫區別家己是徛舊迎新抑是徛新迎新。
Heilbronn 自 1940 uī-tio̍h 一个人 ê 奮鬥 mā hōo 伊跟綴起厝千工，拆厝一陣風 ê 隊伍，承美國人 ê 炸彈到 1944.12月，規个老城交西爿 ê Köln 科隆相𫝛，千外冬 ê 歷史跤跡跟綴炸彈一目𥍉仔窮空，連肉幼仔攏揣無。
交 Heilbronn 𫝛款沐著打馬膠(Pech gehabt，歹運) ê Köln 無 Weißenhorn 魏森霍恩 ê 也著神，也著人 ê 影響，總是伊 tuì 按歐洲生湠到美洲 ê 後裔子民交德國子民有伊 ê 無法度目睭金金看伊傷重 ê 重要性，Köln tī 規个老城承炸彈承甲無地揣烌通看，德國第三帝國總算開竅 m̄ 通繼續三代粒積，一代窮空。
Rathaus/市政府廳
Heilbronn 目今 ê 歷史建築齊是順原稿重新起造，像行過 251 冬 tsiah 完成 ê St. Kilian Kirchen 聖基里安教堂是戰後重新一磚一瓦 kā 起轉來。
St. Kilian Kirche mā 是 Heilbronn 重要地標，交伊徛相倚 ê 市政廳有一个北爿 Goslar 哥斯拉相𫝛 ê 機械時鐘。
Goslar 是礦工逐日透早 9點、中晝 12點、下晡 3 點交 6點出來遊行，Heilbronn 是兩隻牡羊(bóo-iûnn)逐日照地支出來相觸。
來 Heilbronn 行踏三斗，三斗 m̄ 捌見過牡羊出來相觸，特別是這斗交 gún 翁準時正中晝前 10 分鐘到位，𪜶猶原無 bueh 出來挨拶，呔討按呢生 let it go 免纓纏。
起因，我尊重 mā 理解世間事有花缽仔種菜，無緣這項代。
這逝 Heilbronn 行跤花，因為清楚家己 ē uī 伊寫一篇文章做記念，sóo-tí 資料有較認真䀐一遍，總是栽 tī 神魂 ê 迎新棄舊敢若擲 buē 掉...前一暝 tsiah 見 ê 相片，隔日相見隨嫌𪜶䆀才抑是無特殊殊無想 bueh uī 𪜶了 Blog 空間。
這久巡田園翻田塗發見 m̄ 是 Käthchenhaus 䆀才，是我致著未食硞硞綴，食了嫌漚貨 ê 歹癖。
早前有機會去小義大利 Little Italy 抑是南瓜屋食一頓飯，規仙人 buē-su 若真正 tī 歐洲 ê Happy，這久 m̄-nā 跟綴張國立《一口咬定義大利》 mā 實踐鄭華娟《花內褲排排掛》 ê 生活齊 hōo 我感覺白汫無素閣飫喙。
Mensche........
一目那看聖基里安教堂自 1857 浡 buē 出聖水 ê Siebenröhrenbrunnen 七管聖泉，一目那看世界第一間百貨公司 Woolworth，我猶是踅翻頭轉去市政廳踅菜市交佯(tènn)青(tshenn)。
人是真正讀文做文青，我是讀手機仔假文青。
不過，我愛講我真正愛行跤花 --- Tsuē-tsuē 人愛讀書，tsuē-tsuē 人愛旅行。
跟綴當地人踮遮佯一睏青，想著街頭鬧熱 ê 甜路市集隨越頭 tuì 認真讀書 ê 翁講「我認真讀書 ê 翁，你繼續踮遮飼冊蟲(Bücherwurm)，我去 hōo Wertvoll Wool 飼。」
「按呢我愛 tī 佗一層交你相會」翁笑問。
「一層一層巡」我應。
遮 ê 書豐沛百樣，總是我個人有這个怪癖，一本無法度讀 hōo tsiâu-tsn̂g ê 書，準做興趣趣我 mā buē 借來看。
我這个癖 hōo tsuē-tsuē 朋友笑講無彩錢，總是隨人有隨人 ê 癖，敢 m̄ 是。
出發 hōo 有價值 ê 羊毛飼 mā uī 家己 ê 虛華攝一張仔相 --- StadtLesen 城市閱讀，這久 ê 我 mā 是城市閱讀。
Gún 這逝 ê 行跤花猶原是 bué 49箍全德國月票行踏 Heilbronn。
這逝行跤花 mā 受天公保庇 m̄ 免跟綴頂逝 ê 貢德爾斯海姆 Gondelsheim 臨時臨曜成做逐日頭 ê 人半路替換路線。
我 tuì Heilbronn ê 記持除了一杯酒食煞隨心肝掠坦橫 kā 食酒團放粉鳥掠外，猶有這兩件到今猶原燒烙 ê 記持。
食酒團 ê 故事 tshan-tshiūnn 走腹，腌臢物一敨放就免閣纓纏呔討我 ē 遮歹命愛搪著遮 ê 龜鱉叨趖，總是這件代誌愛記錄清楚。
我徛位 Baden. Baden 巴登.巴登，招團 ê 朋友交會合車頭齊 tī Baden 巴登首府 Karlsruhe 卡爾斯魯艾，貼心 ê 朋友就請我先踮 Baden. Baden 拆一張 5 人團體票，賰 ê 4 个人 ê 車錢等我人到 Karlsruhe tsiah 交𪜶做伙拆數。
自我人一到 Karlsruhe Hauptbahn 中央車頭到半路離開，我 kan-ta 收著朋友 ê 車錢，另外三个揹仔客齊佯戇無撏半點錢，mā m̄ 捌 buē 記得愛六月蚶，開喙臭 kā 我臭甲連朋友 mā 看 buē 落去，m̄-koh 伊交我𫝛款齊是外國人，無想 bueh 惹代誌，特別是彼陣 ê 伊已經申請德國護照。
這久翻頭看彼久，彼陣 ê 風火著成做記持 kiōng-bueh 挓 buē 著 ê 火，總是彼陣 ê 風火著引𤆬我理解，別人 ê 青光眼交我一屑仔攏無底代，我 m̄ 免 uī-tio̍h 𪜶 ê 番仔火油燈 teh 艱苦罪過。
離開酒食團，德語文讀講無幾句 ê 我一路青盲看告示 --- 無彩工，愈行愈驚惶，愈行愈感覺家己 hōo 魔神仔牽去，隨四界貓貓相看有活人無。
Tī 規山坪齊是葡萄園 ê 打馬膠路揣出路，翁 mā 敲電話來關心牽手 ê 狀況「你人現此時 tī 佗落？」
「葡萄園。」
「我講庄名。」
我無應話，翁隨知影牽手 m̄ 知影家己 tī 佗落，隨講「揣一个人 kā 電話交 hōo 伊。」
「有見著半个活人我 tsiah 敲電話 hōo 你」電話隨掛掉。
德國 m̄ 是一个𠢕 hőng 揣無路 ê 角勢，總是讀無德文兼 buē 曉讀地圖 ê 我捷 kā 德國行甲若迷宮行 buē 出去....
「你揣著人抑未?」
我想 bueh 應無，一个人影按倒爿葡萄欉行過正爿葡萄欉「我若看著人，你等我一下」無顧禮數隨踏入人兜葡萄園，揣著人隨文文仔輕聲說「Hallo」，注心 tī 葡萄欉 ê 序大寬寬仔擔頭看 Tsiâ 遮爾仔好膽行入私人地盤。
我知影家己無禮數，繼續 kā 10 分 ê 笑容湠到 100 分兼 kā 手機仔㧣 hōo 序大講「ich, Problem, Bitte？」
序大隨 kā 手頭 ê 家私囥踮塗跤，手機仔接過手隨「Hallo」紲落來那交 gún 翁講話那 tuì 我微微仔笑。
「Bahnhof」序大 kā 手機仔 hâinn hōo 我手指頭前請我綴伊行，跟綴序大 ê 跤步行出葡萄園，序大手若指德語若講，我齊是鴨仔聽雷交大目新娘揣無灶，揣無車頭 tī 佗落 m̄-koh 認真 tìm 頭表示，聽無德語看有比手畫刀。
序大看我頭 tìm 甲 kiōng-bueh 斷做兩橛 mā tìm 一下仔頭表示按呢伊 bueh 轉去繼續無閒，互相告別，我隨敲電話 hōo 翁，照伊講 ê 路線行無五分鐘，車頭就在眼前。
按目今已經 buē 記得 ê 車頭坐火車轉來到中央車站，m̄ 驚牽手 phàng-kìnn ê 翁閣出主意「Heilbronn ê 輕鐵 mā 走火車路線，你 ē-tàng 試這條路線轉來 Baden.Baden。」
三輪車 ē-tàng 走汽車 ê 速度，無試呔 ē-tàng，隨照翁分張 ê 車幫上車，紲落來繼續揣無路，因為伊 ê 車幫 kan-ta 報一半。
按伊報 ê 車幫坐到尾站，車務人員按監視螢幕見著我猶原若祀佛公 buē 振 buē 動無落車，Mài-kù 揤落發現我無反應，Mài-kù 閣揤一斗我隨成做燒鼎內 ê 水雞跳起來，傱出車門，輕鐵 mā 隨向月台辭別放我一个人孤單交暗頭仔 ê 日鬚做伴。
「這久無閒，較晏 tsiah 講」罪魁禍首無閒，自動拆票機又閣死殗殗 --- 暫時無提供服務，這聲好矣....
當我按算踮遮坐甲手機仔家己響，月台沓沓仔有人聚集，我 mā 開始一个一个人金金相，總是遮是講德語 ê 德國，無一个人接續我後壁 ê I would like to know.....。
當我按算繼續祀佛公坐踮月台等手機仔喨，一位非洲裔太太行倚相借問講「我 bueh 轉去 Rastatt 拉施塔特，你綴我行。」
愛 ê 連結 Liebe verbindet...
規段話我聽有，m̄-koh 佗位是 Rastatt 拉施塔特？
猶原是黃紅色水 ê 輕鐵入站，捎無路 mā 捎無 Rastatt 是佗位 ê 我就順這位太太 ê 跤步上落車交盤車到熟似 ê 車頭出現，我 tsiah 知影 Rastatt 是佗落。
Rastatt 是 Bade.Baden 第二个我上捷出入 ê 車頭，不過因為我慣勢讀文字無要意聲音，所致當伊按文字成做聲音，我 m̄ 捌伊是 Tsiâ。
交非洲裔太太相辭，本底洘秫秫 ê 車廂 mā 賰無幾个人，我心安草厝穩，雙目金金跟綴窗仔外 ê 景緻寬寬仔駛入 Baden.Baden 月台。
豆腐決定 buē 造成著災
這久翻頭看彼久，認為 ê 有出脫窮實是幻想。
遮是德國 m̄ 是說英語 ê 國家，我捎別人兜 ê 語言當做家己主要 ê 語言，莫怪捷 teh 踅迷宮 hōo 家己著災。
這久 ê 我 buē 閣捎別人 ê 語言成做別人兜 ê 共通語，這久 ê 我 mā 歡喜接受別人認為 ê 無四配是自然美，像這 hőng 嫌伊交街仔路無四配 ê 北海(Nordsee)交東海(Ostsee) ê 沙埔椅，我認為伊誠媠，因為伊按故鄉徙位到他鄉，伊猶原是伊家己 ê m̄ 捌改變，唯一 ê 改變是伊入港隨灣，入鄉隨俗，邊仔無𫞼 500 萬𫞼花矸 hām 麥仔酒桌。
下晡5點開門，Gún 提供菜蔬生菜盤，各式各樣 ê 葡萄
著，kan-ta 葡萄，發酵 ê 葡萄，讚甲 ē 觸舌 ê 酒
Heilbronn ê 紅酒是頂港有名聲，下港上出名。
Gún 行踏 Heilbronn 無 uī-tio̍h 紅酒，透早食甲哽胿 ê 大腸 mā teh 告小腸，隨向按算好勢 ê Georgien 喬治亞餐廳划去 tsiah 發見伊交酒餐廳相仝，齊愛等到下晡 5 點 tsiah 開門。
「這間餐廳 ê 手骨應當誠粗 m̄-tsiah 有才調暗頭仔 tsiah 做生理」我 tuì buaih 食亞洲炒麵交土耳其烘肉 ê 翁講。
Gún 翁知影綿爛 m̄ 食這兩味 ê 伊 buē-tàng 閣行仝路講「Gún 德國人食麭過糜飯」頭犁犁認真𫝻手機仔，請手機仔賜伊智慧 hōo 牽手莫成做 Mǹg-sǹg。
𫝻仔𫝻猶是𫝻著交土耳其烘肉無宛 2 體 ê 希臘烘肉。
希臘烘肉交土耳其烘肉，我個人是感覺希臘烘肉較好味素，起因伊較 buē 死鹹。這个 buē 死鹹凡勢交土耳其烘肉是牛羊透濫 ê 因端，這是我個人 ê 認為，無表示土耳其烘肉就是按呢生。
我自本就罕得食牛肉，gún 翁因為紅肉食 tsuē 無健康，這斗 mā 跟綴我點雞肉來食，hōo 我無機會比並希臘烘肉店 ê 牛肉口味敢 buē 較死鹹。
總是 Heilbronn 食著 ê 希臘烘肉較實比 gún 遮 ê 希臘餐廳較 buē 死鹹，這个因端 m̄ 知敢是店東 mā 入人門，隨人意跟綴 Heilbronn 使用𪜶出名 ê 山岩鹽?
記錄著土耳其烘肉交希臘烘肉 mā 來記錄這兩國烘肉 ê 講法。
希臘號做 Gyros，土耳其號做 Kebab。
德國這幾冬 mā teh 討論消失 ê 母語。
我徛位 ê 符騰堡，頂幾年 ê 在地語言調查， ē 曉講 Schwäbische 語 ê 人口，賰無到 30% 這 30% 大部份是有歲數 ê 人，當地學者向望政府動起來，總是....看起來 kan-na 無動一支跤毛。
我無囡仔 m̄ 知影遮 ê 學校敢有教囡仔講 Schwäbische 語，總是按我個人往過 ê 經驗，當地人 tuì 這个語言 ê 態度是交臺灣大多數人 bueh 相仝，彼是一个無出脫 ê 語言，特別是社經地位較懸 ê 人。
這个問題，我這个外人寫到遮就夠額，這久 ê 我 kan-ta bueh 記錄路裏搪著 ê Ich kann richtig original Schwäbische, wie a Fremdsprache，每一个語言攏特殊，我無過人 ê 才調通 kā 每一个語言學習好勢，m̄-koh 我尊存每一个語言。
栽欉 --- 2023.06.04
翻田塗 --- 2024.12.26
留言列表
冊 ▪ Bücher ▪ Books (4)
