亂皂𥴊仔店 ⓂⒺⒾⓃⓀⒾⓄⓈⓀ

麭合 gún 喙斗合甲無話講，店員 ê 火藥引 hōo gún 徛甲火星去

Großer Ring, v. l. n. r.: Rathaus, ev. Stadtpfarrkirche . 市政府佮大鐘塔

不知不覺人已經車到保加利亞來，又閣不知不覺 bueh 按保加利亞離開，tī 這段僫揣網路 ê 日子，規仙人步頻若綴月娘行跤花 ê 樹，自我閣自在。

我 m̄ 是刁故意 tuì 網路起清瘼 ê 人，總是網路 tuì 我來講正經有成三不五時來挨拶 ê 風疹，起因佮𪜶切甲連一塊肉幼仔攏揣無 ê 我，猶原無法度踅翻頭過往過 ê 意愛，需要豆油 tsiah 去𥴊仔店捾罐豆油轉來。按呢 ê 信息交換是比露螺樹懶越一个頭閣較慢寡，伊猶是比人已經食甲半磅猶 teh 櫼物來食閣較無毒兼顧健康。

人生自本就無一个固定，準做咱認為 ê 固定伊猶若氣象 m̄ 捌固定過，年間無聲無息 teh 變化，我 mā 是。

感謝翁 ê 讓步，讓出伊上愛 ê 西班牙伴我行踏囡仔時 ê 好玄，並真真正正感受烏貓姊年間上捷看著 ê 熊の出没(kuma no shutsubotsu)標語。

真心感謝伊 ê 讓步。

Wir sind in Bulgarien angekommen hat auch Bulgarien verlassen, in diesen Tagen ohne Internetzugang, ich fühle mich ruhig.

Ich habe keine Einwände gegen das Internet, aber ich mag die Stille.

Ich werde es benutzen, wenn ich es brauche, obwohl ich die Dinge gerne aufzeichnen möchte.

Es ist immer anders als das, was man gerade fühlt, aber so ist das Leben. nichts ist festgelegt!

Wenn die Dynastie wechseln wird, ich werde auch und so geht es.

Dank der Begleitung durch meinen Mann sieh die Welt mit mir, ein Kindheitswunsch geht in Erfüllung.

Draculas Haus besuchen und die Begegnung mit den echten Bären.

Herzlichen Dank!

2007 歐洲文化首都 Sibiu.Hermannstadt

徛位 tī 德國人罕得講 Siebenbürgen m̄-koh 捷講 Transsilvanien(中世紀拉丁語) ê Sibiu，伊 ê 歷史 tshan-tshiūnn 伊 tī 希臘語、土耳其語、斯洛划克語遮 ê 號名仝款，萬千變化。

不過，這个理解是事後孔明，起因我 tuì 伊 ê 理解並無跟綴厝邊阿羅 ê 分張。我 tuì 伊 ê 理解 kan-ta 又閣是一搭齊是 Germani ê 白汫無素，青盲點燈火 mā buē 無彩工 ê 𤺪。

「敢無地揣一搭無恁 Germani ê 角勢」公車猶未駛到老城見著熟似 ê 文字佮厝宅我隨燃一鈷壼呻 hōo 翁聽。

「你去到挪威 mā-ē 搪著 Germani」伊笑應。

市塔 . Ratturm

Sibiu 徛位 tī 中東南歐洲上懸山 ê Karpaten mā 是向時 ê 歐洲絲路佮臺灣，Germani 盤山過嶺按 Alpen 到遮就是 uī-tio̍h 匈牙利 kā 地界楦到這搭造成經濟損失。

行踏 Sibiu 進前我 tuì 阿羅分張 ê 大細項是一耳空入，一耳空出篩到賰一个 Hermannstadt 生百外个 Hermann「1877 出世 ê Hermann Hesse 佮 Transsilvanien 有啥物底代？」

2007 歐洲文化首都 Sibiu.Hermannstadt

Uī-tio̍h bueh 解謎，我斟酌看每一搭𫞼 Hermannstadt ê 看板，押尾得出這个答案 Hesse mā 捌來遮生活過，像 Schiller 捌行踏 ê 角勢 m̄ 是號做 Schiller Weg 就是 Meditationweg von Schiller。

羅馬尼亞某一搭公園就有 Schiller 翻草愖題之路。

 2007 歐洲文化首都 Sibiu.Hermannstadt

總是代誌永遠 m̄ 是戇人我想 ê 遮爾仔簡單，像我認捌 ê 斗南 tī 往過號做 Taliwu 他里霧，掠做舊漚舊臭需要拆掉莫鎮地 ê 霧峰林家有遐爾仔 tsuē 故事。

2024.06.30 上北車日子那覕雨那翻田塗 mā 那揣資料 tsiah 知影彼久 ê 白汫無素是我 ê 目若狗蟻，是我 ê 態度若笛盎回答藤田憲兵「啥物是死水」，笛盎回答活水佮死水差別。

活水是看起來烏濁 ê 水燃滾猶原有法度撈出蟲豸，死水是羌仔膀胱內揣無半隻蟲豸，我 ê 心就敢若羌仔 ê 膀光揣無半隻蟲豸 ê 一屑仔酸素攏無。

2007 歐洲文化首都 Sibiu.Hermannstadt

Hermannstadt 佮諾貝爾文學獎得者 Hermann Hesse 一屑仔攏無底代，伊 ê 城市名稱起源無一个確定，不過根據彼个年間做推斷，伊應當是主教 ê 字名抑是移民者頭人 ê 字名。

世界文化遺產 Sighișoara

已經入選世界文化遺產 ê Sighișoara mā 是一搭無 UNSECO 做看板，我隨 kā 列入紺草花 ê 鹹汫無味 ，這久讀資料 tsiah 理解伊是按怎遮爾仔受歡迎，特別是德裔佮美國德裔族群。

Tī 遮停跤兩暝 tī 非觀光角勢拄著佮 gún 翁𫝛款是德裔族群 ê 觀光客我隨理解因端，拄著美國觀光客我 ê 頭殼隨出現，美國人 tī 底時開始愛露營？

我 m̄ 知影別佗 ê 美軍基地按怎運作，總是美軍 tī 德國是有固定 ê 休閒模式，至少 gún 兜附近 ê 美軍就是這款模式，彼就是若林純如 tī《蒙面女人‧漂亮男人：那些三毛沒告訴你的沙漠故事》ê 分張，美國人有家己 ê 美國庄，準做無蹛美國庄𪜶 ê 日子 mā 過蹛 tī 美國庄。

Stundturm . 鐘塔

當我捎無美國人是按怎 ē 一車一車來到遮參觀，這久揣資料讀資料 tsiah 想著《穆斯林與猶太少女》ê 猶太少女就是按羅馬尼亞徙位到柏林，押尾閣徙位到美國。

世界文化遺產 Sighișoara

Sighișoara ê 歷史 tī 古城就有法度見著按紅銅行到青銅並到鐵器年代 ê 跤跡 ，押尾成做一个規模 ê 城市是按第二世紀 ê 羅馬年間。

上重要 ê 觀光景點 Stundturm . 鐘塔

押尾成做繁華閣交易 ê 城市是 12 世紀半按 Germani 遷徙到遮 ê 德裔民族。

你 tī 揣 gún 是 m̄ --- Germani

Sighișoara 這个城市名稱 m̄ 是自本種 tī 羅馬尼亞這个語辭內底 ê 文字，伊是 15 世紀按匈牙利轉化做羅馬尼亞語。

寫著羅馬尼亞語 m̄ 捌半句羅馬尼亞語文 ê gún tuì 羅馬尼亞語文 ê 印象就 tshan-tshiūnn 這段紹介「羅馬尼亞語，淵源自拉丁語，羅馬尼亞文是一種與西語、葡語、法語與義大利語較為接近的羅曼語族語言」。

聽無羅馬尼亞語，讀文字揣 gún 認捌 ê 語文猶是有法度鬥出大約仔 ê 意思，像臺灣人去日本仝款。

世界文化遺產 Sighișoara

世界通人知 ê 鬼夜婆範 mā 是按 Sighișoara 出世。

華文永遠記 buē 牢 ê Karpaten

Uī-tio̍h 解貓 ê 好玄，gún 決定跟綴 Karpaten ê 美麗沓沓仔駛向鬼夜婆 ê 徛家，準做按呢需要加一工 ê 時間，gún mā 願意。

Karpaten 圖書館

不過，這个願意帶來 ê 驚喜超出 gún 自本 ê 認定，我個人佮意 Karpaten tsuē 過 Alpen。

這个佮意凡勢 mā 佮 Karpaten 保留較 tsuē 原始面肉有關係，徛家佮商家無 tshan-tshiūnn Alpen ê 滿天星斗。

不過 Karpaten mā 是有厚甲若蠓 ê 商業區，畢竟當地人需要生活，像熊仝款，需要跟綴年間變化求生存。

熊の出没(kuma no shutsubotsu)

出發羅馬尼亞翁一直講羅馬尼亞無 tshan-tshiūnn 德國 ê 規定 buē-tàng 四界露營，不過人 tī Karpaten 露營車門愛關 hōo 好，使用露營布篷見著熊愛隨入去布篷並 kā 門關好一直到熊離開。

熊の出没(kuma no shutsubotsu)

寢頭仔聽翁按呢講熊の出没，我認為伊 teh 講漫画 ，押尾 tī Karpaten 見著熊佮見著露營布篷，我相信伊分張 ê 漫画。

熊の出没(kuma no shutsubotsu)

人類愈來愈依賴 Tiktok 熊 mā 愈來愈依賴人類 ê 無私分張。

Gún tī Karpaten 拄著 ê 熊知捌佮人類保持距離 mā 知影車 bueh 到搭愛刁意故出現 tī 路爿成做無料 Model 順紲趁糜飯，這个畫面成做無得賞 ê 一段記錄；

人 ē 神格化，動物 ē 古錐化，駛 tī 頭前 ê 車隨个仔隨个 kā 大通路當做停車場 mā 隨个仔隨个大大典典佮伊分張𪜶 ê 物食，恬靜等待若筊徒 tī 奕十八仔 ê 生份人。

記持 ē 食餌，熊敢 ē 食爸母教 hōo 伊 ê 餌？

人生 tshan-tshiūnn 水手搪著 Loreley bueh 綴伊行抑是 buaih 攏是家己 ê 決定 --- 《心行尞》Kreis von Kreisen ▪ 翹頭查某, Au revoir ▪ 車日子

Schloss Bran 鬼夜婆 ê 徛家 . Dracula

這是 gún 揣著上讚 ê 徛位 kā 本底掠做金光閃閃瑞氣千條，見著本人煞揣無金光 mā 見無瑞氣 m̄-koh tsuē-tsuē 火氣 ê 鬼夜婆徛家。

Schloss Bran 屬奧匈帝國家族 ê 資產，這久成做羅馬尼亞上出名 ê 觀光景點之一。

遮 ê 拆票時間猶原保留共產年間 ê 氣味，遮 ê 觀光客 mā tsuē-tsuē 入人門，順人意無照規矩來。

Sóo-tí 我 ê 建議是 tī 遮排隊拆票，保持距離 mā m̄ 通烏白亂走，抑無通人知 ê 城堡猶未見著熱情已經熄。

這久熥彼久 ê 記持，我 tuì 小說 ê 原型無印象反顛倒 tuì 冤家 ê 生份人足有印象 ，我想這隻熊見著 gún 遮 ê 觀光客 mā 是仝款 ê 態度。

恁沓沓仔冤，冤了 m̄ 通 buē 記得 kā 手頭 ê 食物分 hōo 我。

Gún 彼時看人冤家 mā 是𫝛款 ê 態度，你緊冤，冤冤 leh 恁 ê 位就變 gún-ê。

露營地 - Edelweiß(倚保加利亞 ê 柴杙田庄：Suhaia) 頭家娘 ê 傳統好滋味 

2023.08.02 想 bueh 改寫 2022 年 ê 車日子，總是遮 ê 過去 mā 是我四常 ê 一部份，彼久 ê 我會按呢記錄車日子表示我 tuì 遮 ê 行踏想法著是按呢，sòo-pái m̄ 免 uī-tio̍h 2023 ê 車日子翻頭轉來全部改寫。

總是 ē-tàng 調整一寡彼時無想著 ê 字句 tshan-tshiūnn 華語 ê 吸血鬼，我感覺鬼夜婆 tsham 伊真峇，畢竟鬼是人，英語 ê Vampire mā 是人面夜婆身，sóo-tí 鬼夜婆峇甲無法度閣較峇。

栽欉 --- 2022.09.01

翻田塗 --- 2024.06.30