亂皂𥴊仔店 ⓂⒺⒾⓃⓀⒾⓄⓈⓀ

M̄ 知影別人讀冊 ê 慣勢是按怎?

Gún 翁讀冊 kan-ta 讀伊有興趣 ê 部份，其他 ê 就放水流 buē 讀 buē 掀。

伊這款讀冊法捷 hōo 我笑講「無彩作者 ê 用心」，伊講「時間是錢，囉哩囉嗦 m̄ 免 kā 看」。

我看冊 ê 慣勢是冊一讀落去，m̄ 管愛開 luā tsuē 時間揣資料、請教字典彼字愛按怎讀佮彼是啥物意思，我攏決定 ē kā 伊 thang 篇讀 hōo tsiâu-tse。

Sòo-pái，讀小說我慣勢揣歇假日或是拜六佮拜日來讀，抑無照我這个若牛 ê 性地 ē 看甲翻點猶 teh 點燈膋(ting-lâ) kā 興趣成做苦毒。

寫著冊，我想著近來 teh 時行 ê 電子冊，試讀過一回，我猶原較佮意實體冊有 thang hōo 我劃巡，寫按原句牽藤 ê 葡萄。

另外，文學分類 tuì 我來講就敢若茶、Ka-pi、加味茶。

小說是烏龍茶需要時間回甘，詩是加味茶滾水一沖芳味隨現 mā 隨退，散文是 Express，小小一甌 si̍p 一喙酸甜苦汫透全身。

這是王秀容老師第二本散文集。

第一本《我咧唱歌》屬於自傳性散文，讀《我咧唱歌》我捷捷想著轉去塗州賣鴨卵 ê 大姊。想著伊 m̄ 是講伊 ê 故事佮秀蓉老師相仝，是迵過秀蓉老師 ê 作品，我看著因為又閣生查某囡仔 hőng 趕出門到14歲綴阿母嫁 hōo gún 芋仔爸 ê 大姊，面對壓力 ê 韌性佮樂觀。

只是，每一个人 ê 樂觀猶是有行 buē 出 ê 悲觀，我真好玄愛唱歌 ê 大姊若是有機會讀《我咧唱歌》伊 ê 悲傷敢 ē 離開，另外伊敢 ē 敨放別人囥 tī 身軀頂 ê 枷，好好仔愛家己。

「有愛的所在，就無失敗」

這是秀蓉老師 tī《我咧唱歌》0 Huè 重出世 ê 一段話 mā 是伊 tī 台灣人台灣事【台語女性書寫】王秀容 (上)、【台語女性書寫】王秀容 (下)分張 ê 一段話，我足認同--ê。

窮實認同 mā m̄ 是 kan-ta 這段話，猶閣有語言、文學等等 ê 想法。

Tshan-tshiūnn 伊分張伊上課進前攏 ē 𤆬囡仔講「若 bueh 媠食果子，若 bueh 巧講臺語」這段話 hōo 我想著本底一直攏講別人佮阿公阿媽 ê「德語」是「方言」佮 m̄ 捌學習過 ê「語辭」ē 隨講「德國德語」無人按呢講 ê 翁，這久 ē 講「彼是當地語言」、「彼是當地 ê 講法」，伊願意按本底 ê 慣勢成做現此時 ê 生張這就是「愛」。

舉 gún 翁 ê 例 m̄ 是講伊是語言歧視者，因為伊 tuì Castellano、Catalunya 並無區別心，若按呢是按怎伊 tuì 按家己土地湠出來 ê 語言有分別心？

理由真簡單，家庭教育佮國民教育。總是我個人認為家庭教育是上重要 ê 一部份，因由𪜶爸母是看家己母語 buē 上目 mā 真愛提別人 ê 德語來剾洗別人 ê 德語有問題 ê 人。

𪜶爸母 ê「標準德語➀」講甲敢有「優雅➀」人講離鄉，無離腔，gún 翁 hōo 𪜶爸母教甲 buē 曉講家己祖先話，搪著 m̄ 是講「軍隊話」ê 人 mā 聽 ē 出來伊 m̄ 是按 hőng 選做「軍隊話」彼搭來 ê 人。

我無法度改變 gún 翁自紅嬰仔就慣勢 ê 態度，總是我 ē-tàng iōng 我 ê 耐性沓沓仔牽伊 ê 手𤆬伊見著伊家己 ê 問題，這 mā 是「有愛的所在，就無失敗」ê 一種方式。

文學應當按怎展現？

書寫別人看無 ê 文句？

拚勢命翻譯 m̄ 知熥過幾仔斗 ê 世界文學？

遮 ê 問題照實講已經熥甲臭臊酸無啥物好閣喋詳，總是當我 tī Podcast 聽秀蓉老師分張伊 ê 想法，彼有一種電著 ê 感覺。

我記持䆀記 buē 牢全文，總是我 iōng 我家己 ê 認知記錄 hōo 我電著 ê 大概；

每一个語文本底就有家己 ê 特性，一直追求別人 ê 文學別人 ê 文字，總是彼猶是 m̄ 是家己 ê 語文。一个語文 bueh 繼續落去，繼續出版文學真重要，總是一个文學需要 hőng 讀有 tsiah 有繼續湠落去 ê 可能性，起因寫作 m̄ 是學術研究。我寫 ê 文章 m̄ 是上好 mā ē-tàng 按文章揣出 tsuē-tsuē 問題，總是這就是進化 ê 過程。樂觀佮悲觀攏 ē 牽藤，總是押尾較𠢕湠欉 ê 大多數猶是樂觀，起因樂觀 ē 引𤆬你向前行。

我 m̄ 是學者抑是文學評論家，我 m̄ 知影家己寫 ê 文章是好抑是䆀，總是我知影每一件代誌攏需要樂觀 tsiah 有法度繼續向前行並揣著改善 ê 方式，tshan-tshiūnn 秀蓉老師分張伊 tuì《咱來讀讀》ê 感想「頭幾篇寫甲 m̄ 是真好，總是玫瑰花 mā m̄ 是一發穎就是媠」特別甲這段話圈起來猶原表示，我是照我家己 ê 感受 kā 秀蓉老師 ê 分張轉做家己 ê 語辭 。

我真愛《咱來讀讀》〈恩典〉ê 這段話；

語言是民族的寶貝，向望逐種語言攏會當受尊重，會當互相欣賞，會當代代使用。因為尊重語言的使用就是有人權的修養；欣賞語的多元才算有國際化、本土化的圓滿； 共家己的母語盡量講出來、寫出來，就是一種無分宗教對土地的愛。毋管學佗一種語言，攏愛感「恩」有辭「典」，簡單來講就是恩典啦！

一本倚 bueh 400頁80篇 ê 散文冊講 tsuē mā tsuē 講短 mā 短。

內底有 tsuē-tsuē 秀蓉老師四常 ê 故事，遮 ê 故事是人生 ê 牽藤就 tshan-tshiūnn 德國人剾洗家己 ê 問題；

「囡仔你今仔日有祈禱無？」牧師問。

「有」囡仔應。

「按呢，你敢 bueh 繼續來教會」牧師問。

「只要神繼續 hōo gún 老母莫繼續行灶跤，我就去教會」囡仔講。

這是四常簡單 buē 上文學獎 ê 故事，卻犁出深深 ê 社會議題佮人性 ê 固執。

最後引用《咱來讀讀》第25篇〈字紙〉ê 文字；

字有字神。我早就知影寫字是代表一个人的個性，字愛寫予媠，毋通清彩，落筆若有神。這馬我閣深深體會文字、語言是一个民族的寶貝，講母語、寫臺文、敬重家己的語文神佮敬重別人的語文神，攏是一種優雅的精神。

我愛讀字，愛拍字 m̄-koh 無愛寫字。

這个歹癖應當是囡仔時 hōo 教學者嫌字䆀閣要求我愛提伊規定 ê 範來寫作業 ê 因端造成。

我愛拍字因為學習倉頡輸入法，老師 buē 要求我 kan-ta ē-tàng iōng「十十十戈戈」來表達「轉」ê 拆碼「JJJII」 。

我有耐性 kā 慣勢講別人 ê 德語是「方言」佮「彼 m̄ 是德語」ê 翁轉性講「當地語言」佮「當地人講法」，除了有愛猶有按爸母傳 hōo 我 ê 尊重家己 ê 語文神自然就會尊重別人 ê 語文神。

我 m̄ 是文學家，無幼路文雅 ê 筆尾。

我 m̄ 是語言專家，無幼路 ê 語辭揀選。

我鈍目閣無深度，無法度逐本經典文學讀到透透透 mā 理解𪜶 bueh 表達 ê 14。

總是，我知影我佮意讀，佮意寫，佮意聽，佮意學，m̄ 驚掠漏 mā m̄ 驚舊文需要閣 si-á-geh。

咱來讀讀，我來讀讀，這是我 ê 掠漏天地 mā 是我 ê 照妖鏡。

Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。

當你年久月深 tuì 萬丈深坑金金相，萬丈深坑 mā teh tuì 你貓貓相。

--- Friedrich Nietzsche

➀ Hochdeutsch tī 我 ê 年間華語 kā 翻譯做「標準德語」，離開華語箍仔行踏德語箍仔 tsiah 發見這个「Hoch」有兩種意思。一个是「華語」佮「臺灣土地其他語言」ê 意思，一个是「北爿」ê 意思。

總是「北爿」mā 有「臺語」m̄ 是「閩南語」ê 問題，起因 tuì 北爿 ê 人來講，𪜶 ê 德語 m̄ 是「懸地德語」若 bueh kā「Hoch」轉做「懸」。這是一个複雜 ê 問題，總是這久 ê 我攏 ē 講我講 ê 德語是「德國通用德語」a.k.a「Bundesdeutsches」。

《咱來讀讀》

㊔ 王秀蓉

㊓ 前衛出版

ⓦⓦⓦ 聚珍臺灣