亂皂𥴊仔店 ⓂⒺⒾⓃⓀⒾⓄⓈⓀ

 我 tuì APP 系統無興趣，s óo-tí 這个態度 mā 影響我 tuì Podcast ê 興趣。

這幾日《錦荔枝的滋味》讀煞隨上網搜揣廣播劇。

廣播劇有揣著，m̄-koh kan-na 揣著 Podcast，tuì APP 無興趣 ê 我隨放棄收聽。

2023.01.13 又閣相𫝛 ê 透早那款早起頓那聽德國西南廣播電台放送𪜶 ê Podcast。

早前，無論 Podcast 聽甲偌爾仔興趣趣原仔 buē 起心動念上網掠 Podcast ê APP。

是啥物因端 ē 遮爾仔排斥(pâi-thik) APP 窮實我 mā 無啥知影，總是伊 hōo 我 ê 感覺就佮電子冊𫝛款足虛足空無意神。

13 這日電台放送按瑞士來 ê DJ BOBO hōo 我聽甲 m̄ 願按呢有頭無尾就結束，隨上網清彩拍一个往過捌看過目 m̄-koh m̄ 捌聽過 ê Podcast「亞特聊聊天」隨出現 Soundon 這个系統隨揤落去讀細節，無讀 m̄ 知影一个 Podcast 竟然有遐爾仔 tsuē ê 系統，照慣例 Google 大神引𤆬我揣著 tsiâ 我就優先使用這个系統。

檢采是我頇顢，舞規半晡 ê 結果是 ē-sái 聽卻無法度揣其他 ê 節目 tsiah 發見我愛註冊，隨照起工註冊又閣搪著問題，我 ê 密碼 m̄ 著。

Ua--leh 你 mā 幫幫忙忙一下，我 ê 口座佮密碼 tsiah 拄註冊 mā tsiah 拄驗證這時呔 ē 講密碼 m̄ 著。

隨照𪜶 ê 規定閣申請一擺密碼，結果原仔是無效 -- 放棄，換來大神 ê 系統我 ê Podcast 之路就無閣綿精若《Ich bin dann mal weg》其中一段，一直 tī 路 neh 來來去去，永遠行 buē 跤到。

因為想 bueh 收聽 DJ BOBO 完整 ê 訪問，我揣猶原 tī 面冊泅捌看過目 ê 亞特聊聊天，紲落來順亞特聊聊天 ê 跤步繼續生湠其他 ê 節目，像「台語 tsin 輾轉」 。

「台語 tsin 輾轉」mā 是猶 tī 面冊泅就捌 ê 節目，總是猶是 m̄ 知影是啥物因端，自第一斗見面到今，m̄ 捌 tuì 𪜶 ê Play 鍵起心動念過，這斗 uī-tio̍h 收聽 DJ Bobo 完整 ê 訪問，我 mā 順紲 kā 𪜶揤 Play 鍵，紲落來一集接一集聽落去，像亞特聊聊天按呢，我這个怪癖 m̄ 知敢是按遮來，無愛連續劇愛影戲，無愛電視，愛戲院。

窮實電視佮影戲 mā 無宛 2 體，總是影戲 hōo 我有法度自在選擇時間佮意愛 ê 戲齣，電視是𪜶選擇𪜶 bueh hōo 你看 ê 戲齣佮時間，像烏貓姊年間 uī-tio̍h bueh 看「流星花園」m̄ 管偌爾仔厚話偌爾仔想 bueh 佮朋友繼續喋詳攏愛趕 tī 9點進前轉到厝 tsiah 有法度 kā 伊收藏 tsiâu-tsn̂g。 

這个 tsiâu-tsn̂g mā 愛看電視台 ê 歡喜，像囡仔時愛 ê「喬琪姑娘」到今 m̄ 捌收藏完整，喬琪姑娘 ê 故事我貧惰寫，就請別人代我出聲；

1. 懷念80年代卡通「喬琪姑娘」＠沈寂，也是一種聲音

2. 懷舊動畫▶Lady Georgie 喬琪姑娘🎀

APP 按裝好見著別人留話，我 mā 跟綴寫寡感想 tsiah 發見這件這件代誌，是按怎有遐爾仔 tsuē 人無法度離開社群媒體 ê 因由，gún 翁就是一个，伊 m̄ 知影有幾組 E-mail 佮社群媒體 hōo 伊逐日無閒𩑾𩑾。

Tī 我感想寫好，發送鍵揤落去 tsiah 發見，無社群口座我 tī Podcast ê 世界是 Hello Kitty 有目有耳無喙，按呢 mā 好，因為這个限制直接消敨我 ê 龜毛。

我真𠢕後悔是按怎 bueh 寫遮 ê 話，特別是生份人。是按怎有這个性地，我想這交警總猶末離開有關係，準做我 ê 留話無啥特別，我猶原感覺伊真鑿目，像投稿上刊真歡喜，過無偌久隨感覺家己真展風神。

我 m̄ 是無自信，不過我真正無愛 tsham 人盤撋，無愛 tsham 人盤撋成做無聲 ê 人上自在，總是我猶是平凡人，我猶有慾望想 bueh 知影家己做這件代誌 ê 竹目到第幾節。

因為讀冊認捌著《錦荔枝的滋味》有出廣播劇並分張 tī Podcast 就隨跟綴「高雄廣播電台」ê 跤步一集一集仔聽，聽甲痴迷 buē 記持隔轉工愛作穡愛有眠。

《錦荔枝的滋味》

㊔ 洪淑昭

㊓ 九歌

ⓦⓦⓦ 聚珍臺灣