亂皂𥴊仔店 ⓂⒺⒾⓃⓀⒾⓄⓈⓀ

Die Uspenski-Kathedrale/烏斯佩斯基教堂

1550 年瑞典 tī 遮建市並 iōng 瑞典語 kā 伊號做 Helsinkiforg tī 這段瑞典人做主 ê 年間，伊並 m̄ 是重要 ê 所在。

露西亞年間，1812 年 Helsinki hőng 指定做芬蘭大公國 ê 首都，彼陣 ê 首都是現此時 ê 第二大城 Turku，斯當時號做 Åbo(ˈoːbu／瑞典語)，伊 tsiah 開始成做重要 ê 城市 m̄-koh 芬蘭使用家己 ê 話講家己 ê 城市是到 1819 年 tsiah 開始。

1917 年芬蘭成做家己 ê 主人，Helsinki tō 一直成做芬蘭 ê 首都到今。

芬蘭國家歌劇院

Helsinkiforg tī 瑞典語 ê 意思是 Helsinge 教區佮 Helsingån(現此時號做 Vanda å) 最後一个掣流頂。

Forg tī 瑞典語 ê 意思 - 河水，這个名 tī 往過 hőng 人歸類 tī 按瑞典徙來 ê 人接續使用家鄉 ê 字名，不過這个講法一直有爭議。

總是，人會進化爭議 mā 會解決，現此時 ê 語言學家已經證明早前 ê 移民是按 Uppland(烏普蘭)佮附近地區徙到 Helsinki，sòo-pái Helsinki 這个名佮移民無相干，m̄-koh 伊真有可能是 teh 形容一个地區特殊 ê 生張。

伊有可能是 teh 形容河 ê 頷頸仔，意思是掣流上狹 ê 所在，起因 tī 北歐 ê 丹麥抑是瑞典 mā 有相𫝛 ê 城名鄉鎮號名。M̄ 管這个號名按佗位來，伊 tī 1819 年正式成做芬蘭字姓。

Kampin kappeli(靜默/tsīng-bi̍k禮拜堂)

是按怎一个城市字名會寫甲 buē-su 麵線按呢落落長，無 uī-tio̍h 啥物 kan-ta 感覺這个名佮我聽過 ê 芬蘭語無相𫝛，揣資料 ê 時又閣讀著現此時咱掠做是英語 ê Finland 窮實是瑞典語，另外 mā 因為芬蘭朋友分張 ê 芬蘭字母寫法 hōo 我 tuì 伊 ê 語源起造好玄甲無揣一个答案 buē-ti̍t--lih。

這斗行踏愛沙尼亞請教佮芬蘭語 bueh 相𫝛 ê 露營主人家，伊講「發音佮德語 bueh 相𫝛」hōo 我認真試德語發音，確實大部份 ê 當地人攏理解我 teh 講啥，落尾手讀資料 tsiah 知影，芬蘭語 ê 文字系統是 Luther ê 學生 Mikael Agricola。

以瑞典語寫作 ê 芬蘭詩人 Johan Ludvig Runberg

詩人上出名 ê 作品是 Fänrik Ståls sägner („Fähnrich Stahl“/鋼鐵少尉) ，冊分做兩 pha 出版，出版時間是 1848 佮 1860，冊 ê 內容主要是寫瑞典露西亞戰爭 ê 歷史事蹟。

這本冊 ê Vårt land („Unser Land“/咱 ê 祖國) mā 成做芬蘭 ê 國歌。

Tallinn, Eesti 愛沙尼亞碼頭

Gún 是按 Tallinn(愛沙尼亞首都) 坐早班郵輪到是按商業城市開始發展 ê Helsinki，一逝時間 tī 2點鐘這跤兜。

輕鐵

Helsinki ê 發展佮其他 tī 海權年間 hőng 發現 ê 所在相𫝛，本底 ê 無名小卒成做地方頭人。

按呢講誠龜怪，總是芬蘭 ê 歷史 m̄ 是咱現此時看著 ê 生張，另外我 m̄ 是歷史學者或是研究者，我只是一位 m̄ 捌字看告示認真 tī 遮記錄家己讀著 ê 資料。

1550.6.12 瑞典國王 Gustav I. Wasa tī 遮 uī-tio̍h bueh 佮海 ê 對面 Reval(Tallinn) 拚生理，總是這本底著 m̄ 是瑞典心所愛 ê 所在，sòo-pái tī 瑞典總算 tī 1561年 kā 跤踏到海 ê 對面 Tallinn 遮 ê 發展著隨停睏。

Helsinki 碼頭

一直等到 1640年 總督 Per Brahe 下令 kā 這个無適合大船出入港 ê 所在徙到現此時 ê 市中心 tsiah 有變化。

論真講，看德國電視台紹介 Helsinki buē-su teh 啉白滾水按呢白汫無味 hōo 我感覺德國人果真是凡事攏愛照德國標準來看代誌，等到家己 kā 跤花栽到遮來 tsiah 發見，這斗 ê 德國美學無問題是我家己 tuì 這个城市 ê 認捌少甲可憐。

雖罔按呢生，我 mā m̄ 捌 kā Helsinki 想甲若法國巴黎按呢，總是正經 tsham 伊相拄搪，我愛承認彼有一種看人妝前妝後 ê Wow 佮感受著帝國 ê 大細目，懸低耳，準做 tsuē-tsuē 人分張芬蘭人 tuì 露西亞皇帝真感心，我猶是感覺露西亞 kan-ta tī Sankt-Peterburg 較有建設。

感念 Nikolaus I. (Russland) 起 ê Helsingin tuomiokirkko(白教堂)

芬蘭現此時 ê 恬靜 m̄ 是自古著按呢生，伊佮 tsuē-tsuē 𫞼 tī 獅佮虎爭 bueh 做龍 ê 中央抑是厝邊 ê 所在攏相𫝛，無一个人請教當地人 ê 意見隨我來，我見，我征服 kā 芬蘭喝來喝去，喝拍著拍，喝割肉著割肉。

總是，每一个 m̄ 是按這地土地生湠 ê 外來者𪜶 ê 故事就 tshan-tshiūnn 中國史，一朝換過一朝，扞權 ê 瑞典 tī 1809.3.2 戰輸露西亞，芬蘭又閣成做無 hőng 請教隨愛成做露西亞 ê 一部份。

國家藝術館 Ateneum(阿黛濃美術館)

Helsinki mā 因為露西亞皇帝 Alexander I. (Russland) 嫌 Turku(芬蘭本底 ê 首都)佮 Sankt-Peterburg 倚傷遠，tī 1812.4.8 下令 Helsinki 按這日開始成做芬蘭 ê 首都，並倩德國建築設計師規劃這个 hőng 𪜶遮 ê 獅、虎、鳥鼠舞甲挐氅氅 ê 所在。

起 tī 1893 現此時是𥴊仔店 ê 老建築

1917 芬蘭佮其他 hőng 相爭 bueh 做龍 ê 獅虎 kā 𪜶當做是家己喙䫌肉 ê 所在宣布獨立，並宣佈 Helsinki 是芬蘭首都。總是，獨立 2 字在人認為，芬蘭 tī 這段時間爆發內戰，押尾反對獨立 ê 人 hőng 關 tī Suomenlinna(瑞典語：Sveaborg)。關 tī 遐 ê 人大多數 m̄ 是枵死著是著災離開人間。

人會影印別人 ê 身份佮故事，歷史 mā-ē 成做副本。

綴郵輪團行踏 ê 第一个景點

上郵輪進前 gún 閣 kā 手頭揣著 ê 資料餾一斗，最後猶是決定行 Die Uspenski-Kathedrale/烏斯佩斯基教堂 這條線路著夠額，起因 gún 翁仔姐一个離開教堂，一个 m̄ 捌參加教堂，sòo-pái m̄ 免逐个教堂行透透。

大船入港

當 gún tī 愖賰落來 ê 時間 bueh 去 tueh 蹓蹓，落船通知 mā 開始廣播，各國𤆬隊 ê 導遊 mā 開始熥路線。

聽無上大團韓國語 ê gún 隨斡頭行向全船唯一一團 ê 西班牙語團綴𪜶栽猶捎無摠 ê 跤花。

這个捎無頭摠攑香綴拜相趁相喊 ê 結果是到今我猶 m̄ 知影伊有啥物特別，準做 gún 翁成做無料翻譯，我猶是搝無菜頭摠。

「是按怎愛來遮？」

「領隊講遮有美麗 ê 風景通翕相兼啉杯仔燒燒 ê Ka-pi 看東海美景」翁講。

看來逐國旅行團攏有相𫝛 ê SOP。

芬蘭上大 ê 食品公司 Fazer 甜路

Fazer 是按臺灣 ê Blog 揣來 ê 資料，𪜶經營 ê Ka-pi 甜路館 mā 拄好 tī gún bueh 栽 ê 跤花路線，就隨跟綴作者 ê 建議入店交觀這行法國露西亞路線 ê 百年老店。

Fazer 是 1891 年成立，伊是芬蘭上大間 ê 甜路製造商 mā 是芬蘭甜路主要象徵(siōng-ting)主要之一。

伊 ê 產品 tī 芬蘭 ê 百貨抑是超商攏有 bué ē-著。

我個人 tuì 甜粅粅較無熱情，sòo-pái uī-tio̍h 啖一下仔新奇就選擇這个無註冊 hōo 逐家通使用伊 ê 名號走天下 ê 英國 Jaffa 雞卵糕。

上傳統 ê Jaffa 口味 - Jaffa-Orange

Jaffa tī 德國號做 Soft cake，德國是按怎 bueh 按呢號名，𠊎毋知。總是，這款 ka̋ng 換名換姓 ê 代誌 mā m̄ 是 Jaffa tsiah 有。

像丹麥 ê JYSK 𪜶 ka̋ng 號做 Dänisches Bettenlager，丹麥 mā 趣味 hőng 𪜶改名改姓十外冬 tsiah 雄雄想著家己 ê 名 kā 伊改轉來。

德國少年家敢有法度跟綴丹麥 ê 跤步 kā 伊號做 JYSK 我 m̄ 知影，總是我清楚知影我真僫按 Dänisches Bettenlager 翻頭叫伊 JYSK 準做我是按德文字母發音。

名 hőng 提去真正真僫揣轉來....

第一擺見著 ê 口味 - 金含糖餅

Jaffa 算是德國 tsuē 甲若蠓 ê 甜粅粅內底我唯一 ē bué ê 餅，因為知影伊 ê 特殊致使人 tī 芬蘭搪著伊揣無火燒雞寮芳貢貢 ê 味。

不過，食食 tshan-tshiūnn Forrest Gump ê tsioo-kóo-lè-tòo hōo 你 buē 節，食過 Fazer ê 麭我隨決定試 Jaffa。

這个決定押尾成做甜路正確 hōo 我捶心肝呔無加 bué 幾盒，特別是第一斗見著 ê 金含糖餅。

頂港有名聲，下港上出名 ê 芬蘭三文魚湯

出發芬蘭進前我 m̄ 捌三文魚(紅鰱魚)湯，決定行踏芬蘭隨跟綴網路𠢕人來一碗三文魚湯。

翁食 buē 慣勢，起因伊有厚厚 ê 茴香仔。我無愛茴香仔料理，不過我佮意茴香仔透 Khu-lì-mù ê 滋味。

野味罐頭(郵輪)

這斗波羅的海三國行踏並無 kā 芬蘭算在內，伊是人車日子車到 Tallinn 臨時臨曜想著 2022 人 tī 克羅埃西亞 Omiš 因為貓仔佮芬蘭來 ê 朋友成做有話通畫 ê 隔壁厝邊隨 kā 翁講我 ê 芬蘭朋友行踏臺灣三斗，我 mā bueh 拜訪𪜶 ê 家鄉。

「船幫我早就看好矣」翁那講那 kā 船幫表捎出來展寶。

「我就知影，gún 翁 m̄ 是柴頭翁兼十二月葡萄，凍霜 ê 人」我按伊 ê 喙脣輕輕仔點一下隨斡頭講「今仔仔菜單虎蝦敆麭。」

天公伯敢若有聽著我 ê 哭呻 hōo 我 tī 這斗 ê 車日子魚臊食甲暢，特別是三文魚佮虎蝦。

出發芬蘭進前讀著 tsuē-tsuē 分張講芬蘭人 ê 好鬥陣是戴小鬼仔殼， 芬蘭人我無認捌任何一位，總是按這逝車日子搪著 ê 芬蘭人佮人 tī Omiš 奧米什搪著 ê 芬蘭朋友，我 ē 講我聽著 ê Hei 比德國人講 Hallo 閣較 tsuē。

未來敢有機會閣行踏芬蘭，就交 hōo 未來去決定，總是這逝 ê 芬蘭一日跤花佮路途搪著 ê 芬蘭人攏成做我人生上美麗 ê 一塊鬥片子。