亂皂𥴊仔店 ⓂⒺⒾⓃⓀⒾⓄⓈⓀ

Kan-ta 知影情緒叨撚佮提情緒做劍之者，攏無法度佮理性做朋友，一个受人敬愛尊重 ê 人 m̄ 是一出世就有這款魅力，mā m̄ 是成做博士博或是十八港路行透透就有這个才調，彼是年久月深 ê 栽欉、翻草、薅草。

整理文章「鱈魚烘」想著 tsuē 冬前提 Cicero ê 句直透 tuì gún 翁講𪜶爸母 ê 病灶佮這站仔搪著 ê 代誌，遮 ê 代誌 mā 引𤆬我這件代誌，tī YouTube 搪著曾文溪電台 tī 曾文溪電台認捌韓滿老師，紲落來真好運 tī 博客來搪著老師 ê 作品《真情99》、《酒蜜100》。

酒蜜100是詩，我無仙氣兼頇顢100 pha 詩讀煞猶原若柴頭，無情緒。

韓滿老師是正式經過專業訓練 mā 是 tī 學校教學 ê 老師，m̄ 是咱這久手一伸出去就 ē 摸著 ê「老師」，凡勢是受著 Dr. 佮 Professor，Lehrer 佮  Meister 是無相𫝛分類 ê 影響，sòo-pái 我 tuì「老師」2 字 mā 有龜怪 ê 認定。

餾舊文想著韓滿老師 ê 文章就想 bueh kā 伊整理做一篇記錄，起因我真愛老師短短卻飽飽元氣 ê 四常散(Suánn)文。

短短飽飽元氣 m̄ 是 Die Philosophen haben die Welt nur verschieden interpretiert, es kommt darauf an, sie zu verändern(哲學家只是解釋這个世界，重點是愛改變這个世界)彼款 ê「心靈雞湯」是家己 ê 歷史是自由意識 ê 進步，tshan-tshiūnn〈啉咖啡〉下暗倒佇眠床頂，想講今仔日傱規工，定著會較好睏，毋過，煞反來反去睏袂去.....3點、4點矣猶閣咧篢更,到底是為啥代？較想嘛想毋知。啊！有矣，阮啉茶佮啉咖啡攏睏袂去，昨昏去咖啡廳啉咖啡，免講嘛就愛顧更。

餾舊文想著 Die Weltgeschichte ist der Fortschritt im Bewusstein der Freiheit mā 想著車日子㊡露營 tī Erfurt 搪著 ê 料小記持。

行到這个歲數，我無要意時行 ê 穿插 m̄-koh 清氣自在，因為日頭 m̄ 是一年迵天攏有，sòo-pái 我 buē 追求白甲若牛奶 ê 皮膚 mā 因為過敏 m̄ 捌畫貓仔面出門 ê 隨人隨心自在做家己踅角勢，tī 我佮翁分兩路享受家己 ê 行尞 tī 這个按全人類有四分三自本就有服從離經熱狂 ê 箍絡行為解脫 ê 角勢，我搪著真久 m̄ 捌因為穿插 hőng 點油做記號 ê 趣味。

Tī 遮 tsuē-tsuē 看外國人 buē 上目 ê 人，𪜶唯一 ê 武器是「語言」𪜶自身就 teh 使用 ê 語言抑是 ē 曉講 ê 外來語，這款問題搪 tsuē 押尾伊自動轉做變猴弄 tī 我 ê 目皮連烏目仁連行 buē 入去。

Tī Erfurt 彼日，兩个穿插時行爸母 mā 應當 m̄ 驚𪜶搬金角 ê 少年囡仔 tī 店東一聲 Hallo 開始搜揣驢仔 ê 歌聲，總是釘根生湠 ê 輕視已經成做𠕇篤剾 buē 掉瘤 hōo 𪜶連一句「Hênn--meh」mā 講甲離離落落，換大端 ê 18 歲公主 Victoria ê 語言放送𪜶 ê 優越，總是閣較優越 Victoria 公主 ê 語言猶原 m̄ 是𪜶上𠢕唱 ê 歌。

店東看𪜶踅來踅去敢若 teh 揣啥物慣勢款 ê 材料，隨 kā 清甲無任何雜音 ê ラジオ換做佮 Victoria 公主成做龍鳳 ê Prince Albert ê 聲道問「Kann ich Ihnen helfen?」本底認定家己是 Le Roi Soleil 太陽王遮爾仔特殊 ê 2个人開始感受 m̄ 管你按怎拚勢成做白皮膚、啄鼻仔、講高級有競爭力 ê English 遮猶原是 Englisch。

店東問無 Englisch 問我「Kann ich Ihnen helfen?」

「Alles ist in Ordnung, ich suche nur」我那回答店東 ê 挨拶那 kā 手頭彼包𪜶認定我就是按彼搭來遮做辛勞 ê 麵囥轉去架頂，換提彼 hōo 𪜶看 buē 上目 m̄-koh uī-tio̍h bueh 表示你佮 gún 是無相𫝛 ê 彼个角勢來 ê 麵去結數。

餾舊文想著徛踮門跤口張等(tng-tán)翁來會合(huē-ha̍p) ê 心靈雞湯；

白，kám 一定是 suí

若 án-ne

怎樣法國人興曝日

為啥 mih in ê 畫家 ē 去迷戀

烏皮膚 ê 南洋查某人

59.〈迷思〉--- 《iPad kap 杯仔》

聽 gún 翁火車過 tsiah 摃鐘「我若 tī 遮你就 ē-tàng kā 展台語」我想著驢仔 ê 歌聲。

驢仔 ê 歌聲➀

我若講臺語

就 buē 成做鰮仔魚

我若無講臺語

就 buē 成做白腹仔

我愛寫啥物

我愛講啥物

請原諒我，我啥物攏無寫，啥物攏無講

因為，tī 遮 ê 背後無一个好玄佮風神

Kan-ta 遠古 ê 聲調，除了聲音，啥物攏無

遐敢有拊仔 thang 拊掉我一軀 ê 黃

遐 ê 歌聲敢是永遠 ê 媠永遠 ê 雅緻

行踏遠古，我 ē 聽著啥物

走揣未來，我 ē 成做啥物

我原仔是焦土 ê 枯葉

𪜶原仔是霜雪 ê 流水

Gún 攏是這粒球 ê 皮膚

綴烏暗行向光明，綴光明行向烏暗

我敢 bueh 寫臺語

我無音樂家 ê 懸低音 thang 調整

我敢 bueh 寫臺語

我無藝術家 ê 彩筆 thang 變化

我啥物攏無，我 kan-na 一軀 ê 黃

Tshan-tshiūnn 焦土 ê 落葉

有柑，有紅，有綠

焦土 buē 要意我若秘雕 ê 外表

伊 kan-na ē 順我 ê 葉脈

靜靜聽，我若驢仔 ê 歌聲

餾舊文想著《真情99》 ê〈走揣心靈的世界〉人生像舞台，欲演啥物角色有時由不得家己來安排，舞台的銀幕一幕一幕一直來佮自序情有真濟款，有的是若一杯水，無啥滋味，毋過時間久久袂走味；有的是若一杯茶，會芳、會甘，毋過定啉會淡薄仔痴；有的是若一杯酒，有苦、有甜，毋過啉傷雄煞會醉。

咱欣羨別人 ê 啟蒙運動，欽佩別人 ê 哲學思想煞敢若 m̄ 捌想過，別人 ê 哲學 mā 是咱 ê 四常，咱 ê 平常時仔 mā 是𪜶 ê 神秘，咱掠做咱 m̄ 是領主籠仔內 ê 動物，咱有家己 ê 思考有家己 ê 意志，總是迵過咱自在 tī 籠仔內享受領主款 hōo 咱 ê 物件，m̄ 管咱哺 luā-tsuē 按世界各搭來 ê 糧草，咱猶原是無開闊 ê 雙目佮擘腹是按怎別人 kan-na 看 ē 著咱 ê 大鼻煞看 buē 著咱文武全才 ê 氣身惱命。

➀ 是詩 m̄ 是詩抑是假鬼六怪，這攏無重要，重要 ê 是，我總算揣著適合 ê 文章 kā 這篇臨時臨曜收著邀請咱寫詩參加比賽無著賞 ê 作品鋪出來。 

《真情99》