亂皂𥴊仔店 ⓂⒺⒾⓃⓀⒾⓄⓈⓀ

德國號做 Maibuam(五月樹)，瑞典號做 Midsommarstång

Midsommarstång 是瑞典大帝 Gustav II Adolf 掠外我上認捌 ê 文化象徵(ting)。

知捌按怎順瑞典出名運河行尞是按德國電視台吸收來 ê 智識，紲落來按怎順運河循禮，我 kan-ta 負責成做愛哭愛綴路 ê 鵁鴒 tuì 翁喝 Kanelbullar, Köttbullar。

包裝佮若杯仔雞卵雞 ê Kanelbullar(咖啡色)佮 Bá-tah 杯仔麭

我愛食肉桂捲，自人一行跤到瑞典就開始試 Kanelbullar(Zimtschnecke)，總是行踏 ê 角勢齊是三跤步無一坎店 ê 田庄所在，試著 ê 口味齊是 Maxi 抑是 Coop。

「瑞典人愛食甜，不過𪜶 ê 肉桂露螺無 tshan-tshiūnn 恁德國版本食無啥有肉桂 m̄-koh 厚厚甜粅粅」

2011 按膨椅趨湧認捌 ê 瑞典媠姑娘 Tess 分張「Gún 瑞典人愛甜粅粅」 ，跟綴德國電視台行踏瑞典，當地行尞分張 mā 特別紹介𪜶 ê 甜粅粅長城。

這斗親自行踏瑞典，見著一排比 gún 兜客廳(臺灣)閣較闊閬閬 ê 甜粅粅長城隨斡頭喝翁來看，押尾發見這个動作根本是白了工，因為伊已經雙跤踏入 Moor(湳仔地)。

歷史 ē 過去，人 ê 身份 mā 是。

Tī Holgers Konditori 搪著瑞典車日子到今上蓋敆喙 ê 肉桂露螺 hōo 我又閣成做一隻貓。

Holgers 佮愛沙尼亞 ê Buxjöwden 敢是移民押尾成做當地歷史 ê 一部份？ 

不過，這个 Holgers mā 是瑞典傳統字姓之一 m̄ 是孤德國有這个字姓。

GÖTA KANAL 博物館

GÖTA 運河長 190.5km 是瑞典上長 ê 一條運河 mā 是往過連結北海佮東海(Ostsee)上重要 ê 水路，伊佮花蓮太魯閣𫝛款，有一部份是按 58000 名軍人 ê 雙手一塗一塗 kā 若無佮心臟五大湖連結 ê 紅筋結做血路齊通 ê 水路，紲落來閣 tshan-tshiūnn 外科醫師 kā 伊佮 Trollhätte 運河 hām Göta älv 結做伙成做長 390km ê 運河。

Tshan-tshiūnn 頂懸所寫 ê 文字，我 kan-ta 負責喝電視 ê GÖTA KANAL 賰 ê 就成做跟綴鴨母行世界 ê 鴨咪仔，Karlsborg 就是跟綴德國電視台行踏 GÖTA KANAL 其中一个城市。

往過是重要新營、柳營、林鳳營 ê Karlsborg

Karlsborg 佮美國西部城市仝款攏有伊建城 ê 伊因由。

美國西部城市因為 Gold rush(淘金)成做市鎮，Karlsborg 因為軍事起造碉堡(Festung)後尾生湠做市鎮。

Karlsborg 是按碉堡成做市鎮抑是 tshan-tshiūnn 臺中因為火車站成做一个州(市)這我無研究，不過 ē-tang 確定 ê 代誌是 Göta 運河起造 ê 時間是1810，碉堡起造時間是 1819。

往過是重要運河，現此時是觀光運河 ê Göta KANAL

Tī gún 無照表來循禮，有機會搪著大橋開門真正是好字運。

 今仔日循禮過運河大橋 ê 船隻是德國佮瑞典。

Karlsborg 碉堡 tī 1925 無閣做軍事用途，不過現此時 ê Karlsborg 猶是瑞典軍事要地，想 bueh 斟酌行踏這个城鎮，需要斟酌看地圖以避免行 m̄ 著位，行到軍事地區猶 m̄ 知。

是講瑞典 ê 軍事要地敢有圍箍仔，我無研究，總是城市導遊資料有註明，軍事地區 buē-tàng 倚過，不過你 ē-tàng 報名軍事表演行程。

Karlsborg 碼頭露營地

瑞典佮丹麥相𫝛綴天候生湠出屬於家己 ê 露營方式 14 就是 kā 碼頭拆做兩半，一半 hōo 船，一半 hōo 露營車，像 gún 第一暝 ê 露營地 Halmstad。

Halmstad 碼頭露營地

按呢 ê 露營地看起來真兩光，窮實無兩光，起因遮 ê 基本設備齊比德國看起來是純金窮實是鍍金 ê 露營地閣較 zu Hause。

有無限時間抑是掠外納錢洗身軀 ê 浴間仔，有洗碗區，有清氣 ê 便所間。

Halmstad 是瑞典 ê 古城之一，總是名聲無首都 Stockholm 佮第二大城 Göteborg 遐爾仔出名，伊 mā m̄ 是這短短兩月日需要行踏 ê 城市，gún 就 kan-ta 順碼頭路線 tuì 伊循禮順紲 hōo 若風颱來挨拶 ê 風做風吹吹。

Karlsborg 露營早起頓佮 Vättern 湖

我 tuì 動物無任何智識，總是 tī 瑞典我感受著人類尊重動物，動物見著人類 mā buē 走甲若飛，tī Karlsborg 街路我見著廚師 kā 無細膩離岫 ê 海雞母囡仔抱 tī 手捗送伊去大自然 hōo 伊順大自然 ê 循環求生 m̄ 是收留伊育飼伊。

Tī gún-ê 露營區我見著鴨咪仔自在 tī gún-ê 身軀邊揣物食，見著紅嬰仔兔仔恬靜停睏 tī 挪威厝邊 ê 車輪，遮 ê 動物一屑仔攏無驚人類，人類 mā 無人 kā 𪜶攪擾，世界大同 ê 畫面，我想應當就是按呢，不過，碼頭管理人員猶是有清楚𫞼「禁止飼動物」ê 告示。

按 Karlsborg 繼續上北搪著 ê 田庄中古世紀遊園會

我無清楚瑞典敢是遮爾仔無計較，總是！

Bueh tī 德國拄著無料閣妝娗甲媠噹噹 ê 便所間，較早睏較有眠。

碼頭無料便所間

Tī 這个 mā 是見著有趣味就停睏 ê 碼頭，我 ê 存在佮海雞母無宛 2 體攏跟綴著便所間 ê 寧靜佮感受著愛。

我拄著 ê 瑞典人見著我隨講瑞典話，準做我無反應𪜶 ê 問句猶是請問你敢是瑞典人 m̄ 是德國彼款你猶未開喙，伊看你 ê 形隨講你是外國人。

是講，這款問題 mā m̄ 是我捷搪著，家己是德國人 ê 翁 mā 捷 hōo 家己人準做外國人，寫到遮，我 teh 愖敢是這个因端致使德國人真愛染金頭髮 ê 因由？

起因德國人敢若 ē-tàng 一種色緻，金色頭鬃。

無料便所間

瑞典語 tuì 我來講，綴字母發音無問題，不過發 ê 字母音敢是瑞典字母，這我就非常確定絕對無相仝，總是猶是臆有 14。

起因，無斟酌看字母特殊性 ē 掠伊是我慣勢 ê 德語抑是英語，準做按呢，我猶是學著 Hej 佮 Tack。

少年市鎮 Säffle

Säffle 是瑞典上少年 ê 運河城鎮，gún ē 行跤到 m̄ 是 uī-tio̍h 運河，gún ē 行跤到是 uī-tio̍h 超級市場。

少年市鎮 Säffle

出發瑞典進前，tsuē-tsuē 德國人熱情分張𪜶 ê 經驗「貴甲驚死人」。

德國人 ê 消費模式咸豐三，講到今 ê 白汫無味，總是德國人 ê 分張需要這耳空入，彼耳空出，猶無十色五彩 ê 隨綴 leh 白汫無味。

少年市鎮 Säffle

揣無任何紹介 ê Liljedal 露營地

Tsuē-tsuē 德國人一講著瑞典露營地 mā 是貴，這个貴 tuì 我來講 mā 是賣麵--ê 看人撒油，大細心 ê m̄ 免咸豐三，講到今。

 揣無任何紹介 ê Liljedal 露營地

總是自行踏瑞典到離開瑞典，我感受 ê 露營價數攏是 Lohn sich(超有價值) m̄ 管是人抑是環境佮設備攏 Lohn sich，除了菜蔬真正夭壽骨 ê 貴。

不過，我見著 ê 貴參參有瑞典 tuì 當地農民 ê 態度佮教育當地民眾 m̄ 通近廟欺神 ê 公民教育，遮 ê 菜蔬只要種 ê 出來--ê 齊是瑞典製造，德國是德國種 ê 出來--ê 猶是進口貨。

我 m̄ 知影瑞典農民敢捷捷上街頭抗議，總是 gún 翁一句「管待伊佗一國，只要俗就好」ê 態度，攏 hōo 我想著快活頭，艱苦尾。

別人兜 ê 代誌莫繼續大舌閣興喋。

舊 Trollhättan(特羅爾海特)運河

Trollhättan 是瑞典歷史城市之一，總是猶原 tshan-tshiūnn 頂懸記錄 gún 是順電視紹介行踏瑞典，sóo-tí 行踏歷史城市猶是 kan-ta 順 Göta 運河循禮。

舊 Trollhättan(特羅爾海特)運河

這个運河現此時已經無 tī 運作，起因河道無閣闊。

綴運河行踏 Göta 運河 mā buē 專工落船包車來這踏，總是，我個人是感覺伊真值得行一斗，看往過工具無遐爾仔 tsuē ê 工藝是按怎克服環境。

舊 Trollhättan(特羅爾海特)運河

遮是北歐𫞼芬蘭、挪威、丹麥、瑞典我理解，總是無冰島有德國，這个問題 hōo 我又閣成做阿貓一隻，當我 kā 頭越轉來看鴨母，鴨母講「因為德國人是重要工程師之一」。

離開 hōo tsuē-tsuē 德國人講 Lohn sich nicht m̄-koh gún 翁某卻認為這是 gún 搪著上讚閣物超所值 ê 露營區，gún 順露營區主人家 ê 分張停睏踮柴杙田庄儉所費「恁 ê 旅程若無趕緊，恁 ē-tàng 參考倚位 tī Stora Le ê 露營區，𫝛一个湖兩種價數」。

離開這个 tī 歐洲露營十外冬第一个 hōo 我認為三星價數八星設備佮服務 ê 露營區，gún 真心感謝主人家 ê 分張，起因踮挪威露營 ê 第一暝 tsiah 拄停車 gún 就感受啥物叫做 Lohn sich nicht ê 百萬倍。

一个湖，兩个國家 ê Stora le(瑞典)

人口凡勢無夠 300 ê Nössemark 是一搭愛釣魚、划船、拍獵、趨雪 ê 人 ê 天堂，gún tī 遮 mā 斟酌一四界貓貓相百八，押尾 tsiah 知影百八愛等甲十月份。

十月份是駝鹿拍獵季。

真正 Lohn sich ê 露營區，下昏倚 bueh 11點

M̄ 捌去過加拿大 ê 我踮遮想著 tsuē-tsuē 移民加拿大人分張 ê 句「媠山好水無聊甲」隨請教捌去加拿大旅行 ê 翁。

「無剉，規欉好好」伊笑應。

是講瑞典 ê 熱人有法度逐日過甲若德國，早時燒烙，下昏若秋清我應當逐年攏想 bueh 來遮做植物。

露營早起頓

這逝車日子，因為天頂捷捷送狗貓佮菜蔬貴甲 bué buē 落手，我就捷款麭做早起頓。

「你嫌無麭通食，這久 hōo 你食迵海」我笑 tuì 翁講。

「我 ê 喙斗已經 hōo 你飼甲無麭 mā 無要緊，不過我已經開始數念菜蔬佮燒烙 ê 早起頓」翁笑應。

露營區 ê 設備佮賣食 ê 攤仔

瑞典猶有啥物 hōo 我驚喜 ê 角勢，靜待繼續上北 ê 行尞。