亂皂𥴊仔店 ⓂⒺⒾⓃⓀⒾⓄⓈⓀ

Shakespeare Hamlet(王子復仇記) ê 城堡 - Kronborg 

北歐文藝復興重要城堡 mā 是 Shakespeare 四大悲劇之一 Hamlet 復仇城堡 ê 城市。

規个城市攏是我 ê 城市 --- Hamlet

 Uī 遮 ē-tàng 坐船過東海到有 bueh 相𫝛字名 ê Helsingbrog, Sverige(Schweden, Sweden)。

無載車 ê 航運碼頭

Helsingør 有兩搭碼頭，一搭專門載車佮人，一搭專門載人，相片 ê 碼頭 kan-ta 提供人運，無提供車運。

Helsingør 建城時間 tī 15 世紀，不過 Helsingør 這个名稱 tī 1231 已經記錄 tī Liber Census Daniæ  mā 號做 Danish book of land taxation(丹麥土地稅收錄)。

順 Kong Valdemars Jordebog 這本稅收探討落去就 ē-tàng 繼續撚絲拗裒抾襇讀歷史。

Helsingør 第二出名 ê 景點 --- 海洋博物館

Helsingør 地理徛位 tshan-tshiūnn 伊 ê 字名 Hels 𫝛款，船隻 bueh 按遮經過攏愛成做頷頸 hőng 捏牢牢 ê 雞隻仝款，無吐生寡卵出來 buē 得。

街路亂皂

Helsingør 猶未建城進前佮《倒風內海》相仝是一个倚海靠海 ê 漁庄。

記錄這个倚海 ê 地球角勢按漁庄成做交易城鎮 ê 亂皂

你看 buē 著我，你看 buē 著我 --- Hamlet 

自 Erik VII. 1420 tī 遮建城 9 冬 ê 1429 開始規定按遮經過 ê 船隻攏愛納 Øresundstolden，丹麥 ê 倒風內海 mā tshan-tshiūnn 倒風內海 ê 各社跟綴 Sounds Dues 開始 428 冬 ê 交易繁華。

記錄這个倚海 ê 地球角勢按漁庄成做交易城鎮年間變化 ê 亂皂

總是每一个交易無可能永遠 buē 落山，每一隻 hőng 捏頷頸 ê 雞隻 mā-ē 起身反抗，實施 428 ê 海峽通行費綴其他新徛起 ê 國家成做「海峽都更計劃」。

一張合約伴補助金斷這个長期愛 hōo 丹麥捏頷頸 ê 艱苦。

Sankt Olai Kirke(Dom zu Helsingør, Saint Olaf's Church)

起 tī 12 世紀 ê 聖 Olaf 教堂凡勢是這座城市上舊 ê 建築，伊 ê 建變變化 mā tshan-tshiūnn 人類跤跡仝款，按本底 ê 羅馬式建築沓沓仔成做哥德式建築 ê 天主教堂。

Sankt Olai Kirke(Dom zu Helsingør, Saint Olaf's Church)

「這教堂真北爿」翁正跤拄踏入隨越頭佮我分張伊 ê 感想。

Tuì 教堂無研究 ê 我 kan-ta ē-tàng 按呢回答「按怎講?」

Sankt Olai Kirke(Dom zu Helsingør, Saint Olaf's Church)

伊手隨指天篷佮 Orgel(管風琴)，我隨理解伊 ê 14，不過我 tuì 雙目見著 ê 語文較好玄，是按怎德文 tsuē 過丹麥文？

雖罔，我臭彈講學過德文，丹麥語我應當 mā-ē 學甲 buē 䆀，總是遮是丹麥人 ê 教堂 m̄ 是德國人 ê 教堂。

我揣無答案，只好按呢搝摠頭，條條馬路迵羅馬，逐个城市湠 Germani ê 德國。

Sankt Olai Kirke(Dom zu Helsingør, Saint Olaf's Church)

德國人 ê 真北爿有簡單 ê 妝娗像 IKEA 佮𪜶 ê 性地就敢若𪜶 ê 傳統厝宅仝款 --- 保持距離佮 uī-tio̍h 寒人設計 ê 傳統紅磚厝。

紅磚 ē 吸收燒氣，保持厝宅 ê 燒烙。

Sankt Olai Kirke(Dom zu Helsingør, Saint Olaf's Church)

教堂有提供導覽，至於導覽費用是無料抑是以題緣金做感謝，這我就無清楚，起因 gún 無向導覽室申請導覽。

Shakespeare Hamlet(王子復仇記) ê 城堡 - Kronborg 

2000 年成做世界文化遺產 ê Kronborg 徛位波羅的海上狹 ê 角勢 mā 是世界碌硞馬之一 ê 海峽，伊按若海關大細 ê 厝間沓沓仔湠做現此時 ê 生張。

Gún tuì 城堡看甲飽，翁 tuì Hamlet ê 故事無興趣，我 tuì Hamlet mā 是有看佮無看攏仝款就 kan-ta 循城堡循一逝順紲講 To be, or not to be 做這逝 ê 進香 。

有 7-11 ê Helsingør 中央車站

舊城古錐 ê 消防栓(sng)

舊城人家厝花園妝娗

舊城人家厝

舊城街路亂皂

碼頭附近 ê 亂皂

碼頭警報裝妝 --- 𫝛款徛位 tī 東海 ê 愛沙尼亞 mā 有一隻 

Tī 這个人類 m̄ 捌減少，動物煞愈來愈少 ê 地球，未來 ê 人類凡勢正經 ē 成做「垃圾人」m̄ 管食魚無食魚。

規个城市攏是我 ê 城市 --- Hamlet

HAN(2012 - ) 

丹麥首都 København 有 Den lille Havfrue(小美人魚)，Helsingør 除了 Hamlet 閣有 Havdreng(海洋少年)。

按德國「正港北爿」坐船過東海到丹麥 ê 船隻名稱

這斗 ê 計劃本底想 bueh 沓沓仔按丹麥一路上北，總是計算永遠趕 buē 著變化，德國 ê 旅遊保險按無限制投保月日改做 kan-ta ē-tang 投保 2 月日。

這个變化 hōo gún 隨決定加添寡所費坐船上北，畢竟兩个人加起來超過百歲 m̄-thang 佮運氣撚寶。

 飼我，飼我，飼我

德國南北兩爿露營價數 mā tshan-tshiūnn 臺灣南北兩區 ê 現象，南鞏金北鞏金閣包銀，不過敢是規个露營區攏按呢，我 m̄ 知影，起因 gún 真罕得上北露營。

總是，這斗 ê 經驗 hōo 我有機會事先理解未來 ê 消費方向。

Fehmarn 露營早起頓

書面用語抑是口說用語佗一个較優雅，這正經是一个足個人 ê 自在。

Tī 德國店家猶未開門，四常攏寫 Geschlossen，tī Fehmarn 見著口說用語轉做畫面用語，我有一種感覺 tī 這間店我應當 ē 自在甲 buē 記得乞食攑蠓捽仔，假仙。

一看隨知佗一味佮敆家己喙斗 ê 酒單

Gún 彼日坐 ê 船隻字名拄好號做德國(Deutschland)

按德國上北有兩搭角勢通坐船，一搭 tī 東北 ê Rügen，一搭就是這个有丹麥字名 Femern ê Fehmarn。

Gún 本底 ê 計劃是直接按德國上大島 Rügen 直接坐船到瑞典，總是猶原是計劃趕 buē 赴變化，Rügen ê 航運熱人無開放，起因船隻需要保養。

按 Rügen 坐船上北到瑞典，費用敢有較省寡，這个問題我 m̄ 知影，翁 mā 是，起因無通拆票就 buē 去要意價數。

計劃永遠趕 buē 赴變化，Rügen 無開航 gún 就拆孤逝 Fehmarn - Rødbyhavn - Helsingør - Helsingbrog

Fehmarn - Rødbyhavn 45分

Helsingør - Helsingbrog 20分

票價算車無算人，一台車 152€

Fehmarn - Rødbyhavn tī 東海海底磅空起好勢就 buē 閣航行。

東海海底磅空底時 ē 起好 m̄ 知影，總是我清楚家己家己坐 tī 歷史內底，因為伊佮我仝款有一日攏 ē 行入歷史故事，只不過伊是通人知 ê 故事，我是連風 mā m̄ 捌 ê 故事。

往 Stege 露營區見著有 14 就停睏 ê 鄉鎮

往 Stege 露營區見著有 14 就停睏 ê 鄉鎮

這逝上北車日子翁驚我致著公主病 tī gún 猶未出發進前一直交代北歐人 ê 露營方式佮中西南東歐無相𫝛。

「北歐人 ê 露營方式較成咱 tī 波蘭碼頭 ê 方式」tī gún 出門 ê 彼日伊猶原若衛生所一直交代愛去「種珠」ê 工作人員仝款，我 m̄ 知影伊是按佗位致著這个想法，總是我清楚知影我無撒體病。

往 Stege 露營區見著有 14 就停睏 ê 鄉鎮

北歐因為人口佮文化，𪜶真慣勢見著佮意 ê 環境(Ē-tàng 合法露營)就隨停車露營，sóo-tí bueh tī 北歐揣著佮中西南東彼款設計甲若飯店 ê 露營區真僫，不過 tsuē-tsuē 碼頭攏 ē 成做露營區 hōo 人露營，我 ê 14 是 kā 車停 tī 停車格露營。

這个方式看起來真龜怪，總是這是北歐人意愛 ê 方式

往 Stege 露營區見著有 14 就停睏 ê 鄉鎮

窮實 mā 無龜怪只要 kā 船換做車，一切就敢若豬血糕𩛩芫荽塗豆粉仝款 ê 峇峇峇。

窮真講，我真佮意這款曠闊 ê 露營方式，車門一拍開就是海洋。

現此時是博物館 ê Mølleporten (1430) and Empiregården (1813)

Stege 是 gún tī 丹麥第一暝 ê 碼頭露營區，露營價數「包電」31€。

伊 tī 猶未成做堡寨進前 ê 生活模式佮其他倚海靠海 ê 鄉鎮無宛 2 體攏是魚庄，按魚庄成做重要堡寨攏是按一个人 ê 決定開始。

Erik V. (Dänemark) tī 1268 決定 tī 遮起堡寨，伊 ê 地位開始轉變，總是一个角勢 ê 重要性 mā tshan-tshiūnn 本底 m̄ 捌出現 tī 帝國棋盤內底 ê 大員仝款 tī 帝國棋盤開始變化，伊 ê 地位 mā 開始變化，按人人攏愛 ê 無價之寶鑽石成做無人要意 ê 玻璃珠仔。

前市公所 Former town hall designed by Michael Gottlieb Bindesbøll (1854)

這是我第三斗行踏丹麥，我 tuì 丹麥 ê 印象猶是佮前兩斗相𫝛 tī 遮旅行真自在，除了天氣 hōo 我無自在，起因天頂齊是貓仔佮狗仔(Raining cats and dogs)。

我愛貓 mā 愛狗，總是天頂送來 ê 阿貓佮阿狗，我向望伊 tī 我人 tī 厝 tsiah 來相揣。