亂皂𥴊仔店 ⓂⒺⒾⓃⓀⒾⓄⓈⓀ

It was in Gdańsk that i met my wife Danuta, it was here that our children were born... And so i became a Gdańsker by choice.

--- Lech Wałęsa

自彼日再會一目𥍉仔已經倚 bueh 3 冬，踏出門埕若見著盤山過嶺蹽溪渡湳 ê 朋友，海馬總愛泅水，泅去 uī-tio̍h 自由 uī-tio̍h hōo 家己有出頭 ê 彼一日 m̄ 驚風 m̄ 驚雨 m̄ 驚未知 ê 後一秒，下性命成做烏仔魚搢水 ê 同學，這久 ê 𪜶敢猶停跤 tī 德國。

出世 tī 富裕 ê 西德，萬事齊愛趁伊意 ê 翁 tī 阿波羅金色頭鬃沓沓仔順德國鱟百(peh)冊關無峇 ê 閬縫勻勻仔牽藤到 gún ê 雙目，伊隨成做鬧鐘仔自動喨 buē 離「今仔日出大日，咱愛出門行跤花。」

入眠床，順睏神 ê 我跟綴 Warum Beethoven taub wurde 呔討 Beethoven ē 聽 buē 著 ê 智慧選擇聽 buē 著繼續 tī 烏空遊山耍水到巧機仔設定 ê 鬧鐘仔 kā 我吵精神，紲落來優雅款早起頓兼繼續成做 Beethoven hōo 翁某感情有法得無聲繼續牽手透流，畢竟這款詬詬唸無毒毒，若有毒 mā 加加起清瘼 niā-tiānn。

雜唸翁婿出蠻皮牽手，最後一塊盤仔洗汰清氣越頭 tuì「一隻蠓仔做大象」➀ ê 翁講「這久 ê 你會得通做指揮官，請」，我 ê 耳空鬼仔隨成做 Ada➁ ê 恬靜。

天清甲若臺灣東部 ê 太平洋，薄縭絲 ê 雲 tī 天 ê 太平洋跟綴見 buē 著 mā 捊 buē 著 ê 風，一秒一分自在變化。

德國風 ê Stern 交換手 hōo Türkiye 風，德國肉店一店拆兩店交換手 hōo 鐡血宰相講 ê 巴爾幹咖啡廳交意大利 Pizza，今仔日 ê 地下鐵施工全線停駛「恁 ê 慣勢無受恁 ê 控制，大自然呔討愛照恁心所愛變化」我那讀地下鐵告示那攑日本剾刀 kā 翁剾烏鉎。

四常喙脣一粒珠，講話 m̄ 認輸一喙掛兩舌 ê 翁恬靜無出聲，靜靜仔交我徛踮電子告示牌頭前讀紲來 ê 替換交通指示，看 buē 著 ê 目 mā 感覺有一對目睭掠我金金相隨跟綴這个感覺越頭交這對目睭相對看。

凡勢是歹勢，這對掠我金金相 ê 目睭 tī 我搝著伊 ê 目神隨斡頭假探 Bá-sirh 時間。

順伊半爿 ê 面模沓沓仔繩，海馬 mā 沓沓仔泅去「因為 Muammar Gaddafi 格達費名聲透京城，所致 gún-ê 狀況 m̄ 值得報導，不過 gún 承古典希臘交羅馬文化建築是西方重要財源之一，未來有機會轉去敍利亞，非常歡迎你成做我 ê 人客 hōo 我趁寡歐圓抑是美金。」

阿丁，是阿丁「Hallo, 阿丁」我歡喜甲大聲喝。

彼對假探 Bá-sirh 時間 ê 目睭倒看正看越頭看，看著我一身人已經交 gún 翁徛 tī 伊 ê 面頭前，伊歹勢仔歹勢講「Hallo。」

「Wie geht's, alles gut?」我問。

「Vielen Dank, alles gut und wie geht's?」

我順這个固定公式回答一切齊順勢齊好 mā 順紲解伊 ê 困惑(khùn-hi̍k)，畢竟互相相辭(sio-sî) ê 我交這久差 15 公斤交長頭鬃 mā 轉做短頭鬃 hōo 伊一時五秒認 buē 出我是 Tsiâ。

「我是美樹，咱做伙做同學一冬兼考德文認證 ē 記持無」我笑微微仔講。

捎無寮仔門通開 ê 阿丁隨伸手交我握手大聲講「美樹，美樹，我想著矣，坐我隔壁 ê 美樹」彼對猶原遵守男女授授不親傳統 ê 雙目笑甲若藥房門前 ê 花草遐爾仔五彩十色。 

「Wie geht's, alles gut?」阿丁隨換手交 gún 翁握手。

「你這久 tī 佗落食頭路」我順伊 ê 穿插問伊 ê 近況(hóng)。

「B2 考過，我 tī 隔壁庄覓著頭路」阿丁笑微微仔講。

「Wow, 有夠厲害考過 B2。」

「你敢有去考 B2？」

「伊 ê 德語是 D1」揣無話通紲話 ê 翁總算揣著話通接。

阿丁聽伊按呢應隨戇做一欉樹，我隨紲話講「我無去考 B2，m̄-koh 我攏講我 ê 德語是 D2 比德國人閣較𠢕。」

「後回有人 tuì 我指指揬揬我 mā bueh 講我 ê 德文是 D2」阿丁笑甲目汁㴙㴙落。

互相放送相辭後 ê 四常交交伊𫝛款是按敍利亞來德國 ê 同梯同學訊息，gún-ê Bá-sirh mā 寬寬仔入月台，無 hōo 儒家(jû-ka)縛跤帛 ê 我想 bueh hōo 伊一个相抱(sann-phō)，總是無縛 ê 跤帛無表示我 ê 自由會使得𪐞去別人兜。

那擛手那上車，揣著位坐定看向月台，阿丁 ê 手猶原靜靜仔擛 hōo 我想著烘肉會結束送伊轉來車頭牽鐵馬，伊手 mā 擛甲互相無法度見著對方為止。

「美樹，美樹，美樹...」我順 Bá-sirh ê 速度 kā 阿丁按仝尺寸看甲連一尺攏無法得見著，想著往過上課時間行 tī 街路，阿丁手提一杯咖啡笑微微仔喝我 ê 名，然後做陣行去坐地下鐵 ê 日子 mā 想著 uī-tio̍h hōo 母囝通好好過四常，下性命揣頭路，總是準做工夫夠額，德語無夠額 mā 覓無頭路目頭不三時結結 ê 伊交人 tī Lebanon 聽著有一个國家  tuì 𪜶友善隨𤆬某囝轉往 Türkiye 土呂其，某囝安頓好勢，透世人讀聽寫講 kan-na 阿拉伯語 ê 伊，m̄ 捌字看告示一路按 Türkiye 步輦到德國，那覓頭路那靜心等待某囝有法度按土呂其坐飛行機到德國 ê 日子。

「彼兩冬，我逐日上愛做 ê 事工就是徛踮機場看飛行機想像頂懸有 gún 牽手交後生。」

阿丁 m̄ 捌分張 tī Lebanon 交土呂其 ê 日子 mā m̄ 捌分張家己按怎行過這段路，總是講著這段日子，伊 ê 目神猶原離 buē 開憂愁，總是憂愁內底猶是有笑容「神 ē uī 我做主，引𤆬我行到德國認捌新 ê 世界。」

「美樹，美樹，美樹...」我 ê 頭殼踅翕團體相 ê 彼日，成做唯一東方面腔 ê 我，無想 bueh 成做孤鳥 mā 因為西方慣勢 ê 目神 hōo 我揣無一个位通徛，阿丁發現這个現象隨喝我 ê 名 hōo 我按孤鳥插人燒烙 ê 人群。想著通過居留依親德語 B1考試，考試官 uī gún 遮 ê 考試者翕團體相，我又閣是唯一 ê 東方面腔，交我做陣領證書 ê 阿丁隨喝我 ê 名 hōo 我自在融入敍利亞箍仔 ê 貼心....

「Gún 是外來者，一日戰爭結束，gún 需要轉去敍利亞，我愛我出世交成長 ê 所在，總是看 ē 著 ê 腹笥比雺霧 ê 愛閣較重要，囡仔 tī 遮有機會受好 ê 教育交好 ê 未來，我需要覓著一份頭路 hōo gún 規家伙仔 ē-tàng tī 遮開花散葉。」

2024 年兜，交臺灣戒嚴年閣三人做陣隨成做賊愛 hőng 掠去關 ê 敍利亞，總算結束十外冬 ê 內戰，我想著一路搪著 ê 敍利亞同學，想著阿丁，想著爸母求伊離開家鄉 ê 阿穆，想著因為我 kā 手頭 ê 文稿轉 hōo 伊讀 hōo 伊 m̄ 免成做老師口中 ê 低路人，隔擺上課隨紮牽手親手撋 ê 敍利亞扁笱麭送我 ê 阿德，𪜶敢猶停跤 tī 德國，𪜶敢跟綴這波改革再次翻山過嶺轉去敍利亞開始𪜶 ê 敍利亞第二斗新人生。

「美樹，美樹，美樹...」那跟綴 ARD ê 影片按德國出發到土呂其邊境，看成做德國缺工一員主力 ê 敍利亞朋友那擛手那行向海關，我 ê 雙目成做彼日 ê 車窗，Apollo 阿波羅順分秒走標，我 ê 目墘成做伊敨放燒氣 ê 汗水。

「有一日 gún 轉去敍利亞歡迎你來 gún 兜𨑨迌。」

 「有一日恁來臺灣歡迎恁來 gún 兜𨑨迌。」

這段約定，gún 齊清楚伊是犀牛望目，一月向過一月，總是 gún 攏知機這个邀請 m̄ 是空喙哺舌。

「美樹，美樹，美樹...」耳鏡成做一面鏡，引𤆬我見著準備上北面試 ê 阿丁隔一个月台大聲喝我 ê 名，笑微微講「這是 gún 後生，這是美樹，我 ê 德語課同學。」

「美樹，美樹，美樹...」阿丁 mā 是唯一一个有法度 kā 我 ê 名講甲 buē 歪膏揤斜像鼻仔迵過地球 ê 希臘籍德語老師交印尼籍德語老師 kā 我 ê 名叫甲連我家己攏 m̄ 捌。

「Es ist schön dich wiederzusehen」(真正蓋歡喜有機會交你再次相拄頭)，彼日車頭相辭 ê 話句猶原燒烙，敍利亞未來 ē 如何，無一个人有通天眼通知機，祝福敍利亞眾阿丁、阿穆、阿德一切平安順序 mā 感謝恁 ê 溫暖 hōo 我這个從來 m̄ 捌 kā 一个老師上甲透尾 ê 人有機會按孤鳥融入一个社群，準做咱 ê 語言齊是咱無在手 ê 德語。

我交眾阿丁、阿穆、阿德，gún 交波蘭前總統 Lech Wałęsa tī Gdańsk According to Lech Wałęsa tī 自家 ê 雙叉路有屬於家己 ê 故事佮決定。遮 ê 雙叉路有家己 ê 設定，有運命 ê 引𤆬，m̄ 管佗一款面肉，心肝頭掠無定，準做是落塗 ê 小金英獅仔齒➃ mā  buē 定根生湠。

➀ Aus einer Muecke einen Elfanten machen : 刣雞用牛刀，磕著就司公姨，一隻蝨母嗙甲水牛大。華語講小題大作交誇張

➁ The Piano : 鋼琴，華語翻譯做《鋼琴師和她的情人》

➂ 食飽未，一切敢順序？

➃ 德：Löwenzahn, 英：Dandelion, 華語講蒲公英。