亂皂𥴊仔店 ⓂⒺⒾⓃⓀⒾⓄⓈⓀ

2024.05.05 Westpol - Die Luxus-Schleuser 報導猴穿衫做走水 ê 新聞 hōo 我想著阿度 ê 故事，𫝛時想著 tsuē-tsuē 臺灣人一聽著 gún 翁是德國人隨認定我因為這个德國翁婿 mā 綴 leh 成做德國人 ê 故事。

遮 ê 故事無啥物通好喋詳，不過新聞事件 ê Die Blaue Karte EU 拄好 ē-tàng hōo 捎出來熥。

提碗想阿貓-- Restella Camp, Montenegro.

食咖哩想殘殘脆脆拒絕 Blue Card ê 阿度。

碗是按 Budva, Montenegro bué--ê，一塊 1.5€。

阿度是德國公司請來德國補強𪜶較頇顢 ê 工課。

阿度無向公司申請 Blue Card，總是德國 ê 工作環境連德國人家己 mā 嫌甲比𪜶 ê 鹹菜閣較鹹掛酸，免閣講 gún 遮 ê 按外埠頭來 ê 人。

聽過這个分張講有一个美國人踮遮做穡十外冬，德語 mā 講甲伊就是德國人按呢老，伊佮本埠人原仔無交陪。

M̄ 是伊酷刑翹頭歹鬥陣是德國人 kan-na bueh kā 伊當做酸素、滾水按呢看待。

有一日做伙拍拚十外冬，見擺見面 kan-ta ē 講 Guten Morgen(𠢕早) buē 閣有第二句 ê 查某同事開始關心伊 ê 四常 hōo 伊感覺紅龜生蟲，足龜怪 m̄-koh 伊 mā 認為凡勢是這位女同事感覺伊 ê 德語有夠額通佮伊牽尪仔補傘，破豆 m̄-tsiah 開始佮伊練仙。

M̄ 管你德語講甲偌爾仔老，你認為無膏 ê 九月蟳，𪜶原仔認為𪜶 ê 德語比你較老，因為你 m̄ 是德國人。

我無講每一个德國人攏按呢，總是搪著這款人，四常無 teh 綴佛修行抑是較無自信 ê 人 ē 感覺𪜶無好鬥陣或是中氣無地敨。

一日這位女同事佮伊做伙 tī 茶水間那食 Ka-pi 那話仙，步頻微微仔笑講「咱 ē-tàng 做好朋友」聽著這美國人 mā m̄ 是食香火大漢隨微微仔笑應「我欠朋友，m̄-koh 無欠夥計」自這句話，本底是洘旱 ê 田園隨落雨閣發新穎到伊愛薅草 tsiah 有法度顧田園。

四常來講，德國人 ê 感情態度就 tshan-tshiūnn 𪜶 ê 法律，私通無犯法。

起因，這 kan-ta 表示你 ê 姻緣有問題，有問題 mā m̄ 是講按呢我 bueh 離緣就隨 ē-tàng 離緣，離緣進前原仔愛照規定揣婚姻專家諮詢(susun(tsu-sûn)。

畢竟，有緣做翁某是百年修來 ê 福氣 m̄ 是頂世業債這世愛來 hâinn，我講 ê 兩人攏有互相意愛 m̄ 是勉強或是硬押 ê 彼款。

Sóo-tí 搪著這款家己 m̄ 生囝 kan-ta bueh 成做別人奶母 ê 人，tī 性文化已經開放甲 ē-tàng 接受一个查某 mā tshan-tshiūnn 狗公四界濺尿 ê 德國原仔有伊 ê 道德基本 buē-tàng 拍破。

阿度 ê 德語 ē 曉講總是猶無夠德國政府 ê 要求，sóo-tí 伊家己 mā m̄ 捌向望有一日伊 ē tuì 德國政府申請 Blue card(Tshan-tshiūnn 美國綠卡)。

Sòo-pái 當公司知影伊有這个按算準備辭頭路，伊 ê 公司隨替伊掛保證 hōo 伊 m̄ 免受 tsuē-tsuē 折磨(tsiat-buâ) 就 ē-tàng 提著 Blue Card。

總是，逐家 mā 清楚知影，這張 Blue Card tshan-tshiūnn 媒人婆保入房，無保一世人𫝛款，咱 ê 運命 tshan-tshiūnn 古早 ê 查某人仝款，翁婿喝 bueh 離緣就離緣無地討論，sòo-pái 阿度最後猶原選擇離開德國申請去美國發展。

另外，去美國伊 mā ē-tàng kā 厝內 ê 人接過來。

德國 ê 依親政冊 mā m̄ 是 tshan-tshiūnn tsuē-tsuē 臺灣人，一聽著我蹛德國就隨講「你有德國護照抑是德國綠卡」遐爾仔簡單。

一目𥍉阿度按遮徙位去美國 mā 十冬外，本底猶有 teh 保持連絡 ê gún 因為我 ê 姜子牙釣魚 -- 散仙 buē 記得 tī Hinet 停掉前用新口座寫一張電子批 hōo 伊知影我 ê 新口座，就按呢我佮伊成做斷線 ê 風吹 m̄ 知愛去 tueh 揣 tsiah 有法度揣著。

早前，我 m̄ 是真愛食咖哩 ê 人，因端為何？

這久稽考應當是咖哩角 hōo 我感覺𣻸𣻸沙沙 buē 敆喙。

有機會接觸印度咖哩，我 tsiah 知影咖哩原來遮爾仔好食。

感謝阿度，願你佮你 ê 親人平安順序。

栽欉 --- 2022.11.12

翻田塗 --- 2025.03.15