亂皂𥴊仔店 ⓂⒺⒾⓃⓀⒾⓄⓈⓀ

沓沓仔款上北 ê 物件，頭殼不知不覺踅去瑞典佮土耳其微妙(bí-miāu) ê 融合佮緊張，跤步 mā m̄ 知 tī 底時行向自剾板膋真久 m̄ 捌相借問 ê 麵粉。

250g ê 麵粉 ē-tàng 出 6 塊 Pide，一塊 68g/190g，差不多半碗外飯 ê 量.....

550、405，405、550....加 0.4€，減 0.4€，bué buaih bué...啊，人生哪 ē 遮複雜！！！

「揀食，無物通食你就知」序大無色無味無形 kā 𪜶 ê 提醒順空氣輕輕仔送到我 ê 耳空仔鬼。

無聊，曷 m̄ 是逐日若神蹛 tī 法國➀，準做無法度食甩走瘦 mā 愛享受掠肥食瘦。

掠肥食瘦，這我做甲真齊著 m̄ 捌催眠家己，這軀 buē 合猶有 dehnbar➁ 通解決。

是講，我愛 Pide tsuē 過 Pizza，是講我 mā 真久無食 Pide，是講逐日攏食五穀米糧真正 bueh 生菇.....

啊，殘殘豆干切五角！

「Deutscher sehr glücklich」那捏麵粞，結束 Inhale, Exhale ê 踅來廚房揣幼物仔窒喙空，見著 Pide 若牛目 ê 雙目褫開若十五 ê 月娘笑咍咍。

「Einmal pro Woche」我講。

掠肥食瘦是生活禪，我愛學 ē 曉掠漏，板膋 m̄-tsiah 有法度維持加一分傷肥，減一分傷瘦 ê 拄拄好。

頂回(2024.05.02)翻田塗想 bueh 記錄 Feta, Schafskäse 佮 Hirtenkäse 三者之間 ê 精差，文字寫甲「牧」(bo̍k) 隨放棄， 我揣著 ê 文字窒倒街，無欠我一个解說，不過 Hirtenkäse 愛按怎轉譯做台文就敢若人 tuì 沈入海底 ê Titanic 遐爾仔好奇，這就愛記錄。

翻田塗無實做 ê 冬後，我又閣好玄 Pide tī 華文按怎號名？

1. 土耳其披薩 --- 按呢 Lahmacun leh？

2. 土耳其船型披薩 --- 有合軀，m̄-koh 我拄著 ê 土耳其朋友攏講，伊 m̄ 是 Pide 像 Menemen 就是 Menemen m̄ 是 Shakshuka，我 m̄ 是當地人，我 buaih 大主大意 ka̋ng 添名，畢竟添一句語法，腦紋 ē 加一線。

3. 皮德 --- 按 Istanbul. com 來 ê 號名，就是你，皮德！！！

➀ Leben wie Gott in Frankreich

➁ 掛糾帶 ê 衫褲 --- 德國喝玲瓏台 ê 主持人佮 Model 展示衫褲，平均兩分鐘 ē 展一斗，準做你是 XXL，S 猶是合軀四序 ê Mega dehnbar。

那巡菜股那薅華稗(phuē)仔，我又閣成做一隻貓想 bueh 知影德文 ê Hirten，英文 ê Shepherd，華文 ê 牧羊人ㄇㄨˋㄧㄤˊㄖㄣˊ，Blog 跟綴線頂辭典寫 ê「看羊仔人」敢有新 ê 講法，起因「看羊仔人」這个辭目正經無敆喙斗。

教典自 2023-6-13 改版辭目新添 250 條到這久 ê 300 條，教典猶原若《倒風內海》沙喃 ê 族人 kā 人做犁翻田塗，自熟似教典就較罕得請教 ChhoeTaigi找台語 tī 這倚 bueh 2 冬 ê 這久閣 kā 伊請教一斗，當初這條「看羊仔人」辭目已經無法度再相見，換另外一个新朋友 hōo 我雙跤踏雙船，心頭亂紛紛，起因 tī 維基辭典 我 mā 揣著「牧夫/Bokufu」這个按日文來 ê 講法。

當心頭亂慒慒 kā 字唸出喙是上好 ê 解決方式。

牧羊人 Bo̍k-iûnn-jîn，綴愛台語 ê 發音唸，真紲喙。

牧夫 Bo̍k-hu 礙虐兼咬舌。

教典是沙喃 ê 部落，Google 是自荷蘭人行踏倒風內海 ê 萬千百樣。

「牧」（bo̍k） ，

本來的意思是飼精牲仔的人、

顧牛的人，

像：牧羊、牧童；周朝管理牧場的官員，

人講「牧師」；

近代咱講牧師，

講的是基督新教的傳教士，

意思是牧者嘛是老師。

--- 2022.3.21.台視台語新聞逐工一字「牧」（bo̍k）

照我個人 ê 慣勢，我 ē 講牧羊人/Bo̍k-iûnn-lâng，請教線頂辭典，我佮意牧羊人/Bo̍k-iûnn-jîn ê 講法。

押尾請《石頭縫的幸運草》〈台文人tiō行台文路 〉ê 這段話「話是風，字是蹤」來表達我 tuì 寫 Blog ê 想法。

Mā 借用《失控的台語課》來表達我 tuì 語文 ê 想法；

《失控的台語課》──熱愛臺灣話而成立的語言工作坊。

熱愛，不因她的優雅美麗、也不為她的粗俗有力；喜歡，不需理由。你見到的是美還是醜，毫不影響我們。

語言 ê 媠䆀纏綴個人喙斗，我愛 Bo̍k-iûnn-jîn 這个講法。

寫 Blog 正經是一件好代誌，伊 hōo 我認捌家己真𠢕暗頭仔食西瓜，半暝仔反症 ê 症頭 m̄ 是反起反倒，是我理解 W wodzie, owej płynnej materii, nie ma nic stałego，因為水，從來 m̄ 捌固定，伊 tsiah 有法度按一港水沓沓仔湠做海洋。

沓沓仔發見寫 Blog ê 好，伊除了 hōo 我有所在通寫、餾台語、德文等等掠外。

伊 mā hōo gún 翁某揣著敆藥仔行去棺柴店 ê 問題。

Tshan-tshiūnn 我寫「因為寫 Blog hōo 我沓沓仔想著過去學習 ê 語言」。

Gún 翁讀德文 ê 部份，伊問 uī-hô 愛轉來 Blog?

代起先，我掠做德文佮台語寫無對同。

畢竟，寢開始我 ê 主力是台語書寫 m̄ 是德文佮英文這兩个語文。

Sóo-tí，德文佮英文 ê 部份，我攏是延續 tī 愛料理 tsuánn-iūnn Murmur 𪜶 tī 遮就綴 leh 延續，一屑仔攏無變化。

不過，我 m̄ 捌感覺按呢 ê 牛牢跤請媽祖，無查埔 iōng 查埔 ê 清彩，窮實是豬舌 tah 馬鼻亂七八糟閣家己捧屎抹面。

「讀無路，m̄ 通 tshan-tshiūnn 恁爸母按呢 buē 博假博，硬 bueh 蟾蜍展氣功，膨風」我無愛 hőng 譬相，我這佮我講無𫝛款語文 ê 夜間部同學 mā 是，伊隨指我 ê 筆尾講「這啥？」

無指無感覺，一指隨會失禮，我有喙講別人，無喙講家己閣放火燒厝燒過間。

檢采是我 buē kā 死蛇硬諍講是活鱔魚 hōo 我這人喙上毒，比刀較利 ê 供體無閣繼續湠落去。

我相信每一个搪著家己 ê 爸母 hőng 供體 hőng 譬相攏 ē buē 歡喜。

不過，我原仔愛講我 m̄ 是𪜶本家 sóo-tí 我 buē 綴𪜶兜 ê 問題米糕𣻸。

家己 ê 立場徛 hōo 在自然就 ē 公 hâinn 公，私 hâinn 私 buē 挲烏面。

綴翁 ê 問題閣斟酌繩我 ê Blog，我隨笑甲 kiōng-bueh 痚呴。

原來我 m̄-nā 是目睛掛斗概，看人物就愛看人寫一逝漢字一 逝羅馬字我 mā bueh 綴，看著人閣寫一逝英文我呔 ē-tàng 無綴 leh 攑香綴拜閣月光下看人影，莫怪現此時 ē hőng 摠著我是五錢豬仔，掛一支喙 。

總是，歹船原仔 ē 拄著好港路，只要我接受我 ê 頇顢。

Kā 我這鬼佮馬吼無仝聲 ê 文章閣餾一回隨想著這句話「牛好駛，也著工」，一件代誌 m̄ 管閣較按怎簡單，也愛了時間去做 tsiah-ē 順 tsiah-ē 完成。

我想 bueh 惜花連盆 kā 愛料理(Icook) ê 逐字逐句 khop-pih 來遮，這是一个真好 ê 想法，總是愛料理 ê 文字 kan-ta ē-tàng 寫 200 字，這就表示 tsuē-tsuē 想 bueh 寫 ê 事項無寫出來，遮 ê 想 bueh 寫 ê 事項決定 ē 徙來遮掠外，照我 ê 個性，另外兩種語文 mā buē 決定是照一个語文 teh 行。

起因，語文引𤆬無仝 ê 思考無仝 ê 認捌。

Tshan-tshiūnn 德國無龍眼、荔枝遮 ê 物件，你 bueh 去佗位揣相𫝛 ê 辭 kā 𪜶講「Das ist Longan, das ist Litchi」，我知影決定有人 ē 講呔 ē m̄ 知，你 m̄ 是寫出來。

我當然 mā 寫 ē 出來，網路遮爾仔發達清彩揤一个井欄(Tsénn-nuâ)看做石春臼(tsing-khū) ê 提牛頭來鬥馬身 ê 資料 mā-ē hōo 你讀 kah 有影有跡。

只是你讀甲有影有跡無表示，你知影彼是啥物。

Tshan-tshiūnn 德國有一个チーズ號做 Quark，m̄ 知德國有這个物件 ê 人請教網路大部份 ē 揣著這个 Quark，當然--lah，這是我個人搪著 ê 經驗。

一个簡單 ê 問題 hōo 我寫甲若硬 bueh kā 少女縛跤 ê 人，誠恐怖。

我無 The Minds of Billy Milligan(24个Billy Milligan) ê 人格特質，總是我真愛這款 tsuē 語四常。

起因，伊 hōo 我成做 The Fifth Sally 㧎 tī 這个文化 ê 問題 ē 綴這个語文成做另外一个人隨敨放。

只不過，我原仔有這个問題，我慣勢請 Google kā 我鬥相共了後，家己 buē 閣餾一回致使捷捷 hōo 我上死心 ê 讀者 gún 翁定著請教我「這是啥物意思」。