亂皂𥴊仔店 ⓂⒺⒾⓃⓀⒾⓄⓈⓀ

按 2019. 9月這跤兜開始寫 Blog 寫到今猶原 tī 改版，不而過改甲這篇已經揣著家己意愛 ê 書寫排版。

所以，應當 buē 閣出現這頁佮彼頁無𫝛款 ê 問題掠外，我應當 mā ē-tàng 完成當初 ê 設想一日一篇。

Blog 寫 bueh 4冬，一路寫一路改版所做 ê 代誌看起來誠無經濟應效，總是 tuì 我來講這是搜揣 Übermensch(挑戰問題，挑戰自我) ê 過程。

我誠愛這个過程，看家己這睏仔是辯護士，彼睏仔是辯士，過一站仔成做啥物代攏是火化布魯斯 ê Scheiße、Crap，搪著火化布魯斯我 ē 熥 Sufen(階段，層次 Hermann Hesse)來掠漏 ；

Tshan-tshiūnn 每一蕊花，每一个少年

Tī 無相𫝛 ê 年歲，無相𫝛 ê 人生階段 ē 成做一朵新嫣 ê 花蕊

每一種智慧佮美德攏 ē 開花

Tī 伊 ê 年間 buē 接續透流

每一擺 ê 四常呼喚，心攏愛 

準備離開，重新開始

只是 m̄ 管按怎熥我攏 m̄ 捌想過這个問題大工無人倩，小工 m̄ 願行我 kan-na 願意 iōng 一款理路扛棺柴，兼貿哭，tshan-tshiūnn 日文 ê「兄貴」あに(aniki) ē 曉拍漢字 ē 曉讀華語漢字煞 m̄ 捌搜揣伊 ê 摠頭，橫直伊著是「兄貴」，伊著是「Huân-kíng」m̄ 免款待伊是「Khuân-kíng」。 

直到 Blog 寫 bueh 半冬一位迵過面冊社團牽線 m̄ 管我四邊 kan-na 賰德國這一倚主動寫信息 hōo 我講伊 ē-tàng kā 我鬥相共按臺灣紮寡數念來德國 hōo 我 ê 生份面友，一見面話講無幾句伊隨笑講「你中部人--hooh」。

我 ē 記持我 m̄- 捌 tuì 人 講過我 ê 後頭厝 tī 搭位隨笑 tuì 伊講「我 ê 中部腔真重--hooh?」

伊隨轉做 Thá-kheh「台中人佮北部人 lóng 講蟬仔，南部人講 ám-poo-tsê，kan-tann 大肚、龍井、追分 hit-tah ê 人 tsiah 講 tuā-lē，大聲 lè-lè 叫 ê tuā-lē，聽 in ê 腔口是海口人，一定是海線 ê 兄弟」按呢笑答「gún 慣勢講 " Suî "，gún 後生現此時慣勢講 " Tsiâ " 因為伊 tī 臺中讀書食頭路」。

這件代誌 hōo 本底 tuì 學習「Lô-má-jī」無興頭 ê 我隨關心鳥鼠敢有洗身軀 -- 揣鼠味(趣味)，mā 因為這件代誌改變我依賴(i-nāi)倉頡輸入法寫拍台文漢字 ê 慣勢。

雖罔到今我猶原 m̄ 知影漢羅書寫 ê 比例佮啥物字愛 iōng 漢字啥物字愛 īng Lô-má-jī tsiah 適合，總是迵過一擺閣一擺 ê 台文輸入法拍寫台文，我揣著家己 mā 熥一斗囡仔時搪著別人笑 gún 講 ê 臺語有芋仔腔，阿爸 ē iōng tshan-tshiūnn 灶雞仔 ê 管區--ê「鵝仔」kóng「蚵仔」，「西瓜」變做「死瓜」tuì gún 講「透血 ê 語言 mā 𤆬 hōo 人快樂」。

另外綴阿爸離開家鄉到外埠 ê 阿母 mā-ē 按呢講「咱厝邊 tsuē-tsuē 人講蘋果、柑仔蜜，我慣勢講林檎、Kam-má-tooh」無人無 m̄ 著只是慣勢 ê 表達無相仝按呢 niā-niā。

自2019年第一篇全漢字台文到仿寫陳雷醫師 ê 寫作方式一篇全漢字、一篇全羅字到今 bueh 4 冬 ê 今年轉做漢羅一篇，我猶原是 m̄ 知影漢羅書寫 ê 比例 mā 猶原 m̄ 知影啥物是泉腔啥物是漳腔等等。

M̄-koh 我清楚知影我是幸福 ê 囡仔，因為我 m̄ 免經過 tshan-tshiūnn 爸母𪜶彼勻 ê 人經歷愛經過 tsuē-tsuē 擺 ê 語言分裂，tshan-tshiūnn 阿舅到老猶原 teh 抄報紙訓練喙舌向望按呢 ê 練習 ē-tàng 看著字隨 sueh 出囝孫 ê「國語」。

Sóo-tí 我真正足感謝爸母 ê「透血 ê 語言 mā 𤆬 hōo 人快樂」ê 教養 hōo 我 buē tuì 家己起毛敲油嫌家己䆀。

總是 buē 嫌家己䆀猶原 ē 因為 m̄ 捌寫過 m̄ 捌學過 ē 因為別人 ê「文字真的讓人看不下去」這類隨風火著， 不過風火著歸風火著我 mā buē 佮遮 ê 「捍衛戰士」膏膏纏盤天說古，因為我家己 mā 有相𫝛 ê 問題愛我讀「哇係呆丸人」這款台語晶晶體 mā 足痛苦，痛苦甲 m̄ 知愛去佗落拆藥解決病症 tsiah 好，sóo-tí let it be tsiah buē uī-tio̍h 別人 ê 問題 gîng 死家己。

引序台灣教會公報3619-25《台文生涯》ê 這段話；

母語是做一个人心靈 ê 根本部分，咱做一个人所有 ê「生活、行動 kap 存在」，包括咱 ê 語言，攏是上帝賞賜（使徒行傳17章28節），這叫做「天賦人權」。

我是幸福 ê 囡仔有機會 tī 家己 ê 年間搪著這粒 hōo 人當做舊漚舊臭需要挕捒 ê Einkorn(一粒麥仔) kah 搪著 tsuē-tsuē 願意 tsham 我分張這粒 hőng 供體伊無經濟價值 ê 麥仔愛按怎掖種我 ê Einkorn tsiah 有法得抽穗，弄花，勾頭，灌頭，落礨，飽穗，雖罔我 ê Einkorn 原仔䆀甲踅一輾轉 m̄-koh 我原仔種甲足滿足快樂。

日文學習記錄

チーズ(Chīzu) Käse

ハム(Hamu) Schinken

後記

四常我 ē kā 投稿並出刊 ê 文章記錄 tī 家己 ê Blog，總是這篇文章已經 hőng 改甲已經我認為伊 m̄ 是我自本 ê 文章，我就 buē 想 bueh 這篇文章刊登 tī 佗位。

另外，這篇文章 mā 成做我押尾 ê 一篇投稿。

我尊重編輯專業，總是文章猶是我--ê。

是，我 tuì 連續2斗 bueh 相𫝛 ê 經驗感覺真無四序，自然就 buē 閣想 bueh 體驗第三斗。

Tshì-sù Kam-má-tooh Há-mu̍h 葉仔酥酥

...... 材料 ......

葉仔酥　1

Kam-má-tooh，刴幼　

Há-muh，刴幼

Tshì-sù

牛奶

鹽、胡椒

...... 步數 ......

1. Kam-má-tooh、Há-muh 濫做伙搜齊。

2. 葉仔酥捊寡牛奶，Kam-má-tooh、Há-muh 鋪落去，掖寡 Tshì-sù。

3. 落烘箱，捘220度烘12～15分鐘，tiàu 寡鹽、胡椒，樂暢來食。

Seit 2019 September schrieb ich den Blog, ich weiß nicht wie oft ich den Blog geändert habe.

Ich meine das typografische Design.

Aber ich glaube diesmal ist es das letzte Mal.

Weil ich liebe was ich jetzt mache.

In dieser Zeit, habe ich das auch darüber nachgedacht.

Sollte ich das TLJ(Taiwanischen Luomazi) weiter schreiben.

Weil, wenn ich Han's Wörte im Computer schreibe, brauche ich das Zhuyin System nicht.

Also...manchal aber sehr selten.

Deshalb habe ich immer über TLJ nachgedacht.

Sollte ich weiter mache oder nicht?

Weil, ohne TLJ, das ist einfacher für mich.

Aber, jedes Mal.

Wenn ich habe meine Artikel lese.

Ich habe das Problem wie vorher, wenn ich deutsch gelesen habe.

Ich spreche jede Wort fast wie Englisch.

Weil, ich lese nicht ABC,ÄÖÜ usw.

Dann habe ich viele Probleme, wenn ich deutsche spreche.

Wenn ich habe das Problem gefunden habe, dann ist TLJ schreiben kein großes Problem für mich.

Weil jeder sieht endlich das bedeutet nicht das gleiche.

Blätterteig mit Schinken und Tomaten

...... Zutaten ......

Blätterteig　1

Tomaten in kleine Stücke geschnitten　

Schinken in kleine Stücke geschnitten　

Käse

Milch

Salz, Pfeffer

...... Zubereitung ......

1. Tomaten und Schinken gut mischen. 

2. Die Milch auf den Blätterteig streichen.

3. Käse und 1. auf dem Blätterteig legen. Dann in Stücke schneiden.

4. Den Blätterteig auf das Blech legen, auf 220 Grad 10~15 Minuten backen.Guten Appetit!

Since September 2019 I wrote the blog, I don't know how often I changed the blog.

I mean the typographic design.

But I think this time is the last.

Because I love what I do now.

During this time, I also thinking about this.

Should I keep writing the TLJ (Taiwanese Luomazi).

Because when I write Han's words on the computer, I don't need the Zhuyin system.

Well ... sometimes but very rarely.

That's why I've always thought about TLJ. 

Should I go ahead or not?

Because, without a TLJ, it's easier for me.

But every time.

When I have read my articles.

I have the same problem as before when I read German.

I speak every word almost like English.

Because, I don't read ABC, ÄÖÜ etc.

Then I have a lot of problems when I speak German.

So, when found this problem then TLJ writing isn't a big problem for me.

Because everything that looks similar does not mean that they are all the same.

Puff Pastry Tomato and Ham Tart

...... Ingredients ......

Puff pastry　1

Cut tomatoes into small pieces 

Ham cut into small pieces 

Cheese

Milk

Salt, Pepper

...... Method ......

1. Mix the tomatoes and ham well. 

2. Spread the milk on the puff pastry. 

3. Place cheese and 1. on top of the puff pastry. Then cut into pieces. 

4. Place the puff pastry on the baking tray, bake at 220 degrees for 12 ~ 15 minutes. Enjoy your meal.