亂皂𥴊仔店 ⓂⒺⒾⓃⓀⒾⓄⓈⓀ

(2022.11.20 早起頓 蘑菇青花仔菜炒 + Kam-má-tooh 醬肉丸仔 + 清飯/685kcal )

相信大部份 ê 人 lóng 有 tsit 个興頭意愛一空掠雙隻。

Sòo-pái 面對 tsham 家己無底代就 ē 一人一家代，公媽隨人祀。

另外，lán mā-ē kóng 家己 m̄-bat hōo 人鴟鴞偷掠雞，烏鶖佇壁。

Ia̍h-sī lán só͘  做 ê 代誌 m̄ 是俗物食破家，kìng-ka m̄ 是驚人看 lán 無點 tsiah 攑旗軍仔。

Lán 是一兼二顧摸蛤兼洗褲𠢕扞家，絕對 m̄ 是 hit 款攑香綴拜，只驚 hōo 人抾無點。

疫情時間 tsia̍p-tsia̍p 讀著媒體放送食食 ē 無夠價數需要 peh 懸山，起因百工 lóng 欠工。

Iáu-m̄-koh nā tsiânn-si̍t 是按呢，為何 tī tsit 个時 tsūn ē 出現 tsit 款代？

Protest gegen Billigpreise in Supermärkten（抗議超市採收價數 siunn 過 kē)

我 ná 讀新聞 ná 想阮翁 tsit-tsām-á ê 病翻箍「相趁相喊」 mā ná sīm lán ài 按怎開喙 tsiah buē hō͘  伊感覺 lán tùi tsit 款代誌 lóng 無日出著積雨來糧 ê 想法 。

M̄ 是 lán 無 tsit 款態度是 lán 認為 tiàm tsit 个平和年間繼續 īng tsit 款補胎較贏做月內 ê 態度來 kuè 日子，大部分是 kā 飽滇放送 ê 別人，m̄ 是 lán 家己。

Tng lán tī 搜揣「藝術」來擺撥 tsit 个已經 khai buē-tsió 時間 tsiah kā 伊撨 hō͘  正 ê 門扇時，有人揤電鈴。

門一拍開，tńg--lâi 歇中晝 ê 阿羅翁仔某𢯾一箱菜蔬 hōo 我 kóng「超市退 tńg--lâi ê 菜蔬」。

我 ná sueh Dankschön(to-siā) mā 想--著按怎 īng Renoir ê 風格 kap 阮翁談阮 ê 「需要」 kap 「有需要」。

前幾日 bé ê 青花 á 菜，tiàm tsit 段 kóng kah buē-su ài tńg--khì 食生蚵菇 ê 年間(1)。

Tsit-má m̄ tio̍h-sî koh 欠工，一蕊猶原是窒倒街無到一歐圓.......... 

物件整理 hó-sè sûi 搜揣數單，tshing-tiānn-pe̍h-tiānn 想--著早前寫 ê 一段心情。

＂Lán 掠做 lán 事事項項斟酌 tsîn 斟酌 sīm 著 buē hōo 代誌行 tuì 私偏。

    Iáu-m̄-koh，lán 猶原是活 tiàm The Truman Show。＂

有一回翁某做伙 khì 別 ê 庄頭 ê 寮仔買雞卵 mā 踅 khì 作穡人開 ê 餐廳食𪜶家己起手做 ê Pháng、激 ê 酒、灌 ê 煙腸等等。

門一拍開，看著一陣 tī tsit 个時間無應該 tiàm tsia 過「Bierfest」(2) ê 人。

我細聲 tùi 阮翁 kóng 「tsia--ê 人定著 m̄ 是 Swabian」(3)。

「𪜶是 Swabian」阮翁 ìn。

揣好位點好菜，一 tsiah 貓仔 tó-tī 鋼琴頂，我規个人 ê 耳空一直 ùi hit 桌年歲疊起來應當超過500歲 ê 桌覆去。

「Suah m̄ 知，著是揣著 koh khah 俗 ê 所在，就 iōng 品質無合格退貨。」

「我 hō͘  人退 beh 一跤櫃。」

「我 hông  退 kah 倉庫 bô-teh 囥其他種作。」

每一个人手捾一杯迵心涼 ê Bì-lù 目頭 suah 親像我看著磅仔就結規丸，齷齪。

我靜靜 á 聽每一个「鬱積」。

離開餐廳，我 tuì 阮翁 kóng「WWF」(World Wide Fund For Nature)。

Tse tsham WWF 有啥底代，伊問。

「喙 kóng 保護動物，手提銃拍獵」我 kóng。

「Se-pan-gâ 國王無 koh 按呢做--ah」阮翁 ìn。

「因為小鬼 á殼 hông 拔掉」我 kóng。

餐廳內 ê 序大人是 tsham 大公司簽約種作 ê 人。

大公司 tiàm 歐盟揣--著無 hō͘ 「勞工」、「環境保育」tsia--ê 等等法規縛牢，德國法規 iū-koh 「接受」 ê 歐盟國家，就 suî「水鬼揣城隍」要求退貨。

Tsia--ê 序大人知影家己 ê 貨無問題，有問題是大公司。

孤人 tsham 大公司談無路，逐家相招搜揣辦法處理問題。

阮 ná 行 tńg--khì 停車場 ná 談我 ê 感想。 

我用阿梅總理有一回 tsham 學生囡仔對談德國教育問題，伊 ê 回答做我 ê 結論。

「囡仔，政治是複雜--ê」。

一句話 pué 掉討論久年 ê īng「實習」來妝娗「企業成本」問題。

註

(1)

一戰期間，德國 ūi-tio̍h 解決糧草問題，大量種植「Austernpilz」(華：秀珍菇，德文直翻生蚵/Austern，菇/Pilz）

(2)

「Bierfest」 Bì-lù 節慶，阮翁 kā 號做 Bì-lù 廠商 ê 商展。

(3)

「Swabian」地區名。Tsit 地區 ê 人 tiàm tik-kok sióng thang 人 bat ê 印象：勤儉。

蘑菇青花仔菜炒

...... 材料 ......

煠好 ê 青花仔菜　500g

蘑菇，切塊　400g

豆油　1EL

蒜頭，刴幼

鹽、胡椒

...... 步數 ......

1. 蘑菇落鼎炒芳，青花仔菜、蒜頭、豆油濫落去搜齊。

2. Tiàu 寡鹽、胡椒，樂暢來食。

(20.11.2022 Frühstück Broccoli mit Champignons - Hackfleischbällchen in Tomatensoße - Reis/685kcal)

Ich habe das Rezept gesehen und  bin sehr interessiert es mal zu probieren.

Nach dem probieren, ich liebe es, besonders Brokkoli ist knusprig und Champignons sind saftig. Sehr lecker!

Gebratener Broccoli mit Champignons

...... Zutaten ......

Gekochter Brokkoli　500g

Champignons in Stücke geschnitten　400g

Sojasoße　1EL

Knoblauch in kleine Stücke geschnitten

Salz ＆ Pfeffer

...... Zubereitung ......

1. Champignons in die Pfanne geben und anbraten bis sie goldbraun sind, dann Broccoli, Knoblauch, Sojasosse dazu geben und gut mischen.

2. Mit Salz und Pfeffer abschmecken. Guten Appetit!

(20.11.2022 Breakfast Broccoli with Mushrooms - Meatball in Tomato Sauce - Rice/685kcal)

I've seen the recipe and i'm very interested, i'd like to try it.

After trying it, I love it, especially broccoli is kunspurig and mushrooms are juicy. Delicious!

Broccoli with Mushrooms

...... Ingredients ......

Boiled broccoli　500g

Cut mushrooms into pieces　400g

Soy sauce　1EL

Cut the garlic into small pieces

Salt ＆ Pepper

...... Method ......

1. Add the mushrooms to the pan and fry until golden brown, then add the broccoli, garlic, soy sauce and mix well.

2. Season with salt and pepper. Enjoy your meal!

台文教會公報/台文世界

楚門ê世界

刊登日期 2023.01.06

刊別 3697