亂皂𥴊仔店 ⓂⒺⒾⓃⓀⒾⓄⓈⓀ

網路世界 m̄ 免擘腹「文字」。

前一暝寫寒人食食全全草花，隔轉工 Google 就分張食草花佮紫頭菜遮 ê 愛覕塗 ê 菜蔬，mā 好，省得我愖呔討咖啡食 m̄ 知幾杯，Muse 猶未來相揣 ê 問題。

想 bueh 試驗家己 ê 文學程度隨起手翻譯手頭 ê 德文冊，自決定試驗 ê 彼日到目今，闊閬閬 ê odt kan-ta 二頁翻譯隨起手接紲猶未完成 ê 挑戰，總是人生半路 tsiah 出現 ê 德文猶是比人生帕水 ê 台語交秀鳳阿姨 ê 客語閣較 buē 生份，隨放這个試驗自由，起因伊無我 buē 減一塊肉，客語交台語無我僫生肉，準做我是 Nobody。

早前踮面冊社團捷捷讀著討論「教羅」、「台羅」、「閩羅」、「白話字」。我 tuì 徛爿 ê 態度 tshan-tshiūnn 鳥鼠敢有洗身軀無 -- 無興趣，不過我 tuì 這4款字 ê 好玄 tshan-tshiūnn 貓隨請教有所不知 ê Google。寢頭仔讀甲霧 sà-sà，總是捎無摠無表示無摠頭只是需要時間。

我沓沓仔看逐家討論 mā 繼續沓沓仔揣摠頭，最後踮關鍵評論讀著周盈成先生寫 ê 文章想學寫台語羅馬字但不知要選「白話字」或「臺羅」？那你知道早就撨好了嗎？。

面對 tsuē-tsuē 討論抑是建議我「合該」愛按怎樣等等 ê 分張，我 ê 態度 tshan-tshiūnn 菜瓜藤順阿母綁 ê 竹籬仔沓沓仔 peh 勻勻仔湠到今。另外，不論是「教羅」、「台羅」、「閩羅」、「白話字」tuì 我來講攏是「揹帶」(baˇ dai)交〈偝咧阿母旳尻脊骿〉攏特殊攏重要 ，我 m̄ 免開時間佮人錚佗一條較媠佗一條較有價值，起因隨人有隨人愛鼻 ê 味 。

人 tī 波蘭接著朋友按 Line 敲來 ê 電話心情好甲飛上天。起因 gún 翁 tī 遮原仔德語講甲比英語閣較 tsuē 準做當地人德語講甲無遐爾仔掠扭，英語更加瘸跤瘸手無一个人 ē tuì gún 翁仔某講，恁敢 ē-tàng 莫講「德語」抑是「英語」，gún mā m̄ 捌 tuì 當地人講是按怎恁 m̄ 講「德語」抑是「英語」。

刁意故 kā 語言箍起來，無啥特別 ê 理由 kan-ta 想著 ē 要求別人講伊愛聽 ê 語言 kan-na 較捷發生 tī 咱番薯島。其他 ê 國家敢無這種狀況，當然 mā 是有。總是，遮 ê 人自你 tsham 𪜶相拄搪，你喙猶 buē 成做六月蚶 hōo 𪜶鼻一下仔芳，𪜶就隨感覺臭 hōo 你 kā 𪜶臭一下 ê 機會攏無。

面對這款人，猶黑貓 ê 時捷捷 ē hōo 𪜶弄甲起童，這久凡勢是行入〈微笑老妞〉➀ ê 境界，據在𪜶。起因我喙講 ê 話 mā m̄ 是我 ê 母語，所致 m̄ 免無枷夯交椅拍損喙瀾。總是 m̄ 管按怎慣勢遮 ê 生毛帶角、龜叨鱉趖，我猶原迒 buē 過這个坎。

「妳為什麼要跟我說這個語言，人家又沒有學過」注意這 m̄ 是司奶，這是直接剾洗你目頭懸看伊無，準做伊 ê 口氣甜甲若棉紗糖按呢軟𩚨糖，伊原仔 ē hōo 你一舐舌佮喙脣隨見紅 。

人 tî 波蘭 ê 彼日，我 ê 舌佮脣著是按呢步頻見血，險險講 buē 出話，起因我 m̄ 知影這位按學生年間就熟似 ê 朋友，伊 tī 底時(tī-sî) m̄ 捌講過台語 mā m̄ 捌台語。「咱自本就講台語，拄仔佮阿心 mā 講台語...」因為熟甲若 gún 兜附近十幾冬菜篋仔攏 m̄ 捌徙位 ê 自助餐 ê 卵包按呢，目睭瞌瞌 mā 知影伊排 tī 佗一篋 ê 我，一時雄雄 tshan-tshiūnn 滓著肺炎腦霧按呢，聽無伊 ê 意思，繼續 iōng 我上紲拍(suà-phah) ê 語調講落--去。

「你很難相處耶，一直講人家聽不懂的話...」

迵過鏡頭我看著阿心 ê 點拄 mā 想著前幾日看著 ê 句：

„Aber Deutschland war damals primitiv. Als ich England verließ, mit seinem schönen und behaglichen Leben (jetzt hat es Deutschland bis zu einem gewissen Grade nachgeahmt), dachte ich: Muß ich wirklich in diesem unzivilisierten Lande leben? Soll dies meine Heimat sein? Aber ich gewöhnte mich daran, alles von der scherzhaften Seite zu nehmen.“

von Daisy Hochberg von Pleß

Mā 想著這搭歷史引𤆬 ê 句；

當遮猶是德國，我是德國人，當遮成做其他的國名，我轉來德國，德國講我 m̄ 是德國人，遮 ê 人 mā 講我 m̄ 是當地人，我是啥物人?

我無想 bueh 閣繼續愖這个龜怪 ê 問題來拗鬱，起因遮是我上慣勢 ê 所在。

遐 ê tsham 我攏是人 ê 人，有一日攏 ē 成做這塊土地 ê 𩛩肥。

華語久無講，開喙 mā hōo 對方笑講是 tī 底時成做 ABD ê 喙掛笑容 ê 剾洗。「做人真艱苦」齪氣一出現隨感覺柴樠點火較光油 ê 風火著，總是我無法度 tshan-tshiūnn 伊按呢規張紙畫一尊觀音遐爾仔大面神兼孔子媽 teh 教冊遐爾仔有學問，我又閣想著日子過甲無快樂 ê Daisy 佮人生短短 uī-hô 愛綴草人幔棕蓑 ê 假仙假觸。一想著這隨 kā 柴樠廕掉隨在伊喋詳，起因叫青盲 ê 看告示彼是食飽換枵。Tshan-tshiūnn 有朋友一聽著我 teh 讀客語詩集 --- 客語詩集《落泥》隨講我是「激膠」buaih 佮我繼續做朋友。 

這位伊講甲正義全喙泡，我連一句「Ooh」攏無興趣 kā 應，畢竟要意別人 ê 豬 m̄ 食，狗 m̄ 哺彼誠實是戇虎咬炮紙，對方愛食 Scheiße 敢講我 mā 綴伊食「雪特特調」。總結，我 buē 繼續纏綴 tuì 這款 Blah blah blah ê 討論踅金龜磨，huînn-ti̍t 看對頭，臭頭 mā 緣投仔桑，花缽仔種菜(faˊ badˋ eˋ zung coi)，無緣就是無緣 m̄ 免硬 bueh 佮遮 ê 人濫糝做陣來 môo-hui 家己毒神魂。

講是按呢講，現此時 ê 我敢 m̄ 是 teh 枵飽呻？我 buē 感覺家己 teh 枵飽呻抑是吵，mā buē 講家己 m̄ 是 teh 翻舊數講別人 ê 543。總是舊數 ē 曉翻 mā 愛 ē 曉掠數，m̄ 是較翻攏掠無數閣怪別人翻來翻去 hōo 家己癀發(hông-huat) buē 離。

我膨風水雞，刣無肉兼三下咬，無見餡愛 phuh-tshìng ê 愛展，總是我 buē 要求別人愛綴我 ê 喙斗過日子。因由真簡單，全世界 ê 食物 kan-tann 賰 Conan O'Brien Need A Friend 談著 ê 狀況，彼敢 buē 傷過白汫無味。

現此時 ê  咱 ē 痴迷法國料理、日本料理等等敢 m̄ 是因為伊佮咱無相𫝛 hōo 咱好玄甲想 bueh kā 理解一下。

　　心適 ê 人出門 tshuā 三隻獅

　　看東看西、食東食西、bué 東 bué 西

　　無味 ê 人，出門 mā tshuā 三隻獅

　　嫌東嫌西、怨東怨西、罵東罵西

感謝十八港跤行透透 ê 百樣人賜 hōo 我這个十八港 m̄ 捌行過一跤 ê 田庄倯得著上僫 bué 上僫得 ê 一支草一點露，十个囝仔十樣生 ê 智慧，mā 感謝釀出版 hōo 我有機會認捌客家文學。

➀ 微笑老妞 --- 喪禮上的故事，甘耀明，寶瓶