亂皂𥴊仔店 ⓂⒺⒾⓃⓀⒾⓄⓈⓀ

聽亞特聊聊天「出版社不是影印社」其中一段，前衛出版社主編鄭清鴻先生分張伊希望台文冊未來有較 tsuē tshan-tshiūnn 愛情、推論小說 -- Scherlock Holmes 這類 ê 冊。

愛讀這類型 ê 我 mā tī 心肝穎大聲喝我 mā 是，我 mā 向望猶在世有機會讀 Arsène Lupin。

我 ê 第一本台文冊 m̄ 是小王子，是 tsham 伊同齊按臺灣注文 mā 請 DHL kā 我鬥寄到德國 ê 李恆德老師 ê 「彼年的熱天」。

李老師 ê 面冊是紲《我隨意，你儘量》作者王昭華 ê 面冊，我 mā-ē 去揣文章來讀 ê 迷眾頁。

雖罔，老師講彼是伊私人 ê 口座，總是無加伊面冊 ê 我是用 Fans ê 態度 teh 讀伊 ê 文章。

Sóo-pái 冊一寄到遮，我 tuì「彼年的熱天」ê 興趣大過 tsuē-tsuē 人討論佮推薦 ê 小王子。

讀冊無愛讀寫甲若「論文」ê「推薦文」、「𤆬讀」、「踏頭話」ê 我，因為好玄台語文 ē 按怎寫 sóo-pái kā 攢好 ê 頁數抽掉踅轉來「踏頭話」，無疑悟，無讀無代誌一讀雞母皮隨徛起來，規本冊猶未讀煞隨繼續上博客來揣其他 ê 台文冊 mā kā 面冊寫 ê 四常轉寫做台語文囥踮遮。

雖罔到今，我 ê 台語文猶原漚古 buē 輾轉，總是這是我 ê「臭頭仔囝嘛是家己的」，足愛老師 tī 踏頭話寫 ê 這段話。

我 mā 感覺家己真幸運，讀台文文章是先搪著 Frau 王昭華佮老師 ê 筆尾。

起因，我清楚知影我若是先接觸文藝青年紹介 ê 作品，台文冊佮我決定是愈行愈遠，準做我佮意這个語言。

台文冊若是猶原寫甲若華文，我直接讀華文 ē 比提冊假扮 Auguste Rodin ê 愖題人閣較有應效。

迎娶 ê 𤆬路雞是兩人結婚真重要 ê 儀式，一本 ē 引𤆬生份人繼續行踏新文學世界 ê 𤆬路冊 mā 足重要。

我真正足歡喜我是先接觸這本冊 tsiah 綴文青 kuat 伊紹介 ê 冊。

起因，自 kā 文青推薦 ê 彼2本冊 kuat 落到今，我 kan-na 讀一本，而且是經過 bueh 4冬 ê 時間，我 tsiah 揣著熱情佮方式 kā 伊讀煞。

我知影，我按呢寫 buē-su tuì 文青誠有意見，總是我 tuì 文青無意見。我只是清楚知影家己愛撏錢 tsiah 有冊 thang 讀。

Sòo-pái 愛足斟酌揀冊，特別是生份 ê 文類以避免豬八戒拜天公，家己刣家己，連褲袋仔貯磅仔 ê 機會攏無。

2021年面冊看我 buē 慼，我看伊煞愈看愈慼 tī 波蘭行跤花期間隨決定 kā 口座刣掉就無閣有機會行踏李恆德老師佮王昭華 ê 面冊讀台語文章。

總是，我真感謝李恆德老師 ê「臭頭仔囝嘛是家己的」佮 Frau 王昭華《我隨意，你儘量》ê「我隨我的心意寫作，正經僫讀，啊！請讀者你也盡量」ê 自在引𤆬我沓沓仔 tī 遮揣著家己 ê 自在，有寫華文無寫華文攏相𫝛，遮是我 ê 白汫無味酸甘苦澀甜，遮 ê 滋味攏屬我一个人，無屬任何一个人。 

歸結，感謝李恆德老師 ê 𤆬路冊 mā 感謝文青 ê 引𤆬 hōo 我 tī 台語文 ê 文學世界沓沓仔整理出家己意愛 ê 筆尾。

彼就是 m̄ 管啥物文，我 kan-ta 愛散文佮小說，另外迵過文青紹介 ê 台語文冊，我 mā 沓沓仔知影愛按怎 tī 幔台語寫華文 ê 文章內底揣著熱情佮理解。

《彼年的熱天》

㊔ 李恆德

㊓ 就諦學堂

ⓦⓦⓦ 博客來