亂皂𥴊仔店 ⓂⒺⒾⓃⓀⒾⓄⓈⓀ

Bryggen 布呂根碼頭

Bergen 卑爾根 tī 挪威語 mā 號做 Syvfjellsbyen，按德語翻譯號做 Stadt der sieben Hügel 七山崙 ê 城市。這个稱號推斷應當是按挪威詩人 Ludvig Holberg(3.12.1684 – 28.1 1754)順 Sieben Hügel Roms 羅馬七山崙來。不過七山崙並 m̄ 是真正 ê 七山崙，Bergen ê 七山崙是按 Bergen 自本 ê 五个山崙交隔壁 Askøy 島 2 个山崙合做伙，成做七山崙。

Bergen 是挪威 ê 基隆，一年 365 工 m̄ 是雨來天就是落雨天 mā 是挪威向時 ê 首都。

Bergen 目今 ê 埠頭面肉是按 Hanse 年閣保留到今 ê 商業設施。

目今 ê Hanse 建築 m̄ 是彼當時 ê 原樣，目今 ê 12 世紀建築是行過三擺火厄 1702, 1855, 1916 循原樣重新起造 ê 舊宅新枝骨。

根據 Heimskringla➀ Bergen 是挪威國王 Olav Kyrre 1070 建立，斯當時 ê 名號是 Bjørgvin 山 ê 草埔(Bergwiese, Mountain meadow) mā 是國王登基 ê 城市，一直到 Trondheim 取代伊 ê 位置。

1360 德國人來遮成立商業辦事處 - Tyske Bryggen(德國碼頭)，就此伊 hőng 稱呼做 Hansestadt(漢薩城市)，不過實際上 ê 伊交 Hamburg 漢堡, Bremen 不來梅遮 ê 漢薩城市 ê 徛位是無相𫝛。以目今 ê 外交系統來講 Hamburg, Bremen 是德國大使館，Bergen 是德國 tī 台北 ê 辦事處。

準做地位交 Hamburg, Bremen 無相仝，Bergen 猶是德國商人市草上交易 ê 城市。 

➀ 挪威國王編年史

15 ~ 16 世紀 Bergen 一直是 Skandinavia 斯堪地納維亞上大 ê 城市，伊 ê 重要性一直生湠到 19 世紀 Oslo 奧斯陸成做首都為止。

Bergen uī-tio̍h 貿易權 tī 西元 1665 年英荷第二斗戰爭結束，伊 mā 跟綴斯當時 17 ~ 18 世紀 ê 烏暗 kā 人類當做貨物 bué 賣上重要 ê 城市交埠頭。

斯當時 ê 海運頭人 mā 是 Bergen 工業化上大 ê 推手。人類 ê 進步敢若永遠無法度交烏暗結拆分離...

Bergen 自建城到讓出首都地位 ê 1880 進前一直是挪威上交易並上大 ê 城市，並猶原保留 1702, 1855 無遭受火厄傷害 ê 柴式建築。

1916.1.16 一場大火 kā 規个城市猶原保存 ê 傳統建築燒甲無見一搣烌。自彼此開始，Bergen 禁止柴式建築，目今 ê 柴式建築是第三斗火厄，當地政府循原樣重新起造。因為遮 ê 建築循原樣重新起造 hōo Bergen tī 1979 成做聯合國世界文化遺產之一。

自開始四界行跤花，徛位 tī 北極圍箍(Pak-ki̍k-uî-khoo) ê 挪威從來 m̄ 捌 hōo 我箍入涵空龜地圖。

七冬前跟綴朋友 ê 跤步 tī Postcrossing 交人互相分張光批，挪威聊聊仔按超市 ê 三文魚成做未來有機會想 bueh 踮遐栽一蕊跤花 ê 角勢。

總是按算永遠跟綴 buē 著現實，頇顢趁錢交涵空龜地圖猶有 tsuē-tsuē 紅線猶未綁，挪威就按構想(kòo-sióng)成做輕兩想(khin-niú-siúnn)，隨意。

不過這个隨意自 Covid-19 按一个角勢湠到一四界，挪威勻勻仔成做我這世人愛行踏 ê 角勢，因為咱無一个人知影未來 ē 成做啥物生張。

現此時 ê 我是囡仔坐火車，嘟嘟好(拄拄好)蹛踮歐洲，我 m̄ 運用這个難得 ê 機緣是戇人隨邀請翁做陣參詳上北挪威車日子。

M̄-nā 食食是顧秧，較贏顧倉，旅行 mā 外甥仔點燈火，照舅(照舊) ê 翁，一聽著牽手講 bueh 上北挪威車日子，彼本傳家佛經又閣捎出來世世唸(踅踅唸)「挪威物價鞏金」、「挪威無熱人」、「挪威白汫無味....」kā 挪威講甲無一塊好，我隨攑手表示時間到換我開喙。

「畫天畫地，不如伸手一下，我按你 kā 挪威講甲遮爾仔無味無素，大厝大海海，枵死無人知，我愈愛親身行一逝，m̄ 管有你相放伴抑是無。」

Gún 翁去過挪威首都 Oslo 奧斯陸兩逝，一逝公司派伊出張，一逝是機票促銷，這兩斗經驗 hōo 伊得著挪威是一个白汫無素 ê 角勢。是講，一斗規日跍飯店 ê 出張，一斗兩工一暝 ê 尾班到，早鳥飛 ê 搵豆油旅行 tuì 我來講是無夠力 ê 掰會。另外，我 mā 清楚這斗無上北挪威，未來龍鳳生活無法度繼續行落去，我 mā buē 閣 uī-tio̍h 地圖頂 ê 紅點專工飛一逝歐洲。

2024 是 gún uī-tio̍h 別人兜 ê 問題冤家冤甲天篷 kiōng-bueh 掀起來 ê 一年，這逝 ê 瑞典挪威車日子 mā hōo gún 翁清清楚楚知影閣繼續按呢一日拍鳥，三日挽毛來解決問題，伊連蒜仔攏食無。

遮 ê 故事是咸豐三，講到今 ê 連咸豐 mā 感覺厭𤺪 ê let it be，總是我感謝家己 ê 堅持，因為我完成人生 ê 按算 --- 親身感受光批帶 hōo 我 ê 好玄。

遮 ê 歷史交德國有真深 ê 關連，等候你有緣來行踏並分張伊 ê 故事。

交我交換光批 ê 朋友是一位人 tī 英國讀冊 ê 少年查某囡仔，gún 按一張光批生湠 tsuē-tsuē 光批。按挪威來 ê 光批是我最後一斗收到伊按英國寄來 ê 光批，我按帛琉寄出去 ê 光批 mā 成做我交伊分張光批 ê 最後一張，無機會接續 ê 故事就按這篇來去七山崙 ê 城市車日子來生湠。

出發挪威進前，我 tuì 挪威 ê 印象除了三文魚就是德國人分張 ê 挪威 --- 我 tī 挪威無了一仙錢露營，我窮真想 bueh 寫臭頭包頭巾，防蠅(風神)。

挪威主要 ê 觀光客是德國交英國人，總是 mā m̄ 是每一个看起來若阿舍 ê 德國人有才調行踏挪威成做真正 ê 阿舍。像 gún 翁仔姐 tī 德國 m̄ 是阿舍，車日子到挪威愈無才調無毛雞假大格，總是 gún 真骨力按德國 kā 物款 hōo 齊，畢竟我無法度出門一工，轉來無洗浴兼糜飯齊食麭交煙腸。我需要露營區 hōo 我有法度洗浴交敨放身體糞埽交好好仔食糜飯。論真講，tī 挪威露營除了第一暝搪著金光黨，挪威 ê 露營地 tī 我 ê 經驗內底正經無比德國鞏金，挪威 ê 露營地甚至比德國俗價閣四序百倍。

自瑞典車入挪威，gún 大多數 ê 時間攏跟綴台語活詞典 ê 序成做逐日頭 ê 人。

台灣人南島語 ê 祖先，聽講是逐日頭 ê 人。六千冬前，m̄ 相信傳說中祖靈是 tī 日頭落海 ê 所在，所以𪜶就划艋舺對台灣出發。開始逐日頭。划到有島嶼 ê 所在就先停落來，tī 遐生活、生湠、後一代繼續划艋舺出海逐日頭。最後，規个大洋洲所有 ê 島攏有南島語 ê 聲音。

Gún tī 挪威 mā 是按呢車日子，逐日跟綴氣象報告生湠跤跡，一逝比德國車到西班牙閣較近 ê Bergen 成做比西班牙閣較遠 ê 路途。

 Uī-tio̍h 逐 Bergen 日頭停跤 3 日 ê 露營地

這久翻頭回想彼久 ê 安搭，安搭家己痚痀呔 ē 忍得嗽是一件好代，起因我 buē 閣專工上北挪威行跤花。

按呢講 buē-su 挪威白汫無味，m̄ 是，絕對 m̄ 是，總是我人重食閣驚寒，熱人若寒人，菜蔬見食 kan-ta 青花仔菜一款 ê 挪威真正無適合我。Gún 行踏挪威 ê 期間，青花仔菜是上俗價 ê 一款，這款敢若阿母食番薯簽 ê 日子 hōo 我按挪威轉去瑞典，隨感覺瑞典是天堂。

Bergen 交首都 Oslo 𫝛款攏禁止外車進入，sóo-tí tsuē-tsuē 市郊飯店 mā kā 停車場改做露營地 kā 本底 ê 房間一部份改做露營使用 ê 廚房交浴間仔 hōo 飯店有法度繼續生湠經營。

這是較早 m̄ 捌搪過 ê 露營方式，我感覺誠心適 mā 誠佮意，畢竟經營者是飯店，伊有一套循飯店 ê 規定 hōo 環境加足守規矩交四序。

論真講這逝 ê 挪威行跤花並無 uī 我紮來偌 tsuē ê 記持，跟綴光批 ê 跤步行踏德國 ê 光映映 mā 無生湠愛沙尼亞 Tallin 塔林 ê 數念，不過挪威 ê 歷史引𤆬我思考成做別人 ê 生張敢有法度真正成做咱認為 ê 彼个人。

Gún 無法度真正解釋是按怎遮 ê 歷史建築需要消失，不過目今 ê gún 骨力保存遮 ê 歷史 --- 聽導覽人員按呢分張，我想著我出世 ê 番薯島 m̄ 知挪威敢 mā 行過雙目總是看向別搭 ê 統治者。

聽人分張踮挪威 bueh 搪著國寶 m̄ 是一塊雞卵糕，這斗挪威車日子無搪著百八駝鹿(Elch, Älg)交人分張 ê 行動路霸王紅鼻仔 Rudolph the Red-Nosed Reindeer m̄-koh 猶是好字運，搪著兩隻挪威森林貓，𪜶交閣我一屑仔攏無保持距離，這是這逝路 buē 按算 ê 好報頭。

我 kā 你講，有人嫌你大箍，m̄ 好。

Jemand hat mir gesagt, du bist zu dick.

Tsiâ！

Was!

彼个沓沓行倚來 ê 查埔人。

Der Mann kommt zu uns.

敢講我大箍。

Wie kannst du es wagen, zu sagen, ich bin zu DICK.

喂，聽講你講我大箍是 m̄！

Hey, Seltsam, ich habe es gehört, du hast mich zu dick genannt.

斟酌看，我無一屑仔攏無大箍，我 kan-ta 較肨奶膨皮 kā 我𤆬轉去包穩你，厝內清氣溜溜。

Guck! Ich bin nicht zu Dick, Ich bin nur Voluminös und wenn du mich zuhause hast, du hast mein Wort, das Haus immer so sauber.

Siehst du, mein Schwanz ist so schön, kostenloser Besen für dich.