亂皂𥴊仔店 ⓂⒺⒾⓃⓀⒾⓄⓈⓀ

Baby, lass mich schlafen, komm später, ok?

這逝 ê 挪威行尞 tshan-tshiūnn 德國俗語仝款，有得著一隻豬 ê 好運 mā 有沐著打馬膠 ê 歹運。

好運是 tī 彼个 buē-su 龍門客棧 ê 露營地搪著這隻古錐 ê 國寶，歹運是...過了代就 kā 伊飼潘桶免閣儉來熥，hōo 翁笑講有貓雷達 ê 我 tī 這逝 ê 旅程並無發見這隻睏甲倒摔向(hiànn) ê 貓，起因茶鈷內 ê 水當 teh 燃。

心愛--ê hōo 我小睏一下，小等一下 tsiah 來，好無？

出發挪威進前 tsuē-tsuē 人分張「Tuì 挪威 ê 露營地 m̄ 通有傷 tsuē 想法佮向望」總是，無向望 mā 無想法 ê 我猶是無法度無燃一鈷滾水來食。

因為這个因端致使我失去阿貓雷達。

Mann, ich habe dir gesagt, kommt später, warum verstehst du das nicht!

有 ê 故事正經 kā 伊當做話仙來聽較 buē 比並，另外，人生短短十外冬愛收藏美麗佮快樂 m̄ 是儉齷齪。

我就 kā 你講，較停仔 tsiah 才來，你是講 buē 聽，是 m̄！

這隻阿貓 hōo 我摸甲起性地輕輕咬一下仔我 ê 手，我知影家己傷過枵飽吵，繼續 kā 摸幾下仔 tsiah 放伊自由，押尾伊睏醒倚來我身軀邊司奶 lú-lú-lú 我知影伊原諒我，繼續 kā 摸迵海到伊又閣 bueh 出任務為止。

這隻貓佮紅帽仔 ê 故鄉彼幾隻貓相仝 m̄ 是飼來做王做后，是飼來掠鳥鼠 ê 阿貓，我運氣真好，主人家有三隻貓，這隻我上佮意 ê 挪威森林阿貓 buē 驚生份 m̄-koh 真有個性。

瑞典柴杙柱

按 Nössemark 露營區駛車無到五分鐘就到無斟酌看柴杙柱 ē 掠做家己猶原 tī 瑞典 ê Aremark。

慣勢按這國過彼國攏愛看著若破寮仔抑是改妝做 Ka-pi 店 ê 海關檢查站 ê 我無翁 ê 提醒，我凡勢愛等甲撏錢 bué 菜蔬 tsiah 有法度發見我已經按瑞典行到物價 hōo 瑞典人 mā 無法度領受 ê 挪威。

挪威上早古 ê 運河 Haldenkanalen

這个運河是阿公捌參加這項歷史工程 ê 瑞典太太佮 gún 分張 ê 景點，伊是挪威兩條上古早運河之一，起造時間 1852，押尾 1861 崩歹，1877 閣重新起造，現此時 ê 系統順 1924 ê 規劃。

坐船過海是行踏挪威上利便儉時間閣 hōo 銀兩綴牢牢上好 ê 方法 

北海成做內海，內海 kā 國土成做外島是我 tuì 挪威 ê 第一印象，押尾聽翁一路分張遮像德國，遮像瑞士，遮像義大利佮奧地利，我 mā 開始跟綴遮像南投，遮像太魯閣...  

總是當北海成做內海，內海 kā 國土成做外島，我 ê 頭殼開始 teh 愖，世界看起來遮爾仔無相𫝛，窮實 mā 足相仝，起因按呢 ê 行徙 hōo 我想著《倒風內海》。

只不過咱 ê 倒風內海已經成做一片土地，挪威 ê 倒風海底猶原存在，至於兩爿 ê 沙喃佮巴達興遮 ê 傳統敢猶保留？ 

Tuì 臺灣這地土塊無啥認捌 ê 我 tuì 挪威愈無一个認捌就免閣大舌閣興喋。

上北 Bergen 搪著 ê 水沖 --- HULDRESTIER I LARDAL

這是 gún 第一个搪著 ê 水沖，一見隨停車攝相攝 buē 離，押尾見水沖若愛我跟綴德國喙斗三頓齊是麭麭麭過日子仝款 ê 飫。

人正經是楔手縫嫌，大碗閣滿墘 mā 嫌 ê 厚沙屑。

Åmli

Gún 這逝第一个目標是世界文化遺產 ê Bergen sóo-tí tsuē-tsuē 景點是順這條路線行踏，像 Åmli 這个 tī 往過應當是真交易 ê 角勢。

Åmli

讀過 ê 資料若無記重耽，Åmli 用現此時 ê 白話形容就是美國 ê Rust Belt 鏽帶。

Åmli

猶未跟綴公車牌消失 ê 火車站是伊捌交易 ê 象徵。

虹鱒魚

若 m̄ 是德語讀寡有，正經 ē 掠伊是三文魚 ê 虹鱒魚。

猶未行踏德國進前我一直掠做三文魚 tī 挪威是平民價，德國人分張 ê 鞏金一耳空入，一耳空出，跤正行踏到挪威愛 tuì 分張 ê 德國朋友會失禮，這斗恁講了著，產地 ê 三文魚一屑仔攏無比德國較俗價。

雄蜂

我一直掠做挪威寒甲驚死人，驚寒 ê 熊蜂 buē tsuē 甲比蠓甲，結果，事實佮我聽來 ê 分張完全無相仝，我搪著 ê 熊蜂比蠓厚，而且閣骨力做穡。

綴人行跤花，有機會通出發正經愛親身行一逝 hōo 家己 ê 人生閣加一个興趣 tī 路途搪著一位捌 tī 德國學心理學 ê 芬蘭教授，伊回答 gún 翁 ê 智慧成做我這久 ê 錄音帶，當伊又閣起童詬逅唸。

好食 ê 甜粅粅炸彈，一塊一碗清飯

Tī 第一間超市搪著佮瑞典相𫝛 ê 金含壁堵我掠做挪威人 mā 是致著甜路災 ê 貓，押尾 tsiah 發見挪威人敢若較愛食油臊 tsuē 過甜粅粅。

起因，我一直掠做第一間超市規模較細，sóo-tí 金含壁堵 mā tshan-tshiūnn 瑞典較狹，押尾綴大城市踅金含壁堵 tsiah 發見，挪威 m̄ 管大間細間超市金含壁堵攏𫝛大，徛 tī 金含壁堵選糖仔 ê 人 mā 無 tshan-tshiūnn 瑞典按呢遐爾仔 tsuē，應當講記錄這篇文章，我 tsiah 見著一个人徛 tī 金含壁堵選糖仔，彼个人閣挪威 ê 厝邊。

我 m̄ 知影我 tuì 挪威 ê 食食觀察敢有正確，總是我感覺低卡，減油臊，素肉遮 ê 踮德國時行 ê 食物 tī 挪威無市草，因為無市草我 tsiah 有法度 tī 這逝跤花捷捷補充 B12 佮減少一日食超過 2 千 ê 罪惡。是講，遮 ê 熱人 m̄ 是秋清是若寒人，一日超無超過 2 千，身體 ê 火熥猶未行到中晝就化去。

記錄文章 ê 這久，人猶原 tī 南爿，德國 26 挪威 12度。

挪威肉桂露螺捲，一粒一盤 100g Spaghetti

我一直掠做田庄無麭店是四常，跤花栽到挪威第二大城 Bergen 見著麭店，我第一个反應是，這 m̄ 就是 BackWerk ê 升級版 --- 有專人服務 hōo 我失望甲 tuì Ägir 哭呻遮是 Wikinger m̄ 是 Germanen。

「Germanen 捌 tī 遮」翁若背後靈笑甲 kiōng-bueh bueh 喘氣講。

「我知影，總是 mā 無遐爾仔 Germanen」我應。

是，愛我撏佮德國相𫝛 m̄-koh 愛撏 3 倍 ê 價數，我甘願支持超市 hōo 農家警告有毒 m̄ 通 bué  ê 假麭。

喋著農家主人家 ê 自信，我 mā 佩服，總是我清楚我 buē 奉獻我 ê 胃腸 hōo 伊 ê 自信，𪜶兜廚房 ê 清氣 tsham 中國 ê 油湯無宛 2 體。

自這粒露螺捲鹹汫試到今，我猶原 m̄ 捌見著麭店，我 m̄ 知影挪威 ê 露螺捲敢攏這滋味，總是試過一斗，我清楚知影轉到瑞典又閣是露螺捲 ê 天堂。