亂皂𥴊仔店 ⓂⒺⒾⓃⓀⒾⓄⓈⓀ

萊茵河 ê 左右岸

法國東部大區 Alsace 是養飼烏貓年歲 uī 愛走天涯，一逝 pue-lîng-ki m̄ 驚貴 m̄ 驚遠只驚大腸告小腸 ê 相放伴，mā 是消敨情緒駐水上四序 ê 角勢。一目𥍉 bueh 十冬，按德國看法國，按法國看德國，人生 ê 鹹酸苦汫 tshan-tshiūnn《人間條件》 每一个戲文是新題材 mā 是萬世代年 ê 舞台。

2014 我 tī 德國 ê 對岸交天鵝做伙散步提出結束過冬鳥生活，2024 我 tī 德國 ê 對岸熥向時 ê 臭耳聾青盲牛兼消敨綿豉活 tī 向時 m̄ 願接受目今 ê 情緒駐水。

「咱 ê 問題就 tshan-tshiūnn Elsass，伊交德國現現就隔一條萊茵河，德國第三帝國卻聲聲說說講你交我是好兄弟仝穿一領褲 ê 陷眠」按德國上駁仔船我 tuì 猶原捎無摠頭 ê 翁講。

「Elsass tī 往過確實屬德國....」

「Elsass 比德國較早 ê 往過屬法國，比法國閣較早 ê Elsass 無屬德國交法國，這久 ê Elsass 伊屬法國 mā 無表示伊愛扞恁德國人 ê 額。」

「啥物意思？」

「這駁仔船是法國整本交出力，𪜶 hōo 恁德國無料使用無表示𪜶愛 kā 恁照顧甲貼貼，準做是恁認為法國人比恁閣較需要駁仔船，因為 tsuē-tsuē 柴杙居民出國到德國食頭路 mā 無表示恁德國較大軀，按呢聽有無」我文文仔笑講。

Alsace 行跤花是 gún 翁仔姐一人 buaih 踮花缽仔種菜，一人綿爛 kā 菜種 tī 花缽仔無了時臨時臨曜放下相罵無好言，相打無好拳 ê 舊地重遊，畢竟煮九碗湯 ê 田螺 mā 出聲講「恁食我 buē 飫，我 hōo 恁煮甲𤺪」隨決定 tī 北歐 ê Uller 猶未來行踏進前，來厝邊法國遮揣 Auxo➀ ê 跤跡並補充相連紲 2 冬無補著 ê 維生素 D。

➀ 希臘神話熱人之神

法國整本交出力 ê 萊茵河駁仔船

 Elsass tī 羅馬年閣就是行政要角，Elsass 這个字名是德國人 tī 877 年 kā 伊按 pago alsacense (772)佮 pago alisacense (774)整合做 Elisazon 並記錄。

Elsass 表示啥物意思，有人推測伊有可能是無仝族群踮萊茵河 ê 住所 mā 有可能是外埠居民，其中外埠居民 hőng 推測應當是按法蘭克帝國(Fränkische Reich)來，兩個無相仝 ê 族群羅馬交日耳曼踮遮牽手定根生湠。

Elsass 上大首府 Strasbourg, Strasburg 史特拉斯堡就是日耳曼民族 kā 家鄉自來 ê 面肉照實栽 tī 新土地 ê 例 m̄ 是踮人兜疊新磚，像台南 ê 赤崁樓，按荷蘭式成做唐山式。

數念法文青盲牛，法語臭耳聾 ê 日子

風微微仔吹，金烏 ê 頭鬃勻勻仔按皮膚捊過，我按一尾擽擽趖 ê 蟲成做羅丹 ê 愖題者看眼前 ê 光景，是光景發新穎抑是過去 ê 十外冬我 tuì 𪜶從來 m̄ 捌要意過？

風微微仔吹，金烏 ê 頭鬃勻勻仔按皮膚捊過，頭殼內 ê 海馬按法國泅過德國，按德國泅過法國，眼前 ê 光景猶原若 Titanic 我捌這隻船卻 tuì 伊 m̄ 知機 ê 空冇冇。

過了代覓 buē 轉來 ê 記持 tshan-tshiūnn 消失 tī 這塊土地 ê Kelten，我 m̄ 是研究者 m̄ 免 tuì 伊綿死綿爛。

「Bonjour」

「Bonjour」

語言是文化 ê 載體 mā 是消敨齷齪 ê 解方，我總算有法度好好仔講一句話，準做我 kan-ta ē 曉 Bonjour，伊猶原是神魂上自在 ê 聲調，tshan-tshiūnn Es ist verboten die Vögel zu Fûttern➁ ê 自在四序。 

遮是一个字母齊捎無摠 m̄-koh 自在甲成做樹趖 ê 法國 m̄ 是字母捎有摠猶原 hőng 舞甲 kiōng-bueh 成做 Kelten ê 德國，臨時臨曜 ê 行尞 kan-ta 3 日，美麗 ê 時間愛留 hōo 家己，齷齪 ê 垃儳(la-sâm)交 hōo 後三日。

➁ 德文 ê 特色是聲母 a,e,i,o,u 變調 ē 加兩蕊目睭成做 ä,ö,ü，戴帽仔是法文 ê 特色 --- Füttern。

往過 m̄ 捌相見 ê 法國河岸公園

Elsass 行徙歷史交地球各角勢無宛 2 體，這个族群來彼个族群去，抑是新族群 VENI VIDI VIC 我來，我看，我征服，kā 外甥仔點燈火，一切照舊洗盪甲無見一絲在地傳承。

語言是文化 ê 傳續，文字是文化 ê 載體，一个民族除了聲音，無文字 ê 載體，留存落來 ê 事項對千應驗 Vox et praeterea nihil 除了聲音，啥物攏無 ê 賰一个文化，一个文字通解說。

十外冬前 ê 法國萊茵河岸無河岸公園，十外冬後 ê 法國萊茵河岸出現後現代設計公園伴羅馬歷史解說，阿貓問「Kelten 文化--leh？」

「𪜶交 Thracian 色雷斯文化 Vox et praeterea nihil。」

「恁人類敢若真愛成做歷史副本」阿貓繼續問。

「生活 tī 這粒球體 ê 生物，逐个攏 teh 副本並演化」阿貓 Miau 一聲表示冇蟳無膏，臭頭包布，斡頭做伊弄險，我徛 tī 歷史解說看板看頭前未老就無法度哺塗豆 ê 建築，千年後 ê 學者研究我這年閣 ê 人類應當 buē 閣遐困難，畢竟 hōo 羅馬看上目 ê 民族𪜶 mā 按羅馬 ê 烏影獨立做一个完整 ê 人。 

自羅馬 tī 西元前 58 ~ 52 年 kā Gallien 高盧 VENI VIDI VIC，Elsass 行過 500 外冬 ê 羅馬文化，並 tī 這段期間交 Alamannen➂民族融合，紲落來成做目今歐洲人捷講 ê 歐洲一直 teh 變化 kan-ta 法國 m̄ 捌改變 ê Fränkisches Reich mā 號做 Frankreich 法蘭克帝國(Huat-lân-khik)，tī 這段期間 Elsass 是法蘭克帝國其中一个王國。

歷史複雜閣簡單，簡單閣複雜，我 m̄ 是歷史專家 m̄ 通繼續乞食攑蠓捽，假仙假觸 buē 博假博。

➂ Alamannen 抑是 Alemannia，就是目今 ê German 羅馬年間 ê Baden-Württemberg(德國), Elsass(法國),  Bayerisch-Schwaben(德國),  Deutschschweiz(瑞士德語區), Liechtenstein, Vorarlberg(奧地利)。

𫝛款 ê 甜路，Alemannia hōo 我嫌甲臭頭，法國 hōo 我一喙接一喙，接甲 kiōng-bueh buē 喘氣

Elsass 按羅馬行入法蘭克帝國，目今 ê 歐洲首都 Straßburg mā 翻身交德國 ê Speyer，瑞士 ê Basel 成做羅馬天主教金三角。

西元 925 年法蘭克帝國 kā Elsass 交換手 hōo 以德國為主 ê 神聖羅馬帝國，倚 bueh 300 冬 ê 時間伊成做施瓦本公國 ê 一部份，紲落來 ê 日子成做高盧人交日耳曼人 ê 搝大索，像 Charlemagne 抑是 Karl der Große，伊是德國抑是法國 ê 神主牌。

低路人行尞錄寫到遮步頻感覺家己 ê 龍鳳生活交 Elsass 變化無宛 2 體。

 Gún 翁猶未交我牽手進前，Karl der Große kan-ta 屬德國，交我牽手伊 ê Karl der Große 猶原安土德國➃，伊 ê 豐功偉業卻成做德法百外冬無法度解決 ê 親家變冤家。

➃ Karl der Große 安息 tī 德國上西爿並第一个加入聯合國文化遺產組織 ê 城市 Aachen 亞琛大教堂。

出世 tī 羅馬交 Karl der Große 扞家 ê 人民按怎兩族融合並透流，低路人無研究 m̄ 知機，總是身為一位交高盧佮日耳曼融合千外冬 ê 後嗣牽手 ê 外埠新婦，按這完全一致 ê 甜路麭來分張心得，相𫝛 ê 肥芳，相𫝛 ê 肥甜，相𫝛 ê 面肉，𪜶猶是無仝人無仝天性。所致，我真正無法度理解 gún 翁呔 ē 認為我 ē uī-tio̍h 伊跟綴伊 ê 跤步划向死亡，真正是想過頭。

Elsass 行過 700 外冬 ê 日耳曼世代，1648 順天然柴杙成做法蘭克一部份，這其中當然 mā 搪過德國第三帝國 ê 陷眠。

Couleur d'automne➄ 交 Lothringen/Lorraine 是隔壁厝邊 ê Saverne 薩爾韋訥自羅馬年間就是軍事重地，日耳曼民族自西元 4 年就定根 tī 遮並號名做 Zabern, 亞爾薩斯語 Zàwere。

伊是 gún 這逝法國大東部省 Grand Est 第一个行尞 ê 城市 mā 是 hōo 我聽著通用德語猶原冗甲若消風 ê 雞胿自在甲。

記錄這篇行尞進前我 tuì 翁講，咱 tī 奧地利我無機會開喙，所致我 m̄ 知影奧地利人敢 ē khiau-khi 我 ê 通用德文，總是我清楚知影 Grand Est ê 朋友，一屑仔攏 buē 要意我 ê 文法交腔口，因為𪜶 m̄ 捌放棄家己 ê 底蒂並鬥別人 ê 舌來消遣別人提升家己 ê 地位。

我是法文青盲牛，法語臭耳聾，行踏法國我從來 m̄ 捌自動割舌 m̄ 開喙，特別是德語。行踏法國 ê Grand Est 伊 hōo 我 ê 自在交安心就 tshan-tshiūnn 驚泅水 ê 我 tī 帛琉自動成做快樂 ê Nemo。

➄ 秋天 ê 色緻，當地觀光手冊 ê 紹介

往過 ê 城堡，目今 ê 青年旅舍交博物館 --- Schloss Rohan, Est 1790

Saverne 交歐洲 tsuē-tsuē 城市相𫝛，因為主教權利鬥爭按交易行向落坐，因為 30 年戰爭、普法戰爭按平靜行向挐氅氅，因為歷史 ê 交纏按日耳曼人成做高盧人，閣按高盧人成做日耳曼人，高盧人。

Saverne mā 交法國 tsuē-tsuē 角勢行過農民抗爭，mā 得著 tsuē-tsuē 文人 ê 褒唆，像無愛情人生是死水 ê Goethe tī 伊 ê 自傳 Dichtung und Wharheit 詩歌佮真理寫著 Saverne ê 美麗，特別是 Schloss Rohan ê 城堡褒唆 mā 寫著傍城堡交公園 ê 運河，這个運河 m̄-nā 是城堡 ê 一部份，伊閣一路延伸到 Steinbourg/Steinburg 什泰因堡。

Goethe 褒唆 ê 運河經過 2 百外冬已經按 Grand Est 湠到德國、荷蘭 ê 北海 mā 湠到德國交波蘭 ê 東海。

Goethe 當年 ê 不可思議成做目今白汫無素 ê 四常，往過 ê 相𫝛成做家己人烏目仁 ê 低路。

普法戰爭結束，Saverne 成做普魯士 ê 一部份，扞市 ê 軍隊 m̄ 管智識懸低，一个普魯士德語成做看當地人無目地 ê 驕傲，押尾成做你佮我從來 m̄ 捌註好好是仝沿 ê 反抗火引。

這葩點 tī 1897 ê 火引 tuì 我來講到今 m̄ 捌廕火過，至少 tī gún 翁𪜶爸母身軀 m̄ 捌廕過。

別人兜低路 ê 驕傲無興咸豐三，講到今，總是自水帕就食毒慣勢 ê 翁婿 buē-tàng hōo 伊繼續承這葩火，準做 gún 成做花缽仔內 ê 菜➅。 

➅ 客語俗諺：花缽仔種菜，無緣

亞爾薩斯語自羅馬年閣到現代，按老欉沓沓仔敗欉 m̄ 知影交普法戰爭 ê 歷史態度敢有相干？

畢竟這斗 ê 亞爾薩斯行尞，我感受著交往過較無相𫝛 ê 狀況，早前 m̄ 管家己一个人抑是無事交翁駛車來這地區行跤花，法文青盲牛，法語臭耳聾 ê 我，德語 m̄ 管按怎漚古猶有法度一个人獨立完成交易，這斗漚古 ê Oui 交 Merci 比進步 ê 通用德語閣較好交易。

呔討 ē 按呢生？

二戰後 ê 法國並無行向獨尊法語一語，是按怎成做官方語言之一 ê 亞爾薩斯語猶原漸漸焦蔫？這敢是記持食餌 ê 病尾？

𠊎毋知，總是伊引𤆬我思考記錄片所看 ê 德裔波蘭老輩，𪜶選擇交後嗣講波蘭語 m̄ 願後嗣承德語 ê 一大部份是「原來我 m̄ 是家己人。」

語言是一个文化 ê 載體，語言消失就 tshan-tshiūnn 朋友 tuì 人講我是 Paiwan，你感受 ê Paiwan 是連 Paiwan 這个辭攏冇 ê buē 接續伊 ê 話題。

Fachwerkhaus „Maison Katz“, Hochrenaissance (1605)➆

循 Goethe ê 不可思議行尞，二百外冬前 ê 不可思議成做目今 ê 白汫無素，是我心內無歷史，抑是歷史是分散各地 ê 馬花糋？

𠊎毋知，總是循 Goethe ê beauté, Schönheit 媠甲無止比栽跤花，我感謝家己 ê 好字運，有機會 kā 囡仔時 ê 向望兌現，這久 ê 白汫無素交 Saverne 無底代，Goethe mā 無一隻蝨母嗙甲水牛大，是我智識無夠額 m̄-tsiah 猶原紮這三隻獅出門 tuì 無宛 2 體 ê 城市面肉，嫌東嫌西，怨東怨西，罵東罵西，tuì 這交法國一屑仔攏無底代 mā 無理解 ê 文化感覺無興獅獅。

➆ 目今是餐廳 ê 德國竹管厝，竹管厝 ê 建築工藝請參考《山城番子巴》

行踏 Saverne ê 時間，美國萬聖節 mā 沓沓仔倚近 hōo 我想著《我在西伯利亞的監獄》談著法國文化漸漸落坐，美國文化漸漸強勢，2025 起手記錄 2024 ê 行跤花錄跟綴遮 ê 文化來去泅去 Die Haida in Kanada， 自羅馬到目今短短二千外冬 ê 日月，人類從來 m̄ 捌因為天災消失 m̄-koh 人禍收水。

百年後 ê 世界敢 ē 成做 Demolition Man 超級戰警，世界賰大自然設定 ê 男佮女，賰 ê 無宛 2 體 ê 語言服裝等等？

𠊎毋知，總是當別人 ê 文化無聲無息成做家己 ê  文化，想 bueh kā 伊揣轉來我相信伊比埃及考古閣較困難。

不過，當別人 ê 文化成做無味無素 ê 妝娗，伊猶原若一杯長島冰茶 Long Island Iced Tea 原色透新嫣一味疊一味 ê 好喉韻。

羅馬哥德式教 Notre-Dame-de-la-Nativité 聖母教堂

 歐洲城市 tī 宗教猶未離開政治中心進前，有法度得著城市權利抑是按無名小卒成做出名人，百分之 99.9 交教會有相干，觀光導覽 kan-ta 法文版本 ê Saverne mā 相𫝛。

1977 列入市定古蹟 ê Notre-Dame-de-la-Nativité 聖母教堂，起造時間 tī 12 世紀孤 uī 教區服務，13 世紀尾兜受 St. Bartholomäus ê 贊助成做修道院教堂，1482 修道院解散，伊成做 Augustiner-Chorherren➇ 教會。  

 ➇ 筆者 tuì 教會無一个認捌，請教翁婿 Augustiner-Chorherren ê 白話解釋是一个以詩歌吟唱交祈禱 ê 教堂，像 Enigma Sadeness。

Paul-Théodore Acker 徛家

我 ê 家鄉臺中有膠彩晝之父林之助，Saverne ê 美麗有塗州賣鴨卵進前攏愛談戀愛 ê 德國宰相 Goethe uī 伊寫作，家己無親身行尞一逝 buē 楦闊冊外 ê 智識。

我認捌 ê 臺灣作家比法國作家較厚突突，當翁攑手發問伊是 Tsiâ，我 buē 背唐詩三百首來展文化，我 kan-ta ē 食認𠊎毋知，weiter 繼續大伐跟綴我捌 ê Goethe 向行伐。

這久整理翁 uī 我攝 ê 影像，阿貓 mā 走來攑手「伊是 Tsiâ？」一擺生，二擺熟，三擺較爛滷肉，我 mā 攑手問家己「伊是 Tsiâ？」

Paul-Théodore Acker (14 September 1874 – 27 June 1915) was a French-language writer of popular novels..... Wikipedia

出世 tī 1874.9.14 ê Paul-Théodore Acker 是記者 mā 是法文小說 ê 作者，1915.6.27 伊 tī Thann 服役，因為車厄過往。

順維基百科行踏伊 ê 人生故事，我交阿貓齊好玄徛德國字姓 ê 伊是按怎成做只以法語做主體 ê 作者？

Charles Maurras paid him posthumous tribute in his book Tombeaux and mentioned his membership in the Action française.

法蘭西行動成做我理解伊呔討成做單語作家 ê 因由。

Pizza 自人按 PizzaHut 畢業，我 ê 胃囊仔 m̄ 捌讓位 hōo 伊交別 ê 味素相借問過。

這斗法國大東部省行尞第一暝交民宿 Check in 好勢，外頭餐廳賰 McDonald's、酒館交我這世人食甲窞用(thām-īng) ê Pizza 通交觀 hōo 我雙跤踏雙船，心頭亂紛紛 m̄ 知按怎安搭大腸交小腸。

「食飯抑是做仙」翁循 Pizzas Artisanales 踅三輾。

「Bueh 食飯 buaih 做仙」我假扮臭耳聾聽無大腸交小腸 ê 抗議。

「咕嚕，咕嚕，你繼續雙跤踏雙船，心頭亂紛紛，我 bueh 來揣迷人 ê 節奏」翁倒斡一輾，車隨入格，我 mā 跟綴伊 ê 咕嚕，咕嚕行入這世人食過額 ê Pizzas Artisanales。

翁點 ê 火活烘餅 Flammkuchen

Sarre-Union 屬 Saverne 區，伊交附近鄉鎮相比並屬新市鎮。

Sarre tī 法語 ê 14 是 Sarre 河，德語號做 Saar ê 薩爾河，寫著德國 Saar 就愛連結 Saarschleife 這張相片，伊交咱臺灣徛位高雄目今 buē 記持 ê 行政區 ê 景緻是雙生仔。

Union 是結盟 ê 14，Sarre-Union 是 1794 kā Bouquenom 交 Ville Neuve de Sarrewerden 敆做一个市 ê 新市名。

Sarre-Union tī 普法戰爭到一戰結束進前成做德國人，彼久 ê 字名號做 Saarunion，一戰結束 Saarunion 換名做 Sarre-Union，二戰期間又閣按法國人成做德國人，字名換做 Saar-Buckenheim，二戰結束前一冬 1944 伊閣按德國人成做法國人，並定名做 Sarre-Union。 

我點 ê 四季 Pizza

那食 Pizza 那配維基百科，我想著 tsuē 冬前行踏 Ligne Maginot 馬其諾防線 mā 是近代活歷史 ê 序大問 gún-ê 問題，恁認為我是德國人抑是法國人？

彼陣 ê 我 tuì 這段話無遐爾深 ê 感受，那食 Pizza 那愖伊出世是德國人，戰爭 hōo 伊成做法國人 - 德國人 - 法國人，伊 tuì 這兩个語言攏有感情，伊 mā 向望這款 ê 故事 buē 閣發生。

彼陣 ê 我 tuì 這段話 ê 感受無遐爾仔深，這久翻頭愖彼久，我感謝家己 m̄ 捌真正行入這个選擇。

Sarre-Union 是食下昏飯 ê 角勢 m̄ 是觀光要點，記錄就到遮為止。

是講，法國 ê Pizza 呔討遮爾仔好味素。