亂皂𥴊仔店 ⓂⒺⒾⓃⓀⒾⓄⓈⓀ

(減肥下昏飯 Bé-khòng 酸菜。培根酸菜)

人生世事誠實有濟濟 hōo 家己料想 buē 到 ê 代誌，tshan-tshiūnn 人生第一斗搪著身體病疼需要理解別人愛講啥 ê 語言 m̄ 是家己慣勢 ê 語言是佮咱家己一屑仔攏無啥熟似 ê 德語。

不而過，我 ē 講有這斗 ê 經驗，我發覺語言確實 m̄ 是遐爾仔重要，另外我 ê 德語窮真 mā 講甲若醫生 ê 褒唆，我 ê 德語講甲確實 buē 䆀閱讀 mā 是。

起因，我有法度一个人 tī 無網路通請教 ê 狀態 kā 開刀文件讀甲 hōo 護士小姐 m̄ 免揣人專工 uī 我解釋，這正經是無簡單 ê 代誌。

雖罔，自開始確定愛開刀就有淡薄仔出箠，總是彼 kan-ta 文化慣勢無相仝，像褲褪落來，我隨 kā 牛仔褲佮衛生褲攏褪掉賰一領內褲，押尾迵過醫生若 Dame Jane Goodall teh 佮猩猩互動，我 tsiah 知影，我 kan-ta 需要 kā 褲褪甲無四序 ê 角勢 hōo 伊檢查。

是講穿裙應當 buē 出現這个 tsin 想起猶原歹勢 ê 代誌 ，總是裙無合我 ê 喙斗，我是 Yves Saint Laurent ê 信徒....

這久有法度遮爾仔自在面對家己 ê 歹勢正經愛甲家己拍噗仔，起因我自本 m̄ 是這款性地，我是彼款一著觸就隨感覺現世真𠢕 tuì 家己情緒叨撚 ê 性地，總是這款性地 mā m̄ 是我 ê 本性，伊是沓沓仔 hōo 教育世俗環境捏出來 ê 我，只不過我家己 m̄ 捌智覺。

這久翻頭想遐 ê 著觸窮實 mā buē 䆀，因為𪜶我 tsiah 有機會理解 Hegel 講 ê Kreis von Kreisen 一个圓湠一个湠 ê Die Weltgeschichte ist der Fortschritt im Bewusstsein der Freiheit 世界歷史是自由意識 ê 進步，我 ê 著觸佮現世是我 Den Stil verbessern - das heißt den Gedanken verbessern, und gar nichts weiter ê 思考革新。

德國討論外埠人 m̄ 講德語 ê 問題真久一段時間，總是敢是外埠人攏 m̄ 講德語，這个問題是一件真值得逐家思考。

德國需要 gún 來德國 kā 德國鬥相共，gún-ê 家庭佮德國家庭仝款，翁婿負責經濟我負責家庭，gún 佮德國家庭無宛 2 體 ê 人生，押尾因為我 buē 曉講德語成做造成德國負擔 ê 一部份.....

進前看新德國人(按移工成做德國人)談德國人生，我 tuì 隔壁跟綴𪜶爸母喙斗 teh 講這件代誌 ê 翁講「恁爸母蹛過葡萄牙、西班牙、巴哈馬 m̄ 捌學過人 ê 話，特別是恁老母綴恁老爸去西班牙作穡，恁已經攏十外歲，伊有法度出去揣頭路，總是到今人生行到米壽(比喻)伊 m̄ 捌出門做過穡 mā m̄ 捌學過別人 ê 話，伊 kan-ta ē 曉展伊 ē 曉講別人話➀佮恥笑佮伊仝款是講別人話 mā 佮伊仝款有厚厚腔口 ê 人，而且是無分在地人抑是外國人。遮 ê 受訪者 tī 囡仔 m̄ 免人照顧隨出門揣工課，因為長期無機會學習德語➁，sóo-tí 揣 ê 頭路大多數猶是家己 ê 箍仔，總是家己 ê 箍仔猶是愛佮恁遮 ê 德國人盤撋，𪜶開始一句一句學，總是遮 ê 學習 tî 恁 ê 目睭仁永遠是無夠額 ê 貧惰 kan-ta 貪恁德國 ê 福利，講到遮我 mā 是其中一个，敢 m̄ 是。」

 「你 m̄ 是.....」翁總算理解家己承爸母遐 ê 漚梨仔假蘋果有偌爾仔無值錢。

我家己 mā 是外國人 mā 有相𫝛 ê 問題，sóo-tí 拄著愛佮當地人破豆進前我攏 ē 笑講我是 Ausland(外國人)，對方若應講，你 m̄ 是 Ausland 是 Fermd，我知影這个人 ē-tàng 繼續開講。 

Ausland 佮 Fermd 翻譯做英語攏是 Foreign tī 德國伊有你佮 gún 是徛仝國佮一屑仔攏無底代 ê 意思，是講 mā m̄ 是大部份 ê 德國人攏按呢認定，sóo-tí 猶是愛看情景判斷。

 「我是 Ausland。」 

「你 m̄ 是 Ausland，你是 Fermd」德語老師講。

老師 m̄-nā 近視千度 mā 有判斷問題。

「兩个意思確實攏是外國人 ê 意思，總是一个是無 bueh 融入這个環境 ê 形容，一个是按別搭來遮定根 ê 人，像你是按柏林來到遮 ê 外埠人」日時是正規德國文學老師，暗時是國民學校(VHS)德語老師 ê 老師講。

我上捷講 ê 華語講甲 2266，這个人生半途 tsiah 開始學習 ê 德語想 bueh kā 伊講甲若厝內夜間部同學按呢，彼是犀牛望月，一月過一月 ê 較早睏較有眠，sóo-tí 我正經愛 kā 家己拍噗仔，起因我尊存這个國家，我 m̄ 捌提別人兜 ê 話 tī 遮走江湖閣哭呻是按怎別人 m̄ 講別人兜話。

這斗 ê 蹛院 mā hōo 我發見家己看 buē 著 ê 自信不足，我無法度自在讀我紮去 ê 冊 m̄-koh 我有法度大大典典讀病院 ê 報紙。

是按怎按呢生，我清楚知影問題，總是彼个枷就是敨 buē 掉。

準做咱讀無遮 ê 語言咱猶有法度區別德文、法文、義大利文遮 ê 羅馬字文，是按怎遮 ê 人無法度區別日文佮中文 ê 差別。

已經綴翁婿轉去日本 ê Aiko 談著伊已經貧惰解釋日文佮中文 ê 無宛 2 體，我這个捷 hőng 歸類中國人 ê 臺灣人愈無想 bueh hőng 捒去彼爿。

總是山勢好徙，本性僫改，我無法度 kā 論文讀甲若 teh 讀愛情小說按呢，sóo-tí tī-leh 等待醫生宣佈我 ē-tàng 包袱仔款款轉去食家己 ê 時，我猶是若新婦仔 teh 讀藍春瑞老師 ê《無影無跡》。

「這 m̄ 是中文，你敢是按香港來？」我 ê 尻脊骿步頻出現一聲真歹勢 kā 你攪擾 ê 問句。

我 mā 因為這聲問句成做 hōo 醫生交代這陣 buē-tàng 食煞無法度止饞 ê 動作，隨 kā 冊藏 tī 枕頭，越頭微微仔笑應「我臺灣人。」

按身軀色水來看伊應當是癌症彼科 ê 護理師，伊見著我這个動作 mā 隨感覺歹勢直講「歹勢，歹勢，我 m̄ 是刁意故攪擾，實在是你手頭 ê 冊 hōo 我想著早前去香港𨑨迌 ê 記持。」

我沓沓仔 kā 冊按枕頭下跤提出來講「這臺灣文學其中一个語文臺語。」

「我 kan-ta 知影臺灣講華語」護理師歹勢歹勢仔講。

「無要緊，無行踏德國進前我 mā 掠做德語攏相仝，德國 mā kan-ta 一種德語」我微微仔笑應。

「這冊應當誠好看，我看你攏無致心𫝻手機仔 kan-ta 反冊。」

「伊寫臺灣已經消失 ê  Glück Auf 故事。」

「真有 14 neh，遮 ê 羅馬字敢是人名？」

我無理解香港出版社 ê 排版慣勢，總是我想護理師應當看慣勢華文敆羅馬字多數是人名「M̄ 是這是這个語文 ê 文體，像日文按呢。」

「原來如此，智慧線加一條，多謝」護理師頭 mā 按浴間仔探，我 tsiah 發現大腸癌湠到肝 mā 驚我食 buē 飽，糜飯時間攏直問我敢 bueh kā 伊鬥銷頓 ê 阿媽 phàng-kìnn。

「多謝你 ê 分張，再見」護理師隨行入浴間仔無閒，我 mā 繼續讀我 ê《無影無跡》只不過這斗我 buē 閣若新婦仔讀這本冊，我大大典典 kā 家己成做若學者按呢 kā 讀甲出院。

翁無閒通來病院接我轉去，我家己坐輕鐵到市中心換電聯車慢慢仔硞轉到厝，因為疫情 mā 無法度來病院看某 ê 德語 hőng 訓練甲啥物程度 ê 伊問「Alles in Ordnung?」

「Natürlich, 大丈夫 mein deutsch ist D1」我講。

「Natürlich ist Ihr Deutscher besser als der eines Arztes und einer Krankenschwester」翁笑甲吭跤翹。

博客來 ê 台語冊較見 mā 台語詩，我理解台語詩 tuì 台語 ê 重要性，總是詩 m̄ 是四常人 ē 使用 ê 語言 mā m̄ 是提來討論世事 ê 語言。

我 ê 14 是像印度 Kari m̄ 是英國自本 ê 文化，我 m̄ 知影現此時 ê 英國人敢有人寫 Curry 詩，總是我相信當英國人第一斗拄著 kari bueh kā 伊紹介 hōo 英國人知影，應當 mā 使用白話 teh 紹介。

Sóo-tí 開始請教 Google 大眾爺廟佗落有 teh 賣台語冊，廟拜來拜去押尾猶是踅轉來 m̄ 知見過幾擺總是掠伊是無安全 ê「台灣e店」。

我 m̄ 知影「台灣e店」是按怎設定網頁，總是我徛位 ê 所在，見擺攏通知我網頁無安全，無膽驚死 ê 我自然 buē 揤落去踅，寫著無安全中國內容農場(luē-iông lông-tiûnn) tsuē-tsuē 攏是安全，現今講 KI(AI)已經進化到 I'll be back 伊猶是人 teh 設定敢 m̄ 是？

《無影無跡》是按《奪人 ê 愛》生湠，《Thá-kheh》是我本底想 bueh 寫推薦冊單 hōo Hena Ma ê 一本冊。

總是無使用面冊 mā 無慣勢做寡若孫悟空赴蟠桃會，無人請，家己來 ê 代誌就趁巡菜股，翻田塗家己寫 tī 遮做記錄 mā 準做小小冊迷佮台灣人台灣事小小聽眾 ê 心得錄。 

➀ 德語有百百款，gún 翁爸母選擇 Max Weinreich 講 ê《語言，就是擁有軍隊的方言》

➁ Merkel 執政進前，德國無融合政策 Integrationskurs & Orientierungskurs, integration and orientation courses

栽欉 2022.02.04

翻田塗 2024.05.20

Bé-khòng 酸菜

...... 材料 ......

罐頭草花　500g

滾水　300ml

Bé-khòng　75g

洋蔥 ，刴幼　1

鹽、胡椒

...... 步數 ......

1. 洋蔥、Bé-khòng 落鼎煏芳，落草花、滾水，𤉙1點鐘，tiàu 寡鹽、胡椒，樂暢來食。

(Abendessen zur Gewichtsabnahme Sauerkraut mit Speck)

Mein deutsche ist jetzt D1, sage ich meinem Mann nach dem Krankenhaus.

Wir haben nur bis C1, lacht mein Mann.

Ja, ich bin sehr überrascht, mein B1 deutsch ist genug für das Krankenhaussystem.

Obwohl, manchmal verstehe nicht was der Arzt fragt.

Aber das ist nur 1% oder 2% nicht so viel.

Weil die meisten Zeit mein CPU ist noch am überlegen die richtige Worte zum Anworten zu finden

Ich habe kein großes Problem, aber...

Ich bin Auslander und ich muss die Fremdsprache sprechen, das macht mich so nervös.

Wenn jede mich anguckt und wartet...

Mann...

Aber, ich überleben noch in Deutschland.

Und ich teile Taiwanesisches Bücher mit Krankschwester.

Ich glaube, das bedeutet mein deutsch ist D1, sagte ich.

Mein Mann lacht und sagt ja, ich glaube obwohl die Leute über C1, für die Sprache im Krankenhaus vielleicht haben noch Problem.

Weil, das ist von der Schule nicht vom Leben.

Ich weiß nicht. Was C1 ist.

Aber, ich danke jedem Pfleger und Arzt.

Mein Problem ist weg und ich habe mehr Mut zum nächsten Abenteuer um deutsche mit meinem furchtbaren deutsch zu quälen.

Sauerkraut mit Speck

...... Zutaten ......

Sauerkraut aus der Dose　500g

Fein gehackte Zwiebel　1

Wasser　300ml

Speck　75g

Salz ＆ Pfeffer

...... Zubereitung ......

1. Zwiebel und Speck im Topf anbraten bis sie goldbraun ist, Kohl dazu geben und gut mischen.

2. Wasser in den Topf geben und auf kleiner Stufe zum kochen bringen, dann weiter ca. 1 Std. kochen.

3. Mit Salz, Pfeffer abschmecken. Guten Appetit!

(Dinner for weight loss Sauerkraut and Bacon)

My German is now D1, I tell my husband after the hospital.

We only have up to C1, my husband laughs.

Yes, I'm very surprised, my B1 German is enough for the hospital system.

Although, sometimes do not understand what the doctor asks.

But that's only 1% or 2% not so much.

Because most of the time my CPU is still trying to find the right words to answer

I don't have a big problem, but...

I'm a foreigner and I have to speak the foreign language, it makes me so nervous.

When everyone looks at me and waits...

Dear...

But, I still survive in Germany.

And I share Taiwanese books with nurse.

I think that means my German is D1, I said.

My husband laughs and says yes, I think although the people about C1, for the language in the hospital, maybe still have problems.

Because that's from school not from life.

I do not know. What is C1.

But, I thank every nurse and doctor.

My problem is gone and I have more courage for the next adventure to torment Germans with my terrible German. 

Sauerkraut and Bacon

...... Ingredients ......

Canned Sauerkraut　500g

Finely chopped onion　1

Water　300ml

Bacon　75g

Salt,pepper 

...... Method ......

1. Fry the onion and bacon in a saucepan until golden brown, add the sauerkraut and mix well.

2. Pour water into the saucepan, bring to a boil on a low level,  then continue to cook for approx. 1 hour.

3. Season with salt, pepper and vinegar. Enjoy your meal!