世間萬代攏 ē 拋荒，唯一 buē 拋荒是咱 ê 慾望(io̍k-bōng)。
5月初1德國鐵路局開始實施49歐元踅全國，gún 翁仔姐 mā tī 這日開始享受這僫得 ê 交通優惠專案隨拆票出門行跤花。49€ 踅全國限定 RE(普通車、平快)、S-bahn(捷運)、DB Bá-suh。
5月初1 mā 是 gún 翁仔姐攏都合 ê 日子，時間無通閣冗，都會無通閣撨就跟綴氣象局 ê 跤步上北逐阿波羅 ê 金頭鬃。
徛位 tī Baden-Württenemberg 巴登.符騰堡 Baden 地區 ê Gondelsheim 貢德爾斯海姆，目今 ê 伊交 Württenemberg ê Leinfelden 萊恩費爾登攏是規庄踅一輾猶是揣無目的 ê 角勢。不過歷史跤跡較受法國影響 ê Gondelshim 伊 ê 城市面肉猶是比 Leinfelden 較有歷史影跡。
這就是咱 ê 問題，咱目今 ê 德國史 kan-ta Preußen --- 進前參加歷史團行踏向時，引路者回答 tī Baden 出世 Baden 大漢 ê 囡仔 ê 一段話。
歷史複雜低路人我就莫閣 buē 博假博喋 buē 離。
Gún 本底 ê 按算是行踏彼站陪伴我 mā bueh 10 冬 ê 車頭 Baden.Baden 餾一日上北落南青春 ê 家己。總是按算捙拚 buē 過天一劃，本底光映映 ê 光景 tī RE 沓沓仔入站換雲尪來相伴。
「Thallo 春之神這久 ê 気持ち無媠」我手指車窗外勻勻仔 kā 烏紗幔踮身軀 ê 雲尪，無手機仔人生是烏日 ê 翁無應話，因為伊已經向頭犁氣象報告圖。
「按呢咱就繼續上北到 Bruchsal」翁那講那行向車門準備走百米。
我目若看這个陪伴我按烏貓姊沓沓仔行向大嬸婆 ê 車頭，按 Heilbronn kā Straßenbahn 當做 S-Bahn 上車，天按鹹鴨卵 ê 卵紅轉做一片烏枋掛車幫 ê 鼓仔燈，德語講 buē 輾轉 ê 我一个一个人請教我愛按怎換車幫，一个一个聽著無輾轉 ê 德語微微仔笑擔一下仔肩表示「歹勢無法度 kā 你鬥相共」一位按非洲來德國揣新生活 ê 太太輕輕搭我 ê 肩，手指家己微微仔笑成做上有力量 ê 安搭。
這回無機會交你食下晡點心，後回再相見，Bis dann 我 ê 青春。
一戰紀念石碑(Pi)
Gondelsheim 第一斗出現 tī 歷史舞台是紅喙鬚國王(Barbarossa)交西班牙國王 Alfons VIII. von Kastilien 共同簽訂 ê 合約(1188)，這个合約講著 Gondelsheim ê allodium - Eigengut tuì 家己有利 ê 事項，簡單來講就是嫁妝，這份 m̄ 捌實踐 ê 嫁妝 Gundelsheim，推測就是目今 ê Gondelsheim。
1257 Gondelsheim 正式 hőng 記錄做 Gundolfesheim，tī 這段期間進前伊一直屬於 Herrenalb 修道院➀，修道院 kā 伊交 hōo Konrad von Wiesloch(按維斯洛赫來 ê Konrad)成做財產交換 ê 條件，紲落來過手 hōo Grafen von Hohenberg(按霍恩貝格來 ê 伯爵/Pik-tsiok)，然後轉手 hōo Grafen von Württemnberg(按符騰堡來 ê 伯爵/Pik-tsiok)，按符騰堡來 ê Eberhard 伯爵 tī 1483 kā 伊賣 hōo Landschad von Steinach➁(按施泰納赫 ê 貴族)。16 世紀尾 Gondelshim 成做 Knebel von Katzenelnbogen(按卡岑埃爾恩博根來 ê Knebel)家族 ê 財產。Kenbel 家族 tī 1650 kā 伊賣 hōo Herren von Mentzingen(按 Mentzingen 來 ê 男爵/lâm-tsiok)，男爵無法國太陽王 ê 好字運欠缺 ê 財政揣著金主鬥相楗，1787 kā Gondelshim 過戶 hōo 統治巴登 ê 貴族家庭。
歷史有複雜無？
➀ 目今位置 Hermann Hesse ê 家鄉 - Calw/卡爾夫
➁ Landschad 按平民受封做地方頭人 ê 低階層貴族
平交道請禁火
紲落來 Gondelshim 成做 Badischen Grafschaft 巴登縣 ê Petershausen➂, 1806 巴登按縣(Grafschaft)升格做大公國(Großherzogtum)，伊成做 Pfinz- und Enzkreis➃ ê 領地。
1826 Pfinz- und Enzkreis 解散，隨過入 Bretten 領地 Bezirksamt Bretten➄ 到 1936 結束，換做 Bezirksamt Bruchsal 紲落來換做 Landkreis Bruchsal 閣紲落來換做 Landkreis Karlsruhe 到目今。
自大自然 ê 一部分成做人類交易 ê 財產，跟綴人類行過八百外冬歷史 ê Gondelsheim 目今上吸人目睭仁 ê 景點應當是這座起造 tī 中世紀行過農民戰爭交三十年戰爭規組毁了，押尾 tī 新領地主人手頭重新復活 ê Gondelsheim 城堡。Gún mā 確確實實 uī-tio̍h 這个蘇格蘭風格 ê 城堡中途 tī 巴登首府 Karlsruhe 換車到遮。不過 gún 交按 Mentzingen 來 ê 男爵有𫝛款 ê 字運沐著打馬膠(Peach gehabt)，遵照開放時間行踏城堡 ê gún tī 人猶 tī 車頂隨有這个感受「城堡應當無開放參觀一段時間」，這个感受 tī gún 順城堡圍牆巡禮，按這个大門換過彼大門得著明確 ê 答案。城堡 ê 草仔發甲連虎 kiōng-bueh 成做掩身(iám-sin)虎。只好又閣順紹介隔鐵門 kā Walter Schott 1903 ê 作品 Drei tanzende Mädchen(三位跳舞 ê 查某囡仔，複製品)遠遠攝一張相，順紲擔頭看中世紀 ê 舊城門交教堂。
自 2010 Schloss Gondelsheim ê 主人是一位商業人，歷史交建築 hām 咱人類相仝，攏是有百年厝，無百人主。
➂ 目今 ê Konstanz 康士坦茲 19
➃ 伊跟綴時間 ê 跤步成做過去不可得，目今揣 buē 著 ê 一部份
➄ 帝國領地
按 Gondelsheim 坐普通車閣踅轉去影響德國近代歷史 Max von Baden ê 首府 Karlsruhe，gún 又閣按龜成做兔走百米上火車到全歐洲上大 ê 蘆筍市場 Bruchsal。
Bruchsal 除了是巴登首府 Karlsruhe 區人口上 tsuē ê 城市，伊 mā 是研究新石器時代重要地區之一。
Bruchsal mā 是後代人理解 Ostarrichi 就是 Österreich/奧地利 ê 所在，這个記錄出現 tī Otto III uī Bruchsal 起草成做教區 ê 文件。
我真愛這款露天閘蔭(Ńg)設計，雖罔到今原仔 m̄ 捌伊是啥物樹種
....
Bruchsal 自中世紀開始一直屬 Speyer 斯派爾教區，馬爾他騎士團 mā 設立踮遮。
Bruchsal 按 1272 成立，1806 成做帝國 ê 一部份。遮交德國 tsuē-tsuē 城市鄉鎮相𫝛行過宗教戰爭，總是遮 ê 主教權利大過人民，人民拍拚並向望 ê 宗教改革 tī Bruchsal 行真久一段路 tsiah 行向 Luther's Weg。
進前跟綴引路人行踏歷史，伊談著巴登地區多數人是路德教派非符騰堡 ê 天主教派。巴登交符騰堡兩爿攏跍有夠額 ê 我自彼日聽引路人按呢紹介，路德教派交天主教派有啥無相𫝛，我猶是分 buē 清，不過這个問題 m̄ 是我 tsia̍h 有，成做德國人 ê gún 翁家己 mā 分清楚。
市場 ê 女詩人
Bruchsal 現此時 ê 城市地位無往過 ê 光炎炎，不過向時 ê 主教皇宮猶原光映映，這 mā 是 gún 翁仔姐上主要 ê 目標。
我無藝術細胞，總是見人攝相驚人笑 ê 我 mā 攑香綴拜，綴 leh 攝...
Bruchsal 向時上大 ê 族裔居民是猶太裔，二戰結束遮 ê 人口結構 mā 交德國 tsuē-tsuē 角勢相𫝛，無見猶太家庭不過人行路抑是厝宅 ē 安一塊石碑提醒德國人遮本底 ê 面肉。
Bruchsal 商展 ê 所在逐禮拜三佮每禮拜六，透早7點到下晡1點。
Schloss Bruchsal 屬 Barock 交 Rokoko 風格建築，伊是 Bruchsal 主教 Damian Hugo Philipp von Schönborn-Buchheim 下令 tī 1722/23 建造。
Schloss Bruchsal 目今 ê 面肉是根據 400 外張烏白相片重新起造。
78 年前 ê 5 月初 1 Schloss Bruchsal hōo 神(第三帝國 ê 神)放 buē 記持，美軍 mā 無要意目標設定，一路按車頭送炸彈 hōo Bruchsal 食。
Bruchsal 除了居民受傷慘重，這座起甲交皇宮無宛 2 體 ê 主教徛家 mā 毀甲 hőng 認 buē 出伊是 tsiâ。
空襲結束，Schloss Bruchsal 交本底交易 ê 街路攏成做人見人哭，鬼見鬼走斷籬倒壁地獄。
水龍車一車一車來 mā 一車一車走，最後 tī Ferdinand Hundts 設計 ê 房間揣著無受火神上目 ê 400 外張烏白相片。
遮 ê 相片成做 Schloss Bruchsal tī 涼傘雖破，骨格原在上重要 ê 來源。
Schloss Bruchsal tī 戰爭期間交 Schloss Sanssouci(無愁宮)𫝛款，有枝骨無五臟六腑 ê 空殼。
歷史主教收藏交妝娗 tī 戰爭期間成做人民求生存 ê 財產 --- 揣 buē 轉來。
坦白講，讀紹介進前我一直掠做伊是貴族抑是國王 ê 徛家，紹介讀煞我 kan-ta 感謝路德，雖罔路德 ê 宗教改革 mā 有 tsuē-tsuē 問題，總是無伊 ê 改革，我無法度想像這久 ê 世界敢有法度成做目今 ê 面肉。
行踏 Schloss Bruchsal 起厝千工，拆厝一陣風一直 tī 海馬鉼針喝鈴瓏 hōo 我又閣成做 Meow tuì 翁 Meow buē 離。
恁 ê 德國先祖 tī 天頂有聖(siànn)見著恁遮 ê 後代囝孫按呢舞爸公產，m̄ 知𪜶敢有這款想法；
鼻仔較懸 mā 懸 buē 到天，冊 hōo 恁讀閣較 tsuē 猶是讀較尻脊骿 ê 了然，孝尾囝。
城堡花園
行踏 Schloss Bruchsal 進前讀著遮 ê 歷史文物賰建築骨格，gún 就決定 buaih 閣熥 Schloss Sanssouci(無愁宮) ê 跤花，自我發揮想像隨跟綴出名 ê 四季交天地行踏英國花園。
英國花園 ê 四季交天地原樣目今收藏 tī 美國哈佛大學。
代表四季 ê 春天
代表四季 ê 熱人
代表四季 ê 秋天
代表四季 ê 寒人
代表天地 ê 海洋
代表天地 ê 空氣
代表天地 ê 土地
代表天地 ê 火
歐洲 tsuē-tsuē 角勢有家己 tuì 外國 ê 想像，這座無紹介講底時起造 m̄-koh 歸類 tī Italia 風格 ê 建築 hōo 我越頭隨 tuì 翁講，全世界 m̄ 是 kan-ta 臺灣有一堆看 buē 出佗是 Barock 抑是 Rokoko ê 建築。
日本剾刀攑 teh tuì 翁倒剾，倒吊無墨水 mā 硬 bueh 分張家己看法 ê 我那行那 tuì 翁講「遮有厚厚歐洲 tī 北非殖民地 ê 風格 mā 有 Indochin ê 建築風格」換另外一陣少年囡仔做陣大聲笑。
我 m̄ 知影少年囡仔是 teh 笑手機仔 ê 內容抑是笑我 ê 無智識，總是這是我 ê 廣東目鏡隨人掛，百花鏡隨人想。
按廣東目鏡百花鏡遐出發去 Schloss Bruchsal 搪著 ê 古錐 --- 無通過 ABI 無人生
看著這我笑甲反肚 tuì 翁講「恁反對精英制度，逐家又閣下性命成做鰮仔魚按精英制度泅交 gún 番薯島相仝相踏脫。」
我一直掠做真珠奶茶 tī 歐洲無市場，畢竟我最後一斗見著伊是 tī Stuttgart 中央車站。
彼陣 ê 真珠奶茶因為金色彎拱門 tī 德國湠甲若獅仔齒(Löwenzahn)一四界，押尾又閣因為金色彎拱門一攤一店收到我無見半攤店。
這斗行踏 Bruchsal 見著越南人 kā 咱番薯島 ê 手摵茶店一滴攏無落勾搬到德國隨行入去點一杯，看起來若家鄉 ê 真珠奶茶無法度滿足我按家鄉生湠 ê 喙斗，總是伊 mā 飽滇我 tuì 家鄉深深 ê 數念。
栽欉 --- 2023.05.03
翻田塗 --- 2024.11.18
留言列表
冊 ▪ Bücher ▪ Books (4)
