亂皂𥴊仔店 ⓂⒺⒾⓃⓀⒾⓄⓈⓀ

非常好看 ê 小說。

按小說 ê 紋路 ē-tàng 看出語言 ê 變化。

雖罔，我並 m̄ 知影小說語法佮文字敢有調整到咱現此時 ê 語法，總是取台灣文學之父賴和先 ê〈一个同志的批信〉來做區別。

讀這本小說，我 ê 語言思路清清楚楚是台語，準做搪著日語 ê 部分 mā buē 轉過華文想法或是唸法。

讀《賴和全集》我愛拆白講，我智識無夠額，想 bueh 按台語思路讀，押尾齊齊用華文讀 tsiah 有法度理解佮讀甲順順。

是按怎會按呢?

わからない(Wakaranai/m̄ 知影) mā 無想 bueh 研究。

起因，讀魯迅 ê 阿Q 我 mā 讀甲足艱苦。

Tsuē-tsuē 字看有卻 m̄ 捌意思，落尾手搪著魯迅 ê 仝鄉人，伊講彼 m̄ 是普通話...

寫到遮想著主編呂美親先生 tī 亞特聊聊天 ê 專訪捌分張這个故事「學生 kā 我講，這本小說 hōo 𪜶讀較有。」

𫝛款，這是我聽過 ê 濃縮版，有 ê 部份凡勢聽到重耽，總是我 ê 理解是這本小說 ê 出現 tuì 𪜶 ê 幫贊真大。

畢竟，一个作品連捌這个語法 ê 人攏讀無路，講伊偌爾仔精彩講愛 kā 揣來讀 mā 無應效。 

總是猶原愛講，這 mā 簡單表示我台文底蒂無夠額 m̄-tsiah 讀無路來，不過小說 ê 日本時代，逐篇引𤆬我厚甲若雲尪 ê 感想。

我想，彼佮作者本身 tsham 彼个年間是相黏蒂帶(tì-tuà) 有相干，sóo-tí 讀起來真觸入心肝穎。

近代陳明仁先生〈詩人的戀愛古〉mā hōo 無電影分鏡抑是漫画創作力 ê 我，有法度順文字改編做家己 ê 影片，心適甲。

林美麗先生〈八卦紅之心〉hōo 我學著「八卦紅」原來就是仙人掌佮四常中捌聽過 ê tsuē-tsuē 無奈。

陳正雄先生 ê〈命〉佮藍春瑞先生 ê〈奪人的愛〉tī《灶雞仔》佮篇名仝名 ê《Tua̍t 人 ê 愛》透過這本小說閣讀一回畫面猶原有張力(tiunn-li̍k)，特別是奪人 ê 愛按漢羅轉做全漢字 hōo 我想著第一本漢羅台文冊就是《Tua̍t 人 ê 愛》佮一寢開始交伊接觸 ê 緊張 --- 驚家己讀無路，結果是...讀台文比讀德文抑是英文閣較扭掠。不過猶原愛講漢羅版本，全羅版本 ê 台語文，我猶原讀 buē 慣勢。

陳雷先生《鄉史補記》冊按 2022 寄到今猶未讀又閣請台灣e店 kā 我鬥寄《紅牡丹》佮《寶石婚》來德國，台語 m̄ 是無文學，只是我 m̄ 知捌。Tshan-tshiūnn 按這卷小說選，我又閣按臺灣e店收藏著《石頭縫的幸運草》，雖罔記錄這篇 543 ê 時，我猶原猶未 kā 冊讀到一字，總是我清楚知影有一段時間我 m̄ 免閣驚惶冊櫥無味素通揣來敆 Ka-pi。

《台語現代小說選》

主編 呂美親

㊓ 前衛出版社

ⓦⓦⓦ 聚珍臺灣