亂皂𥴊仔店 ⓂⒺⒾⓃⓀⒾⓄⓈⓀ

春雺曝死鬼，夏雺做大水

倚位東海箍 tī 北極箍仔 ê 瑞典熱人一日變化 tuì 我來講就 tshan-tshiūnn 先人 ê 智慧 mā 真符合我現此時 ê 心情，一時足想 bueh 寫 Blog 一時閣足慼寫 Blog ê 齷齪，總是遮 ê 齷齪永遠比 buē 過放家己自由較好過日子。

瑞典佮挪威仝款 m̄ 是逐搭露營地攏有網路，sóo-tí 準做我張使性地 mā 是無較縒 ê 起性搦地。

瑞典 ê 熱人短甲 tshan-tshiūnn 人 ê 青春遐爾仔短，瑞典露營區 ê 網路 mā m̄ 是逐个攏緊甲若高鐵仝款，這久徛位倚 Göteborg 等待雺開來曝死鬼搪著這逝跤花網路緊甲若美洲豹 ê 露營區，我煞無心緒想 bueh tī 遮栽新欉 mā 無想 bueh kā 紮來 ê 冊讀 hōo 煞，起因我無想 bueh「夯枷」。

是「夯枷」，渡假 ê 日子正經 m̄ 通讀寡 hōo 家己心情沈重 ê 冊 mā m̄ 通逼家己閒人 m̄ 做，牽豬哥漩𨑨迌。

我真佮意杜信龍先生 tī 台文博覽會 ê 成做一 ê 母語作家是(人生)上大 ê 投資演講，總是自第一篇推薦序到杜信龍先生 ê 自序我規仙人感覺肩胛硩石頭，本底齊是活水 ê 心臟隨貯死窟仔水 ê 無想 bueh 繼續讀落去。

 是講甘耀明《成為真正的人》mā 仝款，總是我猶有法度 kā 倚 bueh 150 頁 ê 故事讀 hōo 煞，這敢 buē 傷過大細仙？

我個人是感覺 buē，起因我本底就知影甘耀明先生 ê 筆法佮伊認定 ê 文學美感，sóo-tí 我 tuì 伊寫 ê 故事有共鳴，不過我 tuì 伊按怎 kā 別人 ê 文化轉做家己 ê 美感無共鳴，應當按呢講我並 buē 要意伊凡事 kan-ta 一个美感。按呢寫真失禮，不過甘耀明先生 tī 這本冊內底 mā 有寫著這段。

文字是一个記錄，語言是一个人 ê 水源頭，有 ê 人佮意永遠取水頭水，有 ê 人佮意綴風象徛 Passau 取 Donau, Inn, llz 結做伙 ê 水，這無一个 m̄ 著，總是當遮 ê 白汫無素 ê 水因為人 ê 無聊，是我 ē 講無聊開始比較我 ê 水頭較甜較好啉，這就誠無意思，起因每一个水頭有伊順自然生成 ê 特別。

我 tuì 語言復振無想法 mā 無興評論別人 ê「文明」，總是我真認同進前猶有法度以無面冊口座 ê 踅順聰款補家己不足 ê 台語文冊單資訊讀著 ê 一段話，大約仔意思是「以語言做民族復振彼是一件危險 ê 代誌」。

咱攏有家己話，總是咱人類 ê 社會已經 m̄ 是社 ê 發展，咱攏需要一个相仝 ê 語言來佮 tsham 咱無仝話 ê 人交流，總是這久 ê 咱八字較無好，像成德語俗語講 ê 滒著打馬膠(Pech gehabt)搪著 tsuē-tsuē 人猶原愛德國納粹 ê 癖，咱家己就愛較有智慧 m̄ 通行入𪜶做 ê 人囮 hōo 咱家己看起來 mā 足顧人怨 ê 想 bueh Abstand halten 甚至無想 bueh 佮咱交結。

烏鴉有 42 種，我認捌 ê 烏鴉 kan-ta 一款就是規身軀烏趖趖 ê 彼款，人行到瑞典 tsiah 斟酌著烏鴉 m̄ 是『天下烏鴉一般黑』是猶有頭烏身軀塗色抑是鳥鼠仔色 ê 雺霧烏鴉(Nebelkrähe)這款色緻 ê 烏鴉 m̄ 是 m̄ 捌見過，總是我 ê 珠仔豆愛等到這回 tsiah 斟酌著伊，伊 mā 是烏鴉。

天下 ê 烏鴉正經 m̄ 是齊烏，至少這幾日一直偷提 gún 藏 ê 糞埽袋仔 ê 烏鴉就 m̄ 是規軀齊穿烏衫 ê 雺霧烏鴉。

杜信龍先生 ê《放毒》真正好讀，雖罔我 tsiah 讀無幾頁，總是我清楚知影伊無適合人 teh 渡假 ē 我 tshan-tshiūnn 這時 ê 無四序，露營區佮咱八字 buē 合，咱徙位就好免了時間討論「是按怎 ē 有這款服務態度」來積鬱，是講無定著人主人家無差 gún 翁仔某姐這筆錢 sóo-tí 步頻藏鏡人 ê 規定一大堆。

不過猶是愛說明，一路上北落南搪著 ê 瑞典人 hōo 人感覺有距離 m̄-koh 愛講𪜶真正好鬥陣(gún 翁 mā 有仝款 ê 感受)，露營區 mā hōo 我自在甲免孤鳥插人群。

這久 uī-tio̍h Göteborg 猶 teh 雨來天 tsiah 停跤 ê 露營區以這句台灣俗諺語來形容是乞食攑蠓捽仔 --- 假仙(扮)，環境妝挺甲若瑞典窮真非瑞典，一个人 ê 底蒂正經無法度迵過頓粉點胭脂來改變，除非你真正接受這个 tsham 你相踏黜 ê 底蒂，像 Kevin 按呢。

寫著勍(khiang)仔，我想著德國有一句話形容客鳥 --- Diebische Elster

記錄著面冊想著面冊又閣用彼步，捎 What's App 來威脅歐盟公民愛 tī 面冊開一个口座 tsiah ē-tàng 使用 What's App ê 故事，自 2021.08 面冊口座刣掉到今，我 m̄ 捌數念過面冊，準做這久猶有 teh 踅面冊 mā kan-ta 順聰款一个，踅順聰款 ê 目的 mā kan-ta uī-tio̍h 得著較新 ê 台語文出版版，賰 ê 是草花 buē hőng 大箍(Das macht den Kohl nicht fett) ê 無要意。

近來面冊通知我 bueh 踅順聰款就愛申請一个口座，我是小小 ê 地球公民，我知影面冊聽 buē 著我 ê 聲音 --- 無你我無差，總是我清楚知影無面冊通讀，我 ê 四常猶原照常發揮 m̄ 捌走精 ê 快樂自在。

北海 ê 對面是維京教堂 --- Urnes stavkyrkje

這本冊按台灣坐飛行機到德國，按德國坐車一路上北丹麥、瑞典、挪威、瑞典、德國、波蘭、德國、捷克、德國一直維持放毒 P.24 無閣增加任何一頁，起因無特殊 kan-ta 我個人是意愛社會事，社會人處理，意思就是彼个年間 ê 故事 hōo 彼个年間 ê 人講 hōo 咱聽，咱這輩 ê 人記錄咱這輩 ê 故事 hōo 後輩人聽，像鄉史補記作者陳雷先生 tī 台文 Expo ê 分張。

按呢寫 mā 真無公正，起因作者並無鵝筆生花 kā 伊 m̄ 捌搪過 ê 人生階段轉做家己 ê 故事，總是按故事經脈來節這本小說 tuì 我來講猶是承咱按別人遐聽來 ê 面容來妝娗故事 hōo 我窮真講，我無想 bueh 接續讀落去，起因伊 hōo 我一種感覺唯有透過這个方式受害者 ê 怨氣 tsiah 有法度得著敨放。

作者，踮遮 kā 你會失禮，按呢記錄你 ê 作品，總是我是真心 uī 你歡喜，你總算 kā 你 ê 作品整理做一本冊出版 hōo 我有機會迵過我意愛 ê 方式欣賞你 ê 作品，總是歹運就假若蜘蛛仝款會佇無意中出現佇花欉，看著，共掠走就好矣(復活的人)莫閣撏牢 m̄ 願放。

我知影是按怎 bueh 記錄寡 ē hőng 講 tuì 台灣歷史無要意 tuì 事件受害者無同理心 ê 日誌，總是我清楚我無這款無血無目屎無要意 ê 性地，不過，我清楚知影我無經過彼个年間，我無法度真正感受彼个年間 ê 故事，總是悲傷是引𤆬咱行向閣較曠闊 ê 世界 m̄ 是繼續承悲傷佮憤怒。

我知影這本小說是你 tuì 歷史受害者所行過 ê 跤跡按筆生湠 ê 憤慨，總是故事永遠 m̄ 是 kan-ta 一个面肉，當咱憤慨影視歹人角色永遠 kan-ta 一款聲音，咱讀 ê 文學 mā bueh 相𫝛 ê 無宛 2 體，無想 bueh 成做別人 ê 烏面賊煞無細膩融入這个影。

我頇顢寫讀冊心得 mā m̄ 知影是按怎莫名其妙寫這段記錄 hōo 作者，總是這是我 ê 感受 mā 是開始接續台文冊沓沓仔節著家己想 bueh 投資 ê 分類，我無想 bueh kā 時間佮錢投入另外一个烏面賊，準做無人要意我 ê 想法，我猶是佮意 kā 時間投入較 tsuē ê 理解，像復活的人，像灶雞仔，像 Thá-kheh 這類 ê 冊。

真好笑，寫甲 buē-su 家己 ê 意見真重要仝款，窮真一屑仔攏無重要，因為我清楚知影是我家己 kā 作者設想甲過頭，因為我足愛作者這句話寫母語是 lán 人生上好 ê 投資。我 mā 是按呢認為，甚至感恩家己有機會 kā 聲音轉做神奇 ê 符號，準做無人認捌這个符號，伊猶原是別人提 buē 走並幸福 ê 符號。

北海 ê 對面是維京教堂 --- Urnes stavkyrkje

蜘蛛 buē 消失，歷史 ē 翻頭，花煞 ē 跟綴人類進化到無仝 ê 花欉。總是，人工佮順自然競爭 ê 花欉，伊 ê 美麗永遠無相仝。

我 tuì 台文出版現狀無研究，總是我向望台文 ē-tàng 有閣較 tsuē 無相仝 ê 面目引𤆬無仝世代 ê 人認捌無仝 ê 故事並行出家己 ê 雺霧，像 Thá-kheh ê 茱莉 mā tshan-tshiūnn 亞特聊聊天台語兒童公民繪本作者莊佳穎這段訪問，我以我家己 ê 14 來註解 --- 學習是理解並化解無合理 m̄ 是繼續跟綴無合理。