亂皂𥴊仔店 ⓂⒺⒾⓃⓀⒾⓄⓈⓀ

我無 tuì 任何人放送我 ê Blog mā 無去任何社群媒體拍廣告。

Sóo-tí 我 tuì 來訪 ê 人攏準做是風這个媒人婆𠢕做親情 hōo 我 這个自囡仔就無人緣 ê 人，人 buē 到，緣先到，入大廳，得人緣 ê 疼痛。

M̄-koh，這站仔我這个恬甲一隻蠓佮虼蚻攏無興頭來行踏 ê 所在開始出現不明字跡，面對這款 buē-su 海底雞 kan-ta 包裝號名無相𫝛 ê 罐頭訊息，我第一个想法是刣掉，總是海底雞 m̄   捌落第 kan-ta 升級，我呔 ē-tàng 綴𪜶 buē 著陣。另外，bueh 做寡《我在西伯利亞的監獄》談著露西亞按怎抹烏一个人 ê 故事，我 mā 愛𠢕做囮 hōo 人看 buē 出是假影。

添歲猶是有較縒，tshan-tshiūnn Rügen ê LALA 一冬無見關節退化甲 hōo 伊無法度閣 tshan-tshiūnn 頂年按呢，物件食煞隨無見狗。

一字一字斟酌讀，咱感謝海底雞 ê 熱情知影咱 teh 糋膩瓤板膋 sóo-tí 無囥步，總是德國 m̄ 是台北抑是高雄，有法度 kā 長途轉做短途來走，我只好纏綴生份人成做海底雞踅金龜磨寫相𫝛 ê 句，總是我傷過頇顢 hōo 海底雞感受 buē 著我 ê 誠意食水甜，sóo-tí tī 伊一生懸命(isshō kenmei)紹介遐爾仔 tsuē 資料我猶原若罐頭 m̄ 捌調整鹹汫，我遮又閣踅翻頭到半隻蠓仔佮虼蚻攏無 bueh 來挨拶 ê 角勢。

Gún 愛食豆菜德國 mā 有 tsuē-tsuē 豆菜，不過價數無咱臺灣遐爾仔唌人，sóo-tí 一搪著豆菜落價隨捾三盒轉來做料理。

做料理進前翁問「咱 ê 喙斗無相𫝛，遮 ê 豆菜價數佮斤兩 mā tsham 臺灣無相𫝛無法度 hōo 你做䆀隨閣款一盒轉來試鹹汫，你 bueh 按怎處理這个凡勢 ē-hōo 咱成做相拍雞 ê 味素問題？」

我知影伊驚我款「炒豆菜」這類物食，總是伊驚惶 tuì 某拆白伊 ē 得著一尾三斑。

「遮無韭菜我 mā 無滓著恁老母 ê 喙瀾」我刁意故 kā 恁老母 ê 喙瀾搝懸九度。

「我無彼个意思，是...」伊目睭褫(thí)甲若牛目鼻空門關甲密喌喌等我 ê 反應。

窮實，gún m̄ 知影家己四常食食到底食偌 tsuē 熱量。

Sóo-tí 採用德國政府建議 ê 熱量來做 gún-ê 減肥食食標準。

德國政府建議，一个大人一工上 tsuē 食 2000卡。

Gún 就用這个建議做一日食食 ê 標準，一日減食 500卡。

按呢實施，gún 發覺這件代誌。

Nun musst du aber mal langsam die Katze aus dem Sack lassen, wo fahren wir denn nun hin?

你這久沓沓仔愛 kā 貓按袋仔挈出來，現此時 ê 咱 bueh 去佗位？

Nun musst du aber mal langsam die Katze aus dem Sack lassen, wer bist du!!!

你這久沓沓仔愛 kā 貓按袋仔挈出來，你到底是 tsiâ！！！

巡菜股，翻田塗見著西洋萵仔菜，想著我認捌 ê 伊號做『美生菜』這久 ê 伊號做結球萵苣閣有分『大將』佮『翠容』我 ê CUP 小，我無法分判別 tsiâ 是『大將』 tsiâ 是『翠容』，總是我清楚知影伊號做「西洋萵仔菜」，是講這久斟酌看西洋萵仔菜 tsiah 發見這个稱號是無分類 ê 大眾字名，像楠仔是樟科 ê 通稱...

巡菜股，翻田塗人又閣成做一隻貓好玄華文世界 ê「麵沙拉」台語按怎講。

好玄成做貓 ê 我揣答案 ê 第一跤步𫝛款是教典，教典無收錄「沙拉」m̄-koh「沙拉油」 ，教典請教 buē 著 ê 智慧，隨踏第二步公視台語台台語新辭庫，公視台語台有收這个我個人感覺誠無聊 ê 辭「Sa-la」，講著德文 ê Salat 英語 ê Salad 我佮意按 iTaigi 請教來 ê「生菜餐」不過我個人佮意講「生菜盤」生菜佮冷盤。

按「沙拉」我又閣好玄華文世界 ê「冷麵」佮「涼麵」敢是我記憶中 ê 講法？

成做貓第一貓𫝛款貓去教典請教，教典無收，換請教公視台語台台語新辭庫，揣著這兩个佮我囡仔時一模一樣 ê 講法冷麵/líng-mī 佮涼麵/liâng-mī，就隨決定 kā 當初跟綴華文思考 ê「阿草麵沙拉」改寫做「阿草冷麵」。

因為請教「沙拉」我看著「甜菜」二字隨閣成做貓想 bueh 知影華文世界 ê「甜菜」佮「甜菜根」敢閣分 buē 清？

「你 ê 塗肉林檎 buē 記得尾聲。」

「曷，我曷無講幾粒。」

「M̄ 是講幾粒 ê 問題是彼个尾調無出來。」

我恬恬幾分鐘後開始趁樣 Helga und Marianne。

「你講我 ê 德文有問題，Bismarck 是 uì gún 遮出來-ê。」

冊有一版二版三版，我 ê Blog 有一改，再改，閣再改。

自無料使用 Pixnet (300mb?貧惰請教...閬過)到決定撏錢 bué 15G 儉相片，這 4 冬 ê Blog 四常成做我訓練家己食老較莫老倒頹(thē)佮增加智識 ê 好角勢，特別是貧惰寫字做筆記 ê 我迵過寫 Blog 總算有法度好好仔 kā 好玄 m̄-koh 無才調 kā 鏨 tī 海馬鉼針(Hippocampus)隨揣隨有 ê 資訊成做家己 ê 通書。

《我在西伯利亞的監獄》讀煞，四月芒種雨，五月無燒土，六月火燒埔 ê 黃酸雨成做內山出水(Sturzfluten/Flash Flood) hōo 芒雨望豐年 ê 向望成做失望，跤踏佮臺灣 bueh 佮臺灣 bueh 平大細 ê BW(Baden-Württtemberg)，一个圓箍仔兩種心情，耳那聽 Ingo(Tagesthemen) ê 專題報導，海馬鉼針 mā 綴遮 ê 報導開始踅圓箍，Schorndorf ê Gottlieb Wilhelm Daimler ê 古宅敢 mā 受災，若受災需要偌久 ê 時間 tsiah 有法度恢復自本 ê 面肉，耳那聽 Ingo 佮記者 ê 連線，本底恬靜 ê 海馬 mā 綴電視聲、窗仔外 ê 鳥仔歌聲、徛踮肩仔頭 ê 阿 bueh 佮阿 buaih tī 我 ê 耳仔邊比賽啥人較𠢕呲(tshū)。

「夏至到秋分，我搭胸坎保證你包穩 buē 讀伊一字」阿 buaih 翹跤撚喙鬚，那講那笑。

「你永遠 m̄ 知影，你 tī 當時 ē 閒甲掠蝨母來相咬 mā 無法度佮閒閒美代子好好做陣冇談」阿 bueh tshan-tshiūnn 永遠擘腹囡仔食無飽穿無燒 ê 阿母按呢溫暖。

翁某做陣食下昏飯，翁步頻問我「敢有人留話 hōo 你？」

「我 ê 世界賰一隻蠓 ē 留話，不過彼隻蠓無興留話 hōo 我」 我應。

「我逐日攏 mā teh 留話，像 Lila 猶閣有無」伊笑應。

「逐日留這廢話 mā 無較縒」我講。

「柑仔色比茄子色較好挵 hōo 破 mā 較 buē 食別人 ê 白仁。」

昨昏，翁上網路納病院寄來 ê 飯錢，一日10歐圓，蹛五工50歐圓，差不多 gún 兜兩个人倚兩禮拜 ê 菜錢。

伊納錢 ê 時，我 mā 當 teh 款伊 ê 下昏飯。

我那款那講，後回 bué 菜想 bueh 哭呻菜價無天良 kā 這張數單餾一下，你就 buē 閣嫌東嫌西。

伊恬卒卒無出半聲，我 mā 已經 kā 早起頓款好捧出來食飯廳喝伊來食飯。

伊那食，我這支喙原仔無想 bueh 停睏繼續講錢 ê 代誌 hōo 伊配。

那食早起頓那配《新聞挖挖哇》認捌臺灣近來發生啥物代誌，我 ê 14 是網路頂 ê 譀甲 buē 穿得網罩佮蠓仔跤踢著 ê 故事。

這久 ê 我無社群媒體，準做早前有 teh 使用社群媒體，我 mā 無綿精參加社團，唯二捌參加 ê 社團，一个是驚得失人跟綴邀請者 ê 跤步楦闊伊參加 ê 社團，一个是 uī-tio̍h 台文練習家己參加 ê 台文社團，所致看新聞挖挖哇是我認捌臺灣大小事上緊 ê 節目，起因這久 ê 我 mā 罕得看電子新聞，m̄ 是電子新聞無好，是我個人較慣勢讀紙本佮冊型電腦 ê 版本。

我 ê Blog tī 猶未巡菜股翻田塗進前，平均三篇就有兩篇 teh 哭呻翁承𪜶爸母歹癖 hōo 我直接要求離緣。

那食早起頓那配【新聞挖挖哇】台灣夫妻婚內困境？14年可悲婚姻「維繫秘訣」引爆共鳴！律師「二婚實況」狂冒冷汗笑翻全場！太太的生存之道，哪裡怪怪的？20240524｜來賓：黃宥嘉、ViVi、游嵥彥、小call、林宏偉，聽黃宥嘉醫師分張藥包問題，講著番仔火油燈效應，講著假做臭耳聾遮 ê 問題攏 hōo 我想著翁𪜶爸母。

「我無食恁爸母一喙瀾，所致𪜶按怎講我䆀攏 buē 影響我 ê 態度，m̄-koh 你綿精成做恁爸母 ê 態度，這就影響咱 ê 龍鳳生活。」

翁講「你真愛孤鳥插人群。」

我笑應「你敢今仔日 tsiah 佮我熟似？」

窮真我自本 m̄ 是這款性地，總是江湖走久本底若滾水罐 ê 性地 mā m̄ 知 tī 底時成做冰櫥，不過我愛這久 ê 孤𣮈人性地，起因伊 hōo 我儉著 tsuē-tsuē 清心。

畢竟我是有情緒有神經 ê 動物，我正經無法度樂觀吸收遐 ê 能量(lîng-liōng)，像二十外冬前高職同學 ê 同事寄帖仔 hōo 我，我想講佮伊雖罔無啥交情 mā 捌做陣出國𨑨迌佮捷捷綴同學 ê 團出去遊山山戲水，就請同學送紅包家己親身去參加伊 ê 辦桌，桌猶未食新娘見我入房挨拶隨講「你呔 ē 來」hōo 我感覺卸衰 mā 感覺新娘房徛一葩火 kā 我烘甲規身軀齊起火，想 bueh 佮伊鹹魚搵豆抽，鹹拄鹹講話，總是我是九个人十塊粿有冗(量) ê 性地，kan-ta 微微仔笑應「曷知，著收著你 ê 帖仔，無頭殼戴烘爐來 kā 你鬧一个仔熱鬧呔 ē 得」。

我知影新娘看 buē 曉妝娗 ê 我 buē 上目，我 mā 無興跟綴伊 ê 跤步 tuì 鹽館入去，tuì 染房出來，鹹閣澀講話，總是無沖一个仔涼正經 buē-tàng。

巡菜股，翻田塗翻著這翻舊文想著近來又閣搪著相仝 ê 問題，我 ê 體重一直 teh 𬦰崎，不過我 ê 衫仔褲並無啥物變化，特別是彼領十外冬前 M 號 ê 牛仔褲，彼陣 ê 寸尺猶無 vanity sizing。

自滿 2 冬，特別是寒人行跤到我就真罕得徛磅仔，近來天氣沓沓仔 hōo 我願意 tī 燒氣無開規身軀脫甲賰一領內褲徛磅仔，我 tsiah 知影數字 tī 這段期間𬦰 bueh 2 座山嶺。

我知影這佮我按 1400kcal 調整甲 1600kcal 有關係，總是這个調整 mā 調整冬外，bueh 起磅早就起磅矣，板膋 bueh 增加一公斤愛食甲 7700kcal，這个數字 tī 2022 行踏 Balkans 早就實踐。

寫著行踏 Balkans 愛展一下仔這張記錄，tī Balkans kha-lòo-lì 標示無德國(歐盟)遐爾仔頂真，德國是雞襟胸、ひき肉遮 ê 新沢肉攏標示 kho-lòo-lì，Balkans tsuē-tsuē 角勢是 kho-lòo-lì 家己請教 Google ê 家己摸骨 m̄ 知著 m̄ 著，猶是 hōo 我行到這个虛華 ê 數字，不過虛華 tshan-tshiūnn 膨風水雞刣無肉 ê 冇四跤仔，無偌久伊又閣踅轉來原搭。

疫情期間 bué 著一月日食到飽 ê 連鎖飯店優惠票就隨出門四界蹛。

這本食譜冊就是疫情期間 tī 徛位踮萊茵河彼搭，一間四星飯店附近田庄紮轉來 ê 食譜冊之一。

講之一是因為我 m̄-nā 紮一本，是紮足 tsuē 本，只不過押尾留踮廚房冊櫥 kan-ta 賰伊一本，賰 ê 又閣 kā 伊送轉去 gún 遮 ê 公共冊櫥 hōo 伊有較 tsuē 機會 tsham 人結緣。

我 bué ê 冊習慣，除了無愛 bué 有一仙人成做冊皮掠外，食譜冊 mā 是其中一項，這个慣勢凡勢是按 gún 老爸遐來。

囡仔時老爸𤆬我去冊局 bué 冊，伊攏會講「bué 你讀了 ē 閣繼續反 ê 冊」。

我足愛食雞心豆做 ê 料理像雞心豆沙(Hummus)、雞心豆餅(Falafel)遮 ê 物食，總是若是 bueh 講我佮雞心豆料理 ê 第一回接觸，應當是按人 tī 印度 tsiah 開始。

不而過，彼陣 ê 我 tuì 世界 ê 認捌是十八港跤行透透，月光下看人影 ê 水仙(Narcissus)，看印度食物 kan-ta 咖哩 niā-tiānn ê 無，後尾綴著《你無聽---過 ê 格林童話》〈 田蛤 á 王子〉ê 跤步是人 tī 非洲佮中東行跤花。

總是彼陣頭殼 kan-ta「華腦」、「英目」，準做雞心豆 hōo 我煞心 hōo 我挵著頂腹蓋，見佮伊見面我猶是「借問咱啥人？」

我愛食雞心豆餅 tī 臺灣 m̄ 捌見過伊，行踏德國 mā 慣勢攢超市版本來食，sóo-tí tī 我猶未行踏東非 Äthiopien/Ethiopia/衣索比亞(I-sik-pí-á)餐廳進前，伊 ê 名佮講法 m̄ 捌鏨 tī 我 ê 心肝穎。

「請問你敢 bueh 開始點菜？」店東問。

舊年9月拄做阿爸 ê 阿羅歇中畫轉來看嬰閣按工課 ê 合作社捾兩盒整理好 ê 果子 tsham gún 分張。

說多謝 mā 隨想著蹛雲林 ê 大姨，往時經過石榴(Tsio̍h-liû) 攏 ē 講一段 tsham 石榴 kan-na 有關係 m̄-koh 名聽起來無相𫝛。

Uī-hô 大姨愛講這，起因 tsham 阿母相𫝛出世 tī 日本年間 tī1949年後 m̄ 捌閣有機會學習新符號 ê 𪜶直接 hőng 分類 tī「m̄ 捌字兼無衛生」 ê 伊迵過後生 tuì 伊講這 mā 是「石榴/Sia̍h-liû」，「國語」ê 石榴火車頭佮食 ê 石榴 ê「石榴」就此牢牢蹛 tī 伊 ê 世界。

我這个真𠢕夫字做天，馬字作蔫(ian) ê 人 mā 因為大姨，認捌著食 ê 石榴佮火車站 ê 石榴 tī 台語是2種無仝 ê 音，特別是「石」。

我無愛食石榴，想--著大姨 ê 故事開始擘腹愛按怎處理伊，起因物件好好隨 kā 擲糞埽桶，我做 buē 出來。

愛料理近來推出若 Blog ê 服務，使用者家己 ē-tàng 寫 Tag， 這个服務足讚--ê。

伊敨放我這款，看著家己 ê 物件無合軀隨想 bueh 動手改 ê 人 ê 怪癖。

不過，猶是有問題。

M̄ 知是分類 ê 人 tī 主要語言掠外 kan-ta 捌「英語」、「日語」sóo-pái 語言分類是豬母牽到牛墟 ê 竹篙鬥菜刀 hōo 我看甲足礙虐動手 kā 加寫這 2 个 Tag。

讀網路推薦 ê 無料新聞，我 ê 態度大多數是秒看標題隨換逝。

起因，我無想 bueh 成做大數據其中一粒星。

雖罔，無揤落去原仔 ē 成做大數據一粒星，總是無揤心猶是較在。

這斗𫝻著這 pha 新聞，內容 tuì 我無吸引力，總是真久無見著俗諺語出現 tī 新聞標題 ê 我隨起心動念，做別人 ê 工課練家己 ê 工夫。

die Katze aus dem Sack lassen - Kā 貓按麻布袋仔挈出來

坐輕鐵搪著幾个應當是國中年歲 ê 查埔囡仔，我 m̄ 是愛雜插兼鴨母喙愛叨(lo) ê 性地，總是這幾个囡仔 teh 破 ê 豆 hōo 我實在是無法得無 kā 耳仔覆過，起因實在是太有意思。

「Mein Wunsch in diesem Jahr ist eine Hautfarbe wie Bronze」(我今年 ê 向望是 kā 家己曝較成鐵牛運功散 ê 色緻)。

人自囡仔時攏是 teh 比賽這个歇熱愛按怎 hōo 家己成做白銀魚按呢白鑠鑠(siak)無曝烏，𪜶是拚勢 bueh 曝甲若一尾烏魚遐爾仔烏金誠實是無法得順手提著 ê 物件上珍貴。

總是，人𪜶愛曝烏 mā buē 嫌家己䆀 tsi-tsi 愛舞甲 buē-su 是按外國轉來 ê 人按呢乞食攑蠓捽仔，假仙假怪。

不過，彼驅烏是一種 m̄ 免喙講 ê 認證，gún 兜有夠額。

自2019年起頭寫第一篇文章到今，一目𥍉 mā bueh 4冬。

這 4 冬有足 tsuē ê 變化，像擘腹別人讀無我寫 ê 物件隨閣掠外寫一逝華文，落尾手發見彼正經是無枷夯交椅隨放伊自由。

是講，彼陣 ē 按呢寫是攑香綴拜，起因讀著 ê 臺文作品就是按呢寫，一逝漢羅、一逝羅馬字閣一逝華文。

選字，彼陣 m̄ 知啥物字愛寫漢字啥物字愛寫羅馬字就綴台文出版品跤步 kā m̄(毋)、lán(咱)、tsit(這)、tse(這)...遮 ê 捷讀著 ê 羅字綴 le̍h 寫，總是沓沓仔發見有 ê 台文出版品有意見領袖 ê 態度佮堅持𪜶 ê 腔口 tsiah 正範 tsiah 準算，我就無閣綴 leh 做𪜶 ê 副本，行家己 ê 路像這个「親像」我是講「tshan-tshiūnn」m̄ 是「tshin-tshiūnn」我就以羅馬字來表示我 ê 腔口，其他 ê 就齊漢字，起因我正經無認為寫羅馬字有啥物特別。我講羅馬字無啥特別主要是我 ê 四箍圍仔攏是寫羅馬字 ê 族群，我逐日 mā teh 寫羅字，sòo-pái 羅馬字 tuì 我來講正經無特別，不過羅馬字真重要，伊是學習台語上讚 ê 工具，buē 曉讀寫日文五十音 ê 我，學習日語文 mā 是齊靠羅馬字來記和字佮漢字 ê 差別。

外來辭 ê 部份，一開始我 mā 是照呼音抑是愛台語氣口 ê 方式 teh 講，像 Waffel kā 伊號做格仔粿、格仔餅尾手我猶是佮意綴原音 Waffel 行，雖罔捷捷 kā 伊按英語講做德語，特別 tī Fel ê 部份，總是大多數 ê 人一聽攏知影我 bueh 愛啥物，至於(tsì-î)「鬆餅」我 kan-ta ē tuì kan-ta 捌這个語言 ê 人按呢講，聽起來真臭屁，是 m̄ 是?

#記錄寫 tī IG ê 文字

Tsa̋ng(12.07) uī-tio̍h 一篇 m̄ 知結果 ē 如何 ê 稿規日貼貼到暝半。透早一精神隨感覺食力。

鼻頭薟薟腦 tun-tun 嚨 ta-ta。

這凡勢是文昌帝君 teh kā 我點拄「你無 hit-loo 2步7仔」。

Mā 著我煮食就 leh tsiah 頇顢閣敢枵狗痟想豬肝骨，枵貓痟想海底魚。