亂皂𥴊仔店 ⓂⒺⒾⓃⓀⒾⓄⓈⓀ

昨暝無想 bueh 食肉，今暗開冰箱 tsiah 發現...

Scheiße...ひき肉猶規盒好好䖙 tī 冷凍隨清一下仔嚨喉越頭 tuì 翁講貓仔語。

「親愛 ê 彼號，Also....」當我猶 teh 撏字，翁先紲喙講。

「今仔日無阿媽肉餅通食 mā 愛佮我 ê 敵人成做龍鳳」伊講。

伊遮爾仔拆白，我 mā kā 𫞼頭前幔棕蓑 ê 稻草人徙開，喙抹蜜甜甜仔講「人 m̄ 是刁意故按呢生啦...」

以地理來講德國佮臺灣比較起來，德國倚挪威較近，m̄-koh 按挪威來 ê 三文魚踮德國無比臺灣較俗價。

Sóo-tí 見見著三文魚落價，規仙人就若 hōo 魔神仔牽去，準做冰凍滇甲無所在通 hōo 伊徛位，我猶是款一尾抑是兩尾等來楔。

臺灣賣 ê 三文魚是切橛，賰 ê 肉幼仔骨 tsiah 款款做一盒俗賣，這 mā 是我較捷 bué ê 三文魚。

德國 ê 三文魚是𠞭做一大片，紲落來 ê 價數就按魚肚倚懸位，魚尾較俗價、敆皮較俗價無敆皮較懸價，我上捷 bué ê 這類𠞭做一大片 ê 敆皮兼愛家己切橛 ê 三文魚是上俗價。

是按怎 ē 按呢生，無按怎，人工 m̄ 是無料，sóo-tí 較早食魚 m̄ 知𠞭魚 ê 我，已經訓練甲有法度一刀切落去 mā 差不多 bueh 125g，像懸價三文魚包裝按呢。

【食緊挵破碗】

翁無愛食豆，我愛食豆，搪著這款兩人一雙箸，bueh 食煞無仝胃 ê 問題，bueh 按怎 tsiah 好？

生頭清面，霆某螺？

這个方式，tuì 伊來講是石頭掔水，無較縒，起因𪜶老母就是按呢 kā 𪜶晟大漢，我 mā 無彼个才調搬哈買兩齒搪著藏鏡人 ê 戲。

萬事必有因，有因必有解決 ê 方法。

自囡仔時，我就是麻雀桌頂專門 tī 納學費 ê 彼个。

因為朋友無棄嫌我這个肉跤筊伴，這久 ê 我 tsiah 有機會理解台文里長伯鄭順聰先生分張 ê 台語學仔麻將台語 ê 牌跤盤喙花， 另外 mā 順紲踅翻頭揣序大過年時耍四色牌抑是天九牌 ê 記持，紲落來 buē-su 法官 teh 定案 ê 確定，奕牌仔正經是觀察一个人真性情 ê 好時機。 

像我有一个朋友，伊 m̄-nā 喙水好、媠又閣𠢕佮人盤撋，總是一上桌奕麻雀，本底 ê 志玲姊姊隨成做陳守娘，應當講比陳守娘閣較恐怖 hōo 捷 teh 愖是伊是 24个Bily(The minds of Billy Milligan)抑是我是第5位 Sally( The Fifth Sally) ê 𠢕換性地，起因我真討厭這款性地 ê 人，m̄-koh 一耍麻雀我 ē 按陳守娘成做志玲姊姊，遐爾仔好 EQ。 

滾耍笑 ê 啦，我無陳守娘 m̄-koh 我正經無愛佮這款人做朋友，所以 tī 𪜶 bueh 作怪進前我人已經 m̄ 知走到佗去，這是真 ê m̄ 是蟾蜍展氣功，膨風。

我 m̄ 知影佮我拍麻雀 ê 人按怎想這件代誌，總是我是 kā 伊當做食茶破豆 ê 放輕鬆，所以我 buē 奕大 mā buē 一奕奕甲無天無日，我想這佮囡仔時看芋仔老爸退休去耍麻雀有相干。

11月29是「Advent」。

按美國來 ê 厝邊、四箍圍仔 ê 序大、厝稅人家己規家伙仔擠做一間 ê 建築公司大頭家佮樓頂兩戶按羅馬尼亞來德國做穡 ê 厝邊攏已經點燈火。

Gún 兜今年猶是無點半葩燈火，一个起因是我無信天主教抑是基督教，另外一个因端是 gún 翁 kā 教會辭頭路有一段真久長 ê 時間(無納宗教稅)。

德國應當是少少猶原 teh 抾宗教稅 ê 國家，這个問題蓋複雜，省事事省免喋一大拖，起因我無 tī 這个系統內底，gún 翁 mā 是。

總是，逐年搪著「Advent」看遮 ê 厝邊點燈火，拗鬱碰釘 buē 順序 mā tshan-tshiūnn 柴樠點火較光油。

讀著這篇文章我 tsiah 知影 tī 德國一粒紅草花(紫甘藍)至少有三種講法。

「Rothkohl」是我上熟似 ê 名。

「Rotkraut」我讀著字猶原知影伊是啥物。

「Blaukraut」我佮伊是生份人....

那讀文章那想紺草花是按怎會號做「Blaukraut」。

Tī 西方佮東方之間，行來行去。

我食，我愖。

我食，我做數簿。

Gún tī 四常走揣家己 ê 四序。

Gún 相信，特別滿四界 tsīng-hāu gún-ê 行踏 。

數念時，滷一碗麵 hōo 麵𤆬我走揣心肝穎彼條偝巾。

2022.12.26

窮實我已經 buē 記得這碗麵 ê 滋味，所以我感謝網路 m̄ 捌相見生份人 ê 分張，因為恁我 tsiah 有機會熥這碗麵佮愖伊到底號做啥物名。

請教教典，煨 ue - 動詞，燉煮、熬煮。以小火慢慢熬煮食物，像煨豬跤。

請教重編國語辭典，煨 ㄨㄟ- 1. 名詞，熱灰、灰燼 2. 動詞，a. 把生食埋在火灰中燒熟 b. 用微火慢慢燒煮，使食物熟而軟。

踅超市順紲𢯾一欉從來 m̄ 捌活過熱人 ê 洋九層塔。

那行那愖下昏飯來款啥，那行那愖，愖到厝猶是捎無摠，放棄，先來換衫褲放輕鬆。

翕牢 ê 牛仔褲換 Made in Italy 總是遮 ê 人攏知影彼是中國工廠出產 ê 俗物泰國褲，捎無摠 ê 下昏飯 mā 行跤到。

Hallo, 你哪遐久攏無來揣我，你敢無想我？

聽著這句隨笑出來，原來我 mā 是陳世美一个。