(2023.03.31 早起頓 Bé-khòng 雞豆 I-tá-lih 麵 + 紅菜頭瓜仔哖サラダ + 石榴杏桃優格/837kcal）
Tī Extra 3 讀著露西亞勝利遊行 ê meme 笑甲軟骨。
原文是按呢寫；
Das mit den Wolken können wir doch auch dem Westen in die Schuhe Schieben, oder?
這个雺霧我 ē-tàng 算伊是按西方來 ê 抑是？
這句 in die Schuhe Schieben hōo 我想著；
1. 佬仔，諞仙
2. Buē 泅嫌溪狹➀
(2023.03.02 早起頓 玫瑰草花德國麵猴ひき肉炒 + 藍莓檨仔優格/833kcal)
我凡勢有 Narziss ê 神魂，起因我真愛看家己攝 ê 相片。
雖罔，我 ê 攝相技術 mā 無 buē 𠢕，總是見餾新 ê 攝影有比早前 ê 作品閣較合家己 ê 喙斗，我就 ē 掠伊直透金金相。
he̋h--lah，攝相 mā 是一種寂滅(Nirvāna)。
我愛我 ê Nirvāna。
玫瑰草花麵猴ひき肉炒
...... 材料 ......
(2023.04.18 早起頓 蒜頭麵 + 卵包 + 青花仔菜煠 + Sprotten + 弓蕉 Quark/881kcal)
翁講足齷齪 m̄-koh 胃口原仔好甲 ē hőng 僥疑，伊敢誠實 teh 齷齪。
「你看食冰淇淋一屑仔攏 buē 大箍閣 ē-tàng 糋膩瓤油」前幾日 buē-su 揣著啥物實證通 kā 我展 ê 伊，今仔日見磅仔 m̄-nā 仔無減磅卻起磅隨 tuì 我講「m̄ 是磅仔有問題就是你凡勢 kā 菜蔬肉料理透傷過 tsuē 油」。
「磅仔有歹無歹，我 m̄ 知，起因𫝛一个磅仔拄著你起磅，搪著我隨摻酸醋 m̄ 捌五時做藥，六時做石閣五分改一錢，暗頭改半暝」我講。
聽著某無一句詈隨 kā 伊 ê 暗時驚鬼，透早驚露水按呢正剾金爍爍，倒剾一缺一缺隨 kā buē 曉泅水嫌溪狹 ê 話收轉來講「Bueh 好三年，欲敗一時」。
我無紲喙，起因我清楚知影萬項攏是死窟仔水，捷戽抑 ē 焦。
只是，好話一句三分軟，歹話一句六月霜，翁某感情閣較按怎好 mā buē-tàng 講話無關後尾門。
不過，論真講我誠實 ê 想法是想 bueh 成做《驚驚袂著等》ê〈 買你保險的人攏真衰〉ê 保險員。
(03.10.2023 早起頓 玫瑰草花ひき肉麵焗 + 杏桃優格/1114kcal)
翁問「是啥物因端 hōo 你無 bueh tuì 人 講你著賞？」
「無啥因端」我講。
「你誠實是紅龜生蟲 --- 龜怪」翁講。
「Heh-ah，我足狡怪，m̄-koh 我足享受這个屬於我家己 ê 快樂」我講。
翁問我伊敢 ē-sái kā 我鬥放送我參加文學賞著賞 ê 代誌，我應 buē-tàng 起因我誠實足愛這个獨有 ê 快樂 --- m̄ 免發表得獎感想抑是逼家己聽別人褒唆 ê 礙虐。
不過，我原仔足想 bueh 知影𪜶爸母 ê 態度「m̄-koh 我真歡迎你 kā 這件代誌放送 hōo 恁爸母聽」我講。
「Buaih，按呢足展風神」翁隨應。
(減肥早起頓。牛肉麵，牛肉麵)
疫情期間無通 hōo 我繼續像往過按呢起性搦地，愛按怎舞就按怎舞。
因為無法度閣 tshan-tshiūnn 往呢按呢起性搦地大聲喝講見 bueh 出門行踏較遠 ê 角勢見去台灣，真無意無思。
因為疫情 hōo 我無法度遮爾仔歹喙斗，我就開始數想晟養我大漢 ê 番薯島，而且想甲 ē 流瀾。
是講，我 m̄ 是無愛咱番薯島，只是肺炎猶未來行踏進前逐年攏愛轉去一斗 ê 狀況 hōo 我感覺真無局，起因我 tī 臺灣 ê 親人攏已經轉去塗州，我自然就 buē 特別想 bueh 轉去行行看看 leh，畢竟德國 tuì 我來講較像一个家一个厝，準做踮遮 mā kan-ta gún 翁佮我2个 niā-niā。
雖罔 tī 臺灣已經無半个親人 mā tuì 臺灣 ê 依賴無遐爾仔深，總是人就是賤，無法度清彩提著 ê 物件 buē 寶惜，無法度清彩捎就有 ê 物隨 tuì 伊數念甲目屎流目屎滴，是講 mā 無遮爾仔嚴重，總是彼感覺就敢若禁止你戀愛你愈 bueh 佮別人烏白亂愛仝款。
萬事無徛倚，正經是上僫得 ê 藝術品。
較早 tī 臺灣愛食「大麵鹼」總是轉去 mā 見 buē 記得愛食伊，這久無通轉去愈想 bueh 食一碗，不過跤手慢鈍頇顜做兼遮 ê 材料 mā 僫款，數念就隨綴遮 ê 僫 bué 成做鹿林長尾星一去無閣翻頭相揣，總是牛肉麵 m̄ 管我按怎想空想縫想 bueh kā 伊放捒伊著是牢 tī 海馬鉼針 m̄ 徙位 hōo 我氣甲規氣做一碗來趕伊出門兼敨火氣。
(2022.12.05 早起頓 弓蕉藍莓仔俗麭 + 菜蔬ひき肉 I-tá-lih 麵 + 羅馬萵仔菜王梨紅菜頭生菜盤/848kcal)
Der Weg stellt jedem nur eine Frage:
這條道路 kan-na ē 問這个問題:
" Wer bist du? "
你是 tsiâ？
虎年，好字運
虎年第一工 bué 著華語版無買著，德文版 bué buē 落手 ê 《Ich bin dann Mal weg》來去蹓蹓--leh。
(18.01.2023 早起頓 三文魚菜蔬烘 + Bé-khòng 菜擴湯 + 雞肉卵サラダ + チーズ I-tá-lih 麵/1162kcal)
寢幾日 tī YouTube 看著 Odysee，我又閣成做一隻貓好玄伊是 siáng 就隨上 Google 請大神賜我智慧。
檢采是綴時代 buē 著，紹介讀透透猶原捎無一个寮仔門通開門 m̄ 知伊佮 YouTube ê 精差 tī tueh。
起因 m̄ 管我按怎正看倒看 Odysee ê 影片，伊 tuì 我來講就是 YouTube ê 副本無任何 ê 無相𫝛，若硬 bueh tī 雞卵內底揣骨頭我 kan-ta ē 講影片 ê 畫質較無 YouTube 遐爾仔透遐爾仔清，這个精差按手機仔徙到電腦隨看出懸低，當然這 mā 牽涉著電腦 ê 畫素，我 ê 電腦是二手 FUJITSU 手機仔是新 ê Nokia 所以照電子產品 ê 年歲來做比論，FUJITSU 已經是阿公阿媽 ê 年歲，Nokia 猶 tī 烏貓穿裙無穿褲，烏狗穿褲激拖塗 ê 衝衝衝，面肉較䆀也是有法度妝娗甲媠 tang-tang。
因為捎無一个寮仔門隨請教翁你敢捌 Odysee，無疑悟綿精 tī 網路世界 ê 翁竟然 m̄ 捌 Odysee，這件代誌 hōo 我無法度無交懍恂，起因我掠做我踅著暗毿角勢。
我知影家己想傷 tsuē，總是行踏網路世界猶是張持無蝕本較 buē hōo 家己成做乞食婆綴人走反，加無閒寡五四三。
吐一氣大氣冷靜稽考家己是按佗落踅到這个網站，啊，我想著矣，我是按 Ostdeutsch Kochen 遐連過來蹓蹓，本底揣無摠頭通㨨 ê 膨紗衫隨捎著捎，膽膽 ê 情緒 mā 隨走甲無看半人。
「乞食趕廟公，天地顛倒反，我呔比 gún 翁較𠢕揣東揣西」我雙目繼續跟綴文字紹介，喙 mā 若日本剾刀，按呢展風神 kā 翁倒剾 buē 離。
(2023.02.27 羅馬雞鵤刺 I-tá-lih 麵 + 小白銀 + 藍莓優格/725kcal)
近來有朋友 iōng 語源 tuì 我講，我 buē-tàng 使用這段話來表示，我面對「五四三」ê 態度。
我 m̄ 是語言專家 tuì 語法無了解，我 kan-na 有法度恬恬 kā 教典 ê 網鍊分享 hōo 伊罔做參考。
我 m̄ 知伊敢有參考，總是 kā 伊寫甲 buē-su 我專長 ê 臭跤帛讀煞，我想著 gún 媽媽蹛院佮入塔彼日 ê 故事。
有醫護人員若藥店甘草，逐項攏摻著 ê 雜插，醫生話猶未講 hōo 齊伊若鼎頂 ê 狗蟻 - 趕出喙「恁媽媽是神仙行跤到 mā 無應效 ê 無效，你 m̄ 通閣按呢浪費醫療資源」。
聽伊按呢講，我若啉滾水囥茶米茶仝款 ê 火大 mā 想 bueh 提醒成做六月蚶，開喙臭，總是這款小管仔花枝無血無目屎搪 tsuē 我 mā 清楚知影 gún 老母佮我無一个人浪費醫療資源，gún 完全照醫生 ê 專業治療病症，隨 kā 這六月無洗身軀臭死人 ê 護理師擲一爿，恬靜等待醫生𫝺消毒水。
醫生 mā 知影家己好字運搪著 buē 清彩 hőng 挓火就著 ê 家屬解釋講「咱閣試看別項治療....」論真講我家己 mā 清楚知影阿母這斗 ê 蹛院已經無閣 hōo 我機會 tsham 伊手牽手做伙轉去厝歇睏。
我無接話恬靜聽醫生解說病情 mā 照醫生 ê 請教簽放棄急救單，我那簽單提單 hōo 我 ê 實施醫生細聲講「護理師 m̄ 是刁意故按呢講...」，我 m̄ 知影護理師是刁意故抑是無張持，總是我 tī 心肝內祝福伊無搪著佮我相仝 ê 情境，像我 tuì 翁講恁爸母無法度感受我 ê 胃慒慒就講我是因為無想 bueh 來遮行踏所以假破病，這款無仝理心 ê 話正經 m̄ 免 tuì 我講，不過你猶是綿爛 bueh 講 hōo 我聽，我 kan-ta ē-tàng 按呢回答，向望恁爸母有一日搪著身體病疼無一个人 ē 要求𪜶清楚交代是按怎身體 ē buē 爽快。
(減肥食食。三文魚青醬 I-tá-lih 麵，鮭魚青醬義大利麵)
本成掠做彼兩日 ê 無四序一無去，按呢著表示我佮第3斗 ê 疫苗反應就此龜做龜討食，鱟做鱟 peh 壁。
不過，世間事永遠攏有驚喜 hōo 咱有法得 kā 咱家己認為 ê 代誌節甲準準準。
兩工睏甲 m̄ 知暝日，一日 buē-su hōo 睏神煮熟 m̄ 願瞌 ê 目蚶過後 ê 二日後。
四常是紅--ê 準備來洗 tsiah 有 ê 發炎反應步頻出現，而且閣發膿。
往過紅--ê 來洗進前，下軀骱邊附近攏 ē 出現 buē-su 𤶃仔 ê 粒仔。
有當時摸著 ē 疼，有當時 buē。
紅--ê 開始洗伊著沓沓仔消失紲落來家己 ē 轉做若黑𤶃仔按呢 ē-tàng kā 擠。
(2023.01.21 早起頓 Bé-khòng バター菜蔬 I-tá-lih 麵 + 番麥牛奶湯 + 洋刺波チョコレート優格/860kcal)
2021.6月24開始注第一針到12月26 ê 第三斗針，我 tuì 預防針 ê 反應 tshan-tshiūnn 媒體 ê 分張 ... 較有歲數 ê 人較 buē 各樣。
總是，我原仔想 bueh 記錄這斗第三斗按 BNT 換來 Moderna ê 反應。
記錄家己進前，我 mā 想 bueh 記錄 gún 翁 ê 狀況，gún 翁某攏是先接受 BNT 2斗 tsiah 紲第三斗 ê Morderna。
Gún 翁前二斗 ê BNT 伊 kan-na 感受手股淡薄仔痠敆𤺪 ê 人一屑仔攏 buē 忝 ê 無任何若臺灣媒體分張 ê ē 呼雞 buē 歕火。
我是手股痠、腹肚枵閣 hōo 人小可仔碰一下就隨哀爸叫母 hōo 對方聽佮睏 bueh 2瞑 tsiah 通較有精神繼續過本底 ê 四常。
第三斗 ê Morderna，gún 翁 kan-na 感覺手股微微仔痠賰 ê 攏大丈夫無問題，而且閣發生 hōo 伊暢甲 buē 顧 ê 代誌，四常食較腥臊隔轉日 ē hōo 伊面肉青恂恂 ê 磅仔 hōo 伊暢甲若花枝小管仔按呢暢 buē 離兼展風神「我著 kā 你講過，是咱 ê 磅仔有問題 m̄ 是我食過額，而且這久 ê 我閣瘦一公斤」。
人猶原 teh 佮姜子牙行棋 ê 我想 bueh kā 黜破伊上愛 ê 揣空想縫，總是人𤺪甲火燒到跤兜 mā 無感覺，就應一聲「這 mā 算是各樣」繼續佮姜子牙行棋。
(2023.02.25 早起頓 Bé-khòng 菜蔬炒麵 + 紅菜頭寮仔チーズサラダ + Tsioo-kóo-lè-tòo 優格/988kcal)
「咱敢 ē-tàng 莫閣講著 gún 父母」翁 ê 氣口沓沓仔 teh 著火。
「你掠做我愛講是 m̄？」風火己經著 ê 我 mā 已經放棄冷靜莫跟綴伊柴樠點火較光油。
「敢 m̄ 是按呢生」伊喙根咬絚 buē-su bueh tsham 我相輸贏應。
這是我第一斗看著伊按呢，mā 凡勢是第一斗看著伊按呢生 hōo 本底走去啉 Ka-pi 等 bueh 看好戲 ê 理智隨傱轉來佮我合體成做聖戰士(百獣王ゴライオン)。
「你知影我這个癖性，講出去 ê 話就是潑出去 ê 水，sóo-tí 講話進前我 ē 提醒家己 m̄ 通 hōo 人抑是家己情緒叨撚就烏白 tuì 人潑水，總是按呢 ê 好鬥陣 mā 無表示我 ē-tàng 無條件一直接受別人按我遮潑垃圾水水」想 bueh 繼續講遐 ê 生菇代，因為喙瀾㧎 tī 嚨喉隨成做 m̄ 通繼續纏綴別人成做六月蚶，開喙臭 ê 點拄。
翁看我步頻 m̄ 開喙，伊知影 m̄ 是伊𠢕廕火是某發現一粒田螺煮九碗 ê 白汫無味，無興閣喋兼代誌是愈來愈八仙桌欠一支跤，愈來愈僫擺撥隨緊紲喙講「相信我，我真正無想 bueh kā 咱 ê 感情 tsham 𪜶拍相參，總是我家己 mā 捎無摠是按怎我 ē 遮爾仔承𪜶 ê 歹癖」伊那講目箍那紅，手 mā 那趖過來 bueh 佮我疊(thia̍p)十指。
現此時若大士爺厚火氣鬼王 ê 我呔有興趣佮伊耍指頭仔相褒歌，隨 kā 手插胸坎「你知影我足寶惜咱兩人 ê 姻緣，總是我 m̄ 是恁兜教出來 ê 囡仔有法度 kā 情緒叨撚當做鹹酸甜來食 mā 無法度成做你老爸 ê 性地 kā 三斑當做三文魚 teh 惜命命，另外你家己 mā 清楚恁 ê 家和萬事興窮實是塑膠花，假甲姼目 ê 人一看 mā 隨知彼是漚梨仔想 bueh 假蘋果 ê 假包，我是有血有目屎 ê 人 m̄ 是塑膠料，另外我非常確定我 ê 心智無走縒 buē kā 別人 ê 拍拚捎來剾洗做 m̄ 知 teh 展啥物風神」我講。
(減肥。雞肉 Tetrazzini，雞肉 Tetrazzini）
我相信鉛粉決定掖有夠深 m̄-tsiah 有法得 hōo 我 tī 網海 tsham 伊相拄搪。
我 mā 相信四常是食食 ê 挵險是四常記持 ê 引𤆬者。
因為伊，gún 翁某做伙牽手踅轉去家己 ê 美國時間。
翁想著彼久伊佮女朋友做伙 tī Las Vegas 旅行記持，我想著一个人 tī Boston 敨放齷齪 ê 無半隻胡蠅跋落鼎，炒死(吵)死 ê 恬靜。
無𫝛時，無相𫝛所在，𫝛款記持。
這份料理 ê 故事
(2023.01.26 早起頓 鱷梨仔林檎サラダ + 金瓜 I-tá-lih 麵焗 + 三文魚煎 + 藍莓麥角優格/1258kcal)
節氣行到秋分時，翁攏 ē 講這段「著時矣，咱愛金瓜。」
這回翁愛 hőng 剖腹，主要 ê 因端是伊 kā 甜路、糋路當做三頓 teh 食又閣愛成做八卦紅(Kaktus/Cactus) m̄ 啉水，準做伊 ê 醫生朋友 mā 講伊水啉無夠額，伊 mā 無 teh 驚 ê「啉水愛走便所，我 buaih 做水桶。」
這是伊猶未 hőng 剖腹進前講 ê 話，這久 uī-tio̍h 無愛啉水兼愛甲甜路、糋路遮 ê Omega-6 超磅 ê 食物，伊無滓著糖尿、高血壓遮 ê 因為食食喙白引起 ê 病症 kan-ta 愛 hőng 𠞭膽結石，正港是德國豬 kā 伊綴牢牢 ê 好字運。
伊 ê 腹肚窮實 mā 是這久 tsiah 出現，總是伊佮𪜶爸母𫝛款攏是 Prof. Dr. Gesundheit 真愛家己做醫生兼世間無人比我閣較𠢕扞健康知影按怎食，就按呢一拖拖到這斗 ê 人險險 kiōng-bueh 綴 Thanatos 行伊 tsiah 甘願放棄成做王祿仔仙佮好好仔寶惜伊自本就別人較幸運若戰車 ê 抵抗力。
我 m̄ 知影致著高血壓、糖尿問題 ê 人敢猶按呢過日子猶是 kā 甜粅粅遮 ê 物當做三頓，總是認捌 ê 德國人真 tsuē 人是按呢過日子，起因𪜶認為遮 ê 病症無遐爾仔嚴重，免要意，若是真正無爽快食藥仔著好。
是講，我 mā 有朋友是按呢過日子，現此時 ê 伊敢猶閣活跳跳，我毋知，總是我清楚知影見佮伊做伙攏 ē 聽著「遮疼遐疼」特別是頭疼甲若 hōo トラック 挵著 ê 一支喙 m̄ 捌噤過 ê 雞排、手摵茶按呢那配藥仔那食。
Gún 翁 mā 有相仝 ê 想法，若是無拄好致著糖尿病 huînn-ti̍t 有藥仔通控制免驚惶，我 mā 按麵線婆按呢詬唸 buē 離成做 Hello Kitty 隨在伊，起因 tuì 一个 A-ta-mah-khòng-ku-lī ê 人講較 tsuē mā 是無較縒 ê kan-ta ē hōo 家己斷腦筋 ê buē 和。
(2023.03.17 早起頓 Kam-má-tooh 卵湯麵 + バター敏豆炒/687kcal)
毋知是 m̄ 是受著我 ê 影響，翁 mā 起心動念想 bueh 寫 Blog，而且是 tī 遮 PIxnet 寫文章。
我問伊「你想 bueh 寫啥物佮佗一个語言？」
「德文佮華...」話猶未講 tsiâu-tsn̂g 隨換喙講「寫德文佮臺語文」。
我知影伊是順我 ê 氣持ち講話，總是我 m̄ 是天霸王佮意捎大石頭硩毛蟹 ê 性地，我隨笑應「佮我生活 m̄ 免成做蟮蟲仔斷尾求生存」。
「我真正想 bueh 寫這兩款語文」伊乞食揹葫蘆繼續假仙。
面對伊這款愛扮仙 ê 性地，我 buē 綴伊成做有應公 ê 童乩講鬼話 tuì 伊講「你 bueh 寫外星語我 mā 我是大腹肚攏褲，無差。」
「我正經 bueh 寫這兩款語文」伊繼續 iōng 麵線吊脰，iōng 豆腐磕頭，假仙。
(2023.03.10 早起頓 ひき肉紅菜頭炒麵 + 羅美生菜卵包 + 林檎冷盤/944kcal)
四常睏無 8 點鐘 buē 起床 ê 我，步頻 tī 亂鐘仔猶未挵鼓就擘金金佮天篷相對看。
倒看、正看、直直看閣大聲喝「周公矣、姜子牙，莫閣奕，好轉來食飯」。
M̄-koh 𪜶兩个這回敢若食著熊膽，無人 bueh kā 我應一聲。
我氣甲趒跤頓蹄，那頓那講，煞煞去講 buē 伸捙，規氣逐家攏來做仙。
燃一鼎燒水，看窗仔外 ê Romeo 佮 Julia tī 月斜西主導 ê 貓霧光談戀愛。
耳那聽 ラジオ(Rajio) Deutsche Bundeswehr fliegt nach Afghanistan（德國軍機飛往阿富汗)...
喘一氣大氣。
(2022.02.06 減肥早起頓。白跤蝦 i-tá-lih 冷麵，白蝦義大利冷麵)
近來魚臊捷捷 teh 拍折，這个現象 hōo 我想著舊年三文魚致著肺炎 ê 新聞事件。
無肺部 ê 三文魚自 hőng 講伊致著肺炎，本底是生活佮若 tī 法國(Leben wie Gott in Frankreich)按呢 ê 人生瞬間成做塗炭仔人生，險險斡 buē 轉來法國繼續做皇帝，起因 tsuē-tsuē 德國人佮 gún 翁𫝛款，往過看伊是公主 uī 心狂火著，喙瀾㴙㴙滴，等伊成做塗炭仔準做伊徛踮面頭前猶看 kā 伊當做 Hollow man 看無著伊。
三文魚 mā tshan-tshiūnn 塗炭仔按呢，按幼秀跤，好命底成做穡頭貼貼 ê 塗炭仔，我 mā 因為三文魚無法度繼續成做 Napoleon 四常，開始捷去揣伊話仙破豆兼揣 mā 是過甲若 Nepoleon ê 蝦，看伊底時 bueh 放棄權利成做平民。
蝦本底 m̄ 放下權利，總是人民力量大過政府 tī 三文魚 hőng 講伊致著肺炎 ê 兩禮拜捅仔，伊 mā 放下權利成做平民 hōo 我有法度佮伊徛較倚寡。
白跤蝦 I-tá-lih 冷麵
...... 材料 ......
(2023.01.24 早起頓 蘑菇 Kam-má-tooh 炒麵 + 素肉排 + Kam-má-tooh 卵湯/997kcal)
Tī 德國已經真慣勢這項代誌，寒人行跤到看德國傳統菜蔬無目地揣請西班牙相伨。
這禮拜超市款菜見著菜價隨喝阿娘喂，呔 ē 遮雄價，準備越頭見著架仔佮往過無相仝，Ach so 呔 ē buē 記得這件代誌，前站仔關門無做生理，這久開門當然愛羊毛出 tī 羊仔身 ê 𠞭 gún 遮 ê 羊仔。
停跤認真愖，敢 bueh uī-tio̍h 成做羊仔 hőng 𠞭 ê 気持ち䆀繼續盤山過嶺？
情緒是一時，忝頭是無停時 uī-tio̍h 抾拾這幾仙，紲來成做膨椅馬鈴薯，這款抾拾 m̄ 通貪，是講有車通駛，忝頭就 m̄ 是問題，隨換間。
自改裝 ê Penny 一路換到 Lidl，準做有車通駛我 mā 是眩矣忝矣 tsiah 知影愛愖這件代誌，今年是歹年冬，這久猶有法度見著新沢菜蔬我愛感謝天公伯 ê 幫贊，是講 tī 德國 bueh 僫 bué 著菜蔬 mā 是一件新僫 ê 代誌，畢竟伊猶是喝水 ē 堅凍 ê 德國。
一愖著今年是歹年冬隨 kā 進前巡過 ê 4 間超市講會失禮，我是王魁負桂英 ê 忘恩負義 m̄ 知感恩，特別是肺炎大流行期間我猶閣有機會款著 tsiâu-tsn̂g ê 菜蔬，我無得著一隻德國豬(Schwein gehabt/好字運)，我敢沐著打馬膠(Pech gehabt/歹字運)。
捾一袋 hōo 翁慼甲番薑仔佮大同仔講「咱人閣較按怎月光下看人影 ê 掠做家己大，四季 buaih 綴你大，你 mā 掠伊無法，除非你膨皮甲 m̄ 免倚𪜶食穿。」
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
