亂皂𥴊仔店 ⓂⒺⒾⓃⓀⒾⓄⓈⓀ

(2024.05.30 早起頓 牧羊人 Tshì-sù 菜蔬ひき肉焗 + 瑞典麭薄餅 + 優格/1057kcal)

一目𥍉粒粒是珍珠 ê 小滿準備 bueh 出帆，窗仔外月來香 mā 若 Alla Turca 出巡芳甲滿四佈 hōo 我數念慢分 ê 立夏(li̍p-hē)。

牧羊人 Tshì-sù Pide 一完成，想 bueh kā 伊冗幾工 tsiah 接續享受 ê 半爿 Tshì-sù mā 若這个年間 ê 囡仔無照節氣 ê 早熟，開始淡薄仔𣻸。

「彼是正常--ê」知影某 uī-tio̍h 一粒米，百粒汗 teh 佮食過 buē 閣出現 ê 怪癖 teh 相戰 ê 翁徛倚來安我 ê 拔大索。

「我較相信家己 ê 手感」隨𫝻手機仔請教家己 ê Blog，牧羊人 Tshì-sù 菜蔬ひき肉焗，這是一个好主意。

寫 Blog 正經是一件好代誌。

(2023.04.02 早起頓 牧羊人 Tshì-sù 菜蔬ひき肉焗 + 白醬 Gnocchi + 草莓弓蕉優格/1099kcal)

這出菜是按土耳其太太遐學來，土耳其太太用料腥臊，ひき肉是羊肉，Tshì-sù 是重本 ê Halloumi/Grillkäse，我紅肉 m̄ 管按怎食，較食 mā 食豬肉，Tshì-sù 我較食 mā kan-ta 食寮仔 Tshì-sù 抑是 Cream Cheese 這款若玉山落雪 ê Tshì-sù 真僫進化到若金煌檨仔彼款 ê Gouda 佮 Garfield 愛食 ê Cheddar，準做 Cheddar 猶原比 Gouda 較好鬥陣。

食食正經是足個人 ê 選擇，總是這个個人 ê 選擇 mā 包括自本環境 ê 慣勢，像我愛食豆腐 mā 捷講豆腐是素食 Käse，認捌 ê 朋友無一个同意，準做翁 ê 小妹食素，伊 mā 無認同。

這出菜做過幾仔百遍，起因伊 m̄ 管敆橐袋仔麭(Pita), 印度烘餅(Naan), 土耳其烘餅(Gözleme)攏好食，自開始剾板膋遮 ê 菜色就跟綴身軀 ê 斤數沓沓仔佮我愈行愈遠，甚至 ē 刁故意 kā 伊放 buē 記得。

總是遮 ê 意愛 tshan-tshiūnn hőng 禁止來往 ê 情人仝款，愈無法度牽手，愈綿爛 bueh 成做龍鳳，準做無法度成做龍鳳，猶是綿死綿爛等待相逢彼一日。

總是我 tuì 愛情 ê 從來 m̄ 捌綿精，準做我愛這个人愛甲伊 kan-ta 一支指頭仔離開我 ê 視界，我 ê 心就綴伊飛出去，我猶原 buē 綿死綿爛 kā 問題妝娗甲若仙女，不過注心愖解決方式 hōo 家己按這个箍仔平安行出去。

自 2021 開始剾板膋到這久，這出菜我 kan-ta 捌出一斗，彼久收冬 tsiah 冬外心猶原膽膽致使那食那詈家己「枵饞」，這久收冬收 bueh 3 冬， 已經知影按怎節 My Plate 就那食那呵咾家己𠢕扞灶，mā 跟綴著 211 食食，一份卵白質，一份含水碳素，兩份菜蔬，gún-ê 菜蔬基本上一斗四種起跳，減肥、保健、顧胃腸、tiàu 味 ê 洋蔥絕對是其中一項。

Gún-ê 食食熱量猶原是照歐盟建議，一个大人一日食 2000 左右 mā 慣勢 tī 早時食腥臊，下昏飯食早起頓 ê 一半，按呢 ê 食食計劃無法度 hōo 我達成我想 bueh 得著 ê 數字，總是自收冬到今彼幾領按烏貓姊收到今 ê 拍鐵仔褲佮寸尺 4 ê 格仔 siat-tsuh 猶冗甲 hōo 我掠外開錢款新衫。

雖罔，我猶原向望數字 ē-tàng 繼續行落去，總是我愛面對現實，tī 這个人生行到換年年歲我猶原有法度 kā 烏貓姊年間 ê 衫仔褲囊入去我真正愛大力 kā 家己拍噗仔喝𠢕。

再見，烏貓姊

M̄ 通閣踅翻頭 

  凝心 tī 數字請翻頭看身體 ê 變化

頂幾日食飯配醫師好辣，講著 ió-gà 步頻想著 mā 是 YouTube 推薦 ê 影片，彼隻影片分張 tsuē-tsuē 人因為 ió-gà 坐骨神經疼，食飯飽隨請教 Google 大眾廟一禮拜做幾擺 ió-gà 較適合，起因我無想 bueh 練甲傷軟𩚨，是講我 mā 無彼个才調，總是有驚惶就愛收驚。

這久 ê 答案佮三十外冬前 ê 答案相𫝛有時間就做，唯一無相𫝛 tī 這久 ê ió-gà buē 閣強調愛家己摺甲若豆腐乾棉襀被按呢 tsiah 算 ió-gà。

烏貓姊年間因為車禍龍骨疼，醫生建議我做 ió-gà，押尾我轉做散步，畢竟見做攏彼塊 CD 人 ē 𤺪，這久步頻翻頭做 ió-gà 除了想 bueh 改善又閣沓沓仔來相揣 ê 酸痠背疼 mā 向望 ió-gà ē-tàng hōo 磅仔繼續落崎，總是自開始恢復做 ió-gà 到今，磅仔 m̄ 捌落崎過，筋骨顛倒感覺較正較挺，我想這凡勢就是換年年間囊烏貓姊 ê 衫仔褲猶比烏貓姊冗 ê 因由。

翁講，伊想 bueh 知影菜單內 ê 台語。

聽伊按呢講隨 kā 囥踮倉庫 ê 白枋搜出來，紲落來交代家己愛寬心懶性 kā 字寫 hōo 媠寫 hōo 伊讀有。

伊那看我寫白枋 mā 那問「你是按怎有法度一回記遐爾仔 tsuē 字？」

「檢采兩種系統攏有學習」我講。

「按呢是按怎有遐爾仔 tsuē 人講𪜶讀無 mā 看無你 teh 寫啥物字」翁講。

「你敢讀有瑞士德文？」我問。

「讀無」翁應。

--- 2021.11.26

牧羊人 Tshì-sù 菜蔬ひき肉焗

...... 材料 ......

ひき肉　150g

牧羊人 Tshì-sù　100g

洋蔥，刴絲　1

蒜頭，剁幼　

Kam-má-tooh，切塊　3

番薑仔粉　1TL

番薑仔，切塊　3

蘑菇，切片　1/4TL

罐頭雞心豆　1

滾水

芳料草

鹽、胡椒

...... 步數 ......

1. 洋蔥、蒜頭落鼎炒芳，Kam-má-tooh 摻落去炒軟，芳料草、番薑仔粉、滾水濫落去搜 hōo 齊，煮 10 分鐘，落果汁機絞做糊。

2. 蘑菇落鼎炒芳，ひき肉、番薑仔摻落去炒芳，Kam-má-tooh、雞心豆濫落去搜 hōo 齊，煮 5 分鐘，tiàu 寡鹽、胡椒。

3. 牧羊人 Tshì-sù  鋪落去，落烘箱，捘180度烘20分鐘，樂暢來食。

(30.05.2024 Frühstück Hackfleisch mit Gemüse überbacken - Wasabröd - Joghurt/1057kcal)

Jedes Menü diskutiere ich mit meinem Mann.

Dann schreib ich die Menükarte auf das Weißboard.

Vorher, ich schreibe nur deutsch.

Langsam, ich finde dass das nicht richtig ist.

Weil wir sind unterschiedliche Personen.

Er spricht deutsch.

Ich spreche taiwanisch.

Dann schreib ich taiwanisch auf dem Weißboard.

Mein Mann hat das gesehen und sagt, wie sagt mann jedes Wort?

Dann schreib ich die TLJ für ihn.

Er fragt welches Wort bedeutet was?

Nachdem erklären.

Er sagt, ich habe Kopfschmerzen.

Ich sage, jetzt verstehst du wie weh es tut wenn ich die deutsch Prüfung gemacht habe.

Oje, Taiwanisch ist einfach wie deutsch, sage ich.

Hackfleisch mit Gemüse überbacken

...... Zutaten ......

Hackfleisch　200g

Hirtenkäse　100g

Fein gehackte Zwiebel　1

Fein gehackter Knoblauch　

Paprikapulver　1TL

Paprika in Stücke geschnitten　3

Champignons in Stücke geschnitten　400g

Wasser

Kräuter

Kichererbsen aus der Dose　1

Tomaten in Stücke geschnitten　3

Salz ＆ Pfeffer

...... Zubereitung ......

1. Hackfleisch und Zwiebel in die Pfanne geben und anbraten bis sie goldbraun sind, Tomaten mit Kräuter und Paprikapulver dazugeben und anbraten bis sie goldbraun sind.

2. Wasser dazugeben und gut mischung, ca. 10 Minuten Kochen, dann pürieren.

3. Champignons mit Paprika in die Pfanne geben und anbraten bis sie goldbraun sind, Hackfleisch dazugeben und anbraten bis es goldbraun ist.

4. Tomatensoße mit Kichererbsen dazugeben und ca. 5 Minuten kochen.

5. Hirtenkäse darüber streuen, im Backofen auf 180 Grad ca. 20 Minuten backen. Guten Appetit! 

(30.05.20243 Breakfast Balkan Cheese with Mince and Vegetables Bake - Wasabröd - Yogurt/1057kcal)

I discuss each menu with my husband.

Then I write the menu card on the white board.

Before, I only write in German.

Slowly, I don't think that's right.

Because we are different people.

He speaks German.

I speak taiwanese.

Then I write Taiwanese on the whiteboard.

My husband saw this and says how do you say every word?

Then I write the TLJ for him.

He asked what it meant?

After explaining.

He says I have a headache.

I say, now you understand how it hurts when I have taken the German exam.

Oh dear, Taiwanese is just like German, I say. 

Balkan Cheese with Mince and Vegetables Bake

...... Ingredients ......

Minced meat　150g

Balkan Cheese　100g

Finely chopped onion　1

Finely chopped garlic　

Smoked paprika　1TL

Mushroom cut into pieces　400g

Bell paprika cut into pieces　3

Water

Herbs

Canned Chickpeas　1

Salt ＆ Pepper

...... Method ......

1. Put the minced meat and onion in the pan and fry until they are golden brown, add tomatoes with herbs and paprika powder and fry until they are golden brown.

2. Add the water and have a good mix, cook for about 10 minutes, then puree.

3. Put the mushrooms with peppers in the pan and fry until they are golden brown, add minced meat and fry until golden brown.

4. Add the tomato sauce with chickpeas and cook for about 5 minutes.

5. Sprinkle Balkan cheese over it, bake in the oven to 180 degrees for about 20 minutes. Enjoy your meal!