亂皂𥴊仔店 ⓂⒺⒾⓃⓀⒾⓄⓈⓀ

自由的女性和輕佻的女人正好相反 -- 西蒙.波娃

十二月食菜頭，六月 tsiah 轉嗽。

這是早前就寫好 ê 文章，sóo-tí tī 設定公開 ê 日期猶未出現進前，我 buē 閣專工餾一斗。

Tsang-mê 下昏飯食飯飽無想 bueh 反冊 mā 無想 bueh 碰電腦，規个人隨閒甲連蠓仔攏掠無，按呢來 Blog 掠漏。

一段一段繩，這斗 ê 文章寫甲誠通順 buē 㧎㧎抑是成做借殼寄生 ê 中國麋鹿。

總是，世間有一个定律號做「Murphy's Law」(墨非定律)，你掛吊 ê 事項 m̄ 是 buē 出現是機緣猶無夠額。

當我 bueh 臭颺 tuì 翁講「我哪 ē 遮爾仔𠢕，掠無漏」就隨發見問題。

平和世代 ê 人準做厝內散甲賰壁紙(調整)

平和世代 ê 人就使厝內散甲賰壁紙(原句)

這兩句 iōng 華語 ê 語法來讀窮實無啥大問題，起由𪜶是 bueh 相𫝛 ê 意思 m̄-koh 無仝 ê 語法。

Tshan-tshiūnn 德語 ê 歡喜、快樂 mā 有 3 款 1. Glücklich 2. Begeistert 3. Fröhlich，𪜶 ê 意思 bueh 相𫝛總是塗水差寸，木匠差分➀猶愛看頭尾。

寫到遮誠愛笑，寫甲 buē-su 家己語言學家遐爾仔𠢕𫝛款，窮實是膨風水雞刣無肉。

總是，語言是一回生份，兩回熟似，三回比滷肉猶較爛 mā 是一代親、二代表、三代散了了。

我頇顢，總是我知影 Übung macht den Meister，捷講喙 ē 順，捷寫手 buē 鈍，加看思路廣，加寫筆生花，加掠漏，加補強。

因為改這段文句 hōo 我想著《穆斯林與猶太少女》ê 赫爾米醫生佮《三股髮辮》ê 絲蜜塔 mā 想著家己 ê 親人佮所有自由 ê 人。

因為 m̄ 是每一个人攏有法度成做赫爾米醫生抑是絲蜜塔。

➀各有精工，各有所別

《亞特聊聊天》收尾攏 ē 請教受訪者 tuì 台語未來 ê 想法，聽久耳空窮實 ē 生研。

這个生研 m̄ 是講𤺪，是心頭定自然就 buē 去愖本土語言有未來抑是無未來 ê 問題，起因遮 ê 語言就是落實 tī 教育內底。

除非臺灣 mā 佮德國第三帝國𫝛款提「冊」做營火，抑無伊猶原 ē 成做拉丁語佮梵語仝款成做一款專門，hōo 你 m̄ 免拚勢揣辦法看愛按怎做 tsiah 有法度按鰮仔魚成做馬鮫(bé-ka)。

既然聽甲耳空生研是按怎又閣特別 kā 伊提出來寫?

這決定是聽著一搭擉著心肝穎 ê 訪問，tī  台語話故事丨【專訪】「英子！這是啥？！」《派對咖孔明》台語版－聲音演員江志倫、葉又菁、穆宣名這 pha 訪問，圓仔姊姊講著家己是台北人，台語是佮大甲阿媽學--ê，江志倫講著堅持無 bueh 改「笑死」ê「笑死人」 攏觸著我 ê 點，不而過上觸我 ê 點是穆宣名 ê「包容性」hōo 我想著這篇佯青文章佮記錄 tī《穆斯林與猶太少女》彼段參加線頂台語課 ê 心情，雖罔我已經 kā 伊改甲連絞螺仔風來行踏 mā 絞 buē 出一絲皺痕 ê 平靜 mā buē 纏綴 Daisy Hochberg von Pleß 過日子，總是我猶是好玄有一日轉去臺灣，我 ē 按怎做？

我想我猶是講我上慣勢 ê 語言，不過我 buē 閣 tuì 人講寡「你呔 m̄ 講台語，講台語有啥物好處 blah blah blah」，起因咱要求別人尊重咱 ê 意志，咱家己 mā 愛尊重別人 ê 自由，其他 ê lí-li-lo̍k-lo̍k 就留 hōo 時間去篩「選擇」，tshan-tshiūnn 囡仔 tī 爸母 ê 面頭前選擇講「華語」無表示伊 ê 想法佮爸母相𫝛「阿姨，我 mā-ē 曉講台語，m̄-koh 爸母講彼是無啥受教育 ê 人 teh 講 ê 話」。

「你 ê 台語佮 tsâi 學？」

「阿公阿媽...」

這是2019年轉去臺灣佮朋友做陣食飯，我一直 tuì 自 gún 熟似就講台語，m̄ 知 tī 底時𪜶翁某 kan-na ē 曉講華語 ê 朋友點拄𪜶愛佮囝仔講台語佮講台語有啥物優點，囡仔 tī 𪜶爸母去算數 tuì 我講 ê 話成做我記牢牢 ê m̄ 通清彩 kā 目看著 ê 物件點油做記號 ê 烏白鬥，雖罔這久 ê 我搪著對頭 ê 事項猶 ē 氣甲血壓衝懸，不過遮 ê 事項 mā 沓沓仔成做「阿嬤你怎麼沒感覺」，我想這表示我 mā 已經勻勻仔理解著人生正經短甲 hōo 你無法得𥍉一下仔目，kā 目囥踮別人 ê 身軀，我需要 kā 目囥踮佮茱利亞𪜶兜查埔人無宛2體 ê Because i say so。

雖罔，我 ê 病症猶無遐爾仔嚴重到若莎拉按呢，愛等到往過 ê 輝煌猶原無法度掩崁現實 tsiah 願意調整家己，總是每一个大問題攏是按小問題聊聊仔湠做 m̄ 願改變 ê 慣勢佮自在，tshan-tshiūnn 絲蜜塔𪜶翁。

《三股髮辮》

La Tresse von Laetitia Colombani

譯者：蘇瑩文

㊓ 寂寞出版社(圓神出版事業機構)

ⓦⓦⓦ 博客來