亂皂𥴊仔店 ⓂⒺⒾⓃⓀⒾⓄⓈⓀ

第一擺認捌菜擴是同事轉去後頭厝，𪜶阿母𢯾一箱 hőng 退轉來 ê 箱仔請伊紮來無料分享。

M̄ 捌料理，阿母又閣轉去塗州賣鴨卵無人 thang kā 我鬥相共，隨請教同事按怎料理。

「Tshan-tshiūnn 煮菜頭湯按呢」伊講。

寢開始我確實是照伊 ê 分張按呢料理，總是我較歹喙斗，無法度一項物件一直餾。

上網路揣資料，揣著 ê mā 是煮湯抑是做菜鹹。

徛踮窗邊看大暑三斑擾家起性搦地歇熱去，溫馴 ê 小妹立秋隨家和萬事興，家亂萬世窮來接節氣，當咱 teh 嘆四季無四季，鐵拍 ê 身體 mā buē 堪得按呢𬦰崎𬦰落，請咱 kā 𪜶相放伴 ê A-Lô 雄雄出現在眼前。

一二三四、驚到無代誌

曝甲若烏森林薰肉遐爾仔迷人 ê A-Lô，手攑起來講透西文佮德文講「今年雨水 tsuē，菜擴肥，Ciao」。

我一手捾圓棍棍 ê 菜擴，一手繼續捏耳珠講 Vielen Dank。

越轉身行繼續那行那唸一二三四、驚到無代誌，一二三四、今昏下昏飯就是你。

M̄ 知是受著 tsham 咱做陣去踅田園 ê 影響。

抑是閣揀食，規氣做仙好矣。

致到，這擺做陣買菜攏 m̄ 免我請教抑是攢耐性「參詳」，翁家己捾兩包非洲來 ê 荷蘭豆講這擺 ê 減肥食食 bueh 食這項。

聽伊按呢講我隨著生驚 mā 隨 kā 手搭 tī 伊 ê 額頭。

 一位徛踮 gún 身軀邊有一 ta̍p 睏仔 ê 先生，看我按呢 tuì 翁按呢做掠伊人身體無爽快，人隨客氣甲那徙位目睭 mā 那貓貓仔相 tshan-tshiūnn teh 提醒我，這位太太你呔 ē 猶末敲電話叫 112（Euronotruf/歐洲緊急救助電話)。 

寫了 tsuē-tsuē 篇卻無半篇完整，頭殼開始踅這件代誌，後擺寫漢羅就好 m̄ 免閣戇猴搬石頭寫羅馬字。

是講，是按怎愛寫羅馬字，我家己 mā m̄ 知影，總是別人按呢寫我 mā 綴 leh 按呢寫。

只不過，現此時 ê 我正經感覺我 tuì 羅馬字無感情，無想 bueh 繼續按呢狗咬鐵釘，m̄ 願放。

我無輕視羅馬字 mā 無啥物 tsiah 是臺灣字，總是世界有遐爾仔 tsuē 符號，愛我 uī-tio̍h 一个無好鬥陣 ê 族群就莫去理解𪜶 ê 文化佮符號，彼 mā 是紅龜生蟲，龜怪 ê 一件代誌。

起因，m̄ 管啥物符號 tuì 我來講攏有意思 mā 是楦閣家己 ê 不足。

8月初2翁佮我討論伊想 bueh bué Nokia 手機仔。

8月初3佮伊做伙去看手機仔，兩个人那看實體那討論新手機仔敢有合伊 ê 需求。

Tī gún 若祀佛公賰喙 ē 動 ê 押尾「這手機仔窮實是 bueh bué hōo 你做結婚紀念品」我無應話斡頭隨走。

伊知影問題 mā 知影這久 kā 翁手 khiú leh kan-ta ē hōo 某閣較生頭清面。

伊恬靜綴我 ê 跤步行到較無人 ê 所在，iōng 鼻仔 hōo 鼻水窒牢 ê 聲音講「是按怎你 bueh 遮爾仔固執」，聽伊按呢講本底就 teh 挓 ê 火引隨著。

少年時 ，看著遮 ê 幼物仔，bué！

無 bué 轉來厝閣 ē 悲傷甲神魂離體。

迒過上卌戶橂，看著遮 ê 幼物仔原仔足愛看足愛摸 m̄-koh buē 閣 tuì 𪜶起心動念，除非有需求 tsiah-ē 撏橐袋仔。

Tsuē-tsuē 朋友看我按呢過日子攏掠做我 teh 綴近藤麻理惠抑是山下英子 ê 態度 teh 過四常。

我無，總是我清楚知影這个變化是按921開始。

5:2 食食一月日結束。

翁按 79.2 落到 77。

一月日：2.2 公斤。

我 heh-heh....先保密。

一月日：2 公斤。

樂暢食，快樂剾板膋行到今仔日拄拄好滿 1 月日。

照慣例寫落來做記錄，後日 tsiah 有資料通參考。

體重：保密

無去 ê 膩瓤油(脂肪)：1.9kg

今仔日透早翁笑咍咍講「經過兩禮拜 ê 時間，我 ê 體重又閣繼續向前行。」

聽伊按呢講我 mā tsiah 想著家己 buē 記得做 ê 代誌，記錄第三禮拜 ê 變化，按呢就 kā 翁某兩人 ê 第三禮拜寫做陣。

Uì 7月初6到今，我減1.3公斤，翁 uì 7月初8到今，減0.7公斤，翁某兩人上大 ê 運動猶原是出門 bué 菜  --- 怙11路。

物食佮意食 ê 攏食，無限制有節量。

這份早起頓是翁猶 m̄ 改變伊慣勢 ê 食食方式，早起頓食少，下昏飯食臊腥 ê 食物。

自開始糋膩瓤，逐項食食我攏 ē 過磅，這个動作 hōo 翁笑講「我佮熱量傷過計較」。

我 mā 笑應「無--neh，我頇顢手感無好無法得 tshan-tshiūnn 恁阿母按呢遐爾仔𠢕節 --- 準-準-準，sóo-tí，我需要磅仔伊 kā 我鬥相共，抑是你看我按呢做足鑿目 tshan-tshiūnn 恁阿母按呢，你 mā ē-tàng 家己攢我絕對 buē iōng NÖ kā 你 NÖ 甲叫 m̄ 敢。」

「Buiah，我愛媠某 kā 我攢」翁講。

「你敢講我無福氣通收--o͘h」我應。

「我誠實是戇猴搬石頭gún 翁家己 khue 家己」翁緊紲喙講。

翁講「這蓋好食，你按 tueh 揣來 ê 食譜？」

「久年 ê 記持」我講。

「你呔 ē 想 bueh 做這份食譜」伊繼續問。

「起因，挽肉餅踮咱兜，四常 kan-na ē 出現你孤愛 ê 德國版本。」

這回 gún 兜步頻出現一个 tsham 德國味素無相𫝛 ê 絞肉餅 hōo 伊 mā 綴我成做貓開始好玄。

翁一直有一个龜怪 ê 想法，食肉定著 ē 大箍。

我問伊「食甜路敢 buē 大箍？」

「當然 mā 是 ē 大箍，總是食甜路 buē 行向食肉按呢 ê 恐怖」伊講。

伊這款承爸母喙斗慢牛厚屎尿巴禮講道家己攏著 ê 龜怪理路，我無興交伊拍喙鼓，隨交𪜶歐盟搬出來「恁歐盟建議一日食 2 千，照恁歐盟建議，你一日食 4 ~ 5 千，莫怪瘦 buē 來，交恁爸母相仝？」。

「Gún 大箍是年歲到矣 m̄ 是 gún 食過頭，tshan-tshiūnn 你按呢」隨斡向灶跤 kā 咱頂真記錄 ê 熱量分張 hōo 伊參考。 

Tsa̋ng 翁問我，是按怎咱會 uì 二工到三天 bué 一改菜改做一禮拜 tsiah bué 一擺？ 

「因為拜四佮拜五是抾點日」話猶燒滾滾伊煞無出聲，我隨知影伊 hōo 家己準備 ê 哭呻哽著。

起因，自談戀愛、結婚到徙岫，我從來 m̄ 捌一禮拜款一改菜。M̄ 捌按呢做 ê 因端，除了我閒甲掠虱母來相咬，才怪，是我真愛看跳樓大拍賣遐有啥物寶通揣，上重要 ê 因由是 gún 兜 ê 冰箱是130L 彼型，無通仔 hōo 我做阿媽 kā 伊飼甲哽胿。

是講我 mā 無興 kā 冰箱當做大綠島(Greenland)來使用，畢竟 Greenland 有彼个才調 kā 千外冬 ê 物冷凍過千冬猶未臭酸，gún 兜 ê 冰箱 m̄ 管冷藏抑是冷凍攏無彼个才調，sóo-tí m̄ 通飼歹癖，認為俗物 buē bué 破家佮這總有一工用 ē 著，抑是我 ē 用。

「遮是你 ê 地盤，你 bueh 改做兩禮拜我 mā 無意見」uī-tio̍h 伊認為 ê 抾拾佮𠢕扞家，我 mā 生湠出一个新功夫，kā 5 噸物食變一噸楔冰箱，總是我討厭這个功夫，時間一到自然準備成做六月蚶，開喙 kā 伊臭死。

攢早起頓翁行過來講「你誠實是Grüne。」

「我 m̄ 是彼款捾籃仔假燒金 ê 人，我是 Blau」我講。 

捎無某分張 ê 摠，總是一聽著 Blau buē 流清汗 mā-ē 隨倒退攄，總是伊知影某 m̄ 是彼款色 ê 人隨笑甲歪腰。

B1 ê 老師邀請 gún 遮 ê 捌 hōo 伊教過 ê 學生做陣參加 gún 倚位 ê 聯邦政府活動。

Gún 參加 ê 彼日，邦政府 ê 立法廳拄好開放民眾參觀，gún 遮 ê 參觀者就順導覽先生 ê 引𤆬踅入去四常真僫行踏 ê 立法機關。

本成掠準我愛開 6 月日來調整我 ê Blog。

無疑悟我 tsiah 開無夠 3 月日就 kā 遮倚 bueh 3 百篇 ê 文章攏總調整甲好勢 lī-lī。

這，若是無 kā 寫落來記錄一下，我這臭頭包布 --封繩(風神)閣𠢕嗙 ê 癖性 ē 著內傷。

另外，我這站仔 mā teh 進行 ê 「醫師好辣」減重法，自 7 月初 6 開始綴 leh 做到今拄好滿一禮拜成果是 0.3 公斤。

Gún 翁 ê 部份若是無 kā 伊算自伊蹛院到轉來 hōo 家庭醫生檢查講伊 ē-tàng 開始正常食食 ê 7 月 初 7，按 7 月初 8 kā 算伊 mā 糋掉 0.5公斤 ê 膩瓤油。

Sauer macht lustig 酸製造歡樂

早起頓 ê 莓果酸甲我成做 Troll。

Gemischt Sprache ist auch lustig.(透血 ê 語言 mā 𤆬 hōo 人快樂)

透血 ê 語言 hōo 我宛然露台頂 ê 厝鳥，安然自在食遮食遐一霎仔攏 buē 喙白。

Tsa̋ng 是歐州跤球賽上押尾一局，Italia 對 English。