(2022.03.09 減肥早起頓 肉丸仔 oo-mù 卵。肉丸子歐姆蛋)
食早起頓讀著這張圖 In virus veritas，喙內 ê ka-pi 險險噴出來。
雖罔，我並無真正理解伊 ê 意思，m̄-koh 看著熟似 ê virus 小可知影伊是 teh 講佗一項代誌。
Ūi-tio̍h bueh 確定家己想 ê 答案，將手機仔挈 hōo gún 翁看。
伊一看隨笑甲吭跤翹講；
這是真出名 ê 拉丁語俗語，原文是「In vino veritas」，意思是「酒內底有真相」。
聽了，換我斟酌繩我 ê ka-pi。
「你彼是 ka-pi，m̄ 是酒」翁講。
(2023.03.03 早起頓 蘑菇塗肉林檎炒 + 魚指 + 檨仔優格/1031kcal)
有人講德文 ê 馬鈴薯是按義大利文「Tarufolo」(松露)演化，我 m̄ 是語文專家 mā m̄ 是德文專文科無法度確定。
起因，學過拉丁文 ê 夜間部同學講「m̄ 捌聽過」，另外 mā 有一个講法是法文 ê 馬鈴薯有可能是按南美洲印地安人 ê 語言「Papas 」演化。
非語言專家 m̄ 知啥物是啥物，總是透過一粒馬鈴薯學著 tsuē-tsuē 無相𫝛 ê 語言是一件非常有意思 ê 代誌。
蘑菇是素食界 ê 牛排，這是我按臺灣 ê 電視台看來--ê。
蘑菇伊是 m̄ 是素食界 ê 牛排，m̄ 是素食者 ê 我無清楚，m̄-koh 我真 ài 食「各位阿菇」。
特別是 uī-tio̍h bueh 解決歐戰糧草 ê 德國𪜶所大量種作 ê 新食物「生蚵菇」(Austernplize)。
講著生蚵菇，一回踅森林讀告示 tsiah 知影「生蚵菇」mā 有雙生仔，而且 buē 食因為有毒。
(2023.01.02 早起頓 番薯 Frittata + 白花仔菜烘 + 時計果優格/854kcal)
Gún 翁某 tuì 白花仔菜有無𫝛款 ê 記持，m̄-koh 有相𫝛 ê 脾土攏無意愛。
不過，聽過 gún 翁 ê 分享，我發現 gún 媽媽料理白花仔菜 ê 方式無問題，有問題 ê 是我。
Gún 媽媽在生時攏 ē 講，有啥物物食 ē-sái hōo 姑娘仔你 buē 嫌伊無臭塗味佮臭羶味？
Tī 臺灣食吳郭魚嫌臭塗味重，踮德國食三文魚我 mā 嫌臭塗味重...
Tī 臺灣食羊肉嫌羊肉臭羶味重，踮德國食綿羊肉我 mā 嫌綿羊肉臭羶味重...
我真𠢕嫌物件有問題，m̄-koh 我又閣足食遮 ê 物。
O͘h...難忘 tī 波士尼亞食著 ê 烘羊肉，難忘 tī 斯洛維尼亞食著 ê 烘奶豬仔等等...
(2023.02.04 早起頓 䆀豆豆腐炒 + 清飯 + カレー洋蔥湯/734kcal)
朋友分訴現此時 ê 朋友感情來往 tshan-tshiūnn tī 市仔買三領一百箍 ê 衫相𫝛，buē hőng 惜命命拑顧。
我問伊，咱莫算面冊、Line 遮 ê 名單朋友，你 ê 四常生活有幾个你 ē-tàng 三不五時 tsham 𪜶破豆 ê 朋友？
另外，你敢 bueh 稽考你 iōng 偌 tsuē 時間 tsham 你身軀邊 ê 人好好仔食一頓飯佮冇談四常 ê 五四三？
沓沓仔愖遮 ê 問題，凡勢你就 buē 閣感覺家己呔 ē 遐爾仔人緣通交朋友。
因為，至少你閣有我這个恬卒卒又閣 m̄ 免你 tuì 我交代是按怎這站仔 ê 你呔 ē 無 bueh 佮我連絡 ê 因端。
論真講，你 tuì 我交代遐 ê 代誌 tuì 我來講攏無重要，重要 ê 是咱做陣泡茶咱敢有法度 buē-su 火雞母一支喙嘁喳叫，這 tsiah 重要。
朋友聽了講，我盡量 tuì 手機仔內底 ê 物件失覺察莫 hōo 家己壓力。
(2023.03.22 早起頓 蘑菇指頭仔麵猴 + 芳料草雞肉 + 寮仔 Tshì-sù 果子優格/876kcal)
頂幾日讀跑吧！新自由主義的奴隸們！ 誠有感覺。
前幾日 mā 佮翁冇談電子世界𤆬來 ê 便利佮利便內底 ê 鋩鋩角角。
談仔談，我想著 Schopenhauer ê 刺球豬困境。
我講 ，寢開始參加面冊 ê 起因是因為我 ê 好朋友已經無人 bueh tsham 我這个老硞硞 ê 人寫電子批抑是 iōng 電話冇談。
所以堅心5~6冬 buaih 使用面冊 ê 我，到落尾仔感覺家己應該愛有上山看山勢，入門看人意 ê 開明就 tī 2011 綴逐家參加面冊。
Tī 彼當陣，朋友 tī 面冊寫講，hōo 咱逐家做伙拍噗仔熱烈歡迎上落尾 ê 一塊鬥片仔。
我這塊鬥片仔參加面冊無偌久又閣愛面對另外一款新 ê 連絡方式：Line。
(2022.03.05 減肥早起頓。德國獅仔頭湯，德國獅子頭湯)
四常，我 ē 家己 bué 絞肉 tńg--lâi 做肉餅、丸仔，kam-má-tooh 醬 mā 是。
Tsit 擺冰箱猶有 gún 翁出張紮 tńg--lâi ê Frikadellenbällchen(德國獅子頭 )就 kā 伊挈來做平常時 lóng-ē 款來做下昏飯 ê 料理。
Tsit 个做法是按人 tī 法國行跤花食著 ê Bouillabaisse(華文：馬賽魚湯)做地基 ê 烏白舞。
早先，我 kan-na ē 挈伊敆パン做伙食。
Tsit 斗， gún 翁講伊想 bueh 佮法國糋做伙食，看按呢 ê 食法敢有新世界 thang 發見。
翁下 ê 願望做牽手--ê 若是有法得 kā 伊鬥相共彼絕對是塗炭仔 mā-ē 想辦法成做公主 ê 代誌。
總--是，塗炭仔 ē 貪戀眼前 ê 世界來出箠(tshê)，sòo-pái tī 我 bueh 變妝做塗炭 ê 時我 tuì 伊講「塗炭仔是恁 ê 故事，伊 ē 出箠，我更加 ē」。
(2021.11.23 減肥早起頓 德國煙腸 Oo-mù 卵。德國香腸歐姆蛋)
Tī-leh 款起早頓 La-jí-ooh 拄好放送這首歌 Fall On Me。
物件做好，我隨上 YouTube 搜揣影片佮翁分享。
翁看了，我問伊，你有啥物想法？
「歌誠好聽」伊講。
「Sie sind ihrer Seele bester Freund➀」我講。
「這是啥物意思」伊問。
「意思是你若是佮你 ê 靈魂做好朋友，你就 buē 一工到暗掠做家己是先生是專家。」
(減肥早起頓 Quark 塗肉林檎煎餅。德國奶油乳酪馬鈴薯煎餅)
美國電影《Forrest Gump》有一句話「人生 tshan-tshiūnn 一篋仔 Tsioo-kóo-lè-tòo，你永遠 m̄ 知影你會挈著啥物款 ê 口味」。
這个食譜就若阿甘講 ê 這段話。
Tī 東西兩德，因為經濟社會環境無相仝，致使仝款 ê 食物 mā 綴環境成做無相𫝛 ê 妝娗。
第一擺試這个食譜請翁鬥試鹹汫伊猶未試進前就隨「Ne(Buaih)」。
Tī 往過看伊成做𪜶爸母 ê 副本，我 ê 反應是隨搬一齣趒童戲 hōo 伊看，總是歲數 ē 添，我 ê 智慧 mā 是，我無想 bueh uī-tio̍h 別人 ê 喙斗抑是特殊 hōo 家己斷腦筋抑是致病。
「Das Leben ist wie eine Tafel Schokolade, wie wissen vorher nicht wie sie schmeckt」我 kā Forrest Gump 借智慧順紲無料加送一味，𪜶兜上愛 ê「Ne(Buaih)」。
伊知影我是手攑日本剾刀 teh kā 倒剾隨應講「 我無 tsiah 無遐爾仔龜怪。」
(2023.11.04 早起頓 菜蔬雞肉番薯缽 + 優格/953kcal)
真久進前聽過朋友紹介露西亞 ê 大列巴(華語)蓋好食。
自彼久我就 tuì 大列巴充滿滿滿 ê 好奇，m̄-koh 無機會接觸。
有一斗佮猶是男朋友 ê 翁做陣行踏德東 tī 一搭現此時已經 buē 記得庄頭名 ê 店搪著 m̄ 捌聽過 ê 歷史 。
蘇聯期間有 tsuē-tsuē 蘇軍駐軍 tī 東德，sóo-tí 這位店東應當是彼久 ê 駐軍 tsham 當地人成做龍鳳。
這段歷史窮實無啥特別，伊卻敢若一个準備 bueh 出嫁 ê 新娘 tī 紅巾猶未 hőng 掀起來進前，tuì 新郎 ê 印象攏是倚靠別人 ê 分張來捏(liap)家己 tuì 這个 kan-na 誠熟似 m̄-koh 卻生份 ê 翁婿。
不過，猶是愛講面對歷史 m̄ 願迒過家己 ê 堅持，一切猶原相𫝛。
我 ê 意思是，美國 mā 駐軍 tī 西德、日本、韓國等等，uī-hô 我 tuì 這个現象 buē 感覺特殊，顛倒反認為這是真自然 ê 代誌，sóo-tí 搪著美國 ê 物件出現 tī 遮 ê 所在就 buē 感覺興趣趣。
(2022.05.02 減肥早起頓 德國咖哩煙腸。德國咖哩香腸)
一瞑睏醒，本底規叢猶原 tshan-tshiūnn 日花仔色水 ê 樹葉，這陣已經開始落地。
一葉一葉重重疊疊宛然是一本閣一本 ê 冊 hōo 我足想 bueh 出門揣冊來讀。
越頭 kā 猶原䖙 tī 眠床頂 ê 翁講，寒人猶 buē 行跤到，樹仔已經先 FKK teh 等伊。
「秋清是落雪前猶原 ē-tàng 自在爁日 FKK」翁應。
聽伊按呢應，我笑甲腹肚疼。
窗仔門拍 hōo 開 hōo 外口 ê 風通入來 tsham gún 做伙冇談。
風輕蠓蠓 tuì 我 ê 身軀行過，buē 記得疊一領裘仔 ê 我起毛管交懍恂，m̄-koh 我 ê 頭殼想著一件代誌。
(2023.02.02 早起頓。蘑菇炒麵 + 鮭魚煎 + Lìn-gòo 紅菜頭湯 + 刺莓仔 Yogur/984kcal)
Tī 西方佮東方之間，行來行去。
我食，我愖。
我食，我做數簿。
Gún tī 四常走揣家己 ê 四序。
Gún 相信，特別滿四界 tsīng-hāu gún-ê 行踏 。
食食是日常，日常是食食。
Gún tī 無 bueh 相讓佮司公仔象桮 ê 一鄉一俗互相相尋互相幫贊。
(2022.11.12 早起頓 Lê-bóng 芥辣雞肉 + 玫瑰草花羊角麵 + 優格/735kcal)
又閣行到結數日。
好玄頂年 ê 這久時，數簿 ê 數敢有較減寡。
開始反進前 ê 數簿。
舊年有較減一寡，舊舊年有較過額寡。
好玄，是啥物因端致使舊舊年 ê 數有較過額。
一條數目，一條數目繩(tsîn)。
看著 MAILLE 隨理解過額 ê 因端。
(2022.03.17 減肥早起頓 德國酒廠炕肉。德國啤酒燉肉)
Tī 德國，細間 ê 麥仔酒酒廠號做 Brauhaus。
這款 ê 麥仔酒酒廠，大多數攏 ē 敆餐廳佮民宿。
𪜶 ê 餐廳除了提供𪜶家己激 ê 酒，mā-ē 提供𪜶家己激 ê 麥仔酒炕肉。
這款麥仔酒炕肉就號做 Brauhaus Gulasch，意思著是「食 gún 兜麥仔酒 ê 肉」。
食家己麥仔酒炕出來 ê 肉，味素按怎？
甕肚 ê 我 buaih 佮你分張，等待有興趣 ê 各位朋友家己𤆬麥仔酒酒矸仔一矸仔試 mā 歡迎逐家來德國品嚐伊 ê 好味素。
(減肥下昏飯。クリーム馬鈴薯三文魚馬鈴薯三文魚，鮭魚白醬馬鈴薯)
下昏暗翁下班一 tńg--lâi 人猶原 tī 門屋(ak)就大聲喝足芳--ê，今仔日有三文魚著 m̄ 著？
你慢且就知影--ah，我講。
Tī 翁猶 koh leh 換衫褲，我已經 kā 下暗頓攢好請伊直接到食飯廳食飯。
伊一看著三文魚佮馬鈴薯大聲 huah 講，媠某 m̄ kan-na ē-hiáu 扞家、扞數 iū-koh 𠢕扞鼎灶，我 ê 脾土 hōo 媠某扞 kah 穩穩穩 iū-koh 開開開。
Tse 有 khah 𠢕嗙，m̄-koh 我真佮意。
下暗頓食了，我問翁請教先生 "ist das Essen nur Lebensmittel oder bist du zufrieden? "
Tsham 德國人做陣過四常無算短 ê 日子，我已經學 ē 曉按怎 tī durch die Blume(轉彎踅角)盤山過嶺搜揣水源。
(2022.02.05 早起頓 白跤蝦米粉冷盤)
綴我十冬 ê 翕相機自彼日摔歹到今，我猶原 m̄ 知影代誌是按怎發生佮家己彼久是 tī 無閒嗤喳啥物代。
不而過自翕相機摔歹，我 mā tsiah 有法度見著這件代誌。
我 buē 閣 hōo 一張相片 hōo 伊綁票我 ê 時間佮情緒。
有當時，拗鬱正經是家己無枷夯交椅。
白跤蝦米粉冷盤
...... 材料 ......
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
