亂皂𥴊仔店 ⓂⒺⒾⓃⓀⒾⓄⓈⓀ

「你 kám 有興趣投稿？」

有一回 tiàm 面冊社團搪著《落/Làu台語-瑞士ê台語社》ê 社長 A-kuan，伊問我 tsit 个問題。

彼久，我 tùi 台文 ê 印象猶原停 tiàm 「鄉土文學」，猶未迒到實櫼 ê 「台語文學」。

「我 buē 曉寫詩，buē 曉寫羅馬字，一切 lóng buē 曉，tsit 時 ê 文字是 ná 看線頂辭典 ná kā 四常 ê 話轉做文字按呢 niā-niā，猶無夠資格 thang 投稿...」

「有興趣，你 tsiâⁿ-si̍t ē-tàng 投稿 khì Bong報」。

A-kuan ê tsit 段話楦闊我 ê 另外一个閱讀伊甸園，親像伊所紹介 ê 《大士爺厚火氣》。

因為《大士爺厚火氣》我認 bat 鄭順聰老師 ê 面冊，iū-koh 按鄭順聰老師 hia 認 bat 濟濟台文書籍，親像藍春瑞老師《Tua̍t 人 ê 愛》等等，一个網鍊接一个網鍊湠開我 ê 世界，mā hō͘  我開始認真稽考投稿 tsit 件代誌。

不過，一想著家己 ê 筆尾 kap 無內才 sûi 放棄。

一日 tiàm 面冊讀著朋友 ê 文字想著吳念真導演 tī《做伙走台步》ê tsit 段話「守護一個連結記憶的語言」。

Sûi 反冊，看著陳豐惠老師 ê 照片 hām 手頭 ê hit 本冊。

「一件代誌 ê 存在 ē 因為 lán-ê 無要意就當做無 tsit 件代誌」。

想著 tsit 點，我理解四常 buē 斟酌讀朋友華語火星文 ê 我，hit 日為何 ē tsiah 要意伊 ê 文字。

因為伊 hōo 我想著《iPad kap 杯仔》ê〈美白〉kap〈迷思〉。

朋友欣慕阿爆 ê 成就，m̄-koh 伊 tuì 囡仔 kóng Vuvu ê 語言無路用。

不而過，你 ài 記得你是原住民。

我 m̄ 知影伊 ê 囡仔 ê 想法，總是我知影 m̄ 管我 ê 華語、英語、德語 koh khah 按怎 ē-hiáu kóng，𪜶 lóng m̄ 是自我 tī 阿母 ê 游泳池感受著 ê 歌聲。

感謝瑞士社 A-koan ê 分享 hām 鼓勵  hōo 我 ê 台文世界更加楦闊。

感謝Bong報 hōo 我有機會分享家己 ê 䆀筆尾。

更加感謝Bong報 ê 分享，hōo 無 koh 綴陣參加面冊 m̄ 知 ài khì 佗落讀著台文文章 ê 我，ē-tàng thàng-kuè 電子批訂閱 hām Bāng-ia̍h 繼續 tha̍k-to̍k 篇篇精彩 ê 文章。

Kám-siā, Dankeschön

刊登日期：2022.6.339期

刊登：台文通訊Bong報

我 ê Blog tshan-tshiūnn 亂皂𥴊仔店 ê 紹介 In Essen veritas，食食有真相，水，這个物質從來 m̄ 捌固定，𥴊仔店除了我 ê 花眉，啥物攏無。

低路人 buē 曉寫讀冊心得 mā buē 曉寫冊評，這篇文章只是舊事翻新。

斯當時 ê 食譜跟綴時間成做有錢有福相，無錢鼓漲 ê 猶原是仝一支喙 m̄-koh 無仝喙斗 ê 無迎新棄舊 m̄-koh 非常確定彼久 ê 家己是見著內行人看布底，我這外行 ê mā bueh 綴人 bué ê 硬發一篇無敆家己喙斗 ê 食譜 。

彼陣 ê 食譜無佮意，總是彼陣 ê 心情到今猶是缺喙食蛤仔肉，峇峇峇就繼續 hōo 伊生湠做掠外一篇成做我 ê 有寫湠智慧。

巡田園翻田塗犁著這篇佮生菜盤食譜敆逝 ê 文章，前繩後巡確定伊交敆逝 ê 食譜已經無相干隨 kā 獨立做一篇臭頭包布，防蠅(風神)展冊櫥 ê 記錄。

總是，風神進前 mā 愛有摠通捎，畢竟我 m̄ 管按怎規張紙畫一尊觀音，我猶是無法度接受豬母牽去牛墟 ê 無一絲摠頭通成做𫞼諍王。

筆尾䆀才兼凹軁有法度成做規紙張畫一尊觀音，除了《落/Làu台語-瑞士ê台語社》ê 社長 A-kuan ê 鼓勵，猶有台文里長伯鄭順聰先生 ê 呵咾。

2019 因為興趣參加「對囡仔講台語」面冊社團，因為社團齊是仝溫度 ê 人，凹軁兼無興交生份抑是熟似 ê 人比並喙水好䆀 ê 我 tī 這个社團踮沬一段時間，因為讀有社團朋友分張 ê 台語文交家己 tī Pixnet 痞客邦 mā teh 訓練沓沓仔收水 ê 語感，就按凹軁成做大面神分張家己 tuì 台語 ê 想法，彼篇文章我無留底 mā 無通篇記持，總是因為書寫 André Gide《如果麥子不死》hōo 我得著 m̄ 捌聽過 ê 教育廣播電台交台文里長伯主持 ê 拍破台語顛倒勇 ê 台語諾貝爾文學並楦闊新 ê 世界 ---《我佇黃昏的水邊等你》。

一篇文章三重收穫，一个新電台，一本新冊，一个文學家 ê 呵咾。

「寫了真好」這是食甲 bueh 半老老 ê 我，第一擺有人 kā 我呵咾，因為這个呵老 hōo 我開始規張紙畫觀音，有台文通投稿就請電子粉鳥 kā 我送批 hōo 刊登台文 ê 台文通訊Bong報交台灣教會公報 ê 一晃過三冬，一晃過一世人，顧德莎女仕 tī 我收聽伊 ê 節目已經泅入天父 ê 懷抱(kuî-phō)，面冊 mā 因為脾土 buē 合離開幾仔冬，本底興趣趣 ê 投稿 mā 因為互相來去湠出胃滯滯無四序自動離開莫 kā 專家攪擾無接續投稿。

近來面冊又閣按無口座無通讀𪜶 ê 資料庫踅轉來有限篇數 ê 融通(iông-thong)，無口座 ê 我又閣有機會開門讀《順聰款》補台文冊貧惰家己揣 ê 訊息。

Es sollte so sein 花缽仔無種菜，有緣甲無機會讀著台文新冊消息卻讀著按《落/Làu台語-瑞士ê台語社》社長 A-kuan 推薦 ê《台語好日子》確定停版 ê 消息，隨按冊櫥反家己 ê 版本，我是二版四刷。

感謝《落/Làu台語-瑞士ê台語社》社長 A-kuan 推薦 ê《大士爺厚火氣》交《台語好日子》，無這兩本冊到今我 tuì 台文冊凡勢猶原捎無摠頭，mā 感謝台文里長伯 ê 呵咾 hōo 我知機，家己 ê 筆尾窮實無遐爾仔䆀才，Vielen Dank。