(2023.11.26 早起頓 德國尖頭草花ひき肉馬鈴薯法國焗 + 優格/1120kcal)
網路世界 m̄ 免擘腹「文字」。
前一暝寫寒人食食全全草花，隔轉工 Google 就分張食草花佮紫頭菜遮 ê 愛覕塗 ê 菜蔬，mā 好，省得我愖是按怎 Ka-pi m̄ 知食幾杯，Muse 猶未來相揣 ê 問題。
2023.03.15
想 bueh 試驗家己 ê 文學程度 sóo-tí 起手翻譯手頭有 ê 德文冊，自決定試驗 ê 彼日開始到今 kan-ta 翻譯二頁，這久步頻想著伊 mā 是受著 bueh 揣存檔(tsûn-tòng)資料 tsiah 想著家己捌做過這件代誌。
我 m̄ 知這敢有合專家 ê 標準，總是我是感覺家己翻譯甲 buē 䆀。
只是，我 buē 想 bueh 繼續落去，畢竟這 m̄ 是我 ê 專業。
另外，當興趣成做工課這 m̄ 是敨放壓力 ê 方式，sòo-pái 我抑是莫無枷夯交椅，戇猴搬石頭。
(2023.11.22 早起頓 德國尖頭草花雞肉麵焗 + Quark/979kcal)
車日子轉來《台語 tsin 輾轉》固定主持人滾一編無閣出現 hōo 我掠做伊辭頭路，押尾踅轉去我較罕 teh 踅 ê YouTube 華視台語頻道看著伊猶閣 tī 影片內底有一種「真歡喜伊閣 tī 華視潮台」ê 感覺。
是按怎 ē 按呢想，我想這應當是家己已經真慣勢看著《華視潮台》就想著「滾一編」佮愛看歌仔戲 ê「林投林刺編」。
上北東海/Ostsee車日子轉來想 bueh kā 閬掉 ê 集數聽轉來，總是窗外色緻 ē 纏綴溫度變化，我 ê 慢牛 mā-ē 綴ホルモン上崎佮落崎，就無繼續順時間車幫一集一集聽 m̄-koh 有事無事坐巴士聽落去。
自聽台語真輾轉就真慣勢話題 ê 引𤆬者是滾一編，sòo-pái 準做車日子一轉來就先聽倚日 ê 節目 tsiah 翻頭轉去聽車日子彼段無聽著 ê 集數，我猶原無感受著節目 ê 風格已經 teh 轉變 --- 由男性主導 ê Padcast 轉做 Women's talking。
我講男性主導 m̄ 是封建制度 ê 男性扞權，是講我自 tī 網路揣著華視潮台就是按「滾一編」開始，sòo-pái 伊就 kan-na 講著 Acer 我 ē 想著施振榮仝款按呢 buē 撨 ê 印象。
因為這个 buê 撨 ê 印象 hōo 我 buē 記得有一个較恬靜 ê 聲音成做主角，猶 teh 讀大學愛戲劇愛 phi̋n-phóng mā 是拍 phi̋n-phóng 𠢕人 ê 小潔。
一暝聽不可思議的夢境情節？醒來還記得多少？（上/下集）小潔講著「過暝/Kuè-mê」hōo 我想著「Keh-mê」敢是腔口差別，隨上網請教《教典》。
(2023.11.19 早起頓 白草花炕肉 + 秮仔 + 優格/915kcal)
Das Land der Bequemlichkeit? - Eine repräsentative Studie zeigt: Fast 40% der Deutschen konsumieren täglich hochverarbeitete Lebensmittel, obwohl sie es eigentlich besser wissen，這款報導 m̄ 是第一斗出現，總是伊 ê 出現 mā 成做我家己 ê 照妖鏡，照出我 tuì 白草花 ê 認捌纏綴伊 kan-ta ē-tàng 做酸菜佮 m̄ 承認 ê 慢牛厚屎尿，伊有 tsuē-tsuē 料理方式，總是我較款 mā kan-ta 款利便包轉來煮一頓 ê 那煮那哭呻 --- 呔 ē 遮爾仔酸、呔 ē 遮爾仔𠕇 ê 德國食食果真無好味素。
報導內容我無興翻譯，總是 tī 今年歇 bueh 十冬 tsiah 閣家己款一粒白草花(Weißkohl)轉來沓沓仔切絲、沓沓仔燖 ê 大雪期間讀著這篇文章，感受真大。
知影 ê 問題 m̄ 願動手改變抑是調整家己 ê 心態，準做鐵拍 ê 身體 mā buē 堪得咱按呢創 --- 文章讀煞，我隨越頭餾一遍 hōo 翁聽，向望這篇文章 ē-tàng 點拄伊 m̄ 通纏綴爸母 ê 癖性，像𪜶老母已經知影家己骨頭含梢(sau)先生 mā 清楚交代海沙仔厝無地復原，伊猶原無要意到前幾月日規間厝正經崩山 tsiah teh 吼早知就好好仔按怎閣按怎。
別人 ê 問題 m̄ 通閣喋，起因我無想 bueh hōo 家己 ê 舌成做豬砧 ê 一部份，總是我 ē-tàng 稽考家己， 是講稽考完結，我愛講我是驚死 ê 人，sòo-pái 我有蠻皮 m̄-koh 猶原無蠻皮到文章報導 ê 按呢，提家己 ê 健康匪類，總是今年 m̄ 知啥物因端 hōo 我開始決定綴季節食食，總是我就是決定綴大自然 ê 跤步食食 m̄ 是綿精綴家己 ê 喙斗喙白，tshan-tshiūnn 寒人猶原 bueh 食熱人 ê 瓜仔哖。
決定真好處理，總是決定 tshan-tshiūnn Ē 生得囝身，buē 生得囝心，我有法度生出這个想法，總是意志有伊 ê 喙斗，無 bueh kā 寒人過甲若熱人，德國 ê 菜蔬就 kan-ta 賰草花、菜擴遮 ê m̄ 是我無愛抑是 gún 翁慼 ê 菜蔬。
「Schickt die Jury nach Hause. Null Punkte」當我 bueh 放棄這項決定，這句早前 tī 冊局讀著 ê 句按海馬迷宮傱出來挨拶。
Ah---我正經是耳仔生兩葉，家己看 buē 著，現此時 ê 網路利便甲 hōo 我大大典典講「食譜」是上免投資 ê 冊，我是 buē 曉上網路請教白草花除了「酸菜」敢閣有其他 ê 食法，是 m̄。
(2023.11.14 早起頓 米蘭草花雞肉法國焗 + 優格/1189kcal)
相片是佬仔，藝術是窮實
--- Augeuste Rodin
寒人菜蔬，寒人米糧，寒人色緻。
近來看電視捷捷看著受訪者 ê 桌頂𫞼一个圓箍仔日光燈，隨 kā 翁講「彼真有應效，咱 mā ē-tàng bué 一支轉來𫞼燒儉電費。」
翁聽無我 teh 講啥隨講「後回閣見著請指 hōo 我看。」
聽翁按呢應，我隨想著這 mā 龜怪，一日到暗喝 buaih 使用核能 m̄-koh m̄ 願意加納寡錢來增加再生能源設備 ê 伊呔有可能 m̄ 捌這項有通仔 hōo 伊儉電錢 ê 物。
「伊就若病院 teh 使用 ê 徛燈，只是伊 ē-tàng 徛踮桌頂」我講。
(2023.11.13 早起頓 ひき肉美國茄番麥筍滷 + Quark/990kcal)
我一直掠做我講 ê「蕃茄」m̄ 著，起因揣著 ê 辭典攏寫 Thoo-má-tooh。
總是 Thoo-má-tooh 就 tshan-tshiūnn 德語佮英語 m̄ 管我按怎講就感覺伊是生份人。
我無追求臺語「按怎講」tsiah 正確，m̄-koh 我 mā 無向望 uī-tio̍h 標準化 kā 家己慣勢 ê 講法硬拗做別人 ê 生張，tshan-tshiūnn 咱 ê 新聞台 m̄ 管按怎揤按怎換台攏是一个腔一个範 ê 白汫無味。
餾舊文揣資料有文字記錄 ê 猶是「臭杮仔」、「柑仔蜜」、「Thoo-má-tooh」hōo 我又閣 teh khiú 大索，步頻 gún 翁問講「你敢 bueh bué Topfen 這久 tī 落價」。
「Topfen」tī 德國通用德語是「Quark」，奧地利 ê「Paradeiser」tī 是德國 ê「Tomaten」，德國 ê 雞肉是「Hähnchen」，奧地利是「Gockel」... 足 tsuē 足 tsuē ê 無相𫝛，m̄ 是 Google 揣無就無這个講法 tshan-tshiūnn 德國 ê 茄仔是「Aubergine」，奧地利是無注意聽 ē 掠伊做希臘語 ê「Melanzani」 。
一日 tī 廚房那款早起頓那聽《公視台語台Podcast》按員林來 ê 烏編講著「蕃茄」tī 中部 ê 講法，tī 食飯廳等食飯 ê 翁隔一个門喝講「Tomaten, das ist Tomaten」。
Gún 媽 buē 曉講英語更加免講德語，總是伊 ê「Kam-má-tooh」 hōo gún 翁一聽隨知影伊 teh 講啥，m̄ 免 tī 遐呼音抑是分這愛講「白音」彼愛講「文音」，𫝛款 ê 問題這久蹛德國南部 ê 我 buē 講「Sauerkohl」我 ē 講「Sauerkraut」，聽我講 Kraut 隨講我講 m̄ 著 ê 人，我 mā buē 佮𪜶了時間解釋規大拖，因為語言是活 ê m̄ 是 kan-na 釘 tī 課本。
(2023.11.09 早起頓 ひき肉野菜炒 + 秮仔 + 優格/881kcal)
Hőng 認定是菜蔬 m̄-koh 是米糧 ê 青豆仁，伊 ê 食譜 m̄ 管德文抑是英文攏比一盤全菜蔬 ê 敏豆閣較 tsuē，這正經有 14。
因為這个有 14 mā hōo 我想 bueh 斟酌知影廚房 ê 食譜冊有 luā-tsuē 是敏豆食譜， 遮反遐看敏豆就敢若 Runway 透色 ê Model 足僫見。
食食果然 mā 是 capitalism 資本主義 ê 一部份。
「Das Essen ist Kapitalismus, du muss dem Rezept folgen」(食食是資本主義，你愛認命)我手指手機仔 ê 素食食譜。
翁無應話，起因自伊綴我看 Die Ernährungs-Docs 伊 mā 開始接受無 kā 家己 ê 𠢕提掉，有一日伊 mā-ē 行向艱苦 ê 日子。
我 m̄ 是講綴食物食三頓絕對保健康，總是伊佮𪜶爸母有相𫝛 ê 病灶，真愛家己做醫生 mā 認為家己真𠢕扞健康。
舉一个例，公視電視台《這是台灣款》| 咖啡在台飄香百年 Ka-pi 專家 Hally Chen 分張按怎沖 Ka-pi，四常見著這有通仔證明我講過 ê 事項，我是決定 buē 放伊走，總是我無愛熥清飯，sòo-pái 就恬靜繼續綴節目行落去聽故事學智識。
(2023.10.09 Kari 白花仔菜塗肉林檎 + 卵包 + 芳料雞襟胸 + 優格/907kcal)
足想 bueh 知影家己 ê 喙敢有綴著手拍佮手寫 ê 字，手機仔撨好勢開始錄音 tsiah 發現無假做廣播主持人，正經 ē 掠做家己是十全--ê 加加無味按呢 niā-niā。
緊攑筆寫 Lô-má-jī 提醒家己這字愛按呢唸彼字是按華文思路湠過來，這久 ē-tàng 按呢表達較順較敆味。
當我 tī 遐無閒 tshih-tshih 熥家己 ê 聲音，翁雄雄搭我 ê 肩胛頭「我聽無你 teh 講啥，總是逐句聽起來攏有台語腔」。
「你耳仔有問題」我那講手那指選舉日無 tī 厝走去 Berlin 上電視 ê 州長。
「伊是德國人」翁講。
「州長佮我相𫝛 wir können alles außer hochdeutsch」我使一下子目尾講。
雄雄想 bueh 錄音當然有因由，這个因由這久越頭轉去看已經無值得我 uī 伊閣寫一篇。
(2023.10.08 カレー菜頭 + 芳料雞襟胸 + 清飯 + 優格/937kcal)
自早起頓食合我 ê 喙斗 --- 燒 ê 料理兼米糧，下昏飯食合 gún 翁愛食冷盤 ê 脾土，自按調整 ê 彼一日行到這久 m̄ 知敢有一月日，這久徛踮磅仔頂 ê 人開始 kā 咱褒唆「糋膩瓤猶是靠食食較贏運動，gún 兜 ê 營養師正經蓋𠢕掠漏。」
看伊半暝吹電風，暗爽甲若 Tintenfisch 我想 bueh 噤喙一下，總是搪著伊我就是有一大拖傳家佛經需要世世唸(踅踅唸）「糋膩瓤就是愛運動佮食孤項，無按呢做是讀甲博士班畢業，無校(無效)。」
凡勢是磅仔 ê 號碼傷過迷人 hōo 伊雄雄成做臭耳聾翁聽無我 ê 佛經，伊那一尾花枝喙笑目笑㽎仔㽎㽎到我面頭前講「人我擋過六月日無歕雞胿閣日日攏食好料，兼日日捧糖無洗手 ê Naschkatze。」
這是早前寫 ê 文字，現此時提出來閣餾一斗畫面猶原厚甲若窗仔外猶未成做碎鹽鹽 ê 霜雪。
翁某自2021.11月做陣糋膩瓤到今 ê 維持，gún 無枵過一擺腹肚 m̄-koh gún-ê 食食一直 teh 改變。
按寢開始三頓食サラダ到一日食兩頓早晏攏食燒無食冷，這一路行來無發生 Napoléon 講 ê Republicans(共和主義者)抑是 gún 兩人有一个人需要成做 Eugène Delacroix ê 這幅圖 La Liberté guidant le peuple 也是行向 Bayron 參加希臘抗爭 ê 路途。
Gún 翁 ê 食食慣勢我是咸豐三，講到今 ê 飫，總是我清清楚楚知影現此時 ê 改變 m̄ 是桌頂拈柑是我佮伊比賽 tsiâ 較有耐性徛踮戲棚跤，tshan-tshiūnn 這窒倒德國街仔 ê 菜頭因為伊 ê 喙斗 hōo 我等到今 tsiah 有機會佮伊做朋友，這个過程 m̄ 是手路好或是䆀 ê 問題，這个過程是無 kā 自 tī 帕水就鑿 tī 伊心肝穎 ê 偏見清 hōo 清氣啖啖，伊原仔 ē 認為伊是 Prometheus 佮𪜶爸母𫝛款。
(2023.11.13 早起頓 玫瑰草花ひき肉滷 + ドライバー麵 + 優格/892kcal)
近來整理後頭猶未貼出來 ê 文章，那整理那讀文章，有一種 thǹg-tsiap-kha 行石仔路那行那自在 ê 快樂。
近來讀華文譯本那讀那感覺，感謝家己有機會搪著當事者 --- 德國人。
起因，那讀那感覺全世界 kan-na 2 種語言，華文佮英文。
外來語決定愛翻譯做華文，外來文 mā 決定愛寫做英文體。
我 ê 14 是西班牙 ê 河流(Ñ)、德文 ê 目睭(Ö)、法文 ê 尾溜(Ç)佮帽仔(Â) tsiâu 是 ABCDEFG。
總是這 mā m̄ 是第一擺 tsiah 出現，不過伊卻 hōo 我翻草佮感謝爸母 ê 教育，每一个攏特殊，每一个攏平等，無一个較優勢抑是低路。
我 ê 14 是我無法度 kā 全部 ê 語言佮文字學到 tsiâu-tsn̂g 總是我有基本 ê 尊存，符號是逐家 ê m̄ 是孤一人專有 ê 牛牢跤請媽祖，無查埔 iōng 查某 ê 清彩。
(2023.05.19 早起頓 雞豆麵サラダ + 蘑菇夏金瓜法國焗 + 草莓優格/1094kcal)
Lächeln und fabelhaft sein sind die besten Möglichkeiten, dich an deinen Feinden zu rächen. Sie hassen, dich so zu sehen.
峇微 ê 笑容佮良善 ê 心是送 hōo 遐無對範 ê 人上媠 ê 禮物，因為𪜶 buē 堪得接接這份禮物
凡勢是受著修女恬靜面容 ê 影響，我開始愖喙講無意要 m̄-koh 海馬猶 teh 硞硞踅迷宮 ê 代誌。
店東一開喙聲嗽 buē-su teh 趕乞食，按中國來 ê 人客 m̄ 知是慣勢生理著是愛 īng 這款聲嗽招呼 tsiah 是 teh 做生理抑是伊認為這款無客氣是「香腸一條➀」。
總是，聽有華語佮英語 ê 我徛踮後爿等待招呼是聽甲耳空刺鑿目著火。
不而過，我清楚知影這 tsham 我一霎仔攏無底代 m̄ 免牚(Thènn)頭，另外我佮彼 uì 按烏克蘭來 ê 少年囡仔𫝛款，若 m̄ 是橐袋仔貯磅子，我 tsiah-buē 來遮 kā 応援(Ōen)，準做無我這个人客，這間店原仔 buē 倒擔。
(2023.05.11 早起頓 囡仔菜蔬盤 + 藍莓仔 Yogur/999kcal)
出門寄批，郵局猶未行跤到，水庫趕 bueh 出埒(lua̍h)。
撏手機仔看時間 tsiah 發現伊無愛哭愛綴路隨擔頭成做綴星揣路 ê 遠古人。
終其尾我 m̄ 是天干地支師 ē 曉看方位 mā m̄ 捌綴 Bear Grylls 學習籠仔外 ê 工夫，我 mā 捎無 Apollo 彼頭金鑠鑠 ê 頭鬃現此時捋甲佗一搭位。
我只好繼續向行伐，繼續感受伊彼頭 tuì 我來講若 m̄ 是鳥仔 m̄ 唱歌，天閣 bô-ti-bô-tang 按金棗成做白𪐞紅 ê 金含(kâm)，我正經 buē 發覺 Diana 已經 kā Nyx ê 厝宅 iōng 鼓仔燈佮燈仔花裝娗好勢。
拍 buē 死，埋 buē 密 ê 烏面賊，綴我一路感受水庫 tshan-tshiūnn 揣--著閬縫趕 bueh 濆(bùn)出塗，意志宛然發見水庫破空隨 īng 指頭仔楔入去 hōo 伊窒起來 ê Nederland 查埔囝仔靜候農夫 ê 發現按呢搬影戲無聲影戲。
四常殕殕 ê 打馬膠(tá-má-ka)路瞬間成做紅地(tuē)毯，我佮烏面賊成做聽候入門 ê 影視明星 tī 地毯挽頭折脰(bán-thâu-tsi̍h-tāu)。
划仔划，一陣冷風按腹內剾向血管敢若洗腰子 ê 機台 kā 三代漚肥，一擺清空 hōo 我頭清目明想--著 tī 這个無啥物事項是無料 ê 所在 tueh 有 teh 提供奉茶。
(2022.12.18 早起頓 Kam- má-tooh 番麥炒 + 菜蔬雞摸滷 + Kam-má-tooh 菜蔬湯/776kcal)
早前踮面冊社團捷捷讀著討論「教羅」、「台羅」、「閩羅」、「白話字」。
我 tuì 徛爿 ê 態度 tshan-tshiūnn 鳥鼠敢有洗身軀無 -- 無興趣，不過我 tuì 這4款字 ê 好玄 tshan-tshiūnn 貓隨請教有所不知 ê Google。
寢頭仔讀甲霧 sà-sà，總是捎無摠無表示無摠頭只是需要時間。
我沓沓仔看逐家討論 mā 繼續沓沓仔揣摠頭，最後踮關鍵評論讀著周盈成先生寫 ê 文章想學寫台語羅馬字但不知要選「白話字」或「臺羅」？那你知道早就撨好了嗎？。
面對 tsuē-tsuē 討論抑是建議我「應當」愛按怎樣等等 ê 分張，我 ê 態度 tshan-tshiūnn 菜瓜藤順阿母綁 ê 竹籬仔沓沓仔 peh 勻勻仔湠到今。
另外，不論是「教羅」、「台羅」、「閩羅」、「白話字」tuì 我來講攏是「揹帶」(baˇ dai)攏特殊攏重要 ，我 m̄ 免開時間佮人錚佗一條較媠佗一條較有價值，起因隨人有隨人愛鼻 ê 味 。
(2022.11.08 早起頓 芳料白花仔菜烘 + 搵醬 + 魚片糋 + 甜路杯/758kcal)
IPad kap 杯仔/Asterix & Obelix，分張 ê 相趁相喊/Sein und mein Lieblingsbuch
踮遮看著 tsuē-tsuē 人分張𪜶 ê 冊櫥，我 mā 足想 bueh 跟綴(kun-tè)，總是我 ê 冊無 tshan-tshiūnn Hulk 遐爾仔大欉，sóo-tí m̄ 通提出來豬屎籃仔也捾來品寶。不而過，我猶原足想 bueh 跟綴佮展寶。
冊1 Asterix & Obelix
Gún 翁自囝仔時就愛讀 ê 按 1959 到今，已經行過一甲子 ê 法國漫画。
這本漫画是按公共冊櫃紮轉來 ê 分張。
(減肥下昏飯。菜擴馬鈴薯焗，焗烤大頭菜馬鈴薯)
寫愛料理 ê 時，頭殼 phiàng 出這个聲 hōo 我笑甲目汁㴙㴙滴。
「曷 m̄ 是新婦仔講...」
我 m̄ 知 uī-hô ē 出現這个聲，起因我並 buē 要意別人 ê 哭呻 mā 無興佮生份人盤撋。
不過，我想應當是這句話 hōo 我掠做神魂內底 ê 警察「閣較𠢕起厝 ê 人，厝賣 buē 出去 mā 是了然」，我又閣 teh 纏綴 Blog 愛按怎寫 tsiah 有法度 hōo 人看著 ê 無聊代。
總是綿精無聊代，有當時仔 mā-ē 提醒家己斟酌一寡猶未窒滿 m̄ 是消敨 ê 記持。
參加 A1.2 德語課，Северна Македонија(北馬其頓)同學因為我 ê 色緻直接認為我是無智識 ê 人，一日到暗 tuì 我講伊捌 ê 彼幾句英語閣講「你敢聽有英語？」
因為前女朋友是臺灣人選擇佮我成做仝桌兼隔壁位 ê 法國同學，因為一句我慣勢 ê「Sauerkraut」m̄ 是伊捌 ê「Sauerkohl」開始剾洗我 ê 色緻是無頭殼 ê 人。
(2022.11.21 早起頓 馬鈴薯菜蔬烘 + Quark 搵醬 + 鱷梨仔醬 Tsioo-kóo-lè-tòo 米芳白脫牛奶/891kcal)
Tī YouTube 聽鄧惠文醫師踮新聞挖挖哇分享伊 ê 新冊想 bueh 表達 ê 靈魂。
彼久，聽好食中晝頓 ê 我，那聽那綴 leh 愖我敢有鄧惠文醫師分享 ê 症頭？
一項一項繩落來，無。
我家己 kā 家己拍噗仔，特別是症頭內底有一項是 m̄ 願接受新 ê 改變。
這个 m̄ 願接受新 ê 改變是講，比如時代已經行到愛使用 I-Bon 買車票咱 buē 曉操做 m̄ 願請教別人 kan-ta bueh 長短跤話哭呻 m̄ 願學習。
手機禁掉，我又閣那洗碗那熥四常 ê m̄ 意願佮願意。
大大喘一氣大氣，好里佳哉我 ê m̄ 意願大多數攏是無興頭，tshan-tshiūnn 我感覺 APP 無啥保險自然就 buē 學習。
(2023.01.14 早起頓 敏豆雞心豆餅 + 四季豆佐油炸鷹嘴豆餅/799kcal)
那搖尻川那唱『金罵無ㄤ』，我想著 tsham 冰箱黏黐黐 ê 枵鬼鐵。
...den, hier mus ein jeder nach seiner Fasson Selich werden.
--- Friedrich der Große 1740
Heh--la̍h，每一个攏愛照伊意愛 ê 方式過日子。
無任何一个人必須遵照另外一个人 ê 喜愛過日子。
(2022.05.13 減肥下昏飯 美國茄 Kari。咖哩煮圓茄)
Tī Malta 行跤花，我一直想 bueh 試英國印度カレー ê 鹹汫，總是搪著 tuì 印度料理有大細心 ê 翁 m̄ 管我有喙講甲無瀾伊就是無意神。
霆某螺佮成做三斑一尾是解決問題上緊 ê 方式，總是這款拗蠻鬚聳目降已經無合我意，另外一想著石獅賣甲爛肚 mā 是 m̄ 是今仔日 tsiah 出現。
「窮實我 mā 無確定印度料理敢敆喙，不過我 tuì 𪜶 ê 菜單誠有興趣」換一个方式講話，gún 翁 mā 隨按六月蛤，開喙臭換做捧糖無洗手，糖甘甜 --- 某行翁綴，綴我研究菜單。
因為 m̄ 捌食過英國料理，準做食過 mā 應當攏是無敆喙 ê 放風吹。
一間一間看 mā 一間一間講「我想，我應當無法度發揮外媽冬外孫，雞母孵鵪鶉，惜花蓮盆支持遮 ê 印度餐廳。」
凡勢是我缺喙無食福行踏 Malta ê 期間我甘願 bué 啖糝窒腹肚 mā 無法度催眠家己成做枵雞無畏箠(tshuê)，是講我按呢講 mā 真無公平，總是猶是愛拆白講 Malta ê 亞洲料理是我行踏歐洲試過上 buē 合脾土 ê 一搭。
所以，準做我就想 bueh 支持印度餐廳，總是見著 tsuē-tsuē 人甘願食美國料理 Ha̋m-bú-kuh、法國糋敆 Khòo-lah 遮 ê 食物 hōo 我 lú 堅心 m̄-thang 閣繼續試英國料理。
(2022.11.15 早起頓 玫瑰草花蘑菇炒 + 馬鈴薯丸仔 + 芥辣クリーム雞襟胸/777kcal)
本成掠做後台 ê 庫存 ē 因為一直提出來做，數量就 ē 愈來愈少。
無疑悟，那銷庫存貨底 mā 那增加，想著就愛笑。
總是，換另外一个角度看這个變化。
我是有福氣 ê 人。
我無搪著長短料 hōo 我 m̄ 免驚惶無米煮無飯。
感恩一切。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
