亂皂𥴊仔店 ⓂⒺⒾⓃⓀⒾⓄⓈⓀ

佮白草花(Weißkohl)、米蘭草花(Wirsing)遮 ê 兄弟姊妹攏屬仝一家族 ê 綠草花(Grünkohl)，伊就若䆀鴨仔(Das hässliche Entlein) m̄ 管幼穎抑是老欉伊佮其他 ê 兄弟姊妹就是生做無相𫝛 ê 瘦抽無大頭 kan-ta 葉。

綠草花 tī 德國通用德語號做 Grünkohl 抑有其他 ê 講法 Braunkohl, Krauskohl oder Oldenburger Palme，伊愛食落霜，因為愛食落霜 hōo 伊食起來甘甜，屬十字花科植物 ê 伊 mā 有厚厚 ê 芥子油苷(Senfölglykosiden)佮飽滇 ê 維生素 - A, B2, E, K、B3，礦物質 - 鈣(kài)，葉酸，磷(lîn) 、鐵，纖維，卵白質 mā 比牛奶 tsuē ，牛奶100g/3.3g，綠草花100g/4.3g。

綠草花除了有以上 ê 營養 mā 有二級植物物質 a.k.a. 二次代謝物 tuì 免疫系統佮血油攏有真大 ê 幫贊，綠草花凡勢是按希臘湠到義大利，再按希臘湠到中西歐洲、北美洲佮東西非洲地區，栽欉時間自九月底到隔轉冬三月初，tī 德國伊 mā 有這个字名 Oldenburger Palme 是按北德 Ossietzky Universität Oldenburg(大學)生湠 ê 品種。

「照理來講德國南爿較𠢕落霜是按怎遮爾仔僫見著綠草花」愛食新沢綠草花無愛罐頭口味 ê 我請教德語比我較老較輾轉 ê 翁。

「Keine Anhnung/毋知」翁應。

我 m̄ 知影地球綴金烏已經踅過幾輾 tsiah 有法度踅到今仔日 ê 面水，不而過我清楚知影我 ê 耐性可比天頂 ê 河溪 m̄-tsiah 有法度醫治翁 ê 翁，而且 m̄ 捌發生 1789 事件，像𪜶兜按呢。

𪜶兜 ê 1789 到今猶 teh 發生，不過贏 ê 永遠是天霸王，是按怎 ē 按呢生，彼是別人兜 ê 問題 m̄ 免閣稽考 mā m̄ 免咸豐三，講到今。

我愛食菜頭，總是我清楚知影我愛 ê 菜頭 buē 合翁 ê 喙斗，德國人慣勢濫 khu-lì-mù 去𤉙 ê 滋味 mā buē 合我 ê 喙斗，所以愛食菜頭 ê 我見見著伊 buē-su Romeo and Juliet，因為家族問題無法度鬥陣。

窮實 mā 無遐爾仔無捨施，翁已經改掉承𪜶爸母 Ich habe die Hosen an，褲是我穿 ê 出錢 ê 人主意 ê 歹癖，總是我 mā 無興趣一塊桌無仝味，畢竟我 ê 興趣 m̄ 是扞廚房。

所以，見搪著菜頭準做價數媠甲 hōo 我挵著頂腹蓋，我猶是佮伊さようなら。

收著愛料理 ê 問卷(Būn-kuàn)調查，我又閣成做貓一隻綴𪜶讀紹介，讀煞無想 bueh 繼續致著青光眼，隨踅翻頭轉去剷草、翻塗，順紲栽新欉，畢竟 Helge 有交代「一个圓按算 buē 清 ê 圓生湠」，波蘭天文學家 Jan Heweliusz mā 講「水，這个物質，從來 m̄ 捌固定」(W wodzie, owej płynnej materii, nie ma nic stałego)。

我 tuì 愛料理興趣猶原無，總是伊是一个媒界 hōo 無聲量僫生湠 ê 文字佮語言有機會迵過𪜶 ê 圓箍仔聊聊仔湠出閣較 tsuē ê 圓，所以 m̄ 免繼續牛就是牛，牽到北京也是牛。

我無反對愛料理 mā 無認為愛料理無保護我 ê 權利，像食譜規捾 hőng 𢯾去，𪜶攏 m̄ 處理遮 ê 問題，起因我真清楚這件代誌 bueh tī 網路走江湖就愛知影你 ê 拍 buē 死，埋 buē 密 ê 烏面賊 m̄ 是 kan-ta 綴你綴牢牢 ê 彼尊猶有別尊佮 tsuē-tsuē 尊。

雖罔，第一斗搪著烏面賊 m̄ 是這款伊是草花做 ê 物 buē 大箍(Das macht den Kohl nicht fett)一屑仔攏無要意，是衫仔領 kiōng-bueh 弓破(Jemand der Kragen platzen) ê 風火著規腹火，總是有歲仔較要意家己 ê 健康就 buē 綿精佮這个烏面賊拚輸贏，m̄-koh 愛明呼愛敨中氣 ê 事項 mā 是愛照行 buē-tàng 繼續食草花。  

這就是押尾踅去愛料理寫副本 ê 因由，總是我一直迒 buē 過 ka̋ng 無料使用這件代誌，就規氣莫浪費人 ê 空間，這久收著𪜶 ê 電子批踅翻頭轉去看𪜶並無 tshan-tshiūnn 兔仔抑是獅按呢 Vicke 就隨上身，Helge 佮 Jan mā 倚偎來挨拶。

印度人煮一頓飯平均 2 點鐘，德國人煮一頓飯平均 6 分鐘。

好食 ê 新沢綠草花無法度炒 mā 無法度煠 kan-ta ē-tàng 𤉙、煨。

Tī Marktkauf 搪著真僫見 ê 鮮沢綠草花，我 kā 按電視台學來 ê 智識講 hōo 翁聽，順煞掛踏頭話「一公斤一包 3.99€，掛電費凡勢愛加 1€，4.99€，我出資。」

「電費無鞏金，m̄-koh 健康一無去，金銀財寶攏 bué buē 著」翁隨紲喙講。

「準做你承恁爸母 ê 癖，我 mā buē 跟綴」我 kā 綠草花囥落捒車仔，那行那文文仔笑講。

頂站仔看 DOC Fischer 分張紅菜頭智識，其中講著一段我 m̄ 捌聽過 ê 新智識 --- 顧胃腸隨請教 Google 大神，大神 mā 真聖賜  hōo 我這兩篇資料 1. Mit Karottenkur Magen und Darm stärken 2. 腹瀉便秘交替~~吃紅蘿蔔搶救敏感腸道 隨想著這篇 2021.07.19 記錄 ê 食譜，不過彼久 ê 文字齊是茶鈷 teh 呻翁要求我保守秘密越頭隨成做爸母好囝 ê 問題。

遮 ê 問題這久閣餾是 2356789 ê 揣無 1 佮 4 ê 無意無思免閣保留，起因記錄踮遮進前我已經 tī Telegram kā 伊詈甲叫阿爸阿母 mā 無較縒。

「你 m̄ 是交代 m̄ 通 hōo 恁爸母知影你愛 hőng 𠞭膽，是按怎恁爸母這久 ē 敲電話來請教，我是按怎顧𪜶後生」我較按怎驚死後 hőng 割舌，猶原無法度接受這款春天後母面，bueh 變一時間 ê 講鬼話。

過了代 ê 代誌免閣熥清飯，這久 kan-ta 需要 kā 精神囥 tī 這原生 tī 這久 ê 伊朗佮阿富汗地區 ê「紫色」菜頭。

菜頭 tuì 我來講就敢若「感冒用斯斯（用斯斯）、咳嗽用斯斯（用斯斯）、鼻塞鼻炎用斯斯⋯⋯ ê 斯斯有兩種」 白佮柑仔兩色，來到德國見著「紫菜頭」規个人 buē-su Colombo 發現新大陸按呢歡喜甲一四界展風神，這久較 ē 曉成做貓 tsiah 知影 Ach so... ' dass Bugs Bunny an einer violetten Karotte knabbert. Hätte der Comic-Hase im 16. Jahrhundert gelebt, wäre das normal gewesen.... '(你敢有法度想像漫画 ê 兔仔喙咬 ê 菜頭是紫色，不過這个畫面 tī 16 世紀是四常代) ê 見笑代，總是人攏愛經過落(lak)臉 tsiah 有法度換新面肉 --- 胡蘿蔔為什麼多數都是橘色的？傳說跟荷蘭皇室有關？

四常無 teh 要意膩瓤 ê 我步頻認真糋膩瓤兼認真寫炸(tsuànn)油日誌上主要 ê 起因是，當翁踅轉去𪜶爸母 ê 世界，我有一份資料通 hōo 伊做參考。

是講，我 mā 需要這份資料，準做我本底就有這个慣勢 kā 需要時間完成 ê 事項記錄 tī 紙本，總是樹 ē 大欉我 ê 記持 mā-ē buē 閣沿途吟唱「望你早歸」沿途收集你竹筏回航的引擎聲(記持開始食餌◎柯柏榮)。

翁爸母 ê 故事，品過 buē 閣餾就愛熥祖先交代 ê 未娶某 m̄ 通笑人囝枵。

兔仔年兜到今龍年新正，翁認定這久 ê 伊 m̄ 管按怎食甜食鹹攏 buē 破 72 公斤，sóo-tí 就做阿母 ê 乖囝順阿母交代「Weihnachtskalorien zählen nicht!」(聖誕節免減肥)食老母按北爿寄落來 ê 愛心佮伊講這攏是 90% 家己款 ê tsioo-kóo-lè-tòo。

我 m̄ 知影膩瓤需要偌 tsuē 時間 tsiah 有法度 tī 身軀起樓仔厝，總是我清楚知影今仔日無控制枵饞，明仔載隨膨風，磅仔一屑仔攏 buē hōo 我食一下仔秤頭。

凡勢捷揣冊 sóo-pái Google 紹介我讀為何有錢人大多讀紙本書？書可以提升你的這項致富能力，影片、Podcast做不到，文章讀煞，我有一種「學英語 hōo 你變好額」ê 感覺，是講讀書 tī 咱 ê 文化，應當講 tī tsuē-tsuē 文化內底本底就設定 tī hōo 你成做頭人，準做是有啥物大志向像「平等」押尾 mā 是階級 ê 表現。

我按呢講較偏激，總是這是我個人 ê 感受，我 m̄ 捌因為讀書成做好額人抑是頭人，我 mā 好字運無 Pech gehabt 沐著打馬膠歹運出世 tī 阿爾巴尼亞、古巴遮 ê 字捌 tsuē 煞紮來凶年、散(sàn)凶遮 ê 腹肚若水櫃，胸坎若樓梯(獨裁者的廚師) mā 幸運無經過 ' 美麗鄉 Pú-á 寮「總統案」(鄉史補記◎陳雷) ' 抑是《來自清水的孩子》蔡焜霖前輩(Ruhe in Frieden)𪜶彼个年間 ，不過我個人確實是較佮意紙本冊無愛倚電 ê 電子冊，是按怎有這个癖，我家己 mā 捎無摠，總是我就是無法度過淘寶四常，我需要踅街仔揣寶。

我 tī 愖，敢是出版業勼水 sòo-pái mā 愛按呢踅翻頭熥我囡仔時「學英語，出頭天」抑是無參加老師補習班，逐擺上課攏愛聽老師大大典典講「恁遮 ê 無補習，大漢做女工」按呢提醒逐家愛讀書？

我 m̄ 知影，總是我感謝承自芋仔老爸喙斗 ê 愛反冊，不過我無耐性好好仔寫字像芋仔老爸按呢字寫甲有夠媠 mā 無法度像 tsuē-tsuē 𠢕讀冊 ê 人𠢕寫文章，總是我感謝冊帶 hōo 我好奇，準做有 tsuē-tsuē 代誌到今猶無法度理解，像囡仔時讀地球科學，這久看電視 teh 講火山漿遮 ê 有啥物化學物，我猶原無法度 kā 讀過 ê 資訊佮電視敆榫，總是遮 ê 智識成做人生 ê 肥底。

像這久，我有法度自在寫寡佮食譜無相干 ê 話題，m̄-koh 到尾猶是有法度 kā 伊「起承轉合」楔主角，攏是冊紮 hōo 我 ê 自在，像《Tò-tn̄g 倒轉》ê Puigcerda Nuevo 𫝛款，有這个輦11路就通到法國 ê 西班牙城市，總是這个城市敢捌發生小說 ê 故事，彼是隨人取景，隨人寫劇本，像 Cien años de soledad(百年孤寂)。

翁問明仔載 ê 早起頓咱 bueh 食啥？

我答猶原 tī 路--lih。

「攏好食，只要你做 ê 攏好食」話猶未落地伊隨反悔，起因芹菜頭直透佮伊翁某牽電線「你敢 bueh 煮這粒」伊 tshan-tshiūnn 想 bueh 離緣，某煞 m̄ 放伊煞 ê 苦情男子請教律師。 

「我確實 tī 揣芹菜頭 ê 食譜」我成做你若升級納鐘點費，我就 hōo 你正確答案 ê 假公益律師。

「無試 m̄ 知滋味，準做試過 mā buē-tàng 掠伊 buē 按䆀鴨咪仔成做天鵝」翁若看彼粒 tuì 我來講媠甲若楊貴妃，tuì 伊卻是真僫循圖想王昭君是美女 ê 芹菜頭。

德文䆀豆食譜無 tsuē 就請教英文食譜，無疑悟英文食譜 mā 是少甲 hōo 我又閣想 bueh 熥這句話按《驚驚袂著等》學來 ê 句，只不過這斗 kā 伊換軀新衫「䆀豆遮爾無人緣」，正經無滾耍笑 tī 這个英文窒倒街 ê 年間，德文佮英文 ê 䆀豆食譜平均起來，無夠疊(thia̍p)一个 20 尺 ê 無施捨。

雖罔按呢生，踅英文櫥窗猶是較有機會搪著 Muse，畢竟英文佮人敆線 ê 歷史比德文較久長，準做腹腸無德文遐爾仔闊閬閬猶是大目孔 hōo 鰮仔魚成做三文魚，像印度四常食食カレー tī 世界猶未成做啥物攏無啥稀奇 ê 年間，伊是印度人 ê 鰮仔魚，咱臺灣人 ê 三文魚。

是講，正經愛褒唆英國，我這个讀無 Hindī ê 青盲牛透過英國網頁捷捷搪著好食 ê 印度佮四爿厝邊料理。

凡勢一斗愛款雙人食額兼人又閣蹛 tī 德國 ê 入人門，順人意 ê 性地，致使我較 buē 綿爛認定甚至成做天霸王要求 gún 翁愛跟綴我自本 ê 喙斗，顛倒反是循𪜶 ê 喙斗款三頓，只不過較按怎循猶是無法度循甲峇峇峇，像「深圳「油畫村」，複製「梵谷名作」妙手畫師卻一輩子身無分文」m̄ 管你 ê Vincent Willem van Gogh 較按怎循你猶原 m̄ 是伊，sóo-tí 我無法度百分之百成做德國人喙斗 kā チーズ、パン當做牽手按呢意愛，翁 mā 相仝，伊無法度成做臺灣人 ê 脾土 kā 豆油、珍珠奶茶鏨落萬丈深坑 ê 胃腸。

Gún 有家己綿死綿爛 ê 主張 mā 有放伴 ê 相疼痛，雖罔一寢開始故事 m̄ 是按呢搬，總是我 m̄ 是天霸王伊 ê 頭殼 mā m̄ 是 A-ta-mah-khòng-ku-lī ê 一遍賊，百世賊 ê buē 曉軁鑽，gún tsiah 有法度 kā 伊慣勢 ê 三斑擾家、蜈蜞咬蛤(kap)送出門，畢竟這款天落紅雨 ê 代誌是無可能 tī 我 ê 身軀發生，kā 食蒜仔吐蕗蕎當做是寶 ê 褒唆，我 ê 耳仔生兩葉，家己看 ē 著。

#記錄寫踮 IG ê 文字

感謝日頭伯，你 ê 提早下班 hōo 我敨放 tuì 家己 ê 起毛敲油 --- 下昏飯 mā 愛翕一下。

不過，這个變化 m̄ 是這陣 tsiah 開始，7月底 tsham 翁做陣去 Balkon 感受 tsuē 甲做大水，tsuē 甲 tshan-tshiūnn tī Bosnien (波士尼亞，第二斗)、Montenegro 搪著 ê 朋友𪜶 ê 回答出世 tī 平安年間 ê Deutschland 抑是 Schweiz 等等 ê 朋友講 ê 話「Gún 無要意恁 ê 認為，m̄-koh 感謝恁 ê 分張佮建議」，咱攏 īng 家己 ê 意愛要求別人達成連咱家己 mā 無定著 ē 實踐 ê 代誌，甚至 m̄ 捌做過 ê 代誌 kan-ta 因為你認定你比遮 ê hōo 你看無目地 ê 人較𠢕。

足 tsuē 感受頇顢寫，總是按這步開始著是好吉兆。

莫 tuì 家己情緒叨撚。

Google ê Podcast 沓沓仔徙來 YouTube 這个變化 tuì 頇顢揣 Podcast 來聽 ê 我是一个好現象，起因迵過這个變化我 tsiah 知影引𤆬我行入寫台語文世界 ê 黃越綏老師 mā 有出 Podcast《恁祖媽來了》真好聽，特別是這集EP481 黃越綏｜【名人專訪】發生在台灣首席災難記者身上的靈異事件 Feat. 眭澔平，真向望眭教授 ē-tàng 閣上一改節目，伊 ê 人生故事正經是蓋精彩。

是講是按怎 ē 講黃越綏老師是我 ê 台語文𤆬路雞，這愛按《黃越綏的意外人生》講起，讀這本冊進前我 m̄ 捌啥物號做台語詩 mā m̄ 知影台語窮實有字通寫文章，總是愈來愈無頭神 ê 我猶 ē 記持第一斗佮這本冊 tī 諾貝爾相拄搪 mā 讀有黃老師寫 ê 台語詩，我 ê 心池就開始發水泱(iann)想 bueh 綴老師我口我寫 tshan-tshiūnn 寫德文、英文、華文按呢，只不過這段路我有 kā 伊行有較久淡薄仔，總是我猶是感覺家己足幸運，有機會搪著黃老師 ê 台語詩 hōo 我知影台語 m̄ 是 kan-ta 人講 ê 口說文化，伊 mā ē-tàng 成做展風神 ê 神奇符號。

一个食譜記錄寫到遮爾仔遠 mā 是有意思，總是這是我 ê Blog，我寫遮 ê 代誌 mā 決定有伊 ê 因由。

因為 Google 沓沓仔 kā Podcast 徙來到 YouTube 無訂閱像《華視潮台》這款網路節目 ê 我 mā 因為 Google 業務調整有機會聽著閣較 tsuē ê 節目。

是，YouTube tuì 我來講上大 ê 功能 m̄ 是看影片是聽影片/音樂。

米 tī gún 兜本底是有市無路，起因雙人一雙箸 bueh 食無仝味 ê 我 buē uī-tio̍h 這塊肉幼仔雞卵糕來一斗煮兩鼎，我想這佮我本身無遮爾仔依賴(I-nāi)亞洲食食有關係。

是講，無這个症頭凡勢是德國 ê 食食環境 tuì 我來講窮實無遐爾仔白汫無味，除了魚臊掠外，遮 ê 魚臊正經 bué buē 落手，總是這个問題 tī 臺灣 mā 相𫝛，厝內有牛肉抑是挪威三文魚彼決定是價數落甲 hōo 我滿意，我 tsiah-ē 冇手。

Sóo-tí 德國 ê 食食慣勢 tuì 我來講 buē 無聊，除了較無機會食餐廳這項。

是講，蹛臺灣 mā 罕得食餐廳，起因食來食去攏彼幾項，家己料理若較成有變化。按呢講真臭煬，總是我正經是按呢想，tshan-tshiūnn 這尖頭草花家己煮就 m̄ 免固定 kan-ta ē-tàng 食豉鹹 ê 酸菜抑是豉酸 ê サラダ敆馬鈴薯按呢 ê 無變化。

經過一段時間 ê 搜揣，總算 hōo gún 揣著仝一个城邦無仝城市願意開放 hōo 𫝛城邦無仝縣市 ê 民眾跨區域踮𪜶遐種珠，雖罔，一逝路愛2點外鐘。

不過，踮這个 tsuē-tsuē 人 buē-su tī 九份仔挖金礦 ê 時間，gún 有法度 tī 這个金礦愈挖愈少 ê 年間挖著礦閣較遠 mā 是愛出發。

起因有種有保庇，有藏珠心情 mā 較 buē 纏綴新聞數字 ti 遐 leh 五時做藥，六時做石 phīnn-phēnn 跳。 

按申請到報到，所有 ê 鋩鋩角角攏是翁 teh 處理。

我 kan-ta 出一支喙回答伊遵照申請單提問 ê 問題，sóo-tí 等到人誠實到遐我 tsiah 開始擘腹。

 Tī《讀台語,學科學科學，讀台語 Tha̍k Tâi-gí, o̍h kho-ha̍k》讀著〈是按怎來美國生活了後定定予人大箍？Sī-án-tsuánn lâi Bí-kok sing-ua̍h liáu-āu tiānn-tiānn hōo-lâng tuā-khoo〉我笑甲邊仔 ê 人掠做我見著啥物好笑 ê 影片 mā 文文仔笑 kā 目神細膩徒來我遮䀐。

轉來到厝，裘仔猶未褪隨 tuì 佮手機仔黏相倚 ê 翁講「我揣著一年膨風 15 公斤 ê 因端，起因我是泰國族群。」

「你底時又閣透著泰國血統」目 m̄ 捌離開手機仔 ê 翁問。

「咱攏 m̄ 知影咱有透著偌 tsuē 血統，總是按科學研究我有綴著泰國族群 ê 跤步」我講。

「Die Ernährungs-Docs 又閣出新 ê 集數」翁問。

「你敢 ē 驚人已經行到耳順這坎站」 邀請 gún 做陣迒年 ê 主人家輕輕仔幌一下仔頭兼峇文仔笑講「buē，m̄-koh 我足驚健康無去」話 tsiah 濆出喙紅酒隨斟落 hōo 我想著李勤岸教授分張 tī《青春寫真》ê 心梗塞故事 。

2023 熱人，翁 ê 這位朋友佮李勤岸教授仝款，天猶未光心臟就 kā 伊喝醒，因為伊有食薰 mā 捷捷 tī 三更半暝 hōo 雄雄挨拶 ê 嗽舞甲失眠，伊就起床一个人坐踮客廳那看電視那食四秀仔配一杯紅酒等拆箬。

四常 tī 伊 teh 等拆箬，伊猶有法度因為紅酒佮四秀仔 kā 睏神(Sandmännchen)唌過來 hōo 伊閣小小仔瞇一下，這斗 m̄ 管伊按怎延睏神，睏神就是 m̄ 來相揣，顛倒 kā 疫病神(やくびょうがみ/Yakubyōgami)揣來佮伊做伙喝拳拚輸贏閣喝甲電公電母 mā 來摻一跤，伊 tsiah 發見閣按呢家己節脈 m̄ 免 tuì 家己講慢慢仔是，免驚惶，是直接上車往西方，隨錢包仔提 leh 按病院出發。

人一到病院急診室猶未開喙講病灶，護理師隨叫先生來，先生 mā 隨問胸坎敢有疼，伊應有，就隨 hőng 送去開刀，紲落來 uì 手腕(uánn)囥引導管。

Tī 伊 teh 蹛院 ê 期間，伊無講著伊有心梗塞 mā 無講伊裝幾支弓仔，總是當 gún 翁 kā 伊蹛院佮治療 ê 狀況講 hōo 我聽，我第一个想著就是心梗塞，起因按《醫師好辣》看來 ê 智識有講著查某人因為ホルモン得著心梗塞 ê 機會較無查埔人遐爾仔懸，m̄-koh 這無表示查某人 buē 有這个病症，特別是有食薰 ê 慣勢。

雪走，霜倚，霜行，雨來。

發穎 tī 見日 ē 驚，見雨 ē 笑番薯島 ê 我沓沓仔感受著 hőng 欣羨 m̄-koh 卻是選擇自我了斷 % 上懸 ê Suomi 人是按怎 ē 按呢做，起因我 mā 開始感受一種無法度控制 ê 悲傷。

彼 m̄ 是青春少女 ê 無愁揣愁，彼是一種你雄雄感覺活 tī 這个世間蓋無味無素 ê 是按怎閣 bueh 按呢蹽落去 ê 無奈何。

我無鬱症，總是好好仔一个人開始綴這款想法踅 hōo 我開始好玄敢誠實是「日頭」曝無夠？

餾猶記 ē 牢 ê 科學檢驗，看家己 ê 皮膚變化，熱人 ê 跤跡猶印 tī 保守地區，按呢我並無嚴重 ê 欠 Vitamin D，當然這是我家己做王祿仔仙 ê 答案，無科學證據，總是我 m̄ 是烏肉底 hōo D 揣無所在上車。

自徙岫到德國捷 hōo gún 翁講「你食飯若 teh 行軍。」

寢頭仔聽伊按呢講，我掠做家己正港 teh 行軍，押尾發見伊有才調一頓飯食 bueh 40 分鐘，是因為巧手機仔 mā 交伊鬥陣食飯頓。

像今仔日翁仔姐做陣食頓，我測食頓時間大約 15 分鐘結束，伊大約 30 分鐘。我 15 分鐘結束規个胃脹甲若雞胿，伊沓沓仔食 30 分鐘猶原喝枵燥 hōo 我想著囡仔時阿母堅持 m̄ hōo gún 食飯湯 ê 理由。

無經過喙哺 ê 物除了傷胃閣食 buē 飽。

我順阿母 ê 話繩今仔日 ê 飯頓，除了馬鈴薯泥 m̄ 免喙哺，玫瑰草花、紅菜頭、木瓜齊愛喙哺，一喙馬鈴薯泥，一喙紅菜頭玫瑰草花照理來講食是食甲 ē 哽胿 tsiah 著，呔討伊食 buē 飽。

德國鳥鼠正經無洗身軀，蓋鼠(趣)味。

交德國人講德國寒人菜蔬，10 个德國人隨有 10 个燃一鈷 buē 記持禁火 ê 茶請我啉「德國寒人寒甲菜蔬種 buē 出來，所致 gún 慣勢 tī 寒人交熱人生菜過日。」

早前 m̄ 捌扞過鼎，自然 buē 去要意德國食食市場，自開始扞鼎我定感覺家己 ê 目睭有問題，起因德國 ê 寒人菜蔬交《穆斯林與猶太少女》所形容 ê 無啥無宛 2 體，有茄仔有 Kam-má-tooh 等等，唯一無相𫝛是向時 ê 鞏金閣包銀成做目今 ê 四常，人人食 ē 起 ê 進口菜蔬。

另外，準做德國寒人無菜蔬， 罐頭酸菜、罐頭紺草花抑是鹹篤篤 ê 瓜仔哖等等 mā 窒倒街有地 bué，而且這久 ê 氣候 hōo 無著時 ê 草花兄弟姊妹猶有才調 tī 12 月天青 líng-líng 妝娗田園。

我捌 tī 2 月天見過發甲健欉 ê Wirsing 米蘭草花。德國 ê 米蘭草花最後收成是 11 月底，本地栽種 ê 米蘭草花賣無夠額 ē 按意大利進口。

相片是佬仔，藝術是窮實

von Augeuste Rodin

寒人菜蔬，寒人米糧，寒人色緻。

近來看電視捷捷看著受訪者 ê 桌頂𫞼一个圓箍仔日光燈，隨 kā 翁講「彼真有應效，咱 mā ē-tàng bué 一支轉來𫞼燒儉電費。」

翁聽無我 teh 講啥隨講「後回閣見著請指 hōo 我看。」

我一直掠做我講 ê「番茄」m̄ 著，起因揣著 ê 辭典攏寫 Thoo-má-tooh。

總是 Thoo-má-tooh 就 tshan-tshiūnn 德語佮英語 m̄ 管我按怎講就感覺伊是生份人。 

我無追求臺語「按怎講」tsiah 正確，m̄-koh 我 mā 無向望 uī-tio̍h 標準化 kā 家己慣勢 ê 講法硬拗做別人 ê 生張，tshan-tshiūnn 咱 ê 新聞台 m̄ 管按怎揤按怎換台攏是一个腔一个範 ê 白汫無味。

餾舊文揣資料有文字記錄 ê 猶是「臭杮仔」、「柑仔蜜」、「Thoo-má-tooh」hōo 我又閣 teh khiú 大索，步頻 gún 翁問講「你敢 bueh bué Topfen 這久 tī 落價」。

「Topfen」tī 德國通用德語是「Quark」，奧地利 ê「Paradeiser」tī 是德國 ê「Tomaten」，德國 ê 雞肉是「Hähnchen」，奧地利是「Gockel」... 足 tsuē 足 tsuē ê 無相𫝛，m̄ 是 Google 揣無就無這个講法 tshan-tshiūnn 德國 ê 茄仔是「Aubergine」，奧地利是無注意聽 ē 掠伊做希臘語 ê「Melanzani」 。