亂皂𥴊仔店 ⓂⒺⒾⓃⓀⒾⓄⓈⓀ

我愛聽你唱歌，我 mā 愛唱，咱攏 leh 唱歌，只是咱 ê 懸低音無相𫝛按呢 niā-tiānn。

我 buē 講家己 ê 台語真𠢕講，總是伊是我自細漢講到今 ê 語言。

我 ê 年間無機會接受台語抑是客語教學，現此時有機會迵過教育部兩部辭典佮其他辭典學習台語佮客語，我感覺家己誠實是好字運。

雖罔，我 ê 客語自開始接觸學到今猶原離離落落，總是客語 mā 是我音樂庫 ê 一部份，而且有足 tsuē 美好 ê 記持。

自2019年開始寫台語文，我 buē 講家己 ê 台語文寫甲若 Johann Wolfgang von Goethe， 總是我 mā 無 kā 伊當做啥物形態 ê 品牌，我只是 kā 我上捷講 ê 語言寫落來按呢 niā-niā。

聽亞特聊聊天「出版社不是影印社」其中一段，前衛出版社主編鄭清鴻先生分張伊希望台文冊未來有較 tsuē tshan-tshiūnn 愛情、推論小說 -- Scherlock Holmes 這類 ê 冊。

愛讀這類型 ê 我 mā tī 心肝穎大聲喝我 mā 是，我 mā 向望猶在世有機會讀 Arsène Lupin。

我 ê 第一本台文冊 m̄ 是小王子，是 tsham 伊同齊按臺灣注文 mā 請 DHL kā 我鬥寄到德國 ê 李恆德老師 ê 「彼年的熱天」。

李老師 ê 面冊是紲《我隨意，你儘量》作者王昭華 ê 面冊，我 mā-ē 去揣文章來讀 ê 迷眾頁。

雖罔，老師講彼是伊私人 ê 口座，總是無加伊面冊 ê 我是用 Fans ê 態度 teh 讀伊 ê 文章。

Von allen Welten, die der Mensch erschaffen hat, ist die der Bücher die Gewaltigste.

Tī 人類創造 ê 世界，上強大 ê 是冊

--- Heinrich Heine

看冊 ê 慣勢是照冊行跤到 ê 時間來讀。

《我隨意，你儘量》照這个慣勢應當是排到明年 tsiah ē 讀 ê 冊。

M̄ 知影別人讀這本尪仔冊 ê 感想，總是讀這本尪仔冊 tuì 我來講是一帖十全大補湯，補我 ê 生疏。

特別是 tuì 囡仔時騎鐵馬經過攏 ē 好玄 ê 林家佮 tsuē 冬前綴朋友去踅萊園 ê 記持。

我 buē tuì m̄ 捌咱家己 ê 歷史感覺受氣，起因我原仔有機會認捌咱這塊番薯島 ê 歷史。

不而過原仔愛講，一寢開始我 tuì 這本冊並無好印象。

起因是白話字。

前一站仔寫講無想 bueh 繼續 tī 遮記錄食譜，起因已經 kā 伊寫踮愛料理(Icook)。

今仔日料理魚指菜蔬盤步頻想 bueh 繼續 tī 遮記錄食譜，這段掠做沈入大海 ê 話隨成做伸冤 ê 眾生浮出水面 tuì 我講「就 kā 你講 m̄ 免你灌 luā-tsuē 紅毛塗踅 luā-tsuē 石頭，有一日我猶是 ē 浮出來」。

' 愛料理寫，遮 mā 寫是食飽傷閒驚人揣無你是 m̄ '

這久看彼久正經是食菜，食菜，食到肚臍為界 ê 乞食攑蠓捽仔，講話無算話兼假仙假觸。

雖罔按呢，我家己 mā 清楚我並無枵狗痟想豬肝骨，枵貓痟想海底魚佮興 m̄ 知路，閣欲攑頭旗，就隨解脫紅龜生蟲，龜怪 ê 情緒叨撚。

M̄ 知影台語文愛按怎寫，總是讀《大士爺厚火氣》hōo 我想著 tsuē-tsuē 學語言 ê 人 ē 喋 ê 話題。

窮實 kā 法語佮德語學好，英語 mā 差不多精光--ah！ 

往過 kan-na 學過英語 ê 我對這款講法感覺傷譀古。

開始學德語聽法語、丹麥語佮德國 Sachsen 人講德語，我捷捷 ē 感覺若 teh 聽英國人講英語，只是聽無。

我 ê 意思是 tsuē-tsuē 法國朋友講 ê 法語攏 ē hōo 我想著英語，聽丹麥人講丹麥語佮德國 Sachsen 人講德語攏 ē hōo 我想著咱講 ê 雅緻英國腔。

非常好看 ê 小說。

按小說 ê 紋路 ē-tàng 看出語言 ê 變化。

雖罔，我並 m̄ 知影小說語法佮文字敢有調整到咱現此時 ê 語法，總是取台灣文學之父賴和先 ê〈一个同志的批信〉來做區別。

讀這本小說，我 ê 語言思路清清楚楚是台語，準做搪著日語 ê 部分 mā buē 轉過華文想法或是唸法。

讀《賴和全集》我愛拆白講，我智識無夠額，想 bueh 按台語思路讀，押尾齊齊用華文讀 tsiah 有法度理解佮讀甲順順。

自2019年開始寫網路日誌，反冊 ê 速度有放較慢...

Tsa̋ng 準備 bueh 反《大士爺厚火氣》。

我 kā《小王子》佮李恆德老師 ê 《彼年的熱天》閣餾一回想著這件代誌。

透過這兩本冊，我看著應當是三勻人，tī 當代環境學習兩種語言 ê 變化。

這三本冊按臺灣寄到德國，我先讀小王子。

網路世界 m̄ 免擘腹「文字」。

前一暝寫寒人食食全全草花，隔轉工 Google 就分張食草花佮紫頭菜遮 ê 愛覕塗 ê 菜蔬，mā 好，省得我愖呔討咖啡食 m̄ 知幾杯，Muse 猶未來相揣 ê 問題。

想 bueh 試驗家己 ê 文學程度隨起手翻譯手頭 ê 德文冊，自決定試驗 ê 彼日到目今，闊閬閬 ê odt kan-ta 二頁翻譯隨起手接紲猶未完成 ê 挑戰，總是人生半路 tsiah 出現 ê 德文猶是比人生帕水 ê 台語交秀鳳阿姨 ê 客語閣較 buē 生份，隨放這个試驗自由，起因伊無我 buē 減一塊肉，客語交台語無我僫生肉，準做我是 Nobody。

早前踮面冊社團捷捷讀著討論「教羅」、「台羅」、「閩羅」、「白話字」。

我 tuì 徛爿 ê 態度 tshan-tshiūnn 鳥鼠敢有洗身軀無 -- 無興趣，不過我 tuì 這4款字 ê 好玄 tshan-tshiūnn 貓隨請教有所不知 ê Google。

近來迵過 YouTube 收聽陳雷(吳景裕醫師)台語文學系列講座——開講台文創作——我ê台文路／陳雷 ê 演講 hōo 我想著 uī-hô 吳醫師所寫 ê 文章沈重煞 hōo 我讀 buē 離手，其他相𫝛 ê 文章 hōo 我讀甲足想 bueh 睏，甚至 buē 想 bueh 反來讀 ê 因端。

因為吳醫師行過彼个年間，tshan-tshiūnn 伊 tī 演講結尾所分張 ê 一段話，大意是按呢；

每一个人經過 ê 年閣攏無相𫝛，gún 這輩所寫 ê 故事較沈，因為這是 gún 行過 ê 年間。

這段話 tshan-tshiūnn 低緯度 ê 洋流行向懸緯度 ê 暖流溫暖我 ê 心。

起因，我 tuī 一个語言愛用一个...hm̀...過了代無興趣閣熥 ê 方式來表答，家己 tuì 伊 ê 認同佮愛 hōo 我想著囡仔時，m̄ 管講佗一款話總是有人 ē 譬相剾洗「你 m̄ 是遮 ê 人。」

論真講 tuì 這本冊 ê 興趣 tshan-tshiūnn 鳥鼠伊到底有洗身軀抑是無，攏 tsham 我無底代𫝛款。

起因，我 tuì 詩 ê 理解 tshan-tshiūnn 綴人參觀 Galleria degli Uffizi 相𫝛，逐家 tuì 作品 ê 討論宛然 Vesuvio bueh 來 Pompeii 行踏按呢 遐爾仔熱情，我煞敢若一个無腦 ê Seescheiden tī 遐四界沐沐泅四界生湠。

理解這个部份自然就 buē 閣受著感情 ê 束縛看著台文冊隨相楗(kīng)，總是無興趣又閣 bué 來讀，按呢敢 buē 傷過紅龜生蟲 -- 龜怪。

Buē--neh，自無要意鳥鼠有洗身軀無到要意鳥鼠無洗身軀--有鼠味(趣味) ê 興趣趣，是 m̄ 知影 tī 佗落讀著紹介講伊有「散文」。

我愛讀「散文」無愛讀「詩」，我想這也反應我 ê 個性，我有阿婆癖性無仙界氣質。

日本文學 tuì 我來講較生疏，應當講規个日本文化 tuì 我來講攏生疏。

青春少女，逐个朋友攏 leh 痟日本歌星日本劇，我原仔 teh 讀西方文學佮收藏西方影戲。

這久朋友 teh 痟中國戲齣、泰國戲齣、韓國戲齣，我 teh 揣臺文出版冊讀臺文閱本。

自囡仔時到今佮意 ê 事項攏 bueh 相𫝛無啥變化，唯一 ê 變化日本文學開始 teh 讀，日文 mā 開始沓沓仔 teh 學。

是按怎 ē 按呢生?

收著冊無斟酌看內容隨掠做伊是華語冊 hōo 我哭呻幾句以敨放 hőng 騙 ê 感覺，起因讀著 ê 紹介攏講伊是台語 ê 封神榜。

冊開始反 iōng 華語讀閣不止仔順，不過那讀 mā 那開始㧎㧎隨換台語讀，怪奇呔 ē 遮爾仔順，m̄-koh 我 m̄ 是文言一致按呢讀，我是自動 kā 字轉做我學 ê 台語字我講 ê 音，tshan-tshiūnn「他」我 kā 轉做「𪜶」，「不是」我 kā 轉做「m̄ 是」按呢。

雖罔按呢 ê 轉化 hōo 我讀甲順順順，總是我 mā buē-tàng 按呢 m̄ 捌字看告示一霎仔尊存攏無隨踅轉去讀𤆬讀...

我真𠢕剾洗別人「欠錢怨債主，不孝怨父母」，我家己 mā 是半斤八兩「bué 冊 m̄ 認真讀，讀無隨詈別人」。

人冊 ê 目錄寫 kah 清清楚楚「臺語原版《小封神》」又閣特別 tī 這段紹介 iōng 醒目 ê 紅底做提醒。

 我 tuì APP 系統無興趣，s óo-tí 這个態度 mā 影響我 tuì Podcast ê 興趣。

這幾日《錦荔枝的滋味》讀煞隨上網搜揣廣播劇。

廣播劇有揣著，m̄-koh kan-na 揣著 Podcast，tuì APP 無興趣 ê 我隨放棄收聽。

2023.01.13 又閣相𫝛 ê 透早那款早起頓那聽德國西南廣播電台放送𪜶 ê Podcast。

早前，無論 Podcast 聽甲偌爾仔興趣趣原仔 buē 起心動念上網掠 Podcast ê APP。

Tī 聚珍台灣見過伊幾偌擺 m̄ 捌 tuì 伊起心動念 ê 因端 m̄ 是 tshan-tshiūnn 早前踅 Books 看著冊皮 buē 想 bueh bué 來讀 ê 問題，是聚珍台灣無摘(tik)要通讀。

我 ê 意思是 tshan-tshiūnn Books ē 囥幾頁內文 hōo 讀者做參考 tsiah 決定敢 bueh 撏錢。

不過，論真講選華文冊，我 buē 遮爾仔囉嗦，為何？

華文用字大部份攏標準化，所致讀無意思抑是無確定伊愛按怎講手頭又閣無字典或是專業字典(學術專用...我是無用到學術辭典，不過手頭 ê 字典 tuì 我這个青盲牛來講已經真夠額--ah)上網查大部份攏查 ē 著，查 ē 著 ê 因端佮我注音真 lóo 無依賴(I-nāi)伊凡勢 mā 有關係，起因我是使用 hőng 嫌舊漚舊臭又閣因為伊 hōo 鬼哭，神 teh 吼 ê 倉頡輸入法。

台文字 ê 標準化按怎變化，我 m̄ 捌一箍芋仔番薯，不過我是慣用教育部 ê 推薦用字來書寫。

世界文學台讀少年雙語系列㊂《銀河鐵道 ê 暗暝》佮其他 ê 冊按臺灣寄到德國，整理好勢準備 bueh 排冊櫃想著文青 ê 分張「無法度成做大色貨、頭篩仔」想著 Hesse ê 性命行到尾站，你敢有法度聽出音符升G調抑是降A調，喙角成做月眉，冊 mā 是廣東目鏡，隨人佮意佮賣麵 ê 看人撒油 ê 大細心。

畢竟，文青紹介 ê 冊佮伊寫 ê 冊讀煞我 mā buē 合味。

我無興探討文青 ê 世界，總是我 tuì Anne hőng 按呢講真 m̄ 甘 mā 認為 tuì Anne ê 譯者感覺無公平。

不過，世界著是按呢，食食有家己 ê 喙斗讀冊 mā 是，m̄ 免要意，上重要 ê 代誌是揣著家己 ê 喙斗，sóo-pái 我正經真歡喜有機會讀著 Anne，青春少女m̄ 管Ὕπνος➀按怎來招猶原堅心成做暗光鳥佮台視約會 ê 日子。

Ah--我 ê 青春少女，想著褲袋仔袋磅子，uī-tio̍h bué 冊 kā 便當錢儉落來 ê 噤喙。

當我認為家己所做 ê 代誌 tshan-tshiūnn Hänsel(番薯 kah 月桃/你無聽--過ê格林童話) 掖 ê 麭按呢，無望。

一路按德國掖到波蘭閣轉來到德國寫出去 ê 電子批猶是一屑仔聲音攏無隨準備放棄，胡長松先生 ê《幻影號的奇航》引𤆬佮伊相拄搪。

我庄跤倯 m̄ 捌詩 ê 媠，總是讀著這篇記持 ê 海馬又閣泅入海湧滾絞 tshan-tshiūnn 彼陣讀著顧德莎女仕 ê《讀詩》相𫝛。

我 m̄ 知是海馬無事揣事來絞抑是我猶原無法度 kā 這个情緒擲挕掉。

「有人寫信息 hōo 你」

這本冊 tī 我這个連蠓仔攏無 bueh 來行踏 ê Blog m̄ 知出現過幾擺，tī 愛料理 mā m̄ 知影喋過幾仔斗就知影我偌佮意伊。

我佮意伊若 teh 佮厝邊頭尾破豆 ê 筆尾 mā 佮意伊敢若哲學家 ê 自我對談。

一切自自然然，無任何 ê 虛華 --- 我 ê 意思是揀字寫揀字講。

寫著虛華 mā 是我頇顢倒吊無墨水，sóo-tí tsuē-tsuē 字讀有 m̄-koh m̄ 捌半撇，無論華文抑是台文，總是猶是愛講華文字較好揣資料。

我講 ê 華文字較好揣資料 m̄ 是講台文字冷僻抑是豆腐字，起因遮 ê 問題 tuì 我來講攏 m̄ 是問題。

M̄ 是文青兼智識無夠額，所以 tuì 作者無印象。

按呢講 buē-su teh 剾洗啥物。

無，我無剾洗啥物，只是踅網路社群捷看著人 teh 討論作者現此時 mā 開始寫「台語散文」hōo 我感覺真好玄隨揣冊來讀。

冊讀煞拆白講我並無感受文青講 ê 特別，這凡勢佮我從來 m̄ 捌讀過作者 ê 華文作品有相干。

總是猶是愛講，伊讀起來就敢若 teh tsham 厝邊頭尾開講 ê 輕鬆自在閣直透你 ê 世界，有這个感覺 mā 凡勢是作者 ê 背景佮我相𫝛，我 ê 14 是 gún 攏是臺中大漢 ê 囡仔，雖罔蹛 ê 角勢佮年間有精差，總是成做臺中囡仔現此時蹛遠兜綴伊 ê  文字總 mā 想起猶 tī 家鄉 ê 一切佮按家鄉湠出來 ê 記持。

M̄ 知 tī 佗位讀著紹介講，伊是一本適合 bueh 成做台語老師 ê 葵花寶鑑。

彼時 hōo 一直想 bueh 有一本台語字典 ê 我按目睭金爍爍成做連想 bueh 爍一下攏 buē 閣想。

不過，因為太想 bueh 有一本台語字典閣加上總編輯是李勤岸教授 hōo 我按家己 ê 情緒叨撚轉做智慧生，準做無 bueh 成做台語老師，我相信這本詞典決定是葵花寶鑑。

因為...王秀蓉老師，我捌，韓滿老師，我捌，李勤岸教授彼愈免講就隨落單，就按呢伊成做我上重要 ê Muse 之一。

期待第二本。