亂皂𥴊仔店 ⓂⒺⒾⓃⓀⒾⓄⓈⓀ

(2023.04.18 早起頓 蒜頭麵 + 卵包 + 青花仔菜煠 + Sprotten + 弓蕉 Quark/881kcal)

翁講足齷齪 m̄-koh 胃口原仔好甲 ē hőng 僥疑，伊敢誠實 teh 齷齪。

「你看食冰淇淋一屑仔攏 buē 大箍閣 ē-tàng 糋膩瓤油」前幾日 buē-su 揣著啥物實證通 kā 我展 ê 伊，今仔日見磅仔 m̄-nā 仔無減磅卻起磅隨 tuì 我講「m̄ 是磅仔有問題就是你凡勢 kā 菜蔬肉料理透傷過 tsuē 油」。

「磅仔有歹無歹，我 m̄ 知，起因𫝛一个磅仔拄著你起磅，搪著我隨摻酸醋 m̄ 捌五時做藥，六時做石閣五分改一錢，暗頭改半暝」我講。

聽著某無一句詈隨 kā 伊 ê 暗時驚鬼，透早驚露水按呢正剾金爍爍，倒剾一缺一缺隨 kā buē 曉泅水嫌溪狹 ê 話收轉來講「Bueh 好三年，欲敗一時」。

我無紲喙，起因我清楚知影萬項攏是死窟仔水，捷戽抑 ē 焦。

只是，好話一句三分軟，歹話一句六月霜，翁某感情閣較按怎好 mā buē-tàng 講話無關後尾門。

不過，論真講我誠實 ê 想法是想 bueh 成做《驚驚袂著等》ê〈 買你保險的人攏真衰〉ê 保險員。 

(2022.04.17 減肥早起頓 塗肉林檎焗。焗烤馬鈴薯)

“For to be free is not to merely cast off one’s chains, but to live in a way that respects and enhances the freedom of others. “

--- Nelson Mandela

我非德文佮其他語文專門科，見擺若是搪著講究文法專門科 ê 朋友開始深談德文是愛照規矩來談 ê 語言。

我就會想著「Flasche leer」，然後本成有 ê 刺鑿就會由在對方叨(lo)。

起因，語言是活--ê m̄ 是死--ê，總是原仔愛講我是福氣飽滇之人，踮這个無閒 tshì-tshì ê 年間，猶原有人願意 tsham 我分張伊 ê 專業 hōo 我有機會增加智識，減少 m̄ 捌字看告示 ê 捷 teh 看戲卻因為 m̄ 捌戲文，大氣捎咧歕 buē  離 ê 齷齪，我正經愛感謝遮 ê 朋友 m̄ 管舊底就熟似抑是自來無相捌 ê 生份人。

雖罔，我原仔 ē uī-tio̍h 遮 ê 並無捷捷出現 tī 我四序箍仔 ê 事項感覺刺鑿，總是我愛提醒家己「m̄ 通怨嘆生做䆀，媠䆀攏有好人材」佮「離鄉，無離腔」纏綴當地人談 ê 語言說語言。

比論講，我所蹛 ê 角勢講著「看電視」是講「Fernsehe schauen」m̄ 是課本寫 ê「Fernsehe gucken」，開始做一件代誌 ê「開始」有朋友講「Ab geht's」有朋友講優勢腔口 ê「Los geht's」遮 ê t講法 tuì 我來講攏著，我正經 m̄ 免 uī-tio̍h kan-ta ē 曉一種講法 ê 人 teh 鬱卒，抑是綴𪜶認真認定家己 mā 是竹篙鬥菜刀。

(2023.02.17 早起頓 Poulet à la Basquaise + 雙薯玫瑰草花/928kcal)

早起頓聽翁褒唆我 ê 手藝想著作家劉靜娟女仕《驚驚袂著等》ê〈番薯遮爾仔無人緣〉mā 隨想著彼日 tī Aldi 搪著 ê 趣味。

「番薯敢誠實遮爾仔好味素」一位按非洲來 ê 朋友看我揀伊食甲厭𤺪番薯揀甲遮認真 tìm 一下仔頭挨拶笑問，這个笑容佮問句 hōo 我想著按 Togo 來德國做穡 ê 阿麗搪著人建議伊「肉 m̄ 通食傷 tsuē」伊 ê 標準回答「你敢知影肉 tī 非洲 m̄ 是鞏金是金仔？」

咱攏慣勢提家己 ê 角度來看別人 ê 世界 mā 好玄咱慣勢 ê 料小是按怎成做別人 ê 特殊。

按番薯島來 ê 我 tuì 番薯 ê 感情就敢若翁 tuì 馬鈴薯 ê 目尾免徙 mā 看 ē 著伊 ê 料小少缺，總是這久 m̄ 是彼久，我 ê 料小少缺成做鞏金物，翁 ê 料小少缺猶原是窒倒街 ê 飽滇 hōo 我見著番薯 mā 成做攑香對綴 ê 人，無綴人 bué buē-tàng，特別是落價。

「你知影番薯 tī 臺灣就 tshan-tshiūnn 你 ê 白草花遐爾仔少缺 ê 無人緣，m̄-koh 自出名人 kā 伊當做保健食品來食，伊隨按吳郭魚成做臺灣鯛按呢身價反幾仔倍，恁德國決定有食著 gún-ê 喙瀾」我刁意故講。

「真有可能」翁笑應。

無人緣 ê 番薯是按怎按塗炭仔成做皇后，這窮實 mā 無啥特別，就請𠢕講話 ê 人出一支喙一直餾一直餾 tshan-tshiūnn 臺灣 ê《57健康同學會》，我 m̄ 是講《57健康同學會》kan-ta 出一支喙，我只是比喻 tsuē-tsuē hőng 認定是舊漚舊臭 ê 物，迵過專業者 ê 分張 hōo 咱有機會重(tiông)新認捌老朋友，這是一件真好 ê 代誌，只不過遮 ê 智識捷捷成做咱家己 ê 王祿仔仙，咱 kan-ta bueh 聽家己佮意 ê 物佮合社會溫度 ê 事項。

(2022.12.16 早起頓 林檎金瓜烘 + 頭目萵仔菜生菜盤 + 德國煙腸卵包 + 莓仔 Quark 甜路杯 + 寮仔チーズ果子醬俗麭/843kcal)

凡勢是我無理解意思或是我較頇顢理解回函 ê 意思，致使閣寫一斗 ê 光批猶原恬寂寂。

總是，我小面神我家己 ē 稽考 gún 翁捷 tuì 我講 ê In Deutschland gibt es nichts kostenlos (踮德國無啥物是無料)。

㧎牢 ê 礙虐就隨敨放--ah。

Buē 纏綴礙虐金龜磨，mā 隨家己動手做手工。

寫到遮愛呵咾面冊。

咱 ē-tàng 家己選擇「註銷家己」。

(2022.04.14  減肥早起頓  德國卵煎餅。德國煎餅)

餡包到一半我想著這段話鼻酸酸目眶紅...

只不過，這个感觸愛等到十外冬後 ê 2022.4.14 tsiah 有法得感受大笑過後 ê 層層疊疊 ê 數念佮幸福。 

Mein Oma Bertha hat es schon immer gewusst: Wenn wir nicht aufpassen, fliegt unser Hans Peter eines Tages noch weg!

我 ê 阿媽 Bertha 一直攏知影 tsit 件代誌「Lán 若是無注意，有一日 lán-ê Hans Peter ē hōo 走無去。」

--- Hape Kerkeling, Ich bin dann mal weg

(2022.11.15 早起頓 玫瑰草花蘑菇炒 + 馬鈴薯丸仔 + 芥辣クリーム雞襟胸/777kcal)

本成掠做後台 ê 庫存 ē 因為一直提出來做，數量就 ē 愈來愈少。

無疑悟，那銷庫存貨底 mā 那增加，想著就愛笑。

總是，換另外一个角度看這个變化。

我是有福氣 ê 人。

我無搪著長短料 hōo 我 m̄ 免驚惶無米煮無飯。

感恩一切。

(減肥下昏飯 紺草花雞排。雞排紫甘藍)

近來一直想 bueh 做一斗 kā 早前囥 tī 愛料理 ê 相片全數刣掉，起因我無想 bueh 繼續跍 tī 遐。

是講 mā 無人叫我愛跍 tī 遐，是我家己倚過去....

總是，我著是有這个病症，無佮意 ê 事項決定愛規捾消失 tsiah buē 刺鑿。

總是，一筆一筆刣我 mā 無彼个閒工，就煞煞去.....

當我願意放伊煞煞去，我雄雄想 bueh 吼，起因我總算學著扴著魚刺 mā 愛冷靜 ê 智慧。

感謝這个問題，伊 hōo 我接受家己 ê 缺陷 - 迎新棄舊。

(減肥下昏飯 煠卵白跤蝦冷盤。白蝦蛋沙拉)

Tsa̋ng 按病院坐輕軌轉來厝 ê 過程。

步頻想著這件代誌。

論真講，我應當是 tui 遮 ê 一切感覺驚惶。

因由，遮 ê 一切 tuì 我來講是 m̄ 捌看告示。

不過，這个所在帶 hōo 我 ê 恬靜佮自在是彼个 tuì 咱 tsuē-tsuē 臺灣人 buē 講生疏 ê 角勢 m̄ 知幾仔倍。

總是我 mā 是愛講我較頇顢 buē 曉 tsham 人盤撋...

M̄-koh，踮這个 m̄ 免斟酌看就 thang 知影我是外國人 ê 所在。

(2023.03.17 早起頓 Kam-má-tooh 卵湯麵 + バター敏豆炒/687kcal)

3月13參加查理開講會。

這斗 ê 開講主題是白色情人節。

檢采是我 ê 歲頭迒過上卌佮遮 ê 節日我自早就 m̄ 捌過。

Sóo-tí，我 tuì 這个節日 ê 感受無遐爾仔深。

不過，當主持人問我，gún 翁某按怎分享彼此 ê 愛。

彼陣我 kan-na 想著 gún 翁逐日 ē kā 我掠龍這件代誌。

落線，我想著這件代誌我問翁「若是你你 ē 想著啥？」

(2022.12.08 早起頓 ひき肉馬鈴薯 Tshì-sù 滷 + 水牛 Tshì-sù 菜蔬生菜盤 + 藍莓優格/901kcal)

翁 tuì 錢項佮感情 ê 想法是行正爿，我是行倒爿。

兩个想法無相𫝛 ê 人有法得相佮牽手到今，無一个人需要 kā 橫柴剖 buē 開當做練身體或是 kā 歹話當好話聽當做是食補。

窮真講我個人是認為佮我家己 m̄ 免蹛人 ê 砛簷跤討食有關係。

起因，gún 兩个人攏無彼款，拜堂後 m̄ 管水較按怎淹到鼻空攏愛繼續齊行仝命到透尾。

總是，拆白講無這款想法 ê 人是我，m̄ 是 gún 翁。

我 ê 意思是門扇枋鬥 buē 峇，我 buē uī-tio̍h 落塗紙頭無姓，紙尾無名這款問題 tuì 家己講搪著 ê 問題攏是有彼號喙無彼號心來解釋落塗時八命字。

我 ê 四常真簡單。

(2022.12.10 早起頓 番薯煙腸炒 + 水牛 Tshì-sù 瓜仔哖番麥生菜盤 + 洋刺波弓蕉優格/1050kcal)

無日 m̄ 知晝，無鬚 m̄ 知老。

雖罔，歲頭一直纏綴時間沓沓仔 tī 向前行，m̄-koh 記持煞 m̄ 捌纏綴歲頭向行前，tsuē-tsuē 代誌定定是一耳空入，一耳空出 hōo 家己無法得 iōng 這款態度「時到時擔當，無米 tsiah 煮番薯湯」來處理代誌，起因現此時 ê 家己捷捷是騎牛揣 m̄ 見牛。

一个物件 tsiah 拄用過--niā，後一秒著會揣甲心狂火著，氣怫怫、𧿳𧿳跳，sóo-tí，我已經清楚知影家己有九月狗爁日，頇顢查某理 buē 直 ê 特性，趁這久記持 tsham 咱重重疊疊，緊 iōng 手刀 kā 伊寫落來。

故事1.

公寓 ê 外牆 bueh 二十冬 m̄ 捌換新衫，厝頭家媽佮油漆公司 kā 價數攏講定了後，油漆公司 ê 人專工來阮 ê 社區通知逐家，𪜶底時 bueh 來開工。

彼久，Daniel mā tī 厝，四常攏聽伊 tsham gún 遮 ê 厝邊 īng 通用德語(Hochdeutsch) 破豆，彼日聽伊應答油漆公司人員 ê 字句，連我這个外國人攏知影伊 īng Schwäbisch 應答。

(2022.12.13 早起頓 菜蔬印度卵 Kari + 雞肉珠仔豆生菜盤 + 清飯 + 蘑菇敏豆炒/720kcal)

讀新聞讀著「註銷文化」，我想著這件代誌。

踮這个網路利便 ê 世界，你想 bueh kā 家己註銷 mā 是一件真僫 ê 任務。

起因，咱 m̄ 免迵過別人 tuì 咱氣持ち敲油，咱家己就真𠢕 tuì 家己敲油。

是按怎無人來我 ê 網頁行踏，我寫甲遮爾仔好，相片翕甲遮爾仔專業，一切手路攏遮爾仔十全。

我無這个症頭，總是我真愛註銷家己。

這个註銷 m̄ 是這个口座無應效換另外一个，這个註銷是 tī 網路世界我 kan-ta tī 家己 ê 空間，恬靜享受孤鳥插人群。

(2023.04.14 早起頓 寮仔 Tshì-sù 塗肉林檎 + 敏豆鰮仔魚生菜盤 + 果子優格/982kcal)

「若是寫臺文敢有人 ē 來我遮看影片」翁問。

「我 m̄ 知影，m̄-koh 你 ē-tàng 參加臺灣人 ê 社團」我講。

「啥物意思?」伊問。

「參加臺灣人 ê 社團你就知影答案」我應。

「我無 bueh 成做網衝」本底猶中氣十足 ê 聲音瞬間成做貓仔聲。

「歹勢，我耳空重，你敢 ē-tàng 講較大聽寡」我講。

「你若是無佮意我請你寫華文直接講就 ē-sái...」伊 ê 聲音愈來愈細聲，我 ê 耳空 mā m̄ 知發生啥物代誌，步頻成做順風耳。

(2022.12.23 早起頓 玫瑰草花馬鈴薯絞肉炒 + Bé-khòng 白花仔菜焗 + 洋刺波時計果麥角優格/1002kcal)

Tsuē-tsuē 代誌因為捷捷接觸成做慣性就 buē 理落心肝蒂 ê 礙謔。

起因逐家攏按呢相𫝛免掛意，橫直一隻喙糊瘰瘰抑是盤喙錦猶原比頂真較有法得 hōo 成百成千 ê 目睭按咱遮炤過來。

Iáu-m̄-koh，mā 有 tsuē-tsuē 代誌 ē 因為捷捷接觸反倒轉感覺理路無通就開始搜揣資料敨放拍結毬 ê 中氣。

Tshan-tshiūnn『阿表』這个字名 ê 台羅。

寢頭我是使用「講我的名」標示 ê 「A-piáu」做書寫。

不過，便寫一回神魂就攑手問，這个生份人是 tsiâ。

總是，我在來 m̄ 捌管待伊 ê 攑手。

(2023.02.21 早起頓 兔仔耳馬鈴薯サラダ + 幔チーズ ê 雞肉 + Yogur 搵醬 + Ayran 林檎/1044kcal)

我 tuì 食 ê 態度較垃圾食垃圾大。

這垃圾食垃圾大 m̄ 是講，物食臭臊我 mā buē 要意。

我 ê 垃圾食垃圾大是，我 buē 纏綴商品包裝日期來決定物食猶原 ē 食抑是 buē 食。

Tshan-tshiūnn 這份料理 ê 雞肉就是按超市落價專區遐款轉來又閣囥一睏仔久 tsiah 挈來煮 ê 一項物食。

不過，我這款食食態度 tuì 萬事攏愛遵照「專家講咱愛按呢過日子」ê 翁來講這是自殺行為。

Sòo-pái，正經愛講 gún 有法度牽手做伙到今 mā 是無簡單。 

起因，這誠實是 teh 比賽啥人 ê 氣較長啥人 ê 徛馬勢 tshāi 較穩佮無一个人需要 iōng「氣暢忍」來「渡日子」。

(減肥早起頓 番薯鱷梨仔蝦冷盤。地瓜酪梨蝦沙拉)

台語有一句俗語「入港隨灣，入鄉隨俗」。

昨暝 bueh 睏進前，讀著臺灣獨立冊店 tī 11.11 這一日 bueh 暫時歇店 ê 新聞消息。

起早頓讀著這條新聞，已經食落喉 ê ka-pi 險險 bueh 噴出來。

起因我若敢若步頻理解著11.11是按怎 ē 遐爾仔受歡迎 ê 因端。

因為「狂歡節」正式開始。

Gún 翁看著這个畫面笑甲反肚講「Das ist typisch Norden, immer so gemütlich」.

伊講煞，我笑甲 kā 拄食落喉 ê ka-pi 噴甲規个桌頂...１