(減肥早起頓 鱷梨仔番麥生菜盤。酪梨玉米沙拉)
翁佮我攏愛食台灣栽 ê 鱷梨仔。
臺灣品種 ê 鱷梨仔向時 mā 捌出現 tī 德國，押尾 m̄ 知影發生啥物問題無閣進口，咱臺灣栽 ê 彼款品種。
這斗踅超市人猶未行入店內，先徛踮玻璃窗等翁來相會 mā 那探內底 ê 菜蔬果子，見著這斗 ê 鱷梨仔若較大欉隨家己補腦「敢 ē 臺灣來？」
翁一行跤到，我 mā 隨徛鱷梨仔面頭前 tuì 伊金金相。
M̄ 是，這鱷梨仔按 Israel 來，隨越頭 tuì 翁講「我掠做臺灣 ê 鱷梨仔 mā 外銷到德國。」
翁聽我按呢講 mā 隨倚過來看「德國向時攏進口這款大欉 m̄ 知 tī 底時換做細粒子」伊 mā 那講那 kā 隔壁細粒子提來做比較。
我 tuì 鱷梨仔 ê 印象 kan-ta 伊是鱷梨仔 m̄ 捌想過大欉佮細粒子隨 bueh 揀價數較媠 ê 細粒子，翁隨講「我較佮意大欉--ê。」
(減肥早起頓 鱷梨仔卵包。酪梨荷包蛋)
這睏仔身體荏 kan-na 款早起頓，下昏飯就放牛食草。
這款看起來誠自然 ê 代誌 m̄ 知按怎直直 tī 我 ê 頭殼踅金龜磨。
我想決定是想著往擺 ê 故事，總是我無興咸豐三，講到今。
M̄-koh，我清楚知影遮 ê 往過是家己 ê 滇流佮洘流，我家己 mā 捷捷無事揣事三不五時伸手 kā 搣一下。
遮 ê 代誌 tuì 我來講窮實 buē 造成凝心抑是困擾，總是𪜶 tshan-tshiūnn 蠓，煩。
講著這感謝德國無啥蠓，至少 gún 蹛 ê 角勢無啥蠓，m̄-koh 熱人有足 tsuē 胡蠅。
起因，潘桶2禮拜收一改。
(2023.10.26 早起頓 紅菜頭大同仔雞肉炒 + Yogur/760kcal)
這斗 ê 無四序 hōo 我想著少年 ê 代誌。
因為 m̄ 捌假捌 tuì 朋友講寡我認為 ê 笑詼。
這久家己搪著。
雖罔，病症無相𫝛 mā hōo 我艱苦甲 叫 m̄ 敢。
我知影彼久 ê 我 m̄ 是刁意故，總是一想著朋友無奈何(ta-uâ) ê 表情 hōo 我更加感謝我有機會接觸 tsuē-tsuē 智識 hōo 我避免閣較大條 ê 病疼。
紅菜頭雞大同仔肉炒
2021.06
翁某做陣 tī 2021.07 減肥
Gún 翁按79公斤行到72公斤，時間4個月
Das Ziel meines Mannes ist erreicht - Juli ~ November,2021
My husband's goal has been achieved - July ~ November 2021
我按xx公斤行到...猶原 teh 行...目前八月日左右，油炸(tsuànn)13.6公斤，算是已經達成目標 - 52kg
Ziel erreicht。Goal achieved
Tuì 未來慒心 tshan-tshiūnn 鳥鼠
今仔日 kā 明仔載 ê Tshì-sù khian 了了
Zuknftssorgen sind Mäuse,
die heute den Käse vom morgen fressen
今仔日回診日，翁拄好 m̄ 免上班
鬧鐘仔一喨伊隨 tuì 我講露西亞動手矣
聽著這个消息隨想著厝邊阿羅 ê 擘腹
(2023.01.16 早起頓 雞心豆 Kam-má-tooh 湯 + 豆腐蘑菇炒/660kcal)
這款問題喋甲生菇 ê 𤺪，總是 mā 是 buē-tàng tsua̋nn 按呢抨 leh 無 kā 處理。
Bueh 出門處理病灶進前，gún 翁又閣 uī-tio̍h「一仙」無儉著 teh 跳童，我猶原想 bueh 維持 gún-ê 姻緣 sóo-tí 欶一口氣隨 kā 耳空門關起來。
伊見我無出聲掠做 ē-tàng 繼續成做茶鈷呻 buē 離，就繼續呻。
雞卵密密也有縫，睏去 ê 火山 mā 有精神 ê 時陣「我無霸佔你攄 APP 就 ē-tàng bué 俗價衛生紙 ê 時間」看伊彼支喙已經成做𪜶老母 ê 魚仔喙，我按馬西馬西醒過來，因為我清楚知影我家己無𪜶老爸 ê 好性地，有法度看𪜶老母按呢規世人。
「Gún 講一擺做忌，一擺少人，伊 ê 意思是講越來越無仝心，咱現此時 ê 狀況 mā 差不多 bueh 行到完全無仝心」我講。
聽著雞母 teh 啼，伊隨講一大拖沙 mā 掠做我 ē 接受伊遮 ê 沙，我若猶閣 tī 悲傷內底我 ē 接受伊 ê 話屎，總是阿母轉去塗州賣鴨卵 mā 11 冬，閣較頇顢生卵 ê 鴨母 mā-ē 生卵，見伊猶是 buē 曉駛船嫌溪狹 m̄ 願講句「失禮，我又閣著猴、起乩」我學遮 ê 學生囡仔指二指表示我 bueh 出聲，伊彼支魚仔喙 tsiah 願意讓 hōo 我。
「你 ē-tàng 繼續喋你是 uī-tio̍h bueh hōo 咱有閣較好 ê 生活，總是我捌講過我 m̄ 相信遮 ê 錢有法度 hōo 咱儉著一間厝，起因你儉 ê 一仙拚 buē 過你送出去 ê 虛華。」
Gún 無做 m̄ 著代誌
Wir machen kein Käse
翁問敢有興趣 kā 你蹛院 ê 故事寫出來投稿
想幾仔瞑了後，我 tuì 蹛院 ê 故事無興頭
不過，我 ê 頭殼直透踅這句話
這句 tī 病院附近讀著 ê 話
Mein Mann fragte mich, ob ich Interesse hätte, einen Artikel über den Krankenhausaufenthalt zu schreiben
(2022.12.13 早起頓 菜蔬印度卵 Kari + 雞肉雞豆生菜盤 + 清飯 + 蘑菇敏豆炒/720kcal)
翁問「你感覺寫台文抑是華語佗一个較有機會 hōo 人有興趣來行踏？ 」
「毋mˇ 知 diˊ」我應。
「你無歡喜」伊講。
「想 bueh 寫 Blog 閣想 bueh 有 Fans ê 人是你 m̄ 是我，另外我 m̄ 是你 ê Fans 我無法度 uī 𪜶出聲」我講。
「你 mā ē-tàng 成做我 ê Fans...」伊有一个 buē 堪得 hőng 講佮驚得失人 ê 性地隨按呢回答。
我 mā 有一个性地，講過 ê 代誌無愛一直熥 buē 離「你是褪褲放屁 --- 講廢話」我應。
「牛瘦無力，人窮白賊，你若欠錢想 bueh 靠 Blog 起一座金山，寫華文是較有出路，畢竟講華語讀華文 ê 人比你德語德文閣較大四界」見伊無應聲，我直接 kā 問題畫箍仔表示 m̄ 免閣解釋一大拖，直接決定。
(2023.01.05 早起頓 敏豆ひき肉塗肉林檎炒 + 菜擴塗肉林檎湯 + 計時果 Ricotta/858kcal)
Also das Essen bei Euch sieht wirklich gut aus und man sieht an Kleinigkeiten, das A-Pió das mit Liebe.
翁 bué 一支新手機仔，𪜶阿爸問伊手機仔 ê 相機按怎樣，翕出來 ê 相片色緻敢有媠。
做後生 ê 伊 m̄ 知是刁意故抑是貧惰 uī 𪜶阿爸翕一張仔相 hōo 伊參考，伊就清彩寄一張伊 mā teh 記錄 ê 四常食食相片 hōo 𪜶阿爸參考閣 kā 𪜶阿爸 ê 回批展 hōo 我看。
「你絕對選上䆀閣 buē 傷害恁老母感情 ê 相片，王梨酥皮餅」我講。
「這 mā 有....」
伊 tuì 家己講 ê 話 mā 聽 buē 落去，我就 m̄ 免繼續歹心 tuì 伊講「月光下看人影是看 buē 著影，特別是 kan-ta ē 曉要求別人成做伊 ê 烏面賊 ê 人」。
我 m̄ 知影別人翁婿 ê 爸母是啥物性地，總是 gún 翁𪜶爸母真特別，𪜶 m̄ 准別人比𪜶閣較𠢕，sóo-tí m̄ 管你按怎做𪜶攏有話講，tshan-tshiūnn 久冬前我照𪜶老母教 ê 手路做雞卵糕請𪜶食，𪜶爸母隨講我豬屎籃仔也敢提出來品並。
(2023.01.11 早起頓 紅菜頭雞豆湯 + 番薯飯 + 菜擴雞肉 + 弓蕉時計果優格/989kcal)
頂幾日佮翁冇談面冊股價大落，凡勢有一日伊 ē 成做一陣風飛到別 ê 世界。
今仔日讀新聞，我隨 tuì 翁講「臺灣有一句俗語，龍交龍，鳯交鳯，隱痀--ê 交侗戇。」
「啥物意思?」伊問。
「𤆬頭 ê 是這款龜鱉叨趖 ê 性地，伊 ê 花園是 bueh 按怎種出蓮花」我講。
面冊威脅 bueh 離開德國應當講是歐盟，雖罔現此時 ê 伊 tsiah tuì 德國一國喝聲，而且是針對德國無對其他國家，歐盟猶是有其他 ê 國家 mā 真期待面冊離開，像法國。
法國 tī 面冊 tuì 德國按呢「提醒」mā 隨發聲明歡迎面冊主動佮𪜶分手 hōo 面冊食 ê 塗愈厚。
面冊 ê 問題我無研究，總是我清楚知影自面冊要求歐盟使用者 bueh 使用 What's APP mā 愛使用「面冊」彼一日開始，伊 tī 歐盟 ê 業績就愈來愈少，愈來愈少，這久閣有底氣按呢喝聲，這底氣是按佗落來 hōo 我又閣成做一隻貓想 bueh 研究，不過這个想法 kan-ta 閃過一秒 niā-tiānn，起因這款耍法逐日攏 teh 看，而且看甲𤺪。
(2023.10.22 早起頓 德國尖頭草花雞肉滷 + 清飯/807kcal)
那寫關鍵字，那問翁西文 ê El、La、Los。
寫--suah，我 tuì 翁講耍笑講「無定著，我 ê 西文 ē 因為寫網誌寬寬仔轉來相揣，tshan-tshiūnn 往擺看俗麭 buē 入眼 ê 你，這久成做俗麭 ê Fans 𫝛款。猶 m̄ 過，我 tuì 西文無歧視，我只是頭腦較鈍學 buē 來，致使就先 kā 伊寄踮冊櫥。」
Gún 翁恬卒卒無出聲。
起因，伊食老出癖食向時綿死綿爛拍死 m̄ 食 ê 俗麭。
看伊無出聲，我 mā m̄ 甘閣 kā 伊洗面落--去。
因為我明白伊喙白 ê 因端。
那請教 Google 西文，那請教 gún 翁西文。
(2023.04.06 早起頓 魚指雞豆飯 + 雞豆麵 + 火箭菜紅菜頭サラダ + 林檎弓蕉優格/994kcal)
近來，早前無啥大問題 ê 肩胛疼，開始 tshan-tshiūnn 一尾三文魚按家鄉泅按呢一路按肩胛骨泅到頭殼碗 hōo 我坐 mā m̄ 是倒 mā m̄ 是，不過，這个無爽快是我家己 kā 招 m̄ 是伊硬 bueh 佮我做陣。
Tī 手目開始 teh 搐我知影我愛較歇寡 m̄ 通閣規日貼貼 tsham 電腦黏黐黐，總是我著是蠻皮認為伊 buē 成做啥物大病疼就按呢繼續一日貼貼 tī 遮舞這做議量 ê Blog。
押尾，三文魚總算泅到家鄉完成伊 ê 任務，這个 hōo 疼甲 buē 睏閣 kiōng-bueh buē 扞鼎灶 ê 搐 mā 按睏甲落眠成做睏 buē 落眠 ê 草山火山按呢 hōo 我規个人愛順伊 ê 脾氣過四常，這時我 tsiah 想著遐 ê 2019年按臺灣坐 FedEx 來德國 ê 冊緟(thōng)。
正經是冊緟，是講彼久 m̄ 知佗落食 m̄ 著藥仔，竟然 buē 要意運費 ē-tàng hōo 我納一冬 ê 管理費按呢冇手 bué 冊，總是人生世事攏愛著過一擺猴 tsiah 有法度知影別人分張 ê 代誌敢有合家己 ê 喙斗佮知捌按怎調整問題，像這久 ê 我 buē 閣 uī-tio̍h 伨臺文冊啥物攏無愖就落單，畢竟一逝 FedEx 運費敆進口關稅 ê 運費攏 ē-tàng hōo 我做較 tsuē 比伨遮 ê 文學寫臺文四常過華語，較讀攏相仝 ê 作品較閣心神飽滇 ê 代誌。
一想著撒出去 ê 冇手隨徙目神去彼疊 kan-na 按箱仔搬出來一本煞攏 m̄ 捌動過 ê 冊，表小妹 ê 白河阿媽隨徛在眼前講「夭壽骨喔，了然喔，討債喔」，是講囡仔時討厭 ê「夭壽骨喔，了然喔，討債喔」這久煞成做「無毛雞假大格」ê 點拄，足愛。
廚房棉仔紙假做雞毛筅，一本一本筅塗粉 mā 一本一本沓沓仔讀，開始綴冊愖家己敢是閹雞趁鳳飛？
我 m̄ 知影，總是我知影家己 ê 筆尾真有華文氣，這个華文氣又閣真漚古 ê buē 讀 buē 聽 buē 講，不過無練習呔 ē 知影家己 ê 臺文漚到啥物程度，總是我想我 ê 臺文應當猶未漚甲爛塗 buē 糊得壁，起因我猶有法度寫出散文參加閩客語比賽，比賽結果按怎 m̄ 知影，總是這个過程 tshan-tshiūnn 寫 Blog，迵過記錄四常我那寫那揣著家己意愛 ê セット(setto)。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
