(03.10.2023 早起頓 玫瑰草花ひき肉麵焗 + 杏桃優格/1114kcal)
翁問「是啥物因端 hōo 你無 bueh tuì 人 講你著賞？」
「無啥因端」我講。
「你誠實是紅龜生蟲 --- 龜怪」翁講。
「Heh-ah，我足狡怪，m̄-koh 我足享受這个屬於我家己 ê 快樂」我講。
翁問我伊敢 ē-sái kā 我鬥放送我參加文學賞著賞 ê 代誌，我應 buē-tàng 起因我誠實足愛這个獨有 ê 快樂 --- m̄ 免發表得獎感想抑是逼家己聽別人褒唆 ê 礙虐。
不過，我原仔足想 bueh 知影𪜶爸母 ê 態度「m̄-koh 我真歡迎你 kā 這件代誌放送 hōo 恁爸母聽」我講。
「Buaih，按呢足展風神」翁隨應。
(減肥早起頓 Há-muh 水牛 Tshì-sù 法國俗麭𩛩。火腿莫扎瑞拉起司法國吐司)
收著光批請教我敢有意願接受訪問 mā 請我寫問卷。
四常 ê 我讀著光批抑是訊息 buē-su 火 bueh 燒到尻川遐爾仔趕 bueh 揣水來 kā 沃水 --- 隨讀隨回。
總是這斗狀況無相𫝛，這斗 m̄ 是四常五四三 ê 破豆，這斗是關係著 牛 m̄ 通𠢕行，人 m̄ 通出名 ê 大事件，特別是我這款歹戲鑼鼓濟，歹人家私濟 ê 人。
我知影有 ê 人準做家己 kan-ta 有豬屎籃仔 mā bueh 提出來品並，總是我較柝仔頭我無愛家己 ê 膨風水雞 hőng 刣無肉閣擲去大礐，這愛認真 kā 愖一睏...總是我是暗頭仔食西瓜，暝尾仔反症，食一喙茶隨有決定無米留人客，無食假拍呃 --- bueh 來捾豬屎籃仔 ka̋ng 品並。
Kā 我 ê 決定講 hōo 翁聽，翁隨講「我就講你是十肥九呆，無呆狀元才其中彼个無呆。」
「你足想 bueh 上電視--hooh」我笑應。
「想--ah，總是我清楚知影家己無彼个才調」翁講。
(2023.10.10 早起頓 番薑仔蘑菇ひき肉 + Linguine + 檨仔優格/1018kcal)
這幾日直直愖這句按朋友遐學來 ê「抓麻」tī 台語愛按怎表達？
請教教典揣著仝音，m̄-koh tsham「抓麻」門扇枋鬥 buē 峇，請教客語教典 mā 揣無。
早前猶 tī 面冊賴賴趖，有人見著我寫「tiàu」寡味隨講「台語無這个講法」，彼陣我 mā 無了時間解釋，不過「專家」修正 hōo 我想著真𠢕抾恨 ê 遠親表兄分張 ê 族譜歷史，gún 媽媽這邊本底是福建客家人按第一代來到臺灣，gún 這代是第九代，這件代誌隨請教客語辭典隨揣著台語專家講台語無這个音 ê「tiàu」(大埔音)：調味、搣、撮。
有 ê 人食到老 hoo-lú-bóng 猶厚甲若蠓愛嗡嗡叫，我猶未行到中箍 hoo-lú-bóng 就若倒山內海見無海仝款，凡勢是無見海，所以較醉心揣海愛無一件代誌餾 buē 講「遮本底就按呢生」，另外 tī 教典猶未見著 ê「Chhiok」/「Tshiok」mā tī 台華字典揣著並 tī「揣台語」揣著 ' 甘字典 ' ê 解釋「用手捻」閣「掠」，心內有一種講 buē 出喙 ê 快樂。
番薑仔蘑菇ひき肉
...... 材料 ......
(2023.01.17 早起頓 Bé-khòng 梨仔金瓜生菜盤 + 雞肉生菜盤 + 青豆仁湯 + Stippmilch/933kcal)
我真愛這款甜路，總是 m̄ 捌想過伊 tī 華語號做啥物名。
這久因為寫 Blog 想 bueh 知影伊 tī 日文抑是華文號做啥物名 tsiah 發見伊 tī 德文 mā 是少族民族，不過少數民族猶是揣有資料通理解伊 ê 14，按呢就繼續順伊本底 ê 字名 kā 伊號做 Stippmilch，畢竟 m̄ 是每一个人攏有機會熟似少族民族。
Das Einfache kann so gut sein: Wir zaubern heute ein einfaches, aber nichtsdestotrotz köstliches Dessert. Ursprünglich war Stippmilch dickgelegte Sauermilch, die mit wenig Firlefanz aufgetragen wurde. Inzwischen besteht sie aus Quark, Milch, Sahne und wird mit frischem Obst serviert.（資料來源：ＷDR)
Stippmilch
...... 材料 ......
(減肥下昏飯 西班牙串仔冷盤。西班牙鮪魚沙拉)
讀食譜感覺伊誠厚工無想 bueh uī 伊撆手䘼。
總是，喙嫌伊厚工手猶原 teh 振動。
真害，我竟然成做 gún 翁 ê 雙生仔。
我愛反省。
西班牙串仔冷盤
...... 材料 ......
(減肥下昏飯 白跤蝦生菜盤。白蝦沙拉)
Why do I deserve the science
to feel better about you?
At a loss I lost my cool
I denied that I found you
I tried to be a basket case
I did not surprise you
I'm trying to find a signal fire
(減肥早起頓 鱷梨仔醬塗肉林檎。酪梨醬馬鈴薯)
媽，
無機會 kā 你司奶到今一目𥍉 mā bueh 11冬，你好無？
我知影，咱攏誠好，sóo-tí 咱某囝按行無仝途彼日，咱就 m̄ 捌 tī 夢中相見。
今仔日有一件大代誌 hōo 我暢甲想 bueh 敲電話 kā 你講，m̄-koh 我知影彼是犀牛望月，總是我知影你穩當知影我 bueh kā 你講 ê 代誌。
3月16 踮社會組讀著家己 ê 字名佮字姓。
我規仙人 buē-su hōo 雷摃著隨按椅仔跳起來揣電話，電話揣著隨笑家己 tī 台灣已經四邊無一倚是 bueh 敲 hōo tsiâ。
Peh 起身那唱近來足愛唱 ê《心酸酸》那行到窗仔邊請闊莽莽 ê 世界 kā 我 ê 快樂講 hōo 阿母、阿爸佮阿姊聽。
我 m̄ 捌想過這个問題
一个看起來無嚴重性 ê 問題
竟然愛拖遮爾仔久，猶原猶未好勢
Ich habe noch nie an dieses Problem gedacht
Ein Problem, das nicht ernst scheint
Sie braucht eigentlich viel Zeit, um zu heilen
Macht keinen Mist/M̄ 通成做豬寮
(2023.02.26 早起頓 烘箱馬鈴薯條 + 菜蔬魚冷盤 + 優格搵醬 + 藍莓 Tsioo-kóo-lè-tòo 優格/964kcal)
豆仔是敵人 ê gún 翁，近來 m̄ 知踮佗落讀著食豆 ē 康健隨請我 kā 伊鬥相共 -- 加攢寡豆仔 hōo 伊食。
「豆仔敢 m̄ 是你 ê 敵人」我知影伊有專家講健康伊隨愛綴 ê 性地 sóo-tí 慼甲迵骨 ê 豆仔步頻 ē 成做塗豆擘殼：愛人，m̄ 免加問。
總是我 mā 有這个性地喙，我分張 ê 代誌伊 m̄ 信篤，專家講伊 tsiah bueh 信篤，這款大細目 hōo 我無法度無 kā 日本剾刀挈出--來 tuì 伊剾剾𫝻𫝻。
「我是耳仔生兩葉，家己看 buē 著」伊 mā 學著某 teh 剾洗伊 m̄ 通繼續鐵齒銅牙槽解釋一大拖 hōo 家己 hőng 剾甲閣較忝頭。
這月日 gún 遮 ê 超市當 leh 舉辦 Polska 月，這是超市 tsuē-tsuē 外國食品促銷(tshioh-siau)月我上佮意 ê 一个。
起因，伊 hōo 我 m̄ 免行踏 Ploska 抑是 Česko 就有機會款我意愛 ê 物食，tshan-tshiūnn「Sprotten」一款生活 tī 東大西洋 ê 細尾白銀魚(華：腓魚)。
德國 mā 有這款魚，總是「人工」貴過「魚」，tshan-tshiūnn tī Polska 佮 Česko ê Ka-pi to go，德國 ê 細杯是𪜶 ê XXL 杯。
(減肥早起頓。牛肉麵，牛肉麵)
疫情期間無通 hōo 我繼續像往過按呢起性搦地，愛按怎舞就按怎舞。
因為無法度閣 tshan-tshiūnn 往呢按呢起性搦地大聲喝講見 bueh 出門行踏較遠 ê 角勢見去台灣，真無意無思。
因為疫情 hōo 我無法度遮爾仔歹喙斗，我就開始數想晟養我大漢 ê 番薯島，而且想甲 ē 流瀾。
是講，我 m̄ 是無愛咱番薯島，只是肺炎猶未來行踏進前逐年攏愛轉去一斗 ê 狀況 hōo 我感覺真無局，起因我 tī 臺灣 ê 親人攏已經轉去塗州，我自然就 buē 特別想 bueh 轉去行行看看 leh，畢竟德國 tuì 我來講較像一个家一个厝，準做踮遮 mā kan-ta gún 翁佮我2个 niā-niā。
雖罔 tī 臺灣已經無半个親人 mā tuì 臺灣 ê 依賴無遐爾仔深，總是人就是賤，無法度清彩提著 ê 物件 buē 寶惜，無法度清彩捎就有 ê 物隨 tuì 伊數念甲目屎流目屎滴，是講 mā 無遮爾仔嚴重，總是彼感覺就敢若禁止你戀愛你愈 bueh 佮別人烏白亂愛仝款。
萬事無徛倚，正經是上僫得 ê 藝術品。
較早 tī 臺灣愛食「大麵鹼」總是轉去 mā 見 buē 記得愛食伊，這久無通轉去愈想 bueh 食一碗，不過跤手慢鈍頇顜做兼遮 ê 材料 mā 僫款，數念就隨綴遮 ê 僫 bué 成做鹿林長尾星一去無閣翻頭相揣，總是牛肉麵 m̄ 管我按怎想空想縫想 bueh kā 伊放捒伊著是牢 tī 海馬鉼針 m̄ 徙位 hōo 我氣甲規氣做一碗來趕伊出門兼敨火氣。
(2022.12.25 早起頓 番薯兔仔耳卵サラダ + ひき肉白菜焗 + 藍莓檨仔優格/952kcal)
Tī 款材料想著十冬前，少年同事相招食人生在世決定愛食一斗 ê 香港茶餐廳，尤其是「彼項料理」。
彼久，我滿心期待做陣去食「彼項足特別 ê 料理」。
物件一上桌，我想 bueh 講寡啥隨斡一个彎 kā 話吞落喉。
起因，我 tuì 別人 tuì 我展伊 ê 風神感覺誠 buē 自在，別人決定 mā 佮我相𫝛。
另外，我只是較好字運有機會比𪜶較早認捌項好食物。
想著這，新正 ê 發願 buē-su 遮 ê 氣象報告「我 kan-na 講今年有可能摔大雪 tshan-tshiūnn 彼年按呢」發心酸、發好看--ê。
總是，換另外一个角度來看遮 ê hōo 我無興頭佮𪜶繼續纓纏 ê 故事，伊 mā 是一塊鏡 hōo 我稽考家己 ê 變化，sóo-tí 熥菜尾 mā m̄ 是一件歹代。
(2022.03.15 減肥早起頓 總舖師俗麭𩛩。脆脆三明治)
我愛食俗麭，翁看俗麭就敢若咱番薯島人 tuì 家己 ê 語言遐爾仔看 buē 上目閣刺疫。
早前，我認為凡勢是遮 ê 麭 tsuē 甲 hōo 伊 tuì 俗麭無興趣，尾來我發現我 kā 問題想甲傷過簡單閣樂觀。
伊無愛食俗麭 ê 理由真簡單，就是我頂頭寫 ê 句，準做伊講伊無按呢想，事實就是按呢。
「恁爸母 ê 德語較老抑是我？」一回 gún 翁又閣 teh 講「Gún 爸母 m̄ 是輕視....」跳過 m̄ 免閣餾，我直接 kā 𪜶爸母對待2樓序大挨拶 ê 態度搬 hōo 伊看，伊隨恬去。
大狗盤牆細狗趁樣，輕視者永遠 buē 承認家己看人 buē 上目 ê 月光下看人影
(2023.03.10 早起頓 ひき肉紅菜頭 + 羅美生菜卵包 + 林檎優格/944kcal)
相片看久心開始浮冇，不過我 mā 真清楚家己無彼个才調無看食譜款三頓。
總是，浮冇 m̄ 假仙是實櫼 tī 心肝穎愛解決。
真久無反遐 ê 按抾字紙紮轉來 ê 徛厝冊，按呢換來讀字揣想像。
林檎優格
...... 材料 ......
林檎，切塊 2
(2022.11.15 5:2 早起頓。芥辣クリーム雞襟胸 + 德國馬鈴薯丸仔 + 玫瑰草花蘑菇炒/777kcal)
「這雞襟胸參咱 tsa̋ng 踮印度餐廳食著 ê 雞肉相𫝛軟，一屑仔攏 buē 柴柴 」翁那食那喙笑目笑講。
聽伊按呢講我 ê 眼前隨出現《喪禮上的故事》(微笑老妞)佮我 ê 相思仔。
《喪禮上的故事》
㊔ 甘耀明
㊓ 寶瓶
ⓦⓦⓦ 博客來
(減肥下昏飯 林檎白跤蝦生菜盤。蘋果白蝦沙拉)
露西亞講 U-kher-la-in kā 𪜶草踏甲四角磚踏無一角著，致到𪜶愛拚一帖白虎湯來解決 U-kher-la-in 造成 ê 病疼。
想著彼本 m̄ 知 uī-hô ē 賣甲遐爾仔好 ê 冊，𫝛時 mā 想著 Sebastian Haffner ê 人生故事。
我 tuì 翁講「有一日你成做露西亞人抑是抑是中國人，我又閣無機會 thang 走亂，咱兩人應當是我 ē 先 hōo 人提去種，Sòo-pái，我想 bueh 麻煩你 kā 我鬥相共。」
「你 buē 有代誌，咱攏 buē 有代誌」伊講。
「僫講--ooh，天平地無平，抱鳥母目睭青盲 m̄ 是咱出一支喙著 ē-tàng 保穩」我講。
翁目眶紅紅恬恬看 kā 我金金相，我 mā kā 伊𥍉𥍉目繼續講「咱攏 m̄ 知影咱 ê 五里鴟鴞 bueh 啄七里雞仔 ē 行到啥物所在，又閣 ē 按怎 uī-tio̍h 咱 ê 大心肝五分改一錢，暗頭改半暝...」
翁開始成做 Beethoven 我 mā 開始成做 Pavarotti「彼跤 tī Solingen ê 鼎底時 ē-tàng 來咱兜 tsham 我相會」我那唱那笑問。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
