(減肥早起頓 金瓜雞豆飯。南瓜小扁豆飯)
翁某有家己 ê 五里無仝風,十里無仝俗 ê 食頓慣勢,特別是雙人意愛 ê 物食無法度敆做伙,我愛按怎 kā 手頭 ê 秤仔提 hōo 在 buē 重欹爿,這是徒岫來德國進前 m̄ 捌愖過 ê 四常。
總是這个雙人𫝛桌𫝛箸無𫝛喙斗 ê 問題 tuì 我來講 m̄ 是 peh 青天按呢 ê 就準倩仙來鬥相共猶原無變撚(piàn-lián),起因我無真依賴(i-nāi)亞洲食食,遮 ê 超市賣啥我就款啥 buē uī-tio̍h bueh 食一塊豆腐家己撆手䘼抑是坐火車到點外鐘 ê 大城款豆腐。
我按呢寫 m̄ 是表示家己偌爾仔好喙斗,我按呢寫只是 bueh 表示,入港隨灣,入鄉隨俗,遮有啥物物我就綴遮 ê 物做我意愛 ê 物食,像金瓜 tī 臺灣我 kan-ta ē 曉提來𤉙雞肉濫豆油,來到遮我學 ē 曉捎來烘做飯食。
遮爾仔𠢕入港隨灣,入鄉隨俗 ê 我,猶是無法度入人門,順人意纏綴另外一个問題過日子,彼就是順翁自囡仔時就慣勢 ê 態度,只要無合伊喙斗抑是看無目地 ê 事項,伊隨 Nee 甲我掠做家己正經無尊存𪜶德國人 ê 文化。
總是,我 m̄ 是無自信抑是 m̄ 捌看過四海 ê 人,伊 ê Nee 真緊就 hōo 我摠著龜跤佮知影按怎節脈治病佮燃茉(bua̍h)草來治伊 ê 病症佮避邪,不過現此時 ê 我 kan-ta 有法度挽茉草避邪猶無法度 kā 針灸(Tsiam-kù),起因我猶未摸著膏肓,準做伊認為伊無病到膏肓,我猶是斟酌 teh 揣,畢竟 gún-ê 紅線是縛甲比 gún 爸母中國佮臺灣閣較遠 ê 遠,另外 gún 2 个人正經是 You and I, we were meant to be I feel it in my soul Feel it in my soul,一日若是愛分離決定 m̄ 是 gún 其中一个做 m̄ 著代誌抑是無感情,sòo-pái 我願意放下本底 ê 個性,門扇枋鬥 buē 峇就莫鬥 ê 繼續佮伊做陣調角度 kā 門扇枋鬥 hōo 合,真正 ê 合 m̄ 是𪜶兜彼款假包 ê 空榫峇甲 m̄ 免倩小木大木來敆榫。
「日晝三時久,有 ê leh 食,有 ê teh 煮,我尊存你 ê 喙斗、食飯時間 mā 入港隨灣,入鄉隨俗,總是我做 buē 到入恁兜 ê 門,愛百分之百順恁兜 ê 意,特別是無合理兼無尊存別人 ê 意」當我決定 buaih 閣纏綴伊 ê 文化踅金龜磨,彼个凡勢 ē 拆股 ê 驚惶隨走甲無看尾溜 hōo 我清楚知影愛按怎擺撥這个按別人遐傳過來 ê 病症。
像這盤,早前真愛講我無食肉 m̄-koh 見出門款物攏齊款「煙腸」、「加工肉杮仔」遮 ê 食物 ê 伊,這久正經有法度成做無肉 mā ē-tàng 過日子 ê 人,我 mā tī 這个過程學著雞豆窮真 buē 䆀味,彼陣認定 ê 䆀味 kan-ta 運氣無好,搪著半桶仔師 ê 手路。