情緒是玄學是未知 mā 是 hōo 我 tuì 鹹酸苦汫失智覺 ê 情緒叨撚 PUA。
本底掠做䆀 tsi tsi ê 排盤，換一个時間佮空間隨成做媠 tang-tang ê 作品 hōo 我想著舊年底 tsham 翁牽手做陣參觀藝術展，四常攏是伊尻川坐 buē 牢椅，入館無到五分鐘隨喝來去，你沓沓仔欣賞較晏 tsiah 相揣 ê 句交換手換我講。
「你 m̄ 是 tuì 遮 ê 物一直興趣趣」翁問。
凡勢受著皺痕無添家己添，老實樹 m̄ 願大欉 mā 愛接受家己窮真無遐爾仔興這味「你 mā 知身軀邊 ê 人 m̄ 是講劇就是踅園，我無攑香對拜就是冇蟳無膏」我講。
「我 m̄ 捌感覺你是冇蟳 mā m̄ 捌見過你冇蟳夯籠」翁喙抹蜜 kā 我豉甲甜甜甜。
有當時仔 hōo YouTube 抑是 Google 臆你佮意 mā 是得著一隻豬(Schwein gehabt) ê 代誌。
自上北到瑞典，糜飯 m̄ 管按怎食甲腥臊，麭佮 I-tá-lih 麵猶原佔含水碳素百分之 90% hōo 從來 m̄ 捌致意筋肉板膋敢捌結實實櫼 ê 我開始自動感受𪜶愈來愈像豆皮 mā 愈來愈像翁 ê 老母，手猶未攑懸懸，蝶仔就四界飛 ê m̄ 是勢，開始請教 YouTube 孤項運動 --- 手部運動，就按呢 YouTube mā 開始臆我凡勢佮意健身(kiān-sin)這類 ê 影片，sóo-tí 推薦我看 Uncle Sean 讓你體態筑漸出色 ê 影片。
我佮 Hena Ma(台灣人台灣事) 仝款真罕得行踏社群媒體(這已經是咸豐三，講到今 ê 𤺪) mā 無刁工逐 Podcast 抑是 YouTuber，準做有訂閱 mā 是鉛粉掖夠額 ê 像 SWR1 逐日攏有通仔迵過 la-jí-ooh 收聽𪜶 ê Podcast m̄ 免 uī-tio̍h 這便便 ê 節目閣掠外掠一个 APP 來收聽，總是世間事就是 hōo 你 buē 節 ---《錦荔枝的滋味》von 洪淑昭。
Uncle Sean ê 影片我無訂閱 mā 無固定踅翻頭揣來看，總是 YouTube 凡勢有替我 kā 伊點油做記號 hōo 伊三不五時出現 tī 臆你佮意名單內底。
昨昏，Uncle Sean 出一支新影片喝水呼吸就會胖！我的身體到底怎麼了？教你打造仙女易瘦體質，本底鼻無鳥鼠敢有洗身軀 ê 我，見著壁角本底臭煬只要熱量掠有齊按怎食甜按怎一日食八頓 mā buē 歕雞胿 ê 翁認真跟綴 YouTube 做運動，隨揤落去聽 Uncle Sean 分拆，那聽目睭仁出現翁規家伙 ê 生張，特別是𪜶老母一支喙食 buē 停 ê 畫面佮情緒失控遮 ê 問題。翁老母情緒𠢕失控 mā m̄ 免我咸豐三，講到今，起因彼是𪜶兜 ê 問題 m̄ 是 gún 兜 ê 問題。
照本底 ê 性地，這看起來殕殕 ê 相片 buē 出現 tī 遮。
照本底 ê 相趁相喊輸人 m̄ 輸陣 ê 驚人笑，逐張相片攏愛翕甲若 NON-NO ê 性地，這看起來料小閣無鹹無纖(siam) ê 攝相 buē 出現 tī 遮。
總是，樹仔 ē 恬靜添歲我 mā 是。
Tī 這个連蠓攏無興來行踏 ê Blog，我按猴神學 ē 曉挑花刺繡兼引述陳麗君老師《銀河鐵道 ê 暗暝》銀河鉄道 の 夜 ê 這段話；
阮 teh 翻譯 tsit 篇作品 ê 時，阮 ê 人生旅程也拄好 tshiāng 著選擇 ê 交叉路口、無主張、孤單 ê 心境，tng 翻譯過程漸漸行到尾站 ê 時，阮也 tshuē 著「kā ka-kī 放下」ê 領悟。
Hus 聖杯
兩冬前我 kan-tann 捌 Hus 這个名，兩冬後 uī-tio̍h 手面趁食 tsiah 斟酌繩資料 Hus ê 聖杯是按怎出現 tī 這个名聲無透京城押尾連越南商店攏離開 ê 田庄。
人生正經 hōo 你 buē 節得，不過你 ē-tàng 順家己 ê 跤步繼續向前行。
窗捲簾一搝 Uller 猶未出帆行尞，Idun mā 猶未來栽欉，露台花矸步頻出現一欉跟綴 Apollo 火鬚 ê Lê-bóng 芳料草恬靜佮 Hesse ê 罩霧烏陰，每一欉樹每一粒石頭攏寂寞 tsham 我挨拶。
雪一蕊一蕊按迵光 ê 寂寞重重疊疊落向驚花落甲滿世界隨縖頷垂 ê 街路，有白、有咖啡、有掠做立春隨探頭 ê 新椏成做記持 ê 粉圓蜜豆雪花冰，手頭 ê 西洋萵仔菜是阿母 tuì 囝婿 ê 惜花連盆，疼囝連婿。
一手西洋萵仔菜，一目記持 ê 粉圓蜜豆雪花冰那剺目那食恬靜 tī 2月初5迒過春夏秋冬天佮地、掰開烏陰恬靜 Somewhere in time。
這幾月日翁彼台 tsham 伊 kiōng-bueh 平歲 ê la-jí-ooh m̄ 知啥物佗一條天線安無好勢步頻按頭篩仔電台踅去「彼是咱頂一沿 tsiah-ē 聽 ê 頻道」，這个臨時臨曜 ê 變化 m̄ 知 tsham 我雄雄接受我窮實 mā 行向舊漚舊臭有相干無，總是聲一耳入，就 m̄ 捌閣按另一耳出 hōo 翁跟綴我成做阿貓貓貓問「這台敢 hōo 火燒過，抑無你呔 ē tuì 伊遮有興趣？」
「無，總是我佮意 Wolfgang ê 聲音佮伊迵入神魂 ê 我知影我理解 ê 真影非假影」我笑應。
Mostar 上出名 ê 景點之一 --- Stari Mostar
這是 gún 第 2 擺來到波士尼亞，tuì 伊 ê 感受猶原佮第一斗相𫝛，這是一个媠甲 hōo 我喝忝 mā m̄ 願 kā 目睭瞌起來 ê 所在 mā 是一个 hōo 我感覺足自在 ê 所在，準做遮 ê 人看起來攏誠無好鬥陣 ê 款。
這个所在猶原 hōo 我輕鬆甲定定 buē 記得日頭公佮月娘，只是，這个輕鬆捷捷 mā hōo 我感覺沉重。
第一回我想無是啥物因端，這回來行踏我想我揣著答案，媠人無媠命。這句刻薄卻是我唯一想 ē 著 ê 答案。
一个國家3个總統，3个攏想 bueh 做這个家唯一 ê 扞鼎灶掠外，厝外閣有一个惡霸一日到晏想 bueh 強押伊做細姨，一想著遮又閣牽去遐 ê 看起來佮惡霸門扇枋鬥甲誠峇，窮實是孤人擉算盤 ê 假仙
我無 tuì 任何人放送我 ê Blog mā 無去任何社群媒體拍廣告。
Sóo-tí 我 tuì 來訪 ê 人攏準做是風這个媒人婆𠢕做親情 hōo 我 這个自囡仔就無人緣 ê 人，人 buē 到，緣先到，入大廳，得人緣 ê 疼痛。
M̄-koh，這站仔我這个恬甲一隻蠓佮虼蚻攏無興頭來行踏 ê 所在開始出現不明字跡，面對這款 buē-su 海底雞 kan-ta 包裝號名無相𫝛 ê 罐頭訊息，我第一个想法是刣掉，總是海底雞 m̄ 捌落第 kan-ta 升級，我呔 ē-tàng 綴𪜶 buē 著陣。另外，bueh 做寡《我在西伯利亞的監獄》談著露西亞按怎抹烏一个人 ê 故事，我 mā 愛𠢕做囮 hōo 人看 buē 出是假影。
添歲猶是有較縒，tshan-tshiūnn Rügen ê LALA 一冬無見關節退化甲 hōo 伊無法度閣 tshan-tshiūnn 頂年按呢，物件食煞隨無見狗。
一字一字斟酌讀，咱感謝海底雞 ê 熱情知影咱 teh 糋膩瓤板膋 sóo-tí 無囥步，總是德國 m̄ 是台北抑是高雄，有法度 kā 長途轉做短途來走，我只好纏綴生份人成做海底雞踅金龜磨寫相𫝛 ê 句，總是我傷過頇顢 hōo 海底雞感受 buē 著我 ê 誠意食水甜，sóo-tí tī 伊一生懸命(isshō kenmei)紹介遐爾仔 tsuē 資料我猶原若罐頭 m̄ 捌調整鹹汫，我遮又閣踅翻頭到半隻蠓仔佮虼蚻攏無 bueh 來挨拶 ê 角勢。
Gún 愛食豆菜德國 mā 有 tsuē-tsuē 豆菜，不過價數無咱臺灣遐爾仔唌人，sóo-tí 一搪著豆菜落價隨捾三盒轉來做料理。
做料理進前翁問「咱 ê 喙斗無相𫝛，遮 ê 豆菜價數佮斤兩 mā tsham 臺灣無相𫝛無法度 hōo 你做䆀隨閣款一盒轉來試鹹汫，你 bueh 按怎處理這个凡勢 ē-hōo 咱成做相拍雞 ê 味素問題？」
我知影伊驚我款「炒豆菜」這類物食，總是伊驚惶 tuì 某拆白伊 ē 得著一尾三斑。
「遮無韭菜我 mā 無滓著恁老母 ê 喙瀾」我刁意故 kā 恁老母 ê 喙瀾搝懸九度。
「我無彼个意思，是...」伊目睭褫(thí)甲若牛目鼻空門關甲密喌喌等我 ê 反應。
我一直掠做我 ē-tàng 利用出張機會順紲踮 Türkiye(土耳其) 行跤花。
m̄-koh，這个願望 uì 我入去公司到辭頭路攏 m̄ 捌實現。
公司 m̄ 願 hōo 我這个扞頭 ê 業務行踏 Türkiye 我理解。
起因五里無仝風，十里無仝俗，有 ê 代誌 mā m̄ 是 入港隨灣，入鄉隨俗就 ē-tàng 解決。
Sóo-tí，m̄ 免長短跤話喋 buē 離，家己推撨時間自助旅行就好。
翁講下昏飯想 bueh 食抔做伙 buē 因為家己 ê 無聊無賴，致到自早到暗攏 tī 想我愛按怎生 tsiah 有法度滾蛟龍刁古董 ê 阿菇佮火雞母佮我閣想 bueh 加一粒卵包，勞力。
聽伊按呢攑日本剾刀，倒剾家己 ê 爸母 hōo 我笑甲成做魚反肚隨講「乎，有感受著火雞母來行踏，我 ê 鼻仔為何 ē ich habe die Nase voll➀，gún 講飽閣醉 ê 無想 bueh tsham 𪜶繼續 hōo 乾啦 ê 心情乎。」
「不過，你正經是見擺攏食甲飽閣醉 m̄ 捌 hōo 人無細膩枵一个成做骨頭齴齴又閣啞口 hōo 蜂叮著無通講 ê 天公仔囝。」
聽我紲手 kā 剾刀攑過來剾，伊規氣 kā 家己剾到底兼毒蜜「我 ê 天公仔囝是自囝仔時著慣勢大石頭會來硩毛蟹，硩久厚蝨 buē 癢，厚債 buē 想 ê 若欶空氣 ê 自然，致到猶未搪著你進前我 ê 食食哲學是世間無情愛看破，有通食穿免傷磨。」
「歹勢，我按呢講正經較失德 m̄-koh 人火雞母講『我 ê 料理是名聲透京城，是你 m̄ 捌貨』。」
太陽能光版是露營車上重要 ê 資產
車日子來到匈牙利 Dömös 露營工作人員講網路歹去，總是怪奇 gún 就是掠有訊號，有訊號無通使用 tuì gún 翁來講 m̄ 是 Heroin 白粉無注一筒 buē 活閣規身軀若狗蟻 teh 爬，是 Heroin 注落去閣愛加一鼻 Cocaine tsiah-ē 活 ê 性地。
搪著無網路 ê 露營區本底是小面神 ê 伊隨成做 Mǹg-sǹg，因為伊成做 Mǹg-sǹg hōo 我 mā 綴 leh 成佛，才怪，我 kiōng-bueh 斷腦筋，因為足卸世卸眾。
我 m̄ 知影網路敢 ē 步頻消失，畢竟匈牙利無 teh 插歐盟大兄哥 ê 態度，sóo-tí tī 翁現世 ê 這久，網路猶原無消失，我就愛跤手較猛寡先 kā 相片孔明燈放踮遮，後日 mā-tsiah 有 Muse 通厚話。
按相片揣著家己 ê 變化是一件真趣味 ê 代誌。
彼款感覺就 tshan-tshiūnn 喙䫌彼粒 m̄ 知是啥物 ê 粒仔。
伊步頻出現，步頻閣消失𤆬 hōo 我 ê 心情變化。
應當是十冬前，四常無 tī 要意皮膚狀況 ê 我，彼日 m̄ 知影搪著啥物問題步頻要意家己 ê 皮膚並開始沓沓仔落妝揣問題。
M̄ 知是我較有耐性一寡抑是目睭願意面對問題，sóo-tí...伊 hōo 我感受伊 ê 存在。
匈牙利國王請桌食飯
目前 ê 家己窮實是無想法 mā 貧惰，不過，我知影這久無 kā 遮 ê 相片好勢轉到德國絕對 buē 閣翻頭佮伊挨拶一句。
就按呢先隨這久 ê 意順這久 ê 心，搪著網路就 kā 相片鋪出來，掠外 ê 佯青聽候 Muse 來相揣 tsiah 好好仔 kā 伊成做咱宋盼的痟想做文青 ê m̄ 捌現世(hiān-sì)。
Dunakanyar/多瑙大曲
「咱敢 ē-tàng 三不五時料理這來做早頓食」翁問。
「Buē-tàng」我應。
「是按怎講？」
「Gún 德國人早頓無按呢食」我替伊翻頭成做德國人回應這个問題。
翁恬靜無出聲，起因伊清楚知影某真𠢕抾恨，sóo-tí 潑出去 ê 水 m̄ 通抾轉來資源回收加工製造，抑無 kan-ta hőng 𠞭甲閣較忝。
冊 ▪ Bücher ▪ Books (4) 來去車日子露營 ▪ Camping (21) 行跤花 ▪ Ausflug ▪ Field Trip (4) 掠肥食瘦錄 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (3) 心情練跤花 ▪ Prosa ▪ Prose (2) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 弄筆尾展文墨 
